| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā |
༡༣. ཏེརསམསིཀྑཱཔདཝཎྞནཱ
13. Terasamasikkhāpadavaṇṇanā
༡༢༢༦. ཏེརསམེ – པརིཀྑེཔཾ ཨཏིཀྐཱམེནྟིཡཱཏི ཨེཀེན པཱདེན ཨཏིཀྐནྟེ དུཀྐཊཾ, དུཏིཡེན པཱཙིཏྟིཡཾ། ཨུཔཙཱརེཔི ཨེསེཝ ནཡོ།
1226. Terasame – parikkhepaṃ atikkāmentiyāti ekena pādena atikkante dukkaṭaṃ, dutiyena pācittiyaṃ. Upacārepi eseva nayo.
༡༢༢༧. ཨཙྪིནྣཙཱིཝརིཀཱཡཱཏིཨཱདཱིསུ སངྐཙྩིཀཙཱིཝརམེཝ ཙཱིཝརནྟི ཝེདིཏབྦཾ། ཨཱཔདཱསཱུཏི མཧགྒྷཾ ཧོཏི སངྐཙྩིཀཾ, པཱརུཔིཏྭཱ གཙྪནྟིཡཱཝ ཨུཔདྡཝོ ཨུཔྤཛྫཏི, ཨེཝརཱུཔཱསུ ཨཱཔདཱསུ ཨནཱཔཏྟི། སེསཾ ཨུཏྟཱནམེཝ། ཨེལ༹ཀལོམསམུཊྛཱནཾ – ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཏིཙིཏྟཾ, ཏིཝེདནནྟི།
1227.Acchinnacīvarikāyātiādīsu saṅkaccikacīvarameva cīvaranti veditabbaṃ. Āpadāsūti mahagghaṃ hoti saṅkaccikaṃ, pārupitvā gacchantiyāva upaddavo uppajjati, evarūpāsu āpadāsu anāpatti. Sesaṃ uttānameva. Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
ཏེརསམསིཀྑཱཔདཾ།
Terasamasikkhāpadaṃ.
ཚཏྟུཔཱཧནཝགྒོ ནཝམོ།
Chattupāhanavaggo navamo.
ཨུདྡིཊྛཱ ཁོ ཨཡྻཱཡོ ཚསཊྛིསཏཾ པཱཙིཏྟིཡཱ དྷམྨཱཏི ཨེཏྠ སབྦཱནེཝ བྷིཀྑུནཱིནཾ ཁུདྡཀེསུ ཚནྣཝུཏི, བྷིཀྑཱུནཾ དྭེནཝུཏཱིཏི ཨཊྛཱསཱིཏིསཏཾ སིཀྑཱཔདཱནི, ཏཏོ སཀལཾ བྷིཀྑུནཱིཝགྒཾ, པརམྤརབྷོཛནཾ, ཨནཏིརིཏྟབྷོཛནཾ, ཨནཏིརིཏྟེན ཨབྷིཧཊྛུཾ པཝཱརཎཾ, པཎཱིཏབྷོཛནཝིཉྙཏྟི, ཨཙེལཀསིཀྑཱཔདཾ, དུཊྛུལླཔཊིཙྪཱདནཾ, ཨཱུནཝཱིསཏིཝསྶུཔསམྤཱདནཾ, མཱཏུགཱམེན སདྡྷིཾ སཾཝིདྷཱཡ ཨདྡྷཱནགམནཾ, རཱཛནྟེཔུརཔྤཝེསནཾ, སནྟཾ བྷིཀྑུཾ ཨནཱཔུཙྪཱ ཝིཀཱལེ གཱམཔྤཝེསནཾ, ནིསཱིདནཾ ཝསྶིཀསཱཊིཀནྟི ཨིམཱནི དྭཱཝཱིསཏི སིཀྑཱཔདཱནི ཨཔནེཏྭཱ སེསཱནི སཏཉྩ ཚསཊྛི ཙ སིཀྑཱཔདཱནི པཱཏིམོཀྑུདྡེསམགྒེན ཨུདྡིཊྛཱནི ཧོནྟཱིཏི ཝེདིཏབྦཱནི། ཏེནཱཧ – ‘‘ཨུདྡིཊྛཱ ཁོ ཨཡྻཱཡོ ཚསཊྛིསཏཾ པཱཙིཏྟིཡཱ དྷམྨཱ…པེ॰… ཨེཝམེཏཾ དྷཱརཡཱམཱི’’ཏི།
Uddiṭṭhā kho ayyāyo chasaṭṭhisataṃ pācittiyā dhammāti ettha sabbāneva bhikkhunīnaṃ khuddakesu channavuti, bhikkhūnaṃ dvenavutīti aṭṭhāsītisataṃ sikkhāpadāni, tato sakalaṃ bhikkhunīvaggaṃ, paramparabhojanaṃ, anatirittabhojanaṃ, anatirittena abhihaṭṭhuṃ pavāraṇaṃ, paṇītabhojanaviññatti, acelakasikkhāpadaṃ, duṭṭhullapaṭicchādanaṃ, ūnavīsativassupasampādanaṃ, mātugāmena saddhiṃ saṃvidhāya addhānagamanaṃ, rājantepurappavesanaṃ, santaṃ bhikkhuṃ anāpucchā vikāle gāmappavesanaṃ, nisīdanaṃ vassikasāṭikanti imāni dvāvīsati sikkhāpadāni apanetvā sesāni satañca chasaṭṭhi ca sikkhāpadāni pātimokkhuddesamaggena uddiṭṭhāni hontīti veditabbāni. Tenāha – ‘‘uddiṭṭhā kho ayyāyo chasaṭṭhisataṃ pācittiyā dhammā…pe… evametaṃ dhārayāmī’’ti.
ཏཏྲཱཡཾ སངྑེཔཏོ སམུཊྛཱནཝིནིཙྪཡོ – གིརགྒསམཛྫཾ, ཙིཏྟཱགཱརསིཀྑཱཔདཾ, སངྒྷཱཎི, ཨིཏྠཱལངྐཱརོ, གནྡྷཝཎྞཀོ, ཝཱསིཏཀཔིཉྙཱཀོ, བྷིཀྑུནཱིཨཱདཱིཧི ཨུམྨདྡནཔརིམདྡནཱནཱིཏི ཨིམཱནི དས སིཀྑཱཔདཱནི ཨཙིཏྟཀཱནི ལོཀཝཛྫཱནི། ཨཡཾ པནེཏྠ ཨདྷིཔྤཱཡོ – ཝིནཱཔི ཙིཏྟེན ཨཱཔཛྫིཏབྦཏྟཱ ཨཙིཏྟཀཱནི, ཙིཏྟེ པན སཏི ཨཀུསལེནེཝ ཨཱཔཛྫིཏབྦཏྟཱ ལོཀཝཛྫཱནི། ཨཝསེསཱནི ཨཙིཏྟཀཱནི, པཎྞཏྟིཝཛྫཱནེཝ། ཙོརཱིཝུཊྛཱཔནཾ, གཱམནྟརཾ, ཨཱརཱམསིཀྑཱཔདཾ གབྦྷིནིཝགྒེ ཨཱདིཏོ པཊྛཱཡ སཏྟ, ཀུམཱརིབྷཱུཏཝགྒེ ཨཱདིཏོ པཊྛཱཡ པཉྩ, པུརིསསཾསཊྛཾ པཱརིཝཱསིཡཚནྡདཱནཾ, ཨནུཝསྶཝུཊྛཱཔནཾ, ཨེཀནྟརིཀཝུཊྛཱཔནནྟི ཨིམཱནི ཨེཀཱུནཝཱིསཏི སིཀྑཱཔདཱནི སཙིཏྟཀཱནི པཎྞཏྟིཝཛྫཱནི, ཨཝསེསཱནི སཙིཏྟཀཱནི ལོཀཝཛྫཱནེཝཱཏི།
Tatrāyaṃ saṅkhepato samuṭṭhānavinicchayo – giraggasamajjaṃ, cittāgārasikkhāpadaṃ, saṅghāṇi, itthālaṅkāro, gandhavaṇṇako, vāsitakapiññāko, bhikkhunīādīhi ummaddanaparimaddanānīti imāni dasa sikkhāpadāni acittakāni lokavajjāni. Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni. Avasesāni acittakāni, paṇṇattivajjāneva. Corīvuṭṭhāpanaṃ, gāmantaraṃ, ārāmasikkhāpadaṃ gabbhinivagge ādito paṭṭhāya satta, kumāribhūtavagge ādito paṭṭhāya pañca, purisasaṃsaṭṭhaṃ pārivāsiyachandadānaṃ, anuvassavuṭṭhāpanaṃ, ekantarikavuṭṭhāpananti imāni ekūnavīsati sikkhāpadāni sacittakāni paṇṇattivajjāni, avasesāni sacittakāni lokavajjānevāti.
སམནྟཔཱསཱདིཀཱཡ ཝིནཡསཾཝཎྞནཱཡ བྷིཀྑུནཱིཝིབྷངྒེ
Samantapāsādikāya vinayasaṃvaṇṇanāya bhikkhunīvibhaṅge
ཁུདྡཀཝཎྞནཱ ནིཊྛིཏཱ།
Khuddakavaṇṇanā niṭṭhitā.
པཱཙིཏྟིཡཀཎྜཾ ནིཊྛིཏཾ།
Pācittiyakaṇḍaṃ niṭṭhitaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / བྷིཀྑུནཱིཝིབྷངྒ • Bhikkhunīvibhaṅga / ༡༣. ཏེརསམསིཀྑཱཔདཾ • 13. Terasamasikkhāpadaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༣. ཏེརསམསིཀྑཱཔདཾ • 13. Terasamasikkhāpadaṃ
