| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
தேசத்தாலீஸவத்தங்
Tecattālīsavattaṃ
60. ‘‘ஆபத்தியா அப்படிகம்மே உக்கே²பனீயகம்மகதேன, பி⁴க்க²வே, பி⁴க்கு²னா ஸம்மா வத்திதப்³ப³ங். தத்ராயங் ஸம்மாவத்தனா – ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³. யாய ஆபத்தியா ஸங்கே⁴ன, ஆபத்தியா அப்படிகம்மே, உக்கே²பனீயகம்மங் கதங் ஹோதி ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா; கம்மங் ந க³ரஹிதப்³ப³ங், கம்மிகா ந க³ரஹிதப்³பா³. ந பகதத்தஸ்ஸ பி⁴க்கு²னோ அபி⁴வாத³னங், பச்சுட்டா²னங், அஞ்ஜலிகம்மங், ஸாமீசிகம்மங், ஆஸனாபி⁴ஹாரோ, ஸெய்யாபி⁴ஹாரோ, பாதோ³த³கங் பாத³பீட²ங், பாத³கத²லிகங், பத்தசீவரப்படிக்³க³ஹணங், நஹானே பிட்டி²பரிகம்மங் ஸாதி³தப்³ப³ங். ந பகதத்தோ பி⁴க்கு² ஸீலவிபத்தியா அனுத்³த⁴ங்ஸேதப்³போ³ , ந ஆசாரவிபத்தியா அனுத்³த⁴ங்ஸேதப்³போ³, ந தி³ட்டி²விபத்தியா அனுத்³த⁴ங்ஸேதப்³போ³, ந ஆஜீவவிபத்தியா அனுத்³த⁴ங்ஸேதப்³போ³, ந பி⁴க்கு² பி⁴க்கூ²ஹி பே⁴தே³தப்³போ³. ந கி³ஹித்³த⁴ஜோ தா⁴ரேதப்³போ³, ந தித்தி²யத்³த⁴ஜோ தா⁴ரேதப்³போ³, ந தித்தி²யா ஸேவிதப்³பா³; பி⁴க்கூ² ஸேவிதப்³பா³, பி⁴க்கு²ஸிக்கா²ய ஸிக்கி²தப்³ப³ங். ந பகதத்தேன பி⁴க்கு²னா ஸத்³தி⁴ங் ஏகச்ச²ன்னே ஆவாஸே வத்த²ப்³ப³ங், ந ஏகச்ச²ன்னே அனாவாஸே வத்த²ப்³ப³ங், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ங், பகதத்தங் பி⁴க்கு²ங் தி³ஸ்வா ஆஸனா வுட்டா²தப்³ப³ங், ந பகதத்தோ பி⁴க்கு² ஆஸாதே³தப்³போ³ அந்தோ வா ப³ஹி வா. ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயங் காதப்³ப³ங், ந அனுவாதோ³ பட்ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³’’ந்தி.
60. ‘‘Āpattiyā appaṭikamme ukkhepanīyakammakatena, bhikkhave, bhikkhunā sammā vattitabbaṃ. Tatrāyaṃ sammāvattanā – na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena, āpattiyā appaṭikamme, ukkhepanīyakammaṃ kataṃ hoti sā āpatti na āpajjitabbā, aññā vā tādisikā, tato vā pāpiṭṭhatarā; kammaṃ na garahitabbaṃ, kammikā na garahitabbā. Na pakatattassa bhikkhuno abhivādanaṃ, paccuṭṭhānaṃ, añjalikammaṃ, sāmīcikammaṃ, āsanābhihāro, seyyābhihāro, pādodakaṃ pādapīṭhaṃ, pādakathalikaṃ, pattacīvarappaṭiggahaṇaṃ, nahāne piṭṭhiparikammaṃ sāditabbaṃ. Na pakatatto bhikkhu sīlavipattiyā anuddhaṃsetabbo , na ācāravipattiyā anuddhaṃsetabbo, na diṭṭhivipattiyā anuddhaṃsetabbo, na ājīvavipattiyā anuddhaṃsetabbo, na bhikkhu bhikkhūhi bhedetabbo. Na gihiddhajo dhāretabbo, na titthiyaddhajo dhāretabbo, na titthiyā sevitabbā; bhikkhū sevitabbā, bhikkhusikkhāya sikkhitabbaṃ. Na pakatattena bhikkhunā saddhiṃ ekacchanne āvāse vatthabbaṃ, na ekacchanne anāvāse vatthabbaṃ, na ekacchanne āvāse vā anāvāse vā vatthabbaṃ, pakatattaṃ bhikkhuṃ disvā āsanā vuṭṭhātabbaṃ, na pakatatto bhikkhu āsādetabbo anto vā bahi vā. Na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kāretabbo, na codetabbo, na sāretabbo, na bhikkhūhi sampayojetabba’’nti.
ஆபத்தியா அப்படிகம்மே உக்கே²பனீயகம்மே
Āpattiyā appaṭikamme ukkhepanīyakamme
தேசத்தாலீஸவத்தங் நிட்டி²தங்.
Tecattālīsavattaṃ niṭṭhitaṃ.
61. அத² கோ² ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மங் அகாஸி – அஸம்போ⁴க³ங் ஸங்கே⁴ன. ஸோ ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ தம்ஹா ஆவாஸா அஞ்ஞங் ஆவாஸங் அக³மாஸி. தத்த² பி⁴க்கூ² நேவ அபி⁴வாதே³ஸுங், ந பச்சுட்டே²ஸுங், ந அஞ்ஜலிகம்மங் ந ஸாமீசிகம்மங் அகங்ஸு, ந ஸக்கரிங்ஸு, ந க³ருங் கரிங்ஸு, ந மானேஸுங், ந பூஜேஸுங். ஸோ பி⁴க்கூ²ஹி அஸக்கரியமானோ அக³ருகரியமானோ அமானியமானோ அபூஜியமானோ அஸக்காரபகதோ தம்ஹாபி ஆவாஸா அஞ்ஞங் ஆவாஸங் அக³மாஸி. தத்த²பி பி⁴க்கூ² நேவ அபி⁴வாதே³ஸுங், ந பச்சுட்டே²ஸுங், ந அஞ்ஜலிகம்மங் ந ஸாமீசிகம்மங் அகங்ஸு, ந ஸக்கரிங்ஸு, ந க³ருங் கரிங்ஸு, ந மானேஸுங், ந பூஜேஸுங். ஸோ பி⁴க்கூ²ஹி அஸக்கரியமானோ அக³ருகரியமானோ அமானியமானோ அபூஜியமானோ அஸக்காரபகதோ தம்ஹாபி ஆவாஸா அஞ்ஞங் ஆவாஸங் அக³மாஸி. தத்த²பி பி⁴க்கூ² நேவ அபி⁴வாதே³ஸுங், ந பச்சுட்டே²ஸுங், ந அஞ்ஜலிகம்மங் ந ஸாமீசிகம்மங் அகங்ஸு, ந ஸக்கரிங்ஸு, ந க³ருங் கரிங்ஸு, ந மானேஸுங், ந பூஜேஸுங். ஸோ பி⁴க்கூ²ஹி அஸக்கரியமானோ அக³ருகரியமானோ அமானியமானோ அபூஜியமானோ அஸக்காரபகதோ புனதே³வ கோஸம்பி³ங் பச்சாக³ஞ்சி². ஸோ ஸம்மா வத்ததி, லோமங் பாதேதி, நெத்தா²ரங் வத்ததி, பி⁴க்கூ² உபஸங்கமித்வா ஏவங் வதே³தி – ‘‘அஹங், ஆவுஸோ, ஸங்கே⁴ன, ஆபத்தியா அப்படிகம்மே, உக்கே²பனீயகம்மகதோ ஸம்மா வத்தாமி, லோமங் பாதேமி, நெத்தா²ரங் வத்தாமி. கத²ங் நு கோ² மயா படிபஜ்ஜிதப்³ப³’’ந்தி? பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰…. ‘‘தேன ஹி, பி⁴க்க²வே, ஸங்கோ⁴ ச²ன்னஸ்ஸ பி⁴க்கு²னோ, ஆபத்தியா அப்படிகம்மே, உக்கே²பனீயகம்மங் படிப்பஸ்ஸம்பே⁴து.
61. Atha kho saṅgho channassa bhikkhuno, āpattiyā appaṭikamme, ukkhepanīyakammaṃ akāsi – asambhogaṃ saṅghena. So saṅghena, āpattiyā appaṭikamme, ukkhepanīyakammakato tamhā āvāsā aññaṃ āvāsaṃ agamāsi. Tattha bhikkhū neva abhivādesuṃ, na paccuṭṭhesuṃ, na añjalikammaṃ na sāmīcikammaṃ akaṃsu, na sakkariṃsu, na garuṃ kariṃsu, na mānesuṃ, na pūjesuṃ. So bhikkhūhi asakkariyamāno agarukariyamāno amāniyamāno apūjiyamāno asakkārapakato tamhāpi āvāsā aññaṃ āvāsaṃ agamāsi. Tatthapi bhikkhū neva abhivādesuṃ, na paccuṭṭhesuṃ, na añjalikammaṃ na sāmīcikammaṃ akaṃsu, na sakkariṃsu, na garuṃ kariṃsu, na mānesuṃ, na pūjesuṃ. So bhikkhūhi asakkariyamāno agarukariyamāno amāniyamāno apūjiyamāno asakkārapakato tamhāpi āvāsā aññaṃ āvāsaṃ agamāsi. Tatthapi bhikkhū neva abhivādesuṃ, na paccuṭṭhesuṃ, na añjalikammaṃ na sāmīcikammaṃ akaṃsu, na sakkariṃsu, na garuṃ kariṃsu, na mānesuṃ, na pūjesuṃ. So bhikkhūhi asakkariyamāno agarukariyamāno amāniyamāno apūjiyamāno asakkārapakato punadeva kosambiṃ paccāgañchi. So sammā vattati, lomaṃ pāteti, netthāraṃ vattati, bhikkhū upasaṅkamitvā evaṃ vadeti – ‘‘ahaṃ, āvuso, saṅghena, āpattiyā appaṭikamme, ukkhepanīyakammakato sammā vattāmi, lomaṃ pātemi, netthāraṃ vattāmi. Kathaṃ nu kho mayā paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho channassa bhikkhuno, āpattiyā appaṭikamme, ukkhepanīyakammaṃ paṭippassambhetu.
