| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៨. តាយនសុត្តវណ្ណនា
8. Tāyanasuttavaṇṇanā
៨៩. អដ្ឋមេ បុរាណតិត្ថករោតិ បុព្ពេ តិត្ថករោ។ ឯត្ថ ច តិត្ថំ នាម ទ្វាសដ្ឋិ ទិដ្ឋិយោ, តិត្ថករោ នាម តាសំ ឧប្បាទកោ សត្ថា។ សេយ្យថិទំ នន្ទោ, វច្ឆោ, កិសោ, សំកិច្ចោ។ បុរាណាទយោ បន តិត្ថិយា នាម។ អយំ បន ទិដ្ឋិំ ឧប្បាទេត្វា កថំ សគ្គេ និព្ពត្តោតិ? កម្មវាទិតាយ។ ឯស កិរ ឧបោសថភត្តាទីនិ អទាសិ, អនាថានំ វត្តំ បដ្ឋបេសិ, បតិស្សយេ អកាសិ, បោក្ខរណិយោ ខណាបេសិ, អញ្ញម្បិ ពហុំ កល្យាណំ អកាសិ។ សោ តស្ស និស្សន្ទេន សគ្គេ និព្ពត្តោ, សាសនស្ស បន និយ្យានិកភាវំ ជានាតិ។ សោ តថាគតស្ស សន្តិកំ គន្ត្វា សាសនានុច្ឆវិកា វីរិយប្បដិសំយុត្តា គាថា វក្ខាមីតិ អាគន្ត្វា ឆិន្ទ សោតន្តិអាទិមាហ។
89. Aṭṭhame purāṇatitthakaroti pubbe titthakaro. Ettha ca titthaṃ nāma dvāsaṭṭhi diṭṭhiyo, titthakaro nāma tāsaṃ uppādako satthā. Seyyathidaṃ nando, vaccho, kiso, saṃkicco. Purāṇādayo pana titthiyā nāma. Ayaṃ pana diṭṭhiṃ uppādetvā kathaṃ sagge nibbattoti? Kammavāditāya. Esa kira uposathabhattādīni adāsi, anāthānaṃ vattaṃ paṭṭhapesi, patissaye akāsi, pokkharaṇiyo khaṇāpesi, aññampi bahuṃ kalyāṇaṃ akāsi. So tassa nissandena sagge nibbatto, sāsanassa pana niyyānikabhāvaṃ jānāti. So tathāgatassa santikaṃ gantvā sāsanānucchavikā vīriyappaṭisaṃyuttā gāthā vakkhāmīti āgantvā chinda sotantiādimāha.
តត្ថ ឆិន្ទាតិ អនិយមិតអាណត្តិ។ សោតន្តិ តណ្ហាសោតំ។ បរក្កម្មាតិ បរក្កមិត្វា វីរិយំ កត្វា។ កាមេតិ កិលេសកាមេបិ វត្ថុកាមេបិ។ បនុទាតិ នីហរ។ ឯកត្តន្តិ ឈានំ។ ឥទំ វុត្តំ ហោតិ – កាមេ អជហិត្វា មុនិ ឈានំ ន ឧបបជ្ជតិ, ន បដិលភតីតិ អត្ថោ។ កយិរា ចេ កយិរាថេនន្តិ យទិ វីរិយំ ករេយ្យ, ករេយ្យាថ, តំ វីរិយំ ន ឱសក្កេយ្យ។ ទឡ្ហមេនំ បរក្កមេតិ ទឡ្ហំ ឯនំ ករេយ្យ។ សិថិលោ ហិ បរិព្ពាជោតិ សិថិលគហិតា បព្ពជ្ជា។ ភិយ្យោ អាកិរតេ រជន្តិ អតិរេកំ ឧបរិ កិលេសរជំ អាកិរតិ។ អកតំ ទុក្កដំ សេយ្យោតិ ទុក្កដំ អកតមេវ សេយ្យោ។ យំ កិញ្ចីតិ ន កេវលំ ទុក្កដំ កត្វា កតសាមញ្ញមេវ, អញ្ញម្បិ យំ កិញ្ចិ សិថិលំ កតំ ឯវរូបមេវ ហោតិ។ សំកិលិដ្ឋន្តិ ទុក្ករការិកវតំ។ ឥមស្មិំ ហិ សាសនេ បច្ចយហេតុ សមាទិន្នធុតង្គវតំ សំកិលិដ្ឋមេវ។ សង្កស្សរន្តិ សង្កាយ សរិតំ, ‘‘ឥទម្បិ ឥមិនា កតំ ភវិស្សតិ, ឥទម្បិ ឥមិនា’’តិ ឯវំ អាសង្កិតបរិសង្កិតំ។ អាទិព្រហ្មចរិយិកាតិ មគ្គព្រហ្មចរិយស្ស អាទិភូតា បុព្ពបធានភូតា។ អដ្ឋមំ។
Tattha chindāti aniyamitaāṇatti. Sotanti taṇhāsotaṃ. Parakkammāti parakkamitvā vīriyaṃ katvā. Kāmeti kilesakāmepi vatthukāmepi. Panudāti nīhara. Ekattanti jhānaṃ. Idaṃ vuttaṃ hoti – kāme ajahitvā muni jhānaṃ na upapajjati, na paṭilabhatīti attho. Kayirā ce kayirāthenanti yadi vīriyaṃ kareyya, kareyyātha, taṃ vīriyaṃ na osakkeyya. Daḷhamenaṃ parakkameti daḷhaṃ enaṃ kareyya. Sithilo hi paribbājoti sithilagahitā pabbajjā. Bhiyyo ākirate rajanti atirekaṃ upari kilesarajaṃ ākirati. Akataṃ dukkaṭaṃ seyyoti dukkaṭaṃ akatameva seyyo. Yaṃ kiñcīti na kevalaṃ dukkaṭaṃ katvā katasāmaññameva, aññampi yaṃ kiñci sithilaṃ kataṃ evarūpameva hoti. Saṃkiliṭṭhanti dukkarakārikavataṃ. Imasmiṃ hi sāsane paccayahetu samādinnadhutaṅgavataṃ saṃkiliṭṭhameva. Saṅkassaranti saṅkāya saritaṃ, ‘‘idampi iminā kataṃ bhavissati, idampi iminā’’ti evaṃ āsaṅkitaparisaṅkitaṃ. Ādibrahmacariyikāti maggabrahmacariyassa ādibhūtā pubbapadhānabhūtā. Aṭṭhamaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. តាយនសុត្តំ • 8. Tāyanasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៨. តាយនសុត្តវណ្ណនា • 8. Tāyanasuttavaṇṇanā
