| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
১৩. তেরসমনযো অসঙ্গহিতেনসম্পযুত্তৰিপ্পযুত্তপদৰণ্ণনা
13. Terasamanayo asaṅgahitenasampayuttavippayuttapadavaṇṇanā
৪৪৮. যেহীতি রূপক্খন্ধধম্মাযতনাদীহি। তীহিপি খন্ধাযতনাদিসঙ্গহেহি। পুন যেহীতি অরূপভৰাদীহি। ওল়ারিকাযতনানেৰ হোন্তি আযতনধাতুসঙ্গহেহিপি অসঙ্গহিতত্তা। তেতি চতুৰোকারভৰাদযো। ৰুত্তাৰসেসাতি রূপক্খন্ধধম্মাযতনাদীহি অৰসিট্ঠা। সতিপি অসঙ্গাহকত্তে তেহি অসঙ্গহিতানং সম্পযোগো ন সম্ভৰতীতি ৰেদনাক্খন্ধাদযো ইধ তেরসমনযে ৰিস্সজ্জনং ন রুহন্তি নারোহন্তি। তেনাহ অট্ঠকথাযং ‘‘ৰেদনাক্খন্ধেন হি খন্ধাদিৰসেন রূপারূপধম্মা অসঙ্গহিতা হোন্তি, তেসঞ্চ সম্পযোগো নাম নত্থী’’তি (ধাতু॰ ৪৪৮) অসঙ্গাহকা এৰ ন হোন্তি অৰিকলপঞ্চক্খন্ধাদিসমুদাযভাৰতো।
448. Yehīti rūpakkhandhadhammāyatanādīhi. Tīhipi khandhāyatanādisaṅgahehi. Puna yehīti arūpabhavādīhi. Oḷārikāyatanāneva honti āyatanadhātusaṅgahehipi asaṅgahitattā. Teti catuvokārabhavādayo. Vuttāvasesāti rūpakkhandhadhammāyatanādīhi avasiṭṭhā. Satipi asaṅgāhakatte tehi asaṅgahitānaṃ sampayogo na sambhavatīti vedanākkhandhādayo idha terasamanaye vissajjanaṃ na ruhanti nārohanti. Tenāha aṭṭhakathāyaṃ ‘‘vedanākkhandhena hi khandhādivasena rūpārūpadhammā asaṅgahitā honti, tesañca sampayogo nāma natthī’’ti (dhātu. 448) asaṅgāhakā eva na honti avikalapañcakkhandhādisamudāyabhāvato.
তেতি ‘‘দুক্খসচ্চাদী’’তি আদি-সদ্দেন ৰুত্তধম্মা। অসব্ব…পে॰… সিযুং অৰিতক্কাৰিচারাদিধম্মা ৰিয। ন তেসং ৰিপ্পযোগো নত্থি তব্বিনিমুত্তস্স চিত্তুপ্পাদস্স সম্ভৰতো। ৰেদনাক্খন্ধেন অসঙ্গহিতানং অনারম্মণমিস্সকত্তা ন ‘‘ৰিপ্পযোগস্স অত্থিতাযা’’তি ৰুত্তং। তথা চাহ ‘‘রূপারূপধম্মা অসঙ্গহিতা’’তি। উভযাভাৰতোতি সম্পযোগৰিপ্পযোগাভাৰতো। অনারম্মণসহিতসব্বৰিঞ্ঞাণতংধাতুসম্পযুত্ততদুভযধম্মা অচেতসিকচেতসিকলোকিযপদাদীনং ৰসেন ৰেদিতব্বা।
Teti ‘‘dukkhasaccādī’’ti ādi-saddena vuttadhammā. Asabba…pe… siyuṃ avitakkāvicārādidhammā viya. Na tesaṃ vippayogo natthi tabbinimuttassa cittuppādassa sambhavato. Vedanākkhandhena asaṅgahitānaṃ anārammaṇamissakattā na ‘‘vippayogassa atthitāyā’’ti vuttaṃ. Tathā cāha ‘‘rūpārūpadhammā asaṅgahitā’’ti. Ubhayābhāvatoti sampayogavippayogābhāvato. Anārammaṇasahitasabbaviññāṇataṃdhātusampayuttatadubhayadhammā acetasikacetasikalokiyapadādīnaṃ vasena veditabbā.
তেরসমনযঅসঙ্গহিতেনসম্পযুত্তৰিপ্পযুত্তপদৰণ্ণনা নিট্ঠিতা।
Terasamanayaasaṅgahitenasampayuttavippayuttapadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধাতুকথাপাল়ি • Dhātukathāpāḷi / ১৩. অসঙ্গহিতেনসম্পযুত্তৰিপ্পযুত্তপদনিদ্দেসো • 13. Asaṅgahitenasampayuttavippayuttapadaniddeso
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১৩. তেরসমনযো অসঙ্গহিতেনসম্পযুত্তৰিপ্পযুত্তপদৰণ্ণনা • 13. Terasamanayo asaṅgahitenasampayuttavippayuttapadavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১৩. তেরসমনযো অসঙ্গহিতেনসম্পযুত্তৰিপ্পযুত্তপদৰণ্ণনা • 13. Terasamanayo asaṅgahitenasampayuttavippayuttapadavaṇṇanā
