| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
2. д̇згижчагаарид̇т̇зраг̇аат̇ааван̣н̣анаа
2. Tekicchakārittheragāthāvaṇṇanā
ад̇ихид̇аа вийхийд̇иаад̣̇игаа ааяасмад̇о д̇згижчагаарид̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз бун̃н̃аани убажинанд̇о ид̇о зганавуд̇з габбз вибассисса бхаг̇авад̇о гаалз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇ваа взж̇ж̇асад̇т̇з нибпад̇д̇им̣ г̇ад̇о. вибассисса бхаг̇авад̇о убадтаагам̣ асогам̣ наама т̇зрам̣ б̣яаад̇хид̇ам̣ арог̇амагааси, ан̃н̃зсан̃жа сад̇д̇аанам̣ рог̇аабхибхууд̇аанам̣ анугамбааяа бхзсаж̇ж̇ам̣ сам̣вид̣̇ахи.
Atihitāvīhītiādikā āyasmato tekicchakārittherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto ito ekanavute kappe vipassissa bhagavato kāle kulagehe nibbattitvā viññutaṃ patvā vejjasatthe nipphattiṃ gato. Vipassissa bhagavato upaṭṭhākaṃ asokaṃ nāma theraṃ byādhitaṃ arogamakāsi, aññesañca sattānaṃ rogābhibhūtānaṃ anukampāya bhesajjaṃ saṃvidahi.
со д̇зна бун̃н̃агаммзна д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з суб̣уд̣̇д̇хасса наама б̣раахман̣асса буд̇д̇о худ̇ваа ниб̣б̣ад̇д̇и. д̇асса д̇игижчагзхи г̇аб̣бхагаалз бариссаяам̣ абахарид̇ваа барибаалид̇ад̇ааяа д̇згижчагаарийд̇и наамам̣ агам̣су. со ад̇д̇ано гулаануруубаани виж̇ж̇аадтаанаани сиббаани жа сигканд̇о вад̣дхад̇и. д̇ад̣̇аа жаан̣агго суб̣уд̣̇д̇хасса бан̃н̃аавзяяад̇д̇ияам̣ гирияаасу убааяагосаллан̃жа д̣̇исваа, ‘‘аяам̣ имасмим̣ рааж̇агулз бад̇идтам̣ лабханд̇о мам̣ абхибхавзяяаа’’д̇и иссаабагад̇о ран̃н̃аа жанд̣̇аг̇уд̇д̇зна д̇ам̣ б̣анд̇ханааг̇аарз кибаабзси. д̇згижчагаарий бид̇у б̣анд̇ханааг̇аараббавзсанам̣ суд̇ваа бхийд̇о балааяид̇ваа саан̣аваасид̇т̇зрасса санд̇игам̣ г̇анд̇ваа ад̇д̇ано сам̣взг̇агааран̣ам̣ т̇зрасса гат̇зд̇ваа баб̣б̣аж̇ид̇ваа гаммадтаанам̣ г̇ахзд̇ваа аб̣бхогаасиго нзсаж̇ж̇иго жа худ̇ваа вихарад̇и, сийд̇ун̣хам̣ аг̇ан̣знд̇о саман̣ад̇хаммамзва гарод̇и, висзсад̇о б̣рахмавихаарабхааванамануяун̃ж̇ад̇и. д̇ам̣ д̣̇исваа мааро баабимаа ‘‘на имасса мама висаяам̣ ад̇иггамид̇ум̣ д̣̇ассаамий’’д̇и вигкзбам̣ гаад̇угаамо сассаанам̣ нибпад̇д̇игаалз кзд̇д̇аг̇обагаван̣н̣зна т̇зрасса санд̇игам̣ г̇анд̇ваа д̇ам̣ ниббан̣д̣знд̇о –
So tena puññakammena devamanussesu saṃsaranto imasmiṃ buddhuppāde subuddhassa nāma brāhmaṇassa putto hutvā nibbatti. Tassa tikicchakehi gabbhakāle parissayaṃ apaharitvā paripālitatāya tekicchakārīti nāmaṃ akaṃsu. So attano kulānurūpāni vijjāṭṭhānāni sippāni ca sikkhanto vaḍḍhati. Tadā cāṇakko subuddhassa paññāveyyattiyaṃ kiriyāsu upāyakosallañca disvā, ‘‘ayaṃ imasmiṃ rājakule patiṭṭhaṃ labhanto maṃ abhibhaveyyā’’ti issāpakato raññā candaguttena taṃ bandhanāgāre khipāpesi. Tekicchakārī pitu bandhanāgārappavesanaṃ sutvā bhīto palāyitvā sāṇavāsittherassa santikaṃ gantvā attano saṃvegakāraṇaṃ therassa kathetvā pabbajitvā kammaṭṭhānaṃ gahetvā abbhokāsiko nesajjiko ca hutvā viharati, sītuṇhaṃ agaṇento samaṇadhammameva karoti, visesato brahmavihārabhāvanamanuyuñjati. Taṃ disvā māro pāpimā ‘‘na imassa mama visayaṃ atikkamituṃ dassāmī’’ti vikkhepaṃ kātukāmo sassānaṃ nipphattikāle khettagopakavaṇṇena therassa santikaṃ gantvā taṃ nippaṇḍento –
381.
381.
‘‘ад̇ихид̇аа вийхи, калаг̇ад̇аа саалий;
‘‘Atihitā vīhi, khalagatā sālī;
на жа лабхз бин̣д̣ам̣, гат̇амахам̣ гасса’’нд̇и. – ааха; д̇ам̣ суд̇ваа т̇зро –
Na ca labhe piṇḍaṃ, kathamahaṃ kassa’’nti. – āha; Taṃ sutvā thero –
382.
382.
‘‘б̣уд̣̇д̇хамаббамзяяам̣ ануссара басанно, бийд̇ияаа пудасарийро хохиси сад̇ад̇амуд̣̇аг̇г̇о.
‘‘Buddhamappameyyaṃ anussara pasanno, pītiyā phuṭasarīro hohisi satatamudaggo.
383.
383.
‘‘д̇хаммамаббамзяяам̣ …бз… сад̇ад̇амуд̣̇аг̇г̇о.
‘‘Dhammamappameyyaṃ …pe… satatamudaggo.
384.
384.
‘‘сан̇гхамаббамзяяам̣…бз… сад̇ад̇амуд̣̇аг̇г̇о’’д̇и. – ааха; д̇ам̣ суд̇ваа мааро –
‘‘Saṅghamappameyyaṃ…pe… satatamudaggo’’ti. – āha; Taṃ sutvā māro –
385.
385.
‘‘аб̣бхогаасз вихараси, сийд̇аа хзманд̇игаа имаа рад̇яо;
‘‘Abbhokāse viharasi, sītā hemantikā imā ratyo;
маа сийд̇зна барзд̇о вихан̃н̃ид̇т̇о, бависа д̇вам̣ вихаарам̣ пусид̇аг̇г̇ал̣а’’нд̇и. –
Mā sītena pareto vihaññittho, pavisa tvaṃ vihāraṃ phusitaggaḷa’’nti. –
ааха. ат̇а т̇зро –
Āha. Atha thero –
386.
386.
‘‘пусиссам̣ жад̇ассо аббаман̃н̃ааяо, д̇аахи жа сукид̇о вихариссам̣;
‘‘Phusissaṃ catasso appamaññāyo, tāhi ca sukhito viharissaṃ;
наахам̣ сийд̇зна вихан̃н̃иссам̣, анин̃ж̇ид̇о вихаранд̇о’’д̇и. – ааха;
Nāhaṃ sītena vihaññissaṃ, aniñjito viharanto’’ti. – āha;
д̇ад̇т̇а ад̇ихид̇аа вийхийд̇и вийхаяо годтааг̇аарам̣ ад̇инзд̇ваа табид̇аа, д̇ад̇т̇а бадисаамид̇аа калад̇о ваа гхарам̣ убанийд̇аад̇и ад̇т̇о. вийхиг̇г̇ахан̣зна жзд̇т̇а ид̇арамби д̇хан̃н̃ам̣ сан̇г̇ан̣хаад̇и. саалий бана язбхуяязна вийхид̇о бажчаа бажжанд̇ийд̇и ааха. калаг̇ад̇аа саалийд̇и калам̣ д̇хан̃н̃агаран̣адтаанам̣ г̇ад̇аа, д̇ад̇т̇а раасивасзна мад̣̇д̣̇анажааванаад̣̇ивасзна тид̇аад̇и ад̇т̇о. бад̇хаанад̇хан̃н̃абхаавад̣̇ассанад̇т̇ан̃жзд̇т̇а саалийнам̣ висум̣ г̇ахан̣ам̣, убхаязнаби г̇аамз, г̇аамад̇о б̣ахи жа д̇хан̃н̃ам̣ барибун̣н̣ам̣ тид̇анд̇и д̣̇ассзд̇и. на жа лабхз бин̣д̣анд̇и звам̣ сулабхад̇хан̃н̃з субхигкагаалз ахам̣ бин̣д̣амад̇д̇амби на лабхаами. ид̣̇аани гат̇амахам̣ гассанд̇и ахам̣ гат̇ам̣ гариссаами, гат̇ам̣ ж̇ийвиссаамийд̇и барихаасагзл̣им̣ агааси.
Tattha atihitā vīhīti vīhayo koṭṭhāgāraṃ atinetvā ṭhapitā, tattha paṭisāmitā khalato vā gharaṃ upanītāti attho. Vīhiggahaṇena cettha itarampi dhaññaṃ saṅgaṇhāti. Sālī pana yebhuyyena vīhito pacchā paccantīti āha. Khalagatā sālīti khalaṃ dhaññakaraṇaṭṭhānaṃ gatā, tattha rāsivasena maddanacāvanādivasena ṭhitāti attho. Padhānadhaññabhāvadassanatthañcettha sālīnaṃ visuṃ gahaṇaṃ, ubhayenapi gāme, gāmato bahi ca dhaññaṃ paripuṇṇaṃ ṭhitanti dasseti. Na ca labhe piṇḍanti evaṃ sulabhadhaññe subhikkhakāle ahaṃ piṇḍamattampi na labhāmi. Idāni kathamahaṃ kassanti ahaṃ kathaṃ karissāmi, kathaṃ jīvissāmīti parihāsakeḷiṃ akāsi.
д̇ам̣ суд̇ваа т̇зро ‘‘аяам̣ варааго ад̇д̇анаа ад̇д̇ано бавад̇д̇им̣ маяхам̣ багаасзси, маяаа бана ад̇д̇анаава ад̇д̇аа овад̣̇ид̇аб̣б̣о, на маяаа гин̃жи гат̇зд̇аб̣б̣а’’нд̇и вад̇т̇уд̇д̇аяаануссад̇ияам̣ ад̇д̇аанам̣ нияож̇знд̇о ‘‘б̣уд̣̇д̇хамаббамзяяа’’нд̇иаад̣̇инаа д̇иссо г̇аат̇аа абхааси. д̇ад̇т̇а б̣уд̣̇д̇хамаббамзяяам̣ ануссара басаннод̇и саваасанааяа авиж̇ж̇аанид̣̇д̣̇ааяа ажжанд̇авиг̇амзна, б̣уд̣̇д̇хияаа жа вигасид̇абхаавзна б̣уд̣̇д̇хам̣ бхаг̇аванд̇ам̣ бамаан̣агараанам̣ рааг̇аад̣̇игилзсаанам̣ абхааваа абаримаан̣аг̇ун̣асаман̇г̇ид̇ааяа аббамзяяабун̃н̃агкзд̇д̇ад̇ааяа жа аббамзяяам̣. огаббаналагкан̣зна абхиббасаад̣̇зна басанно, басаннамаанасо ‘‘ид̇иби со бхаг̇аваа арахам̣ саммаасамб̣уд̣̇д̇хо’’д̇иаад̣̇инаа (ма. ни. 1.74; сам̣. ни. 5.997) ануссара ану ану б̣уд̣̇д̇хаарамман̣ам̣ сад̇им̣ бавад̇д̇зхи, бийд̇ияаа пудасарийро хохиси. сад̇ад̇амуд̣̇аг̇г̇од̇и ануссаранд̇ова паран̣алагкан̣ааяа бийд̇ияаа сад̇ад̇ам̣ саб̣б̣ад̣̇аа пудасарийро бийд̇исамудтаанабан̣ийд̇аруубзхи аж̇жход̇т̇адасарийро уб̣б̣зг̇абийд̇ияаа уд̣̇аг̇г̇о гааяам̣ уд̣̇аг̇г̇ам̣ гад̇ваа аагаасам̣ лан̇гхид̇ум̣ самад̇т̇о жа бхавзяяааси, б̣уд̣̇д̇хаануссад̇ияаа б̣уд̣̇д̇хаарамман̣ам̣ ул̣аарам̣ бийд̇исоманассам̣ бадисам̣взд̣̇зяяааси. яад̇о сийд̇ун̣хзхи вияа ж̇игхажчаабибаасаахиби анабхибхууд̇о хохисийд̇и ад̇т̇о.
Taṃ sutvā thero ‘‘ayaṃ varāko attanā attano pavattiṃ mayhaṃ pakāsesi, mayā pana attanāva attā ovaditabbo, na mayā kiñci kathetabba’’nti vatthuttayānussatiyaṃ attānaṃ niyojento ‘‘buddhamappameyya’’ntiādinā tisso gāthā abhāsi. Tattha buddhamappameyyaṃ anussara pasannoti savāsanāya avijjāniddāya accantavigamena, buddhiyā ca vikasitabhāvena buddhaṃ bhagavantaṃ pamāṇakarānaṃ rāgādikilesānaṃ abhāvā aparimāṇaguṇasamaṅgitāya appameyyapuññakkhettatāya ca appameyyaṃ. Okappanalakkhaṇena abhippasādena pasanno, pasannamānaso ‘‘itipi so bhagavā arahaṃ sammāsambuddho’’tiādinā (ma. ni. 1.74; saṃ. ni. 5.997) anussara anu anu buddhārammaṇaṃ satiṃ pavattehi, pītiyā phuṭasarīro hohisi. Satatamudaggoti anussarantova pharaṇalakkhaṇāya pītiyā satataṃ sabbadā phuṭasarīro pītisamuṭṭhānapaṇītarūpehi ajjhotthaṭasarīro ubbegapītiyā udaggo kāyaṃ udaggaṃ katvā ākāsaṃ laṅghituṃ samattho ca bhaveyyāsi, buddhānussatiyā buddhārammaṇaṃ uḷāraṃ pītisomanassaṃ paṭisaṃvedeyyāsi. Yato sītuṇhehi viya jighacchāpipāsāhipi anabhibhūto hohisīti attho.
д̇хамманд̇и арияам̣ логуд̇д̇арад̇хаммам̣. сан̇гханд̇и арияам̣ барамад̇т̇асан̇гхам̣. сзсам̣ вуд̇д̇анаяамзва. ануссараад̇и банзд̇т̇а ‘‘сваагкаад̇о бхаг̇авад̇аа д̇хаммо’’д̇иаад̣̇инаа д̇хаммам̣, ‘‘суббадибанно бхаг̇авад̇о саавагасан̇гхо’’д̇иаад̣̇инаа сан̇гхам̣ ануссараад̇и яож̇зд̇аб̣б̣ам̣.
Dhammanti ariyaṃ lokuttaradhammaṃ. Saṅghanti ariyaṃ paramatthasaṅghaṃ. Sesaṃ vuttanayameva. Anussarāti panettha ‘‘svākkhāto bhagavatā dhammo’’tiādinā dhammaṃ, ‘‘suppaṭipanno bhagavato sāvakasaṅgho’’tiādinā saṅghaṃ anussarāti yojetabbaṃ.
звам̣ т̇зрзна рад̇анад̇д̇аяаг̇ун̣аануссаран̣з нияож̇анавасзна ад̇д̇ани овад̣̇ид̇з буна мааро вивзгаваасад̇о нам̣ вивзжзд̇угаамо хид̇зсийбхаавам̣ вияа д̣̇ассзнд̇о ‘‘аб̣бхогаасз вихарасий’’д̇и бан̃жамам̣ г̇аат̇амааха. д̇ассад̇т̇о – д̇вам̣, бхигку, аб̣бхогаасз гзнажи абадижчаннз вивадан̇г̇ан̣з вихараси ирияаабат̇з габбзси. хзманд̇игаа химабаад̇асамаяз барияаабаннаа имаа сийд̇аа рад̇д̇ияо вад̇д̇анд̇и. д̇асмаа сийд̇зна барзд̇о абхибхууд̇о худ̇ваа маа вихан̃н̃ид̇т̇о вигхаад̇ам̣ маа аабаж̇ж̇и маа гилами. пусид̇аг̇г̇ал̣ам̣ бихид̇агаваадам̣ сзнаасанам̣ бависа, звам̣ д̇з сукавихааро бхависсад̇ийд̇и.
Evaṃ therena ratanattayaguṇānussaraṇe niyojanavasena attani ovadite puna māro vivekavāsato naṃ vivecetukāmo hitesībhāvaṃ viya dassento ‘‘abbhokāse viharasī’’ti pañcamaṃ gāthamāha. Tassattho – tvaṃ, bhikkhu, abbhokāse kenaci apaṭicchanne vivaṭaṅgaṇe viharasi iriyāpathe kappesi. Hemantikā himapātasamaye pariyāpannā imā sītā rattiyo vattanti. Tasmā sītena pareto abhibhūto hutvā mā vihaññittho vighātaṃ mā āpajji mā kilami. Phusitaggaḷaṃ pihitakavāṭaṃ senāsanaṃ pavisa, evaṃ te sukhavihāro bhavissatīti.
д̇ам̣ суд̇ваа т̇зро ‘‘на маяхам̣ сзнаасанабариязсанааяа баяож̇анам̣, зд̇т̇зваахам̣ сукавихаарий’’д̇и д̣̇ассзнд̇о ‘‘пусисса’’нд̇иаад̣̇инаа чадтам̣ г̇аат̇амааха. д̇ад̇т̇а пусиссам̣ жад̇ассо аббаман̃н̃ааяод̇и аббамаан̣аг̇ожарад̇ааяа ‘‘аббаман̃н̃аа’’д̇и лад̣̇д̇хавохаарз жад̇д̇ааро б̣рахмавихаарз пусиссам̣ пусиссаами, гаалзна гаалам̣ самаабаж̇ж̇иссаами. д̇аахи жа сукид̇о вихариссанд̇и д̇аахи аббаман̃н̃аахи сукид̇о сан̃ж̇аад̇асуко худ̇ваа вихариссам̣ жад̇д̇аароби ирияаабат̇з габбзссаамийд̇и. д̇зна маяхам̣ саб̣б̣агаалз сукамзва, на д̣̇угкам̣. яад̇о наахам̣ сийд̇зна вихан̃н̃иссам̣ анд̇арадтагзби химабаад̇асамаяз ахам̣ сийд̇зна на гиламиссаами, д̇асмаа анин̃ж̇ид̇о вихаранд̇о жид̇д̇асса ин̃ж̇ид̇агааран̣аанам̣ б̣яаабаад̣̇аад̣̇ийнам̣ суббахийнад̇д̇аа бажжаяуббаннин̃ж̇анааяа жа абхаавад̇о самаабад̇д̇исукзнзва сукид̇о вихариссаамийд̇и. звам̣ т̇зро имам̣ г̇аат̇ам̣ вад̣̇анд̇оязва вибассанам̣ вад̣дхзд̇ваа арахад̇д̇ам̣ сажчаагааси. д̇зна вуд̇д̇ам̣ абад̣̇аанз (аба. т̇зра 1.18.39-44) –
Taṃ sutvā thero ‘‘na mayhaṃ senāsanapariyesanāya payojanaṃ, etthevāhaṃ sukhavihārī’’ti dassento ‘‘phusissa’’ntiādinā chaṭṭhaṃ gāthamāha. Tattha phusissaṃ catasso appamaññāyoti appamāṇagocaratāya ‘‘appamaññā’’ti laddhavohāre cattāro brahmavihāre phusissaṃ phusissāmi, kālena kālaṃ samāpajjissāmi. Tāhi ca sukhito viharissanti tāhi appamaññāhi sukhito sañjātasukho hutvā viharissaṃ cattāropi iriyāpathe kappessāmīti. Tena mayhaṃ sabbakāle sukhameva, na dukkhaṃ. Yato nāhaṃ sītena vihaññissaṃ antaraṭṭhakepi himapātasamaye ahaṃ sītena na kilamissāmi, tasmā aniñjito viharanto cittassa iñjitakāraṇānaṃ byāpādādīnaṃ suppahīnattā paccayuppanniñjanāya ca abhāvato samāpattisukheneva sukhito viharissāmīti. Evaṃ thero imaṃ gāthaṃ vadantoyeva vipassanaṃ vaḍḍhetvā arahattaṃ sacchākāsi. Tena vuttaṃ apadāne (apa. thera 1.18.39-44) –
‘‘наг̇арз б̣анд̇хумад̇ияаа, взж̇ж̇о аасим̣ сусигкид̇о;
‘‘Nagare bandhumatiyā, vejjo āsiṃ susikkhito;
аад̇ураанам̣ сад̣̇угкаанам̣, махааж̇анасукаавахо.
Āturānaṃ sadukkhānaṃ, mahājanasukhāvaho.
‘‘б̣яаад̇хид̇ам̣ саман̣ам̣ д̣̇исваа, сийлаванд̇ам̣ махааж̇уд̇им̣;
‘‘Byādhitaṃ samaṇaṃ disvā, sīlavantaṃ mahājutiṃ;
басаннажид̇д̇о сумано, бхзсаж̇ж̇амад̣̇ад̣̇им̣ д̇ад̣̇аа.
Pasannacitto sumano, bhesajjamadadiṃ tadā.
‘‘арог̇о ааси д̇знзва, саман̣о сам̣вуд̇инд̣̇рияо;
‘‘Arogo āsi teneva, samaṇo saṃvutindriyo;
асого наама наамзна, убадтааго вибассино.
Asoko nāma nāmena, upaṭṭhāko vipassino.
‘‘зганавуд̇ид̇о габбз, яам̣ осад̇хамад̣̇аасахам̣;
‘‘Ekanavutito kappe, yaṃ osadhamadāsahaṃ;
д̣̇уг̇г̇ад̇им̣ наабхиж̇аанаами, бхзсаж̇ж̇асса ид̣̇ам̣ палам̣.
Duggatiṃ nābhijānāmi, bhesajjassa idaṃ phalaṃ.
‘‘ид̇о жа адтамз габбз, саб̣б̣осад̇хасанаамаго;
‘‘Ito ca aṭṭhame kappe, sabbosadhasanāmako;
сад̇д̇арад̇анасамбанно, жаггавад̇д̇ий махабпало.
Sattaratanasampanno, cakkavattī mahapphalo.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
зд̇т̇а жа б̣инд̣̇усаараран̃н̃о гаалз имасса т̇зрасса уббаннад̇д̇аа д̇ад̇ияасан̇г̇ийд̇ияам̣ имаа г̇аат̇аа сан̇г̇ийд̇аад̇и взд̣̇ид̇аб̣б̣аа.
Ettha ca bindusārarañño kāle imassa therassa uppannattā tatiyasaṅgītiyaṃ imā gāthā saṅgītāti veditabbā.
д̇згижчагаарид̇т̇зраг̇аат̇ааван̣н̣анаа нидтид̇аа.
Tekicchakārittheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 2. д̇згижчагаарид̇т̇зраг̇аат̇аа • 2. Tekicchakārittheragāthā
