| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
තෙචත්‌තාලීසවත්‌තං
Tecattālīsavattaṃ
70. ‘‘පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයකම්‌මකතෙන, භික්‌ඛවෙ, භික්‌ඛුනා සම්‌මා වත්‌තිතබ්‌බං. තත්‍රායං සම්‌මාවත්‌තනා – න උපසම්‌පාදෙතබ්‌බං, න නිස්‌සයො දාතබ්‌බො, න සාමණෙරො උපට්‌ඨාපෙතබ්‌බො, න භික්‌ඛුනොවාදකසම්‌මුති සාදිතබ්‌බා, සම්‌මතෙනපි භික්‌ඛුනියො න ඔවදිතබ්‌බා. යාය ආපත්‌තියා සඞ්‌ඝෙන, පාපිකාය දිට්‌ඨියා අප්‌පටිනිස්‌සග්‌ගෙ, උක්‌ඛෙපනීයකම්‌මං කතං හොති සා ආපත්‌ති න ආපජ්‌ජිතබ්‌බා, අඤ්‌ඤා වා තාදිසිකා, තතො වා පාපිට්‌ඨතරා; කම්‌මං න ගරහිතබ්‌බං, කම්‌මිකා න ගරහිතබ්‌බා…පෙ.… න පකතත්‌තස්‌ස භික්‌ඛුනො උපොසථො ඨපෙතබ්‌බො, න පවාරණා ඨපෙතබ්‌බා, න සවචනීයං කාතබ්‌බං, න අනුවාදො පට්‌ඨපෙතබ්‌බො, න ඔකාසො කාරෙතබ්‌බො, න චොදෙතබ්‌බො, න සාරෙතබ්‌බො, න භික්‌ඛූහි සම්‌පයොජෙතබ්‌බ’’න්‌ති.
70. ‘‘Pāpikāya diṭṭhiyā appaṭinissagge ukkhepanīyakammakatena, bhikkhave, bhikkhunā sammā vattitabbaṃ. Tatrāyaṃ sammāvattanā – na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena, pāpikāya diṭṭhiyā appaṭinissagge, ukkhepanīyakammaṃ kataṃ hoti sā āpatti na āpajjitabbā, aññā vā tādisikā, tato vā pāpiṭṭhatarā; kammaṃ na garahitabbaṃ, kammikā na garahitabbā…pe… na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kāretabbo, na codetabbo, na sāretabbo, na bhikkhūhi sampayojetabba’’nti.
පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛෙපනීයකම්‌මෙ
Pāpikāya diṭṭhiyā appaṭinissagge ukkhepanīyakamme
තෙචත්‌තාලීසවත්‌තං නිට්‌ඨිතං.
Tecattālīsavattaṃ niṭṭhitaṃ.
71. අථ ඛො සඞ්‌ඝො අරිට්‌ඨස්‌ස භික්‌ඛුනො ගද්‌ධබාධිපුබ්‌බස්‌ස, පාපිකාය දිට්‌ඨියා අප්‌පටිනිස්‌සග්‌ගෙ, උක්‌ඛෙපනීයකම්‌මං අකාසි – අසම්‌භොගං සඞ්‌ඝෙන. සො සඞ්‌ඝෙන, පාපිකාය දිට්‌ඨියා අප්‌පටිනිස්‌සග්‌ගෙ, උක්‌ඛෙපනීයකම්‌මකතො විබ්‌භමි. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අරිට්‌ඨො භික්‌ඛු ගද්‌ධබාධිපුබ්‌බො සඞ්‌ඝෙන , පාපිකාය දිට්‌ඨියා අප්‌පටිනිස්‌සග්‌ගෙ, උක්‌ඛෙපනීයකම්‌මකතො විබ්‌භමිස්‌සතී’’ති? අථ ඛො තෙ භික්‌ඛූ භගවතො එතමත්‌ථං ආරොචෙසුං.
71. Atha kho saṅgho ariṭṭhassa bhikkhuno gaddhabādhipubbassa, pāpikāya diṭṭhiyā appaṭinissagge, ukkhepanīyakammaṃ akāsi – asambhogaṃ saṅghena. So saṅghena, pāpikāya diṭṭhiyā appaṭinissagge, ukkhepanīyakammakato vibbhami. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma ariṭṭho bhikkhu gaddhabādhipubbo saṅghena , pāpikāya diṭṭhiyā appaṭinissagge, ukkhepanīyakammakato vibbhamissatī’’ti? Atha kho te bhikkhū bhagavato etamatthaṃ ārocesuṃ.
අථ ඛො භගවා එතස්‌මිං නිදානෙ එතස්‌මිං පකරණෙ භික්‌ඛුසඞ්‌ඝං සන්‌නිපාතාපෙත්‌වා භික්‌ඛූ පටිපුච්‌ඡි – ‘‘සච්‌චං කිර, භික්‌ඛවෙ, අරිට්‌ඨො භික්‌ඛු ගද්‌ධබාධිපුබ්‌බො සඞ්‌ඝෙන, පාපිකාය දිට්‌ඨියා අප්‌පටිනිස්‌සග්‌ගෙ, උක්‌ඛෙපනීයකම්‌මකතො විබ්‌භමතී’’ති 1? ‘‘සච්‌චං භගවා’’ති. විගරහි බුද්‌ධො භගවා – ‘‘අනනුච්‌ඡවිකං…පෙ.… කථඤ්‌හි නාම සො, භික්‌ඛවෙ, මොඝපුරිසො සඞ්‌ඝෙන, පාපිකාය දිට්‌ඨියා අප්‌පටිනිස්‌සග්‌ගෙ, උක්‌ඛෙපනීයකම්‌මකතො විබ්‌භමිස්‌සති? නෙතං, භික්‌ඛවෙ, අප්‌පසන්‌නානං වා පසාදාය…පෙ.… විගරහිත්‌වා…පෙ.… ධම්‌මිං කථං කත්‌වා භික්‌ඛූ ආමන්‌තෙසි – ‘‘තෙන හි, භික්‌ඛවෙ, සඞ්‌ඝො, පාපිකාය දිට්‌ඨියා අප්‌පටිනිස්‌සග්‌ගෙ, උක්‌ඛෙපනීයකම්‌මං පටිප්‌පස්‌සම්‌භෙතු.
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, ariṭṭho bhikkhu gaddhabādhipubbo saṅghena, pāpikāya diṭṭhiyā appaṭinissagge, ukkhepanīyakammakato vibbhamatī’’ti 2? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ…pe… kathañhi nāma so, bhikkhave, moghapuriso saṅghena, pāpikāya diṭṭhiyā appaṭinissagge, ukkhepanīyakammakato vibbhamissati? Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho, pāpikāya diṭṭhiyā appaṭinissagge, ukkhepanīyakammaṃ paṭippassambhetu.
Footnotes:
