| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
13. තෙරසමසික්‌ඛාපදං
13. Terasamasikkhāpadaṃ
1224. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරා භික්‌ඛුනී අසඞ්‌කච්‌චිකා 1 ගාමං පිණ්‌ඩාය පාවිසි. තස්‌සා රථිකාය වාතමණ්‌ඩලිකා සඞ්‌ඝාටියො උක්‌ඛිපිංසු. මනුස්‌සා උක්‌කුට්‌ඨිං අකංසු – ‘‘සුන්‌දරා අය්‍යාය ථනුදරා’’ති. සා භික්‌ඛුනී තෙහි මනුස්‌සෙහි උප්‌පණ්‌ඩියමානා මඞ්‌කු අහොසි. අථ ඛො සා භික්‌ඛුනී උපස්‌සයං ගන්‌ත්‌වා භික්‌ඛුනීනං එතමත්‌ථං ආරොචෙසි. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනී අසඞ්‌කච්‌චිකා ගාමං පවිසිස්‌සතී’’ති…පෙ.… සච්‌චං කිර, භික්‌ඛවෙ, භික්‌ඛුනී අසඞ්‌කච්‌චිකා ගාමං පාවිසීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, භික්‌ඛුනී අසඞ්‌කච්‌චිකා ගාමං පවිසිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1224. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī asaṅkaccikā 2 gāmaṃ piṇḍāya pāvisi. Tassā rathikāya vātamaṇḍalikā saṅghāṭiyo ukkhipiṃsu. Manussā ukkuṭṭhiṃ akaṃsu – ‘‘sundarā ayyāya thanudarā’’ti. Sā bhikkhunī tehi manussehi uppaṇḍiyamānā maṅku ahosi. Atha kho sā bhikkhunī upassayaṃ gantvā bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī asaṅkaccikā gāmaṃ pavisissatī’’ti…pe… saccaṃ kira, bhikkhave, bhikkhunī asaṅkaccikā gāmaṃ pāvisīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī asaṅkaccikā gāmaṃ pavisissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1225. ‘‘යා පන භික්‌ඛුනී අසඞ්‌කච්‌චිකා 3 ගාමං පවිසෙය්‍ය, පාචිත්‌තිය’’න්‌ති.
1225.‘‘Yāpana bhikkhunī asaṅkaccikā4gāmaṃ paviseyya, pācittiya’’nti.
1226. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1226.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අසඞ්‌කච්‌චිකාති විනා සඞ්‌කච්‌චිකං.
Asaṅkaccikāti vinā saṅkaccikaṃ.
සඞ්‌කච්‌චිකං නාම අධක්‌ඛකං උබ්‌භනාභි, තස්‌ස පටිච්‌ඡාදනත්‌ථාය.
Saṅkaccikaṃ nāma adhakkhakaṃ ubbhanābhi, tassa paṭicchādanatthāya.
ගාමං පවිසෙය්‍යාති පරික්‌ඛිත්‌තස්‌ස ගාමස්‌ස පරික්‌ඛෙපං අතික්‌කාමෙන්‌තියා ආපත්‌ති පාචිත්‌තියස්‌ස. අපරික්‌ඛිත්‌තස්‌ස ගාමස්‌ස උපචාරං ඔක්‌කමන්‌තියා ආපත්‌ති පාචිත්‌තියස්‌ස.
Gāmaṃ paviseyyāti parikkhittassa gāmassa parikkhepaṃ atikkāmentiyā āpatti pācittiyassa. Aparikkhittassa gāmassa upacāraṃ okkamantiyā āpatti pācittiyassa.
1227. අනාපත්‌ති අච්‌ඡින්‌නචීවරිකාය, නට්‌ඨචීවරිකාය, ගිලානාය, අස්‌සතියා, අජානන්‌තියා, ආපදාසු, උම්‌මත්‌තිකාය, ආදිකම්‌මිකායාති.
1227. Anāpatti acchinnacīvarikāya, naṭṭhacīvarikāya, gilānāya, assatiyā, ajānantiyā, āpadāsu, ummattikāya, ādikammikāyāti.
තෙරසමසික්‌ඛාපදං නිට්‌ඨිතං.
Terasamasikkhāpadaṃ niṭṭhitaṃ.
ඡත්‌තුපාහනවග්‌ගො නවමො.
Chattupāhanavaggo navamo.
උද්‌දිට්‌ඨා ඛො, අය්‍යායො, ඡසට්‌ඨිසතා පාචිත්‌තියා ධම්‌මා. තත්‌ථාය්‍යායො පුච්‌ඡාමි – ‘‘කච්‌චිත්‌ථ පරිසුද්‌ධා’’? දුතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? තතියම්‌පි පුච්‌ඡාමි – ‘‘කච්‌චිත්‌ථ පරිසුද්‌ධා’’? පරිසුද්‌ධෙත්‌ථාය්‍යායො, තස්‌මා තුණ්‌හී, එවමෙතං ධාරයාමීති.
Uddiṭṭhā kho, ayyāyo, chasaṭṭhisatā pācittiyā dhammā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
ඛුද්‌දකං සමත්‌තං.
Khuddakaṃ samattaṃ.
භික්‌ඛුනිවිභඞ්‌ගෙ පාචිත්‌තියකණ්‌ඩං නිට්‌ඨිතං.
Bhikkhunivibhaṅge pācittiyakaṇḍaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 13. තෙරසමසික්‌ඛාපදවණ්‌ණනා • 13. Terasamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 11. එකාදසමාදිසික්‌ඛාපදවණ්‌ණනා • 11. Ekādasamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 13. තෙරසමසික්‌ඛාපදං • 13. Terasamasikkhāpadaṃ
