| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā |
13. தேரஸமஸிக்கா²பத³வண்ணனா
13. Terasamasikkhāpadavaṇṇanā
1226. தேரஸமே – பரிக்கே²பங் அதிக்காமெந்தியாதி ஏகேன பாதே³ன அதிக்கந்தே து³க்கடங், து³தியேன பாசித்தியங். உபசாரேபி ஏஸேவ நயோ.
1226. Terasame – parikkhepaṃ atikkāmentiyāti ekena pādena atikkante dukkaṭaṃ, dutiyena pācittiyaṃ. Upacārepi eseva nayo.
1227. அச்சி²ன்னசீவரிகாயாதிஆதீ³ஸு ஸங்கச்சிகசீவரமேவ சீவரந்தி வேதி³தப்³ப³ங். ஆபதா³ஸூதி மஹக்³க⁴ங் ஹோதி ஸங்கச்சிகங், பாருபித்வா க³ச்ச²ந்தியாவ உபத்³த³வோ உப்பஜ்ஜதி, ஏவரூபாஸு ஆபதா³ஸு அனாபத்தி. ஸேஸங் உத்தானமேவ. ஏளகலோமஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், திசித்தங், திவேத³னந்தி.
1227.Acchinnacīvarikāyātiādīsu saṅkaccikacīvarameva cīvaranti veditabbaṃ. Āpadāsūti mahagghaṃ hoti saṅkaccikaṃ, pārupitvā gacchantiyāva upaddavo uppajjati, evarūpāsu āpadāsu anāpatti. Sesaṃ uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
தேரஸமஸிக்கா²பத³ங்.
Terasamasikkhāpadaṃ.
ச²த்துபாஹனவக்³கோ³ நவமோ.
Chattupāhanavaggo navamo.
உத்³தி³ட்டா² கோ² அய்யாயோ ச²ஸட்டி²ஸதங் பாசித்தியா த⁴ம்மாதி எத்த² ஸப்³பா³னேவ பி⁴க்கு²னீனங் கு²த்³த³கேஸு ச²ன்னவுதி, பி⁴க்கூ²னங் த்³வேனவுதீதி அட்டா²ஸீதிஸதங் ஸிக்கா²பதா³னி, ததோ ஸகலங் பி⁴க்கு²னீவக்³க³ங், பரம்பரபோ⁴ஜனங், அனதிரித்தபோ⁴ஜனங், அனதிரித்தேன அபி⁴ஹட்டு²ங் பவாரணங், பணீதபோ⁴ஜனவிஞ்ஞத்தி, அசேலகஸிக்கா²பத³ங், து³ட்டு²ல்லபடிச்சா²த³னங், ஊனவீஸதிவஸ்ஸுபஸம்பாத³னங், மாதுகா³மேன ஸத்³தி⁴ங் ஸங்விதா⁴ய அத்³தா⁴னக³மனங், ராஜந்தேபுரப்பவேஸனங், ஸந்தங் பி⁴க்கு²ங் அனாபுச்சா² விகாலே கா³மப்பவேஸனங், நிஸீத³னங் வஸ்ஸிகஸாடிகந்தி இமானி த்³வாவீஸதி ஸிக்கா²பதா³னி அபனெத்வா ஸேஸானி ஸதஞ்ச ச²ஸட்டி² ச ஸிக்கா²பதா³னி பாதிமொக்கு²த்³தே³ஸமக்³கே³ன உத்³தி³ட்டா²னி ஹொந்தீதி வேதி³தப்³பா³னி. தேனாஹ – ‘‘உத்³தி³ட்டா² கோ² அய்யாயோ ச²ஸட்டி²ஸதங் பாசித்தியா த⁴ம்மா…பே॰… ஏவமேதங் தா⁴ரயாமீ’’தி.
Uddiṭṭhā kho ayyāyo chasaṭṭhisataṃ pācittiyā dhammāti ettha sabbāneva bhikkhunīnaṃ khuddakesu channavuti, bhikkhūnaṃ dvenavutīti aṭṭhāsītisataṃ sikkhāpadāni, tato sakalaṃ bhikkhunīvaggaṃ, paramparabhojanaṃ, anatirittabhojanaṃ, anatirittena abhihaṭṭhuṃ pavāraṇaṃ, paṇītabhojanaviññatti, acelakasikkhāpadaṃ, duṭṭhullapaṭicchādanaṃ, ūnavīsativassupasampādanaṃ, mātugāmena saddhiṃ saṃvidhāya addhānagamanaṃ, rājantepurappavesanaṃ, santaṃ bhikkhuṃ anāpucchā vikāle gāmappavesanaṃ, nisīdanaṃ vassikasāṭikanti imāni dvāvīsati sikkhāpadāni apanetvā sesāni satañca chasaṭṭhi ca sikkhāpadāni pātimokkhuddesamaggena uddiṭṭhāni hontīti veditabbāni. Tenāha – ‘‘uddiṭṭhā kho ayyāyo chasaṭṭhisataṃ pācittiyā dhammā…pe… evametaṃ dhārayāmī’’ti.
தத்ராயங் ஸங்கே²பதோ ஸமுட்டா²னவினிச்ச²யோ – கி³ரக்³க³ஸமஜ்ஜங், சித்தாகா³ரஸிக்கா²பத³ங், ஸங்கா⁴ணி, இத்தா²லங்காரோ, க³ந்த⁴வண்ணகோ, வாஸிதகபிஞ்ஞாகோ, பி⁴க்கு²னீஆதீ³ஹி உம்மத்³த³னபரிமத்³த³னானீதி இமானி த³ஸ ஸிக்கா²பதா³னி அசித்தகானி லோகவஜ்ஜானி. அயங் பனெத்த² அதி⁴ப்பாயோ – வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி. அவஸேஸானி அசித்தகானி, பண்ணத்திவஜ்ஜானேவ. சோரீவுட்டா²பனங், கா³மந்தரங், ஆராமஸிக்கா²பத³ங் க³ப்³பி⁴னிவக்³கே³ ஆதி³தோ பட்டா²ய ஸத்த, குமாரிபூ⁴தவக்³கே³ ஆதி³தோ பட்டா²ய பஞ்ச, புரிஸஸங்ஸட்ட²ங் பாரிவாஸியச²ந்த³தா³னங், அனுவஸ்ஸவுட்டா²பனங், ஏகந்தரிகவுட்டா²பனந்தி இமானி ஏகூனவீஸதி ஸிக்கா²பதா³னி ஸசித்தகானி பண்ணத்திவஜ்ஜானி, அவஸேஸானி ஸசித்தகானி லோகவஜ்ஜானேவாதி.
Tatrāyaṃ saṅkhepato samuṭṭhānavinicchayo – giraggasamajjaṃ, cittāgārasikkhāpadaṃ, saṅghāṇi, itthālaṅkāro, gandhavaṇṇako, vāsitakapiññāko, bhikkhunīādīhi ummaddanaparimaddanānīti imāni dasa sikkhāpadāni acittakāni lokavajjāni. Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni. Avasesāni acittakāni, paṇṇattivajjāneva. Corīvuṭṭhāpanaṃ, gāmantaraṃ, ārāmasikkhāpadaṃ gabbhinivagge ādito paṭṭhāya satta, kumāribhūtavagge ādito paṭṭhāya pañca, purisasaṃsaṭṭhaṃ pārivāsiyachandadānaṃ, anuvassavuṭṭhāpanaṃ, ekantarikavuṭṭhāpananti imāni ekūnavīsati sikkhāpadāni sacittakāni paṇṇattivajjāni, avasesāni sacittakāni lokavajjānevāti.
ஸமந்தபாஸாதி³காய வினயஸங்வண்ணனாய பி⁴க்கு²னீவிப⁴ங்கே³
Samantapāsādikāya vinayasaṃvaṇṇanāya bhikkhunīvibhaṅge
கு²த்³த³கவண்ணனா நிட்டி²தா.
Khuddakavaṇṇanā niṭṭhitā.
பாசித்தியகண்ட³ங் நிட்டி²தங்.
Pācittiyakaṇḍaṃ niṭṭhitaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 13. தேரஸமஸிக்கா²பத³ங் • 13. Terasamasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 13. தேரஸமஸிக்கா²பத³ங் • 13. Terasamasikkhāpadaṃ
