| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
3. තෙජඞ්‌ගපඤ්‌හො
3. Tejaṅgapañho
3. ‘‘භන්‌තෙ නාගසෙන, ‘තෙජස්‌ස පඤ්‌ච අඞ්‌ගානි ගහෙතබ්‌බානී’ති යං වදෙසි, කතමානි තානි පඤ්‌ච අඞ්‌ගානි ගහෙතබ්‌බානී’’ති? ‘‘යථා, මහාරාජ, තෙජො තිණකට්‌ඨසාඛාපලාසං ඩහති, එවමෙව ඛො, මහාරාජ, යොගිනා යොගාවචරෙන යෙ තෙ අබ්‌භන්‌තරා වා බාහිරා වා කිලෙසා ඉට්‌ඨානිට්‌ඨාරම්‌මණානුභවනා, සබ්‌බෙ තෙ ඤාණග්‌ගිනා ඩහිතබ්‌බා. ඉදං, මහාරාජ, තෙජස්‌ස පඨමං අඞ්‌ගං ගහෙතබ්‌බං.
3. ‘‘Bhante nāgasena, ‘tejassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, tejo tiṇakaṭṭhasākhāpalāsaṃ ḍahati, evameva kho, mahārāja, yoginā yogāvacarena ye te abbhantarā vā bāhirā vā kilesā iṭṭhāniṭṭhārammaṇānubhavanā, sabbe te ñāṇagginā ḍahitabbā. Idaṃ, mahārāja, tejassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, තෙජො නිද්‌දයො අකාරුණිකො, එවමෙව ඛො, මහාරාජ, යොගිනා යොගාවචරෙන සබ්‌බකිලෙසෙසු කාරුඤ්‌ඤානුද්‌දයා න කාතබ්‌බා. ඉදං, මහාරාජ, තෙජස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, tejo niddayo akāruṇiko, evameva kho, mahārāja, yoginā yogāvacarena sabbakilesesu kāruññānuddayā na kātabbā. Idaṃ, mahārāja, tejassa dutiyaṃ aṅgaṃ gahetabbaṃ.
‘‘පුන චපරං, මහාරාජ, තෙජො සීතං පටිහනති, එවමෙව ඛො, මහාරාජ, යොගිනා යොගාවචරෙන වීරියසන්‌තාපතෙජං අභිජනෙත්‌වා කිලෙසා පටිහන්‌තබ්‌බා. ඉදං, මහාරාජ, තෙජස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, tejo sītaṃ paṭihanati, evameva kho, mahārāja, yoginā yogāvacarena vīriyasantāpatejaṃ abhijanetvā kilesā paṭihantabbā. Idaṃ, mahārāja, tejassa tatiyaṃ aṅgaṃ gahetabbaṃ.
‘‘පුන චපරං, මහාරාජ, තෙජො අනුනයප්‌පටිඝවිප්‌පමුත්‌තො උණ්‌හමභිජනෙති, එවමෙව ඛො, මහාරාජ, යොගිනා යොගාවචරෙන අනුනයප්‌පටිඝවිප්‌පමුත්‌තෙන තෙජොසමෙන චෙතසා විහරිතබ්‌බං. ඉදං, මහාරාජ, තෙජස්‌ස චතුත්‌ථං අඞ්‌ගං ගහෙතබ්‌බං.
‘‘Puna caparaṃ, mahārāja, tejo anunayappaṭighavippamutto uṇhamabhijaneti, evameva kho, mahārāja, yoginā yogāvacarena anunayappaṭighavippamuttena tejosamena cetasā viharitabbaṃ. Idaṃ, mahārāja, tejassa catutthaṃ aṅgaṃ gahetabbaṃ.
‘‘පුන චපරං, මහාරාජ, තෙජො අන්‌ධකාරං විධමිත්‌වා 1 ආලොකං දස්‌සයති, එවමෙව ඛො, මහාරාජ, යොගිනා යොගාවචරෙන අවිජ්‌ජන්‌ධකාරං විධමිත්‌වා ඤාණාලොකං දස්‌සයිතබ්‌බං. ඉදං, මහාරාජ, තෙජස්‌ස පඤ්‌චමං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන සකං පුත්‌තං රාහුලං ඔවදන්‌තෙන –
‘‘Puna caparaṃ, mahārāja, tejo andhakāraṃ vidhamitvā 2 ālokaṃ dassayati, evameva kho, mahārāja, yoginā yogāvacarena avijjandhakāraṃ vidhamitvā ñāṇālokaṃ dassayitabbaṃ. Idaṃ, mahārāja, tejassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena –
‘තෙජොසමං 3, රාහුල, භාවනං භාවෙහි, තෙජොසමං හි තෙ, රාහුල, භාවනං භාවයතො උප්‌පන්‌නා? මනාපාමනාපා ඵස්‌සා චිත්‌තං න පරියාදාය ඨස්‌සන්‌තී’’’ති.
‘Tejosamaṃ 4, rāhula, bhāvanaṃ bhāvehi, tejosamaṃ hi te, rāhula, bhāvanaṃ bhāvayato uppannā? Manāpāmanāpā phassā cittaṃ na pariyādāya ṭhassantī’’’ti.
තෙජඞ්‌ගපඤ්‌හො තතියො.
Tejaṅgapañho tatiyo.
Footnotes:
