| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. တေဇင္ဂပဉ္ဟော
3. Tejaṅgapañho
၃. ‘‘ဘန္တေ နာဂသေန, ‘တေဇသ္သ ပဉ္စ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, တေဇော တိဏကဋ္ဌသာခာပလာသံ ဍဟတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ယေ တေ အဗ္ဘန္တရာ ဝာ ဗာဟိရာ ဝာ ကိလေသာ ဣဋ္ဌာနိဋ္ဌာရမ္မဏာနုဘဝနာ, သဗ္ဗေ တေ ဉာဏဂ္ဂိနာ ဍဟိတဗ္ဗာ။ ဣဒံ, မဟာရာဇ, တေဇသ္သ ပဌမံ အင္ဂံ ဂဟေတဗ္ဗံ။
3. ‘‘Bhante nāgasena, ‘tejassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, tejo tiṇakaṭṭhasākhāpalāsaṃ ḍahati, evameva kho, mahārāja, yoginā yogāvacarena ye te abbhantarā vā bāhirā vā kilesā iṭṭhāniṭṭhārammaṇānubhavanā, sabbe te ñāṇagginā ḍahitabbā. Idaṃ, mahārāja, tejassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, တေဇော နိဒ္ဒယော အကာရုဏိကော, ဧဝမေဝ ခော, မဟာရာဇ, ယောဂိနာ ယောဂာဝစရေန သဗ္ဗကိလေသေသု ကာရုညာနုဒ္ဒယာ န ကာတဗ္ဗာ။ ဣဒံ, မဟာရာဇ, တေဇသ္သ ဒုတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, tejo niddayo akāruṇiko, evameva kho, mahārāja, yoginā yogāvacarena sabbakilesesu kāruññānuddayā na kātabbā. Idaṃ, mahārāja, tejassa dutiyaṃ aṅgaṃ gahetabbaṃ.
‘‘ပုန စပရံ, မဟာရာဇ, တေဇော သီတံ ပဋိဟနတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ဝီရိယသန္တာပတေဇံ အဘိဇနေတ္ဝာ ကိလေသာ ပဋိဟန္တဗ္ဗာ။ ဣဒံ, မဟာရာဇ, တေဇသ္သ တတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, tejo sītaṃ paṭihanati, evameva kho, mahārāja, yoginā yogāvacarena vīriyasantāpatejaṃ abhijanetvā kilesā paṭihantabbā. Idaṃ, mahārāja, tejassa tatiyaṃ aṅgaṃ gahetabbaṃ.
‘‘ပုန စပရံ, မဟာရာဇ, တေဇော အနုနယပ္ပဋိဃဝိပ္ပမုတ္တော ဥဏ္ဟမဘိဇနေတိ, ဧဝမေဝ ခော, မဟာရာဇ, ယောဂိနာ ယောဂာဝစရေန အနုနယပ္ပဋိဃဝိပ္ပမုတ္တေန တေဇောသမေန စေတသာ ဝိဟရိတဗ္ဗံ။ ဣဒံ, မဟာရာဇ, တေဇသ္သ စတုတ္ထံ အင္ဂံ ဂဟေတဗ္ဗံ။
‘‘Puna caparaṃ, mahārāja, tejo anunayappaṭighavippamutto uṇhamabhijaneti, evameva kho, mahārāja, yoginā yogāvacarena anunayappaṭighavippamuttena tejosamena cetasā viharitabbaṃ. Idaṃ, mahārāja, tejassa catutthaṃ aṅgaṃ gahetabbaṃ.
‘‘ပုန စပရံ, မဟာရာဇ, တေဇော အန္ဓကာရံ ဝိဓမိတ္ဝာ 1 အာလောကံ ဒသ္သယတိ, ဧဝမေဝ ခော, မဟာရာဇ, ယောဂိနာ ယောဂာဝစရေန အဝိဇ္ဇန္ဓကာရံ ဝိဓမိတ္ဝာ ဉာဏာလောကံ ဒသ္သယိတဗ္ဗံ။ ဣဒံ, မဟာရာဇ, တေဇသ္သ ပဉ္စမံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန သကံ ပုတ္တံ ရာဟုလံ ဩဝဒန္တေန –
‘‘Puna caparaṃ, mahārāja, tejo andhakāraṃ vidhamitvā 2 ālokaṃ dassayati, evameva kho, mahārāja, yoginā yogāvacarena avijjandhakāraṃ vidhamitvā ñāṇālokaṃ dassayitabbaṃ. Idaṃ, mahārāja, tejassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena –
‘တေဇောသမံ 3, ရာဟုလ, ဘာဝနံ ဘာဝေဟိ, တေဇောသမံ ဟိ တေ, ရာဟုလ, ဘာဝနံ ဘာဝယတော ဥပ္ပန္နာ? မနာပာမနာပာ ဖသ္သာ စိတ္တံ န ပရိယာဒာယ ဌသ္သန္တီ’’’တိ။
‘Tejosamaṃ 4, rāhula, bhāvanaṃ bhāvehi, tejosamaṃ hi te, rāhula, bhāvanaṃ bhāvayato uppannā? Manāpāmanāpā phassā cittaṃ na pariyādāya ṭhassantī’’’ti.
တေဇင္ဂပဉ္ဟော တတိယော။
Tejaṅgapañho tatiyo.
Footnotes:
