| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. ཏེཛངྒཔཉྷོ
3. Tejaṅgapañho
༣. ‘‘བྷནྟེ ནཱགསེན, ‘ཏེཛསྶ པཉྩ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི པཉྩ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, ཏེཛོ ཏིཎཀཊྛསཱཁཱཔལཱསཾ ཌཧཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཡེ ཏེ ཨབྦྷནྟརཱ ཝཱ བཱཧིརཱ ཝཱ ཀིལེསཱ ཨིཊྛཱནིཊྛཱརམྨཎཱནུབྷཝནཱ, སབྦེ ཏེ ཉཱཎགྒིནཱ ཌཧིཏབྦཱ། ཨིདཾ, མཧཱརཱཛ, ཏེཛསྶ པཋམཾ ཨངྒཾ གཧེཏབྦཾ།
3. ‘‘Bhante nāgasena, ‘tejassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, tejo tiṇakaṭṭhasākhāpalāsaṃ ḍahati, evameva kho, mahārāja, yoginā yogāvacarena ye te abbhantarā vā bāhirā vā kilesā iṭṭhāniṭṭhārammaṇānubhavanā, sabbe te ñāṇagginā ḍahitabbā. Idaṃ, mahārāja, tejassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཏེཛོ ནིདྡཡོ ཨཀཱརུཎིཀོ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སབྦཀིལེསེསུ ཀཱརུཉྙཱནུདྡཡཱ ན ཀཱཏབྦཱ། ཨིདཾ, མཧཱརཱཛ, ཏེཛསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, tejo niddayo akāruṇiko, evameva kho, mahārāja, yoginā yogāvacarena sabbakilesesu kāruññānuddayā na kātabbā. Idaṃ, mahārāja, tejassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཏེཛོ སཱིཏཾ པཊིཧནཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཝཱིརིཡསནྟཱཔཏེཛཾ ཨབྷིཛནེཏྭཱ ཀིལེསཱ པཊིཧནྟབྦཱ། ཨིདཾ, མཧཱརཱཛ, ཏེཛསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, tejo sītaṃ paṭihanati, evameva kho, mahārāja, yoginā yogāvacarena vīriyasantāpatejaṃ abhijanetvā kilesā paṭihantabbā. Idaṃ, mahārāja, tejassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཏེཛོ ཨནུནཡཔྤཊིགྷཝིཔྤམུཏྟོ ཨུཎྷམབྷིཛནེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨནུནཡཔྤཊིགྷཝིཔྤམུཏྟེན ཏེཛོསམེན ཙེཏསཱ ཝིཧརིཏབྦཾ། ཨིདཾ, མཧཱརཱཛ, ཏེཛསྶ ཙཏུཏྠཾ ཨངྒཾ གཧེཏབྦཾ།
‘‘Puna caparaṃ, mahārāja, tejo anunayappaṭighavippamutto uṇhamabhijaneti, evameva kho, mahārāja, yoginā yogāvacarena anunayappaṭighavippamuttena tejosamena cetasā viharitabbaṃ. Idaṃ, mahārāja, tejassa catutthaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཏེཛོ ཨནྡྷཀཱརཾ ཝིདྷམིཏྭཱ 1 ཨཱལོཀཾ དསྶཡཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཝིཛྫནྡྷཀཱརཾ ཝིདྷམིཏྭཱ ཉཱཎཱལོཀཾ དསྶཡིཏབྦཾ། ཨིདཾ, མཧཱརཱཛ, ཏེཛསྶ པཉྩམཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན སཀཾ པུཏྟཾ རཱཧུལཾ ཨོཝདནྟེན –
‘‘Puna caparaṃ, mahārāja, tejo andhakāraṃ vidhamitvā 2 ālokaṃ dassayati, evameva kho, mahārāja, yoginā yogāvacarena avijjandhakāraṃ vidhamitvā ñāṇālokaṃ dassayitabbaṃ. Idaṃ, mahārāja, tejassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena –
‘ཏེཛོསམཾ 3, རཱཧུལ, བྷཱཝནཾ བྷཱཝེཧི, ཏེཛོསམཾ ཧི ཏེ, རཱཧུལ, བྷཱཝནཾ བྷཱཝཡཏོ ཨུཔྤནྣཱ? མནཱཔཱམནཱཔཱ ཕསྶཱ ཙིཏྟཾ ན པརིཡཱདཱཡ ཋསྶནྟཱི’’’ཏི།
‘Tejosamaṃ 4, rāhula, bhāvanaṃ bhāvehi, tejosamaṃ hi te, rāhula, bhāvanaṃ bhāvayato uppannā? Manāpāmanāpā phassā cittaṃ na pariyādāya ṭhassantī’’’ti.
ཏེཛངྒཔཉྷོ ཏཏིཡོ།
Tejaṅgapañho tatiyo.
Footnotes:
