| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā |
13. තෙරසමසික්‌ඛාපදවණ්‌ණනා
13. Terasamasikkhāpadavaṇṇanā
1226. තෙරසමෙ – පරික්‌ඛෙපං අතික්‌කාමෙන්‌තියාති එකෙන පාදෙන අතික්‌කන්‌තෙ දුක්‌කටං, දුතියෙන පාචිත්‌තියං. උපචාරෙපි එසෙව නයො.
1226. Terasame – parikkhepaṃ atikkāmentiyāti ekena pādena atikkante dukkaṭaṃ, dutiyena pācittiyaṃ. Upacārepi eseva nayo.
1227. අච්‌ඡින්‌නචීවරිකායාතිආදීසු සඞ්‌කච්‌චිකචීවරමෙව චීවරන්‌ති වෙදිතබ්‌බං. ආපදාසූති මහග්‌ඝං හොති සඞ්‌කච්‌චිකං, පාරුපිත්‌වා ගච්‌ඡන්‌තියාව උපද්‌දවො උප්‌පජ්‌ජති, එවරූපාසු ආපදාසු අනාපත්‌ති. සෙසං උත්‌තානමෙව. එළකලොමසමුට්‌ඨානං – කිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, තිචිත්‌තං, තිවෙදනන්‌ති.
1227.Acchinnacīvarikāyātiādīsu saṅkaccikacīvarameva cīvaranti veditabbaṃ. Āpadāsūti mahagghaṃ hoti saṅkaccikaṃ, pārupitvā gacchantiyāva upaddavo uppajjati, evarūpāsu āpadāsu anāpatti. Sesaṃ uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
තෙරසමසික්‌ඛාපදං.
Terasamasikkhāpadaṃ.
ඡත්‌තුපාහනවග්‌ගො නවමො.
Chattupāhanavaggo navamo.
උද්‌දිට්‌ඨා ඛො අය්‍යායො ඡසට්‌ඨිසතං පාචිත්‌තියා ධම්‌මාති එත්‌ථ සබ්‌බානෙව භික්‌ඛුනීනං ඛුද්‌දකෙසු ඡන්‌නවුති, භික්‌ඛූනං ද්‌වෙනවුතීති අට්‌ඨාසීතිසතං සික්‌ඛාපදානි, තතො සකලං භික්‌ඛුනීවග්‌ගං, පරම්‌පරභොජනං, අනතිරිත්‌තභොජනං, අනතිරිත්‌තෙන අභිහට්‌ඨුං පවාරණං, පණීතභොජනවිඤ්‌ඤත්‌ති, අචෙලකසික්‌ඛාපදං, දුට්‌ඨුල්‌ලපටිච්‌ඡාදනං, ඌනවීසතිවස්‌සුපසම්‌පාදනං, මාතුගාමෙන සද්‌ධිං සංවිධාය අද්‌ධානගමනං, රාජන්‌තෙපුරප්‌පවෙසනං, සන්‌තං භික්‌ඛුං අනාපුච්‌ඡා විකාලෙ ගාමප්‌පවෙසනං, නිසීදනං වස්‌සිකසාටිකන්‌ති ඉමානි ද්‌වාවීසති සික්‌ඛාපදානි අපනෙත්‌වා සෙසානි සතඤ්‌ච ඡසට්‌ඨි ච සික්‌ඛාපදානි පාතිමොක්‌ඛුද්‌දෙසමග්‌ගෙන උද්‌දිට්‌ඨානි හොන්‌තීති වෙදිතබ්‌බානි. තෙනාහ – ‘‘උද්‌දිට්‌ඨා ඛො අය්‍යායො ඡසට්‌ඨිසතං පාචිත්‌තියා ධම්‌මා…පෙ.… එවමෙතං ධාරයාමී’’ති.
Uddiṭṭhā kho ayyāyo chasaṭṭhisataṃ pācittiyā dhammāti ettha sabbāneva bhikkhunīnaṃ khuddakesu channavuti, bhikkhūnaṃ dvenavutīti aṭṭhāsītisataṃ sikkhāpadāni, tato sakalaṃ bhikkhunīvaggaṃ, paramparabhojanaṃ, anatirittabhojanaṃ, anatirittena abhihaṭṭhuṃ pavāraṇaṃ, paṇītabhojanaviññatti, acelakasikkhāpadaṃ, duṭṭhullapaṭicchādanaṃ, ūnavīsativassupasampādanaṃ, mātugāmena saddhiṃ saṃvidhāya addhānagamanaṃ, rājantepurappavesanaṃ, santaṃ bhikkhuṃ anāpucchā vikāle gāmappavesanaṃ, nisīdanaṃ vassikasāṭikanti imāni dvāvīsati sikkhāpadāni apanetvā sesāni satañca chasaṭṭhi ca sikkhāpadāni pātimokkhuddesamaggena uddiṭṭhāni hontīti veditabbāni. Tenāha – ‘‘uddiṭṭhā kho ayyāyo chasaṭṭhisataṃ pācittiyā dhammā…pe… evametaṃ dhārayāmī’’ti.
තත්‍රායං සඞ්‌ඛෙපතො සමුට්‌ඨානවිනිච්‌ඡයො – ගිරග්‌ගසමජ්‌ජං, චිත්‌තාගාරසික්‌ඛාපදං, සඞ්‌ඝාණි, ඉත්‌ථාලඞ්‌කාරො, ගන්‌ධවණ්‌ණකො, වාසිතකපිඤ්‌ඤාකො, භික්‌ඛුනීආදීහි උම්‌මද්‌දනපරිමද්‌දනානීති ඉමානි දස සික්‌ඛාපදානි අචිත්‌තකානි ලොකවජ්‌ජානි. අයං පනෙත්‌ථ අධිප්‌පායො – විනාපි චිත්‌තෙන ආපජ්‌ජිතබ්‌බත්‌තා අචිත්‌තකානි, චිත්‌තෙ පන සති අකුසලෙනෙව ආපජ්‌ජිතබ්‌බත්‌තා ලොකවජ්‌ජානි. අවසෙසානි අචිත්‌තකානි, පණ්‌ණත්‌තිවජ්‌ජානෙව. චොරීවුට්‌ඨාපනං, ගාමන්‌තරං, ආරාමසික්‌ඛාපදං ගබ්‌භිනිවග්‌ගෙ ආදිතො පට්‌ඨාය සත්‌ත, කුමාරිභූතවග්‌ගෙ ආදිතො පට්‌ඨාය පඤ්‌ච, පුරිසසංසට්‌ඨං පාරිවාසියඡන්‌දදානං, අනුවස්‌සවුට්‌ඨාපනං, එකන්‌තරිකවුට්‌ඨාපනන්‌ති ඉමානි එකූනවීසති සික්‌ඛාපදානි සචිත්‌තකානි පණ්‌ණත්‌තිවජ්‌ජානි, අවසෙසානි සචිත්‌තකානි ලොකවජ්‌ජානෙවාති.
Tatrāyaṃ saṅkhepato samuṭṭhānavinicchayo – giraggasamajjaṃ, cittāgārasikkhāpadaṃ, saṅghāṇi, itthālaṅkāro, gandhavaṇṇako, vāsitakapiññāko, bhikkhunīādīhi ummaddanaparimaddanānīti imāni dasa sikkhāpadāni acittakāni lokavajjāni. Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni. Avasesāni acittakāni, paṇṇattivajjāneva. Corīvuṭṭhāpanaṃ, gāmantaraṃ, ārāmasikkhāpadaṃ gabbhinivagge ādito paṭṭhāya satta, kumāribhūtavagge ādito paṭṭhāya pañca, purisasaṃsaṭṭhaṃ pārivāsiyachandadānaṃ, anuvassavuṭṭhāpanaṃ, ekantarikavuṭṭhāpananti imāni ekūnavīsati sikkhāpadāni sacittakāni paṇṇattivajjāni, avasesāni sacittakāni lokavajjānevāti.
සමන්‌තපාසාදිකාය විනයසංවණ්‌ණනාය භික්‌ඛුනීවිභඞ්‌ගෙ
Samantapāsādikāya vinayasaṃvaṇṇanāya bhikkhunīvibhaṅge
ඛුද්‌දකවණ්‌ණනා නිට්‌ඨිතා.
Khuddakavaṇṇanā niṭṭhitā.
පාචිත්‌තියකණ්‌ඩං නිට්‌ඨිතං.
Pācittiyakaṇḍaṃ niṭṭhitaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 13. තෙරසමසික්‌ඛාපදං • 13. Terasamasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 13. තෙරසමසික්‌ඛාපදං • 13. Terasamasikkhāpadaṃ
