| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৬. তযোধম্মসুত্তং
6. Tayodhammasuttaṃ
৭৬. ‘‘তযোমে, ভিক্খৰে, ধম্মা লোকে ন সংৰিজ্জেয্যুং, ন তথাগতো লোকে উপ্পজ্জেয্য অরহং সম্মাসম্বুদ্ধো, ন তথাগতপ্পৰেদিতো ধম্মৰিনযো লোকে দিব্বেয্য। কতমে তযো? জাতি চ, জরা চ, মরণঞ্চ – ইমে খো, ভিক্খৰে, তযো ধম্মা লোকে ন সংৰিজ্জেয্যুং, ন তথাগতো লোকে উপ্পজ্জেয্য অরহং সম্মাসম্বুদ্ধো, ন তথাগতপ্পৰেদিতো ধম্মৰিনযো লোকে দিব্বেয্য। যস্মা চ খো, ভিক্খৰে, ইমে তযো ধম্মা লোকে সংৰিজ্জন্তি তস্মা তথাগতো লোকে উপ্পজ্জতি অরহং সম্মাসম্বুদ্ধো, তস্মা তথাগতপ্পৰেদিতো ধম্মৰিনযো লোকে দিব্বতি।
76. ‘‘Tayome, bhikkhave, dhammā loke na saṃvijjeyyuṃ, na tathāgato loke uppajjeyya arahaṃ sammāsambuddho, na tathāgatappavedito dhammavinayo loke dibbeyya. Katame tayo? Jāti ca, jarā ca, maraṇañca – ime kho, bhikkhave, tayo dhammā loke na saṃvijjeyyuṃ, na tathāgato loke uppajjeyya arahaṃ sammāsambuddho, na tathāgatappavedito dhammavinayo loke dibbeyya. Yasmā ca kho, bhikkhave, ime tayo dhammā loke saṃvijjanti tasmā tathāgato loke uppajjati arahaṃ sammāsambuddho, tasmā tathāgatappavedito dhammavinayo loke dibbati.
‘‘তযোমে , ভিক্খৰে, ধম্মে অপ্পহায অভব্বো জাতিং পহাতুং জরং পহাতুং মরণং পহাতুং। কতমে তযো? রাগং অপ্পহায, দোসং অপ্পহায, মোহং অপ্পহায – ইমে খো, ভিক্খৰে, তযো ধম্মে অপ্পহায অভব্বো জাতিং পহাতুং জরং পহাতুং মরণং পহাতুং।
‘‘Tayome , bhikkhave, dhamme appahāya abhabbo jātiṃ pahātuṃ jaraṃ pahātuṃ maraṇaṃ pahātuṃ. Katame tayo? Rāgaṃ appahāya, dosaṃ appahāya, mohaṃ appahāya – ime kho, bhikkhave, tayo dhamme appahāya abhabbo jātiṃ pahātuṃ jaraṃ pahātuṃ maraṇaṃ pahātuṃ.
‘‘তযোমে ভিক্খৰে, ধম্মে অপ্পহায অভব্বো রাগং পহাতুং দোসং পহাতুং মোহং পহাতুং। কতমে তযো? সক্কাযদিট্ঠিং অপ্পহায, ৰিচিকিচ্ছং অপ্পহায, সীলব্বতপরামাসং অপ্পহায – ইমে খো, ভিক্খৰে, তযো ধম্মে অপ্পহায অভব্বো রাগং পহাতুং দোসং পহাতুং মোহং পহাতুং।
‘‘Tayome bhikkhave, dhamme appahāya abhabbo rāgaṃ pahātuṃ dosaṃ pahātuṃ mohaṃ pahātuṃ. Katame tayo? Sakkāyadiṭṭhiṃ appahāya, vicikicchaṃ appahāya, sīlabbataparāmāsaṃ appahāya – ime kho, bhikkhave, tayo dhamme appahāya abhabbo rāgaṃ pahātuṃ dosaṃ pahātuṃ mohaṃ pahātuṃ.
‘‘তযোমে , ভিক্খৰে, ধম্মে অপ্পহায অভব্বো সক্কাযদিট্ঠিং পহাতুং ৰিচিকিচ্ছং পহাতুং সীলব্বতপরামাসং পহাতুং। কতমে তযো? অযোনিসোমনসিকারং অপ্পহায, কুম্মগ্গসেৰনং অপ্পহায, চেতসো লীনত্তং অপ্পহায – ইমে খো, ভিক্খৰে, তযো ধম্মে অপ্পহায অভব্বো সক্কাযদিট্ঠিং পহাতুং ৰিচিকিচ্ছং পহাতুং সীলব্বতপরামাসং পহাতুং।
‘‘Tayome , bhikkhave, dhamme appahāya abhabbo sakkāyadiṭṭhiṃ pahātuṃ vicikicchaṃ pahātuṃ sīlabbataparāmāsaṃ pahātuṃ. Katame tayo? Ayonisomanasikāraṃ appahāya, kummaggasevanaṃ appahāya, cetaso līnattaṃ appahāya – ime kho, bhikkhave, tayo dhamme appahāya abhabbo sakkāyadiṭṭhiṃ pahātuṃ vicikicchaṃ pahātuṃ sīlabbataparāmāsaṃ pahātuṃ.
‘‘তযোমে, ভিক্খৰে, ধম্মে অপ্পহায অভব্বো অযোনিসো মনসিকারং পহাতুং কুম্মগ্গসেৰনং পহাতুং চেতসো লীনত্তং পহাতুং। কতমে তযো? মুট্ঠসচ্চং অপ্পহায, অসম্পজঞ্ঞং অপ্পহায, চেতসো ৰিক্খেপং অপ্পহায – ইমে খো, ভিক্খৰে, তযো ধম্মে অপ্পহায অভব্বো অযোনিসোমনসিকারং পহাতুং কুম্মগ্গসেৰনং পহাতুং চেতসো লীনত্তং পহাতুং।
‘‘Tayome, bhikkhave, dhamme appahāya abhabbo ayoniso manasikāraṃ pahātuṃ kummaggasevanaṃ pahātuṃ cetaso līnattaṃ pahātuṃ. Katame tayo? Muṭṭhasaccaṃ appahāya, asampajaññaṃ appahāya, cetaso vikkhepaṃ appahāya – ime kho, bhikkhave, tayo dhamme appahāya abhabbo ayonisomanasikāraṃ pahātuṃ kummaggasevanaṃ pahātuṃ cetaso līnattaṃ pahātuṃ.
‘‘তযোমে, ভিক্খৰে, ধম্মে অপ্পহায অভব্বো মুট্ঠসচ্চং পহাতুং অসম্পজঞ্ঞং পহাতুং চেতসো ৰিক্খেপং পহাতুং। কতমে তযো? অরিযানং অদস্সনকম্যতং অপ্পহায, অরিযধম্মস্স 1 অসোতুকম্যতং অপ্পহায, উপারম্ভচিত্ততং অপ্পহায – ইমে খো, ভিক্খৰে, তযো ধম্মে অপ্পহায অভব্বো মুট্ঠসচ্চং পহাতুং অসম্পজঞ্ঞং পহাতুং চেতসো ৰিক্খেপং পহাতুং।
‘‘Tayome, bhikkhave, dhamme appahāya abhabbo muṭṭhasaccaṃ pahātuṃ asampajaññaṃ pahātuṃ cetaso vikkhepaṃ pahātuṃ. Katame tayo? Ariyānaṃ adassanakamyataṃ appahāya, ariyadhammassa 2 asotukamyataṃ appahāya, upārambhacittataṃ appahāya – ime kho, bhikkhave, tayo dhamme appahāya abhabbo muṭṭhasaccaṃ pahātuṃ asampajaññaṃ pahātuṃ cetaso vikkhepaṃ pahātuṃ.
‘‘তযোমে, ভিক্খৰে, ধম্মে অপ্পহায অভব্বো অরিযানং অদস্সনকম্যতং পহাতুং অরিযধম্মস্স অসোতুকম্যতং পহাতুং উপারম্ভচিত্ততং পহাতুং। কতমে তযো? উদ্ধচ্চং অপ্পহায, অসংৰরং অপ্পহায, দুস্সীল্যং অপ্পহায – ইমে খো, ভিক্খৰে, তযো ধম্মে অপ্পহায অভব্বো অরিযানং অদস্সনকম্যতং পহাতুং অরিযধম্মস্স অসোতুকম্যতং পহাতুং উপারম্ভচিত্ততং পহাতুং।
‘‘Tayome, bhikkhave, dhamme appahāya abhabbo ariyānaṃ adassanakamyataṃ pahātuṃ ariyadhammassa asotukamyataṃ pahātuṃ upārambhacittataṃ pahātuṃ. Katame tayo? Uddhaccaṃ appahāya, asaṃvaraṃ appahāya, dussīlyaṃ appahāya – ime kho, bhikkhave, tayo dhamme appahāya abhabbo ariyānaṃ adassanakamyataṃ pahātuṃ ariyadhammassa asotukamyataṃ pahātuṃ upārambhacittataṃ pahātuṃ.
‘‘তযোমে , ভিক্খৰে, ধম্মে অপ্পহায অভব্বো উদ্ধচ্চং পহাতুং অসংৰরং পহাতুং দুস্সীল্যং পহাতুং। কতমে তযো ? অস্সদ্ধিযং অপ্পহায, অৰদঞ্ঞুতং অপ্পহায, কোসজ্জং অপ্পহায – ইমে খো, ভিক্খৰে, তযো ধম্মে অপ্পহায অভব্বো উদ্ধচ্চং পহাতুং অসংৰরং পহাতুং দুস্সীল্যং পহাতুং।
‘‘Tayome , bhikkhave, dhamme appahāya abhabbo uddhaccaṃ pahātuṃ asaṃvaraṃ pahātuṃ dussīlyaṃ pahātuṃ. Katame tayo ? Assaddhiyaṃ appahāya, avadaññutaṃ appahāya, kosajjaṃ appahāya – ime kho, bhikkhave, tayo dhamme appahāya abhabbo uddhaccaṃ pahātuṃ asaṃvaraṃ pahātuṃ dussīlyaṃ pahātuṃ.
‘‘তযোমে , ভিক্খৰে, ধম্মে অপ্পহায অভব্বো অস্সদ্ধিযং পহাতুং অৰদঞ্ঞুতং পহাতুং কোসজ্জং পহাতুং। কতমে তযো? অনাদরিযং অপ্পহায, দোৰচস্সতং অপ্পহায, পাপমিত্ততং অপ্পহায – ইমে খো, ভিক্খৰে, তযো ধম্মে অপ্পহায অভব্বো অস্সদ্ধিযং পহাতুং অৰদঞ্ঞুতং পহাতুং কোসজ্জং পহাতুং।
‘‘Tayome , bhikkhave, dhamme appahāya abhabbo assaddhiyaṃ pahātuṃ avadaññutaṃ pahātuṃ kosajjaṃ pahātuṃ. Katame tayo? Anādariyaṃ appahāya, dovacassataṃ appahāya, pāpamittataṃ appahāya – ime kho, bhikkhave, tayo dhamme appahāya abhabbo assaddhiyaṃ pahātuṃ avadaññutaṃ pahātuṃ kosajjaṃ pahātuṃ.
‘‘তযোমে, ভিক্খৰে, ধম্মে অপ্পহায অভব্বো অনাদরিযং পহাতুং দোৰচস্সতং পহাতুং পাপমিত্ততং পহাতুং। কতমে তযো? অহিরিকং অপ্পহায, অনোত্তপ্পং অপ্পহায, পমাদং অপ্পহায – ইমে খো, ভিক্খৰে, তযো ধম্মে অপ্পহায অভব্বো অনাদরিযং পহাতুং দোৰচস্সতং পহাতুং পাপমিত্ততং পহাতুং।
‘‘Tayome, bhikkhave, dhamme appahāya abhabbo anādariyaṃ pahātuṃ dovacassataṃ pahātuṃ pāpamittataṃ pahātuṃ. Katame tayo? Ahirikaṃ appahāya, anottappaṃ appahāya, pamādaṃ appahāya – ime kho, bhikkhave, tayo dhamme appahāya abhabbo anādariyaṃ pahātuṃ dovacassataṃ pahātuṃ pāpamittataṃ pahātuṃ.
‘‘অহিরিকোযং, ভিক্খৰে, অনোত্তাপী পমত্তো হোতি। সো পমত্তো সমানো অভব্বো অনাদরিযং পহাতুং দোৰচস্সতং পহাতুং পাপমিত্ততং পহাতুং। সো পাপমিত্তো সমানো অভব্বো অস্সদ্ধিযং পহাতুং অৰদঞ্ঞুতং পহাতুং কোসজ্জং পহাতুং। সো কুসীতো সমানো অভব্বো উদ্ধচ্চং পহাতুং অসংৰরং পহাতুং দুস্সীল্যং পহাতুং। সো দুস্সীলো সমানো অভব্বো অরিযানং অদস্সনকম্যতং পহাতুং অরিযধম্মস্স অসোতুকম্যতং পহাতুং উপারম্ভচিত্ততং পহাতুং। সো উপারম্ভচিত্তো সমানো অভব্বো মুট্ঠসচ্চং পহাতুং অসম্পজঞ্ঞং পহাতুং চেতসো ৰিক্খেপং পহাতুং। সো ৰিক্খিত্তচিত্তো সমানো অভব্বো অযোনিসোমনসিকারং পহাতুং কুম্মগ্গসেৰনং পহাতুং চেতসো লীনত্তং পহাতুং। সো লীনচিত্তো সমানো অভব্বো সক্কাযদিট্ঠিং পহাতুং ৰিচিকিচ্ছং পহাতুং সীলব্বতপরামাসং পহাতুং। সো ৰিচিকিচ্ছো সমানো অভব্বো রাগং পহাতুং দোসং পহাতুং মোহং পহাতুং। সো রাগং অপ্পহায দোসং অপ্পহায মোহং অপ্পহায অভব্বো জাতিং পহাতুং জরং পহাতুং মরণং পহাতুং।
‘‘Ahirikoyaṃ, bhikkhave, anottāpī pamatto hoti. So pamatto samāno abhabbo anādariyaṃ pahātuṃ dovacassataṃ pahātuṃ pāpamittataṃ pahātuṃ. So pāpamitto samāno abhabbo assaddhiyaṃ pahātuṃ avadaññutaṃ pahātuṃ kosajjaṃ pahātuṃ. So kusīto samāno abhabbo uddhaccaṃ pahātuṃ asaṃvaraṃ pahātuṃ dussīlyaṃ pahātuṃ. So dussīlo samāno abhabbo ariyānaṃ adassanakamyataṃ pahātuṃ ariyadhammassa asotukamyataṃ pahātuṃ upārambhacittataṃ pahātuṃ. So upārambhacitto samāno abhabbo muṭṭhasaccaṃ pahātuṃ asampajaññaṃ pahātuṃ cetaso vikkhepaṃ pahātuṃ. So vikkhittacitto samāno abhabbo ayonisomanasikāraṃ pahātuṃ kummaggasevanaṃ pahātuṃ cetaso līnattaṃ pahātuṃ. So līnacitto samāno abhabbo sakkāyadiṭṭhiṃ pahātuṃ vicikicchaṃ pahātuṃ sīlabbataparāmāsaṃ pahātuṃ. So vicikiccho samāno abhabbo rāgaṃ pahātuṃ dosaṃ pahātuṃ mohaṃ pahātuṃ. So rāgaṃ appahāya dosaṃ appahāya mohaṃ appahāya abhabbo jātiṃ pahātuṃ jaraṃ pahātuṃ maraṇaṃ pahātuṃ.
‘‘তযোমে, ভিক্খৰে, ধম্মে পহায ভব্বো জাতিং পহাতুং জরং পহাতুং মরণং পহাতুং। কতমে তযো? রাগং পহায, দোসং পহায, মোহং পহায – ইমে খো, ভিক্খৰে, তযো ধম্মে পহায ভব্বো জাতিং পহাতুং জরং পহাতুং মরণং পহাতুং।
‘‘Tayome, bhikkhave, dhamme pahāya bhabbo jātiṃ pahātuṃ jaraṃ pahātuṃ maraṇaṃ pahātuṃ. Katame tayo? Rāgaṃ pahāya, dosaṃ pahāya, mohaṃ pahāya – ime kho, bhikkhave, tayo dhamme pahāya bhabbo jātiṃ pahātuṃ jaraṃ pahātuṃ maraṇaṃ pahātuṃ.
‘‘তযোমে, ভিক্খৰে, ধম্মে পহায ভব্বো রাগং পহাতুং দোসং পহাতুং মোহং পহাতুং। কতমে তযো ? সক্কাযদিট্ঠিং পহায, ৰিচিকিচ্ছং পহায, সীলব্বতপরামাসং পহায – ইমে খো, ভিক্খৰে, তযো ধম্মে পহায ভব্বো রাগং পহাতুং দোসং পহাতুং মোহং পহাতুং।
‘‘Tayome, bhikkhave, dhamme pahāya bhabbo rāgaṃ pahātuṃ dosaṃ pahātuṃ mohaṃ pahātuṃ. Katame tayo ? Sakkāyadiṭṭhiṃ pahāya, vicikicchaṃ pahāya, sīlabbataparāmāsaṃ pahāya – ime kho, bhikkhave, tayo dhamme pahāya bhabbo rāgaṃ pahātuṃ dosaṃ pahātuṃ mohaṃ pahātuṃ.
‘‘তযোমে, ভিক্খৰে, ধম্মে পহায ভব্বো সক্কাযদিট্ঠিং পহাতুং ৰিচিকিচ্ছং পহাতুং সীলব্বতপরামাসং পহাতুং। কতমে তযো? অযোনিসোমনসিকারং পহায, কুম্মগ্গসেৰনং পহায, চেতসো লীনত্তং পহায – ইমে খো, ভিক্খৰে, তযো ধম্মে পহায ভব্বো সক্কাযদিট্ঠিং পহাতুং ৰিচিকিচ্ছং পহাতুং সীলব্বতপরামাসং পহাতুং।
‘‘Tayome, bhikkhave, dhamme pahāya bhabbo sakkāyadiṭṭhiṃ pahātuṃ vicikicchaṃ pahātuṃ sīlabbataparāmāsaṃ pahātuṃ. Katame tayo? Ayonisomanasikāraṃ pahāya, kummaggasevanaṃ pahāya, cetaso līnattaṃ pahāya – ime kho, bhikkhave, tayo dhamme pahāya bhabbo sakkāyadiṭṭhiṃ pahātuṃ vicikicchaṃ pahātuṃ sīlabbataparāmāsaṃ pahātuṃ.
‘‘তযোমে, ভিক্খৰে, ধম্মে পহায ভব্বো অযোনিসোমনসিকারং পহাতুং কুম্মগ্গসেৰনং পহাতুং চেতসো লীনত্তং পহাতুং। কতমে তযো? মুট্ঠসচ্চং পহায, অসম্পজঞ্ঞং পহায, চেতসো ৰিক্খেপং পহায – ইমে খো, ভিক্খৰে, তযো ধম্মে পহায ভব্বো অযোনিসোমনসিকারং পহাতুং কুম্মগ্গসেৰনং পহাতুং চেতসো লীনত্তং পহাতুং।
‘‘Tayome, bhikkhave, dhamme pahāya bhabbo ayonisomanasikāraṃ pahātuṃ kummaggasevanaṃ pahātuṃ cetaso līnattaṃ pahātuṃ. Katame tayo? Muṭṭhasaccaṃ pahāya, asampajaññaṃ pahāya, cetaso vikkhepaṃ pahāya – ime kho, bhikkhave, tayo dhamme pahāya bhabbo ayonisomanasikāraṃ pahātuṃ kummaggasevanaṃ pahātuṃ cetaso līnattaṃ pahātuṃ.
‘‘তযোমে , ভিক্খৰে, ধম্মে পহায ভব্বো মুট্ঠসচ্চং পহাতুং অসম্পজঞ্ঞং পহাতুং চেতসো ৰিক্খেপং পহাতুং। কতমে তযো? অরিযানং অদস্সনকম্যতং পহায, অরিযধম্মস্স অসোতুকম্যতং পহায, উপারম্ভচিত্ততং পহায – ইমে খো, ভিক্খৰে, তযো ধম্মে পহায ভব্বো মুট্ঠস্সচ্চং পহাতুং অসম্পজঞ্ঞং পহাতুং চেতসো ৰিক্খেপং পহাতুং।
‘‘Tayome , bhikkhave, dhamme pahāya bhabbo muṭṭhasaccaṃ pahātuṃ asampajaññaṃ pahātuṃ cetaso vikkhepaṃ pahātuṃ. Katame tayo? Ariyānaṃ adassanakamyataṃ pahāya, ariyadhammassa asotukamyataṃ pahāya, upārambhacittataṃ pahāya – ime kho, bhikkhave, tayo dhamme pahāya bhabbo muṭṭhassaccaṃ pahātuṃ asampajaññaṃ pahātuṃ cetaso vikkhepaṃ pahātuṃ.
‘‘তযোমে, ভিক্খৰে, ধম্মে পহায ভব্বো অরিযানং অদস্সনকম্যতং পহাতুং অরিযধম্মস্স অসোতুকম্যতং পহাতুং উপারম্ভচিত্ততং পহাতুং। কতমে তযো? উদ্ধচ্চং পহায, অসংৰরং পহায, দুস্সীল্যং পহায – ইমে খো, ভিক্খৰে, তযো ধম্মে পহায ভব্বো অরিযানং অদস্সনকম্যতং পহাতুং অরিযধম্মস্স অসোতুকম্যতং পহাতুং উপারম্ভচিত্ততং পহাতুং।
‘‘Tayome, bhikkhave, dhamme pahāya bhabbo ariyānaṃ adassanakamyataṃ pahātuṃ ariyadhammassa asotukamyataṃ pahātuṃ upārambhacittataṃ pahātuṃ. Katame tayo? Uddhaccaṃ pahāya, asaṃvaraṃ pahāya, dussīlyaṃ pahāya – ime kho, bhikkhave, tayo dhamme pahāya bhabbo ariyānaṃ adassanakamyataṃ pahātuṃ ariyadhammassa asotukamyataṃ pahātuṃ upārambhacittataṃ pahātuṃ.
‘‘তযোমে, ভিক্খৰে, ধম্মে পহায ভব্বো উদ্ধচ্চং পহাতুং অসংৰরং পহাতুং দুস্সীল্যং পহাতুং। কতমে তযো? অস্সদ্ধিযং পহায, অৰদঞ্ঞুতং পহায, কোসজ্জং পহায – ইমে খো, ভিক্খৰে, তযো ধম্মে পহায ভব্বো উদ্ধচ্চং পহাতুং অসংৰরং পহাতুং দুস্সীল্যং পহাতুং।
‘‘Tayome, bhikkhave, dhamme pahāya bhabbo uddhaccaṃ pahātuṃ asaṃvaraṃ pahātuṃ dussīlyaṃ pahātuṃ. Katame tayo? Assaddhiyaṃ pahāya, avadaññutaṃ pahāya, kosajjaṃ pahāya – ime kho, bhikkhave, tayo dhamme pahāya bhabbo uddhaccaṃ pahātuṃ asaṃvaraṃ pahātuṃ dussīlyaṃ pahātuṃ.
‘‘তযোমে, ভিক্খৰে, ধম্মে পহায ভব্বো অস্সদ্ধিযং পহাতুং অৰদঞ্ঞুতং পহাতুং কোসজ্জং পহাতুং। কতমে তযো? অনাদরিযং পহায, দোৰচস্সতং পহায, পাপমিত্ততং পহায – ইমে খো, ভিক্খৰে, তযো ধম্মে পহায ভব্বো অস্সদ্ধিযং পহাতুং অৰদঞ্ঞুতং পহাতুং কোসজ্জং পহাতুং।
‘‘Tayome, bhikkhave, dhamme pahāya bhabbo assaddhiyaṃ pahātuṃ avadaññutaṃ pahātuṃ kosajjaṃ pahātuṃ. Katame tayo? Anādariyaṃ pahāya, dovacassataṃ pahāya, pāpamittataṃ pahāya – ime kho, bhikkhave, tayo dhamme pahāya bhabbo assaddhiyaṃ pahātuṃ avadaññutaṃ pahātuṃ kosajjaṃ pahātuṃ.
‘‘তযোমে, ভিক্খৰে, ধম্মে পহায ভব্বো অনাদরিযং পহাতুং দোৰচস্সতং পহাতুং পাপমিত্ততং পহাতুং। কতমে তযো? অহিরিকং পহায, অনোত্তপ্পং পহায, পমাদং পহায – ইমে খো, ভিক্খৰে, তযো ধম্মে পহায ভব্বো অনাদরিযং পহাতুং দোৰচস্সতং পহাতুং পাপমিত্ততং পহাতুং।
‘‘Tayome, bhikkhave, dhamme pahāya bhabbo anādariyaṃ pahātuṃ dovacassataṃ pahātuṃ pāpamittataṃ pahātuṃ. Katame tayo? Ahirikaṃ pahāya, anottappaṃ pahāya, pamādaṃ pahāya – ime kho, bhikkhave, tayo dhamme pahāya bhabbo anādariyaṃ pahātuṃ dovacassataṃ pahātuṃ pāpamittataṃ pahātuṃ.
‘‘হিরীমাযং, ভিক্খৰে, ওত্তাপী অপ্পমত্তো হোতি। সো অপ্পমত্তো সমানো ভব্বো অনাদরিযং পহাতুং দোৰচস্সতং পহাতুং পাপমিত্ততং পহাতুং। সো কল্যাণমিত্তো সমানো ভব্বো অস্সদ্ধিযং পহাতুং অৰদঞ্ঞুতং পহাতুং কোসজ্জং পহাতুং। সো আরদ্ধৰীরিযো সমানো ভব্বো উদ্ধচ্চং পহাতুং অসংৰরং পহাতুং দুস্সীল্যং পহাতুং। সো সীলৰা সমানো ভব্বো অরিযানং অদস্সনকম্যতং পহাতুং অরিযধম্মস্স অসোতুকম্যতং পহাতুং উপারম্ভচিত্ততং পহাতুং। সো অনুপারম্ভচিত্তো সমানো ভব্বো মুট্ঠস্সচ্চং পহাতুং অসম্পজঞ্ঞং পহাতুং চেতসো ৰিক্খেপং পহাতুং। সো অৰিক্খিত্তচিত্তো সমানো ভব্বো অযোনিসোমনসিকারং পহাতুং কুম্মগ্গসেৰনং পহাতুং চেতসো লীনত্তং পহাতুং। সো অলীনচিত্তো সমানো ভব্বো সক্কাযদিট্ঠিং পহাতুং ৰিচিকিচ্ছং পহাতুং সীলব্বতপরামাসং পহাতুং। সো অৰিচিকিচ্ছো সমানো ভব্বো রাগং পহাতুং দোসং পহাতুং মোহং পহাতুং। সো রাগং পহায দোসং পহায মোহং পহায ভব্বো জাতিং পহাতুং জরং পহাতুং মরণং পহাতু’’ন্তি। ছট্ঠং।
‘‘Hirīmāyaṃ, bhikkhave, ottāpī appamatto hoti. So appamatto samāno bhabbo anādariyaṃ pahātuṃ dovacassataṃ pahātuṃ pāpamittataṃ pahātuṃ. So kalyāṇamitto samāno bhabbo assaddhiyaṃ pahātuṃ avadaññutaṃ pahātuṃ kosajjaṃ pahātuṃ. So āraddhavīriyo samāno bhabbo uddhaccaṃ pahātuṃ asaṃvaraṃ pahātuṃ dussīlyaṃ pahātuṃ. So sīlavā samāno bhabbo ariyānaṃ adassanakamyataṃ pahātuṃ ariyadhammassa asotukamyataṃ pahātuṃ upārambhacittataṃ pahātuṃ. So anupārambhacitto samāno bhabbo muṭṭhassaccaṃ pahātuṃ asampajaññaṃ pahātuṃ cetaso vikkhepaṃ pahātuṃ. So avikkhittacitto samāno bhabbo ayonisomanasikāraṃ pahātuṃ kummaggasevanaṃ pahātuṃ cetaso līnattaṃ pahātuṃ. So alīnacitto samāno bhabbo sakkāyadiṭṭhiṃ pahātuṃ vicikicchaṃ pahātuṃ sīlabbataparāmāsaṃ pahātuṃ. So avicikiccho samāno bhabbo rāgaṃ pahātuṃ dosaṃ pahātuṃ mohaṃ pahātuṃ. So rāgaṃ pahāya dosaṃ pahāya mohaṃ pahāya bhabbo jātiṃ pahātuṃ jaraṃ pahātuṃ maraṇaṃ pahātu’’nti. Chaṭṭhaṃ.
Footnotes:
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫-১০. মিগসালাসুত্তাদিৰণ্ণনা • 5-10. Migasālāsuttādivaṇṇanā
