| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೮. ತಾಯನಸುತ್ತವಣ್ಣನಾ
8. Tāyanasuttavaṇṇanā
೮೯. ಅತೀತಜಾತಿಯಂ ಸಯಂಕಾರವಸೇನ ತಾಯ ದಿಟ್ಠಿಯಾ ಉಪ್ಪಾದಿತತ್ತಾ ಪುಬ್ಬೇ ತಿತ್ಥಕರೋ। ತೇನಾಹ ‘‘ದಿಟ್ಠಿ ಉಪ್ಪಾದೇತ್ವಾ’’ತಿ। ಅಪರೇ ಆಹು ‘‘ಅಯಂ ಮೇ ಸತ್ಥಾತಿ ಗಹಣವಸೇನ ತಿತ್ಥಕರೋ ಅಸ್ಸ ಅತ್ಥೀತಿ ಪುಬ್ಬೇ ತಿತ್ಥಕರೋ, ಅತೀತತ್ತಭಾವೇ ತಿತ್ಥಕರಸಾವಕೋ’’ತಿ। ತೇ ‘‘ದಿಟ್ಠಿಂ ಉಪ್ಪಾದೇತ್ವಾತಿ ತಸ್ಸ ಸತ್ಥುನೋ ದಿಟ್ಠಿಂ ಆದಾಯ ಗಹೇತ್ವಾತಿ ಅತ್ಥೋ’’ತಿ ವದನ್ತಿ। ತಿತ್ಥಂ ನಾಮ ದ್ವಾಸಟ್ಠಿ ದಿಟ್ಠಿಯೋ ತಬ್ಬಿನಿಮುತ್ತಸ್ಸ ಮಿಚ್ಛಾವಾದಸ್ಸ ಅಭಾವತೋ। ತಿತ್ಥೇ ನಿಯುತ್ತಾತಿ ತಿತ್ಥಿಕಾ, ತೇ ಏವ ತಿತ್ಥಿಯಾತಿ ವುತ್ತಾ ಕ-ಕಾರಸ್ಸ ಯ-ಕಾರಂ ಕತ್ವಾ। ತಸ್ಸಾತಿ ಯಥಾವುತ್ತಸ್ಸ ಕಲ್ಯಾಣಕಮ್ಮಸ್ಸ। ನಿಸ್ಸನ್ದೇನಾತಿ ಫಲಭಾವೇನ। ವೀರಿಯಪ್ಪಟಿಸಂಯುತ್ತಾತಿ ವೀರಿಯದೀಪನಾತಿ ಅತ್ಥೋ।
89. Atītajātiyaṃ sayaṃkāravasena tāya diṭṭhiyā uppāditattā pubbe titthakaro. Tenāha ‘‘diṭṭhi uppādetvā’’ti. Apare āhu ‘‘ayaṃ me satthāti gahaṇavasena titthakaro assa atthīti pubbe titthakaro, atītattabhāve titthakarasāvako’’ti. Te ‘‘diṭṭhiṃ uppādetvāti tassa satthuno diṭṭhiṃ ādāya gahetvāti attho’’ti vadanti. Titthaṃ nāma dvāsaṭṭhi diṭṭhiyo tabbinimuttassa micchāvādassa abhāvato. Titthe niyuttāti titthikā, te eva titthiyāti vuttā ka-kārassa ya-kāraṃ katvā. Tassāti yathāvuttassa kalyāṇakammassa. Nissandenāti phalabhāvena. Vīriyappaṭisaṃyuttāti vīriyadīpanāti attho.
ಅನಿಯಮಿತಆಣತ್ತೀತಿ ಅನಿಯಮವಿಧಾನಂ ಅನಿಯಮವಸೇನ ವಿಧಿವಚನಂ। ತಣ್ಹಾಸೋತನ್ತಿ ತಣ್ಹಾಪ್ಪಬನ್ಧನಂ। ನೀಹರಾತಿ ಸಮೇಹಿ ಪಜಹ। ಏಕತ್ತನ್ತಿ ಏಕಗ್ಗಂ। ತೇನಾಹ ‘‘ಝಾನ’’ನ್ತಿ। ಉಪಪಜ್ಜತೀತಿ ನ ಉಪ್ಪಜ್ಜತಿ ನ ಪಾಪುಣಾತೀತಿ ಆಹ ‘‘ನ ಪಟಿಲಭತೀ’’ತಿ। ನ ಓಸಕ್ಕೇಯ್ಯಾತಿ ನ ಸಙ್ಕೋಚಂ ಆಪಜ್ಜೇಯ್ಯ। ಘರಾವಾಸತೋ ಪರಿಬ್ಬಜನಂ ಪರಿತೋ ಅಪಗಮೋತಿ ಪರಿಬ್ಬಜೋ। ಪಬ್ಬಜಿತವತಸಮಾದಾನಸ್ಸ ಅದಳ್ಹತಾಯ ಚ ತತ್ಥ ಚ ಅಸಕ್ಕಚ್ಚಕಿರಿಯಾಯ ಸಿಥಿಲಗಹಿತಾ। ಅತಿರೇಕನ್ತಿ ಪಬ್ಬಜ್ಜಾಯ ಪುರಿಮಕಾಲತೋಪಿ ಅಧಿಕಂ। ಉಪರೀತಿ ಉಪರೂಪರಿ। ದುಕ್ಕಟಂ ಅಕತಮೇವ ಸೇಯ್ಯೋತಿ ದುಚ್ಚರಿತಂ ನಾಮ ಸಬ್ಬೇನ ಸಬ್ಬಂ ಅಕತಮೇವ ಹಿತಾವಹಂ।
Aniyamitaāṇattīti aniyamavidhānaṃ aniyamavasena vidhivacanaṃ. Taṇhāsotanti taṇhāppabandhanaṃ. Nīharāti samehi pajaha. Ekattanti ekaggaṃ. Tenāha ‘‘jhāna’’nti. Upapajjatīti na uppajjati na pāpuṇātīti āha ‘‘na paṭilabhatī’’ti. Na osakkeyyāti na saṅkocaṃ āpajjeyya. Gharāvāsato paribbajanaṃ parito apagamoti paribbajo. Pabbajitavatasamādānassa adaḷhatāya ca tattha ca asakkaccakiriyāya sithilagahitā. Atirekanti pabbajjāya purimakālatopi adhikaṃ. Uparīti uparūpari. Dukkaṭaṃ akatameva seyyoti duccaritaṃ nāma sabbena sabbaṃ akatameva hitāvahaṃ.
ಯಂ ಕಿಞ್ಚೀತಿ ಯಂ ಕಿಞ್ಚಿ ಕಮ್ಮಂ। ಸಿಥಿಲಂ ಕತನ್ತಿ ಅಸಕ್ಕಚ್ಚಕಾರಿತಾಯ ಸಿಥಿಲಂ ಕತ್ವಾ ಪವತ್ತಿತಂ। ಏವರೂಪಮೇವಾತಿ ಏವರೂಪಂ ಪರಾಮಟ್ಠಸಾಮಞ್ಞಸದಿಸಮೇವ ಪಚ್ಛಾನುತಾಪಚರಿಯಾದಿಪಟಿಭಾಗತೋ। ಸಂಕಿಲಿಟ್ಠಮೇವ ತಣ್ಹಾಸಂಕಿಲೇಸಉಪಕ್ಕಿಲಿಟ್ಠತ್ತಾ। ಆಸಙ್ಕಿತಪರಿಸಙ್ಕಿತನ್ತಿಆದಿತೋ ಸಮನ್ತತೋಪಿ ಪರೇಹಿ ಸಙ್ಕಿತಂ। ಬ್ರಹ್ಮಚರಿಯಸ್ಸ ಆದಿ ಆದಿಬ್ರಹ್ಮಚರಿಯಂ, ತತ್ಥ ನಿಯುತ್ತಾತಿ ಆದಿಬ್ರಹ್ಮಚರಿಯಿಕಾ, ಮಗ್ಗಬ್ರಹ್ಮಚರಿಯಸ್ಸ ಪುಬ್ಬಭಾಗಪಟಿಪದಾತಿ ಅತ್ಥೋ। ತೇನಾಹ ‘‘ಮಗ್ಗಬ್ರಹ್ಮಚರಿಯಸ್ಸ ಆದಿಭೂತಾ’’ತಿ। ಪುಬ್ಬಪಧಾನಭೂತಾತಿ ಪಠಮಾರಮ್ಭಭೂತಾ।
Yaṃ kiñcīti yaṃ kiñci kammaṃ. Sithilaṃ katanti asakkaccakāritāya sithilaṃ katvā pavattitaṃ. Evarūpamevāti evarūpaṃ parāmaṭṭhasāmaññasadisameva pacchānutāpacariyādipaṭibhāgato. Saṃkiliṭṭhameva taṇhāsaṃkilesaupakkiliṭṭhattā. Āsaṅkitaparisaṅkitantiādito samantatopi parehi saṅkitaṃ. Brahmacariyassa ādi ādibrahmacariyaṃ, tattha niyuttāti ādibrahmacariyikā, maggabrahmacariyassa pubbabhāgapaṭipadāti attho. Tenāha ‘‘maggabrahmacariyassa ādibhūtā’’ti. Pubbapadhānabhūtāti paṭhamārambhabhūtā.
ತಾಯನಸುತ್ತವಣ್ಣನಾ ನಿಟ್ಠಿತಾ।
Tāyanasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ತಾಯನಸುತ್ತಂ • 8. Tāyanasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ತಾಯನಸುತ್ತವಣ್ಣನಾ • 8. Tāyanasuttavaṇṇanā
