| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
၁၃. တေရသမနယော အသင္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ
13. Terasamanayo asaṅgahitenasampayuttavippayuttapadavaṇṇanā
၄၄၈. ယေဟီတိ ရူပက္ခန္ဓဓမ္မာယတနာဒီဟိ။ တီဟိပိ ခန္ဓာယတနာဒိသင္ဂဟေဟိ။ ပုန ယေဟီတိ အရူပဘဝာဒီဟိ။ ဩဠာရိကာယတနာနေဝ ဟောန္တိ အာယတနဓာတုသင္ဂဟေဟိပိ အသင္ဂဟိတတ္တာ။ တေတိ စတုဝောကာရဘဝာဒယော။ ဝုတ္တာဝသေသာတိ ရူပက္ခန္ဓဓမ္မာယတနာဒီဟိ အဝသိဋ္ဌာ။ သတိပိ အသင္ဂာဟကတ္တေ တေဟိ အသင္ဂဟိတာနံ သမ္ပယောဂော န သမ္ဘဝတီတိ ဝေဒနာက္ခန္ဓာဒယော ဣဓ တေရသမနယေ ဝိသ္သဇ္ဇနံ န ရုဟန္တိ နာရောဟန္တိ။ တေနာဟ အဋ္ဌကထာယံ ‘‘ဝေဒနာက္ခန္ဓေန ဟိ ခန္ဓာဒိဝသေန ရူပာရူပဓမ္မာ အသင္ဂဟိတာ ဟောန္တိ, တေသဉ္စ သမ္ပယောဂော နာမ နတ္ထီ’’တိ (ဓာတု. ၄၄၈) အသင္ဂာဟကာ ဧဝ န ဟောန္တိ အဝိကလပဉ္စက္ခန္ဓာဒိသမုဒာယဘာဝတော။
448. Yehīti rūpakkhandhadhammāyatanādīhi. Tīhipi khandhāyatanādisaṅgahehi. Puna yehīti arūpabhavādīhi. Oḷārikāyatanāneva honti āyatanadhātusaṅgahehipi asaṅgahitattā. Teti catuvokārabhavādayo. Vuttāvasesāti rūpakkhandhadhammāyatanādīhi avasiṭṭhā. Satipi asaṅgāhakatte tehi asaṅgahitānaṃ sampayogo na sambhavatīti vedanākkhandhādayo idha terasamanaye vissajjanaṃ na ruhanti nārohanti. Tenāha aṭṭhakathāyaṃ ‘‘vedanākkhandhena hi khandhādivasena rūpārūpadhammā asaṅgahitā honti, tesañca sampayogo nāma natthī’’ti (dhātu. 448) asaṅgāhakā eva na honti avikalapañcakkhandhādisamudāyabhāvato.
တေတိ ‘‘ဒုက္ခသစ္စာဒီ’’တိ အာဒိ-သဒ္ဒေန ဝုတ္တဓမ္မာ။ အသဗ္ဗ။ပေ.။ သိယုံ အဝိတက္ကာဝိစာရာဒိဓမ္မာ ဝိယ။ န တေသံ ဝိပ္ပယောဂော နတ္ထိ တဗ္ဗိနိမုတ္တသ္သ စိတ္တုပ္ပာဒသ္သ သမ္ဘဝတော။ ဝေဒနာက္ခန္ဓေန အသင္ဂဟိတာနံ အနာရမ္မဏမိသ္သကတ္တာ န ‘‘ဝိပ္ပယောဂသ္သ အတ္ထိတာယာ’’တိ ဝုတ္တံ။ တထာ စာဟ ‘‘ရူပာရူပဓမ္မာ အသင္ဂဟိတာ’’တိ။ ဥဘယာဘာဝတောတိ သမ္ပယောဂဝိပ္ပယောဂာဘာဝတော။ အနာရမ္မဏသဟိတသဗ္ဗဝိညာဏတံဓာတုသမ္ပယုတ္တတဒုဘယဓမ္မာ အစေတသိကစေတသိကလောကိယပဒာဒီနံ ဝသေန ဝေဒိတဗ္ဗာ။
Teti ‘‘dukkhasaccādī’’ti ādi-saddena vuttadhammā. Asabba…pe… siyuṃ avitakkāvicārādidhammā viya. Na tesaṃ vippayogo natthi tabbinimuttassa cittuppādassa sambhavato. Vedanākkhandhena asaṅgahitānaṃ anārammaṇamissakattā na ‘‘vippayogassa atthitāyā’’ti vuttaṃ. Tathā cāha ‘‘rūpārūpadhammā asaṅgahitā’’ti. Ubhayābhāvatoti sampayogavippayogābhāvato. Anārammaṇasahitasabbaviññāṇataṃdhātusampayuttatadubhayadhammā acetasikacetasikalokiyapadādīnaṃ vasena veditabbā.
တေရသမနယအသင္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ နိဋ္ဌိတာ။
Terasamanayaasaṅgahitenasampayuttavippayuttapadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဓာတုကထာပာဠိ • Dhātukathāpāḷi / ၁၃. အသင္ဂဟိတေနသမ္ပယုတ္တဝိပ္ပယုတ္တပဒနိဒ္ဒေသော • 13. Asaṅgahitenasampayuttavippayuttapadaniddeso
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁၃. တေရသမနယော အသင္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ • 13. Terasamanayo asaṅgahitenasampayuttavippayuttapadavaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၃. တေရသမနယော အသင္ဂဟိတေနသမ္ပယုတ္တဝိပ္ပယုတ္တပဒဝဏ္ဏနာ • 13. Terasamanayo asaṅgahitenasampayuttavippayuttapadavaṇṇanā
