| Library / Tipiṭaka / তিপিটক • Tipiṭaka / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā |
১৩. তেরসমসিক্খাপদৰণ্ণনা
13. Terasamasikkhāpadavaṇṇanā
১২২৬. তেরসমে – পরিক্খেপং অতিক্কামেন্তিযাতি একেন পাদেন অতিক্কন্তে দুক্কটং, দুতিযেন পাচিত্তিযং। উপচারেপি এসেৰ নযো।
1226. Terasame – parikkhepaṃ atikkāmentiyāti ekena pādena atikkante dukkaṭaṃ, dutiyena pācittiyaṃ. Upacārepi eseva nayo.
১২২৭. অচ্ছিন্নচীৰরিকাযাতিআদীসু সঙ্কচ্চিকচীৰরমেৰ চীৰরন্তি ৰেদিতব্বং। আপদাসূতি মহগ্ঘং হোতি সঙ্কচ্চিকং, পারুপিত্ৰা গচ্ছন্তিযাৰ উপদ্দৰো উপ্পজ্জতি, এৰরূপাসু আপদাসু অনাপত্তি। সেসং উত্তানমেৰ। এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি।
1227.Acchinnacīvarikāyātiādīsu saṅkaccikacīvarameva cīvaranti veditabbaṃ. Āpadāsūti mahagghaṃ hoti saṅkaccikaṃ, pārupitvā gacchantiyāva upaddavo uppajjati, evarūpāsu āpadāsu anāpatti. Sesaṃ uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
তেরসমসিক্খাপদং।
Terasamasikkhāpadaṃ.
ছত্তুপাহনৰগ্গো নৰমো।
Chattupāhanavaggo navamo.
উদ্দিট্ঠা খো অয্যাযো ছসট্ঠিসতং পাচিত্তিযা ধম্মাতি এত্থ সব্বানেৰ ভিক্খুনীনং খুদ্দকেসু ছন্নৰুতি, ভিক্খূনং দ্ৰেনৰুতীতি অট্ঠাসীতিসতং সিক্খাপদানি, ততো সকলং ভিক্খুনীৰগ্গং, পরম্পরভোজনং, অনতিরিত্তভোজনং, অনতিরিত্তেন অভিহট্ঠুং পৰারণং, পণীতভোজনৰিঞ্ঞত্তি, অচেলকসিক্খাপদং, দুট্ঠুল্লপটিচ্ছাদনং, ঊনৰীসতিৰস্সুপসম্পাদনং, মাতুগামেন সদ্ধিং সংৰিধায অদ্ধানগমনং, রাজন্তেপুরপ্পৰেসনং, সন্তং ভিক্খুং অনাপুচ্ছা ৰিকালে গামপ্পৰেসনং, নিসীদনং ৰস্সিকসাটিকন্তি ইমানি দ্ৰাৰীসতি সিক্খাপদানি অপনেত্ৰা সেসানি সতঞ্চ ছসট্ঠি চ সিক্খাপদানি পাতিমোক্খুদ্দেসমগ্গেন উদ্দিট্ঠানি হোন্তীতি ৰেদিতব্বানি। তেনাহ – ‘‘উদ্দিট্ঠা খো অয্যাযো ছসট্ঠিসতং পাচিত্তিযা ধম্মা…পে॰… এৰমেতং ধারযামী’’তি।
Uddiṭṭhā kho ayyāyo chasaṭṭhisataṃ pācittiyā dhammāti ettha sabbāneva bhikkhunīnaṃ khuddakesu channavuti, bhikkhūnaṃ dvenavutīti aṭṭhāsītisataṃ sikkhāpadāni, tato sakalaṃ bhikkhunīvaggaṃ, paramparabhojanaṃ, anatirittabhojanaṃ, anatirittena abhihaṭṭhuṃ pavāraṇaṃ, paṇītabhojanaviññatti, acelakasikkhāpadaṃ, duṭṭhullapaṭicchādanaṃ, ūnavīsativassupasampādanaṃ, mātugāmena saddhiṃ saṃvidhāya addhānagamanaṃ, rājantepurappavesanaṃ, santaṃ bhikkhuṃ anāpucchā vikāle gāmappavesanaṃ, nisīdanaṃ vassikasāṭikanti imāni dvāvīsati sikkhāpadāni apanetvā sesāni satañca chasaṭṭhi ca sikkhāpadāni pātimokkhuddesamaggena uddiṭṭhāni hontīti veditabbāni. Tenāha – ‘‘uddiṭṭhā kho ayyāyo chasaṭṭhisataṃ pācittiyā dhammā…pe… evametaṃ dhārayāmī’’ti.
তত্রাযং সঙ্খেপতো সমুট্ঠানৰিনিচ্ছযো – গিরগ্গসমজ্জং, চিত্তাগারসিক্খাপদং, সঙ্ঘাণি, ইত্থালঙ্কারো, গন্ধৰণ্ণকো, ৰাসিতকপিঞ্ঞাকো, ভিক্খুনীআদীহি উম্মদ্দনপরিমদ্দনানীতি ইমানি দস সিক্খাপদানি অচিত্তকানি লোকৰজ্জানি। অযং পনেত্থ অধিপ্পাযো – ৰিনাপি চিত্তেন আপজ্জিতব্বত্তা অচিত্তকানি, চিত্তে পন সতি অকুসলেনেৰ আপজ্জিতব্বত্তা লোকৰজ্জানি। অৰসেসানি অচিত্তকানি, পণ্ণত্তিৰজ্জানেৰ। চোরীৰুট্ঠাপনং, গামন্তরং, আরামসিক্খাপদং গব্ভিনিৰগ্গে আদিতো পট্ঠায সত্ত, কুমারিভূতৰগ্গে আদিতো পট্ঠায পঞ্চ, পুরিসসংসট্ঠং পারিৰাসিযছন্দদানং, অনুৰস্সৰুট্ঠাপনং, একন্তরিকৰুট্ঠাপনন্তি ইমানি একূনৰীসতি সিক্খাপদানি সচিত্তকানি পণ্ণত্তিৰজ্জানি, অৰসেসানি সচিত্তকানি লোকৰজ্জানেৰাতি।
Tatrāyaṃ saṅkhepato samuṭṭhānavinicchayo – giraggasamajjaṃ, cittāgārasikkhāpadaṃ, saṅghāṇi, itthālaṅkāro, gandhavaṇṇako, vāsitakapiññāko, bhikkhunīādīhi ummaddanaparimaddanānīti imāni dasa sikkhāpadāni acittakāni lokavajjāni. Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni. Avasesāni acittakāni, paṇṇattivajjāneva. Corīvuṭṭhāpanaṃ, gāmantaraṃ, ārāmasikkhāpadaṃ gabbhinivagge ādito paṭṭhāya satta, kumāribhūtavagge ādito paṭṭhāya pañca, purisasaṃsaṭṭhaṃ pārivāsiyachandadānaṃ, anuvassavuṭṭhāpanaṃ, ekantarikavuṭṭhāpananti imāni ekūnavīsati sikkhāpadāni sacittakāni paṇṇattivajjāni, avasesāni sacittakāni lokavajjānevāti.
সমন্তপাসাদিকায ৰিনযসংৰণ্ণনায ভিক্খুনীৰিভঙ্গে
Samantapāsādikāya vinayasaṃvaṇṇanāya bhikkhunīvibhaṅge
খুদ্দকৰণ্ণনা নিট্ঠিতা।
Khuddakavaṇṇanā niṭṭhitā.
পাচিত্তিযকণ্ডং নিট্ঠিতং।
Pācittiyakaṇḍaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ১৩. তেরসমসিক্খাপদং • 13. Terasamasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৩. তেরসমসিক্খাপদং • 13. Terasamasikkhāpadaṃ
