| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
ཏེཙཏྟཱལཱིསཝཏྟཾ
Tecattālīsavattaṃ
༦༠. ‘‘ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡཀམྨཀཏེན, བྷིཀྑཝེ, བྷིཀྑུནཱ སམྨཱ ཝཏྟིཏབྦཾ། ཏཏྲཱཡཾ སམྨཱཝཏྟནཱ – ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ, ན བྷིཀྑུནོཝཱདཀསམྨུཏི སཱདིཏབྦཱ, སམྨཏེནཔི བྷིཀྑུནིཡོ ན ཨོཝདིཏབྦཱ། ཡཱཡ ཨཱཔཏྟིཡཱ སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ཀཏཾ ཧོཏི སཱ ཨཱཔཏྟི ན ཨཱཔཛྫིཏབྦཱ, ཨཉྙཱ ཝཱ ཏཱདིསིཀཱ, ཏཏོ ཝཱ པཱཔིཊྛཏརཱ; ཀམྨཾ ན གརཧིཏབྦཾ, ཀམྨིཀཱ ན གརཧིཏབྦཱ། ན པཀཏཏྟསྶ བྷིཀྑུནོ ཨབྷིཝཱདནཾ, པཙྩུཊྛཱནཾ, ཨཉྫལིཀམྨཾ, སཱམཱིཙིཀམྨཾ, ཨཱསནཱབྷིཧཱརོ, སེཡྻཱབྷིཧཱརོ, པཱདོདཀཾ པཱདཔཱིཋཾ, པཱདཀཐལིཀཾ, པཏྟཙཱིཝརཔྤཊིགྒཧཎཾ, ནཧཱནེ པིཊྛིཔརིཀམྨཾ སཱདིཏབྦཾ། ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ , ན ཨཱཙཱརཝིཔཏྟིཡཱ ཨནུདྡྷཾསེཏབྦོ, ན དིཊྛིཝིཔཏྟིཡཱ ཨནུདྡྷཾསེཏབྦོ, ན ཨཱཛཱིཝཝིཔཏྟིཡཱ ཨནུདྡྷཾསེཏབྦོ, ན བྷིཀྑུ བྷིཀྑཱུཧི བྷེདེཏབྦོ། ན གིཧིདྡྷཛོ དྷཱརེཏབྦོ, ན ཏིཏྠིཡདྡྷཛོ དྷཱརེཏབྦོ, ན ཏིཏྠིཡཱ སེཝིཏབྦཱ; བྷིཀྑཱུ སེཝིཏབྦཱ, བྷིཀྑུསིཀྑཱཡ སིཀྑིཏབྦཾ། ན པཀཏཏྟེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྠབྦཾ, ན ཨེཀཙྪནྣེ ཨནཱཝཱསེ ཝཏྠབྦཾ, ན ཨེཀཙྪནྣེ ཨཱཝཱསེ ཝཱ ཨནཱཝཱསེ ཝཱ ཝཏྠབྦཾ, པཀཏཏྟཾ བྷིཀྑུཾ དིསྭཱ ཨཱསནཱ ཝུཊྛཱཏབྦཾ, ན པཀཏཏྟོ བྷིཀྑུ ཨཱསཱདེཏབྦོ ཨནྟོ ཝཱ བཧི ཝཱ། ན པཀཏཏྟསྶ བྷིཀྑུནོ ཨུཔོསཐོ ཋཔེཏབྦོ, ན པཝཱརཎཱ ཋཔེཏབྦཱ, ན སཝཙནཱིཡཾ ཀཱཏབྦཾ, ན ཨནུཝཱདོ པཊྛཔེཏབྦོ, ན ཨོཀཱསོ ཀཱརེཏབྦོ, ན ཙོདེཏབྦོ, ན སཱརེཏབྦོ, ན བྷིཀྑཱུཧི སམྤཡོཛེཏབྦ’’ནྟི།
60. ‘‘Āpattiyā appaṭikamme ukkhepanīyakammakatena, bhikkhave, bhikkhunā sammā vattitabbaṃ. Tatrāyaṃ sammāvattanā – na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena, āpattiyā appaṭikamme, ukkhepanīyakammaṃ kataṃ hoti sā āpatti na āpajjitabbā, aññā vā tādisikā, tato vā pāpiṭṭhatarā; kammaṃ na garahitabbaṃ, kammikā na garahitabbā. Na pakatattassa bhikkhuno abhivādanaṃ, paccuṭṭhānaṃ, añjalikammaṃ, sāmīcikammaṃ, āsanābhihāro, seyyābhihāro, pādodakaṃ pādapīṭhaṃ, pādakathalikaṃ, pattacīvarappaṭiggahaṇaṃ, nahāne piṭṭhiparikammaṃ sāditabbaṃ. Na pakatatto bhikkhu sīlavipattiyā anuddhaṃsetabbo , na ācāravipattiyā anuddhaṃsetabbo, na diṭṭhivipattiyā anuddhaṃsetabbo, na ājīvavipattiyā anuddhaṃsetabbo, na bhikkhu bhikkhūhi bhedetabbo. Na gihiddhajo dhāretabbo, na titthiyaddhajo dhāretabbo, na titthiyā sevitabbā; bhikkhū sevitabbā, bhikkhusikkhāya sikkhitabbaṃ. Na pakatattena bhikkhunā saddhiṃ ekacchanne āvāse vatthabbaṃ, na ekacchanne anāvāse vatthabbaṃ, na ekacchanne āvāse vā anāvāse vā vatthabbaṃ, pakatattaṃ bhikkhuṃ disvā āsanā vuṭṭhātabbaṃ, na pakatatto bhikkhu āsādetabbo anto vā bahi vā. Na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kāretabbo, na codetabbo, na sāretabbo, na bhikkhūhi sampayojetabba’’nti.
ཨཱཔཏྟིཡཱ ཨཔྤཊིཀམྨེ ཨུཀྑེཔནཱིཡཀམྨེ
Āpattiyā appaṭikamme ukkhepanīyakamme
ཏེཙཏྟཱལཱིསཝཏྟཾ ནིཊྛིཏཾ།
Tecattālīsavattaṃ niṭṭhitaṃ.
༦༡. ཨཐ ཁོ སངྒྷོ ཚནྣསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ ཨཀཱསི – ཨསམྦྷོགཾ སངྒྷེན། སོ སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཀཏོ ཏམྷཱ ཨཱཝཱསཱ ཨཉྙཾ ཨཱཝཱསཾ ཨགམཱསི། ཏཏྠ བྷིཀྑཱུ ནེཝ ཨབྷིཝཱདེསུཾ, ན པཙྩུཊྛེསུཾ, ན ཨཉྫལིཀམྨཾ ན སཱམཱིཙིཀམྨཾ ཨཀཾསུ, ན སཀྐརིཾསུ, ན གརུཾ ཀརིཾསུ, ན མཱནེསུཾ, ན པཱུཛེསུཾ། སོ བྷིཀྑཱུཧི ཨསཀྐརིཡམཱནོ ཨགརུཀརིཡམཱནོ ཨམཱནིཡམཱནོ ཨཔཱུཛིཡམཱནོ ཨསཀྐཱརཔཀཏོ ཏམྷཱཔི ཨཱཝཱསཱ ཨཉྙཾ ཨཱཝཱསཾ ཨགམཱསི། ཏཏྠཔི བྷིཀྑཱུ ནེཝ ཨབྷིཝཱདེསུཾ, ན པཙྩུཊྛེསུཾ, ན ཨཉྫལིཀམྨཾ ན སཱམཱིཙིཀམྨཾ ཨཀཾསུ, ན སཀྐརིཾསུ, ན གརུཾ ཀརིཾསུ, ན མཱནེསུཾ, ན པཱུཛེསུཾ། སོ བྷིཀྑཱུཧི ཨསཀྐརིཡམཱནོ ཨགརུཀརིཡམཱནོ ཨམཱནིཡམཱནོ ཨཔཱུཛིཡམཱནོ ཨསཀྐཱརཔཀཏོ ཏམྷཱཔི ཨཱཝཱསཱ ཨཉྙཾ ཨཱཝཱསཾ ཨགམཱསི། ཏཏྠཔི བྷིཀྑཱུ ནེཝ ཨབྷིཝཱདེསུཾ, ན པཙྩུཊྛེསུཾ, ན ཨཉྫལིཀམྨཾ ན སཱམཱིཙིཀམྨཾ ཨཀཾསུ, ན སཀྐརིཾསུ, ན གརུཾ ཀརིཾསུ, ན མཱནེསུཾ, ན པཱུཛེསུཾ། སོ བྷིཀྑཱུཧི ཨསཀྐརིཡམཱནོ ཨགརུཀརིཡམཱནོ ཨམཱནིཡམཱནོ ཨཔཱུཛིཡམཱནོ ཨསཀྐཱརཔཀཏོ པུནདེཝ ཀོསམྦིཾ པཙྩཱགཉྪི། སོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, བྷིཀྑཱུ ཨུཔསངྐམིཏྭཱ ཨེཝཾ ཝདེཏི – ‘‘ཨཧཾ, ཨཱཝུསོ, སངྒྷེན, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཀཏོ སམྨཱ ཝཏྟཱམི, ལོམཾ པཱཏེམི, ནེཏྠཱརཾ ཝཏྟཱམི། ཀཐཾ ནུ ཁོ མཡཱ པཊིཔཛྫིཏབྦ’’ནྟི? བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰…། ‘‘ཏེན ཧི, བྷིཀྑཝེ, སངྒྷོ ཚནྣསྶ བྷིཀྑུནོ, ཨཱཔཏྟིཡཱ ཨཔྤཊིཀམྨེ, ཨུཀྑེཔནཱིཡཀམྨཾ པཊིཔྤསྶམྦྷེཏུ།
61. Atha kho saṅgho channassa bhikkhuno, āpattiyā appaṭikamme, ukkhepanīyakammaṃ akāsi – asambhogaṃ saṅghena. So saṅghena, āpattiyā appaṭikamme, ukkhepanīyakammakato tamhā āvāsā aññaṃ āvāsaṃ agamāsi. Tattha bhikkhū neva abhivādesuṃ, na paccuṭṭhesuṃ, na añjalikammaṃ na sāmīcikammaṃ akaṃsu, na sakkariṃsu, na garuṃ kariṃsu, na mānesuṃ, na pūjesuṃ. So bhikkhūhi asakkariyamāno agarukariyamāno amāniyamāno apūjiyamāno asakkārapakato tamhāpi āvāsā aññaṃ āvāsaṃ agamāsi. Tatthapi bhikkhū neva abhivādesuṃ, na paccuṭṭhesuṃ, na añjalikammaṃ na sāmīcikammaṃ akaṃsu, na sakkariṃsu, na garuṃ kariṃsu, na mānesuṃ, na pūjesuṃ. So bhikkhūhi asakkariyamāno agarukariyamāno amāniyamāno apūjiyamāno asakkārapakato tamhāpi āvāsā aññaṃ āvāsaṃ agamāsi. Tatthapi bhikkhū neva abhivādesuṃ, na paccuṭṭhesuṃ, na añjalikammaṃ na sāmīcikammaṃ akaṃsu, na sakkariṃsu, na garuṃ kariṃsu, na mānesuṃ, na pūjesuṃ. So bhikkhūhi asakkariyamāno agarukariyamāno amāniyamāno apūjiyamāno asakkārapakato punadeva kosambiṃ paccāgañchi. So sammā vattati, lomaṃ pāteti, netthāraṃ vattati, bhikkhū upasaṅkamitvā evaṃ vadeti – ‘‘ahaṃ, āvuso, saṅghena, āpattiyā appaṭikamme, ukkhepanīyakammakato sammā vattāmi, lomaṃ pātemi, netthāraṃ vattāmi. Kathaṃ nu kho mayā paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho channassa bhikkhuno, āpattiyā appaṭikamme, ukkhepanīyakammaṃ paṭippassambhetu.
