| Library / Tipiṭaka / திபிடக • Tipiṭaka / தீ³க⁴ நிகாய (அட்ட²கதா²) • Dīgha nikāya (aṭṭhakathā) |
13. தேவிஜ்ஜஸுத்தவண்ணனா
13. Tevijjasuttavaṇṇanā
518. ஏவங் மே ஸுதங்…பே॰… கோஸலேஸூதி தேவிஜ்ஜஸுத்தங். தத்ராயங் அனுத்தானபத³வண்ணனா. மனஸாகடந்தி தஸ்ஸ கா³மஸ்ஸ நாமங். உத்தரேன மனஸாகடஸ்ஸாதி மனஸாகடதோ அவிதூ³ரே உத்தரபஸ்ஸே. அம்ப³வனேதி தருணஅம்ப³ருக்க²ஸண்டே³, ரமணீயோ கிர ஸோ பூ⁴மிபா⁴கோ³, ஹெட்டா² ரஜதபட்டஸதி³ஸா வாலிகா விப்பகிண்ணா, உபரி மணிவிதானங் விய க⁴னஸாகா²பத்தங் அம்ப³வனங். தஸ்மிங் பு³த்³தா⁴னங் அனுச்ச²விகே பவிவேகஸுகே² அம்ப³வனே விஹரதீதி அத்தோ².
518.Evaṃme sutaṃ…pe… kosalesūti tevijjasuttaṃ. Tatrāyaṃ anuttānapadavaṇṇanā. Manasākaṭanti tassa gāmassa nāmaṃ. Uttarena manasākaṭassāti manasākaṭato avidūre uttarapasse. Ambavaneti taruṇaambarukkhasaṇḍe, ramaṇīyo kira so bhūmibhāgo, heṭṭhā rajatapaṭṭasadisā vālikā vippakiṇṇā, upari maṇivitānaṃ viya ghanasākhāpattaṃ ambavanaṃ. Tasmiṃ buddhānaṃ anucchavike pavivekasukhe ambavane viharatīti attho.
519. அபி⁴ஞ்ஞாதா அபி⁴ஞ்ஞாதாதி குலசாரித்தாதி³ஸம்பத்தியா தத்த² தத்த² பஞ்ஞாதா. சங்கீதிஆதீ³னி தேஸங் நாமானி. தத்த² சங்கீ ஓபாஸாத³வாஸிகோ. தாருக்கோ² இச்சா²னங்க³லவாஸிகோ. பொக்க²ரஸாதீ உக்கட்ட²வாஸிகோ. ஜாணுஸோணீ ஸாவத்தி²வாஸிகோ. தோதெ³ய்யோ துதி³கா³மவாஸிகோ. அஞ்ஞே சாதி அஞ்ஞே ச ப³ஹுஜனா. அத்தனோ அத்தனோ நிவாஸட்டா²னேஹி ஆக³ந்த்வா மந்தஸஜ்ஜா²யகரணத்த²ங் தத்த² படிவஸந்தி. மனஸாகடஸ்ஸ கிர ரமணீயதாய தே ப்³ராஹ்மணா தத்த² நதீ³தீரே கே³ஹானி காரெத்வா பரிக்கி²பாபெத்வா அஞ்ஞேஸங் ப³ஹூனங் பவேஸனங் நிவாரெத்வா அந்தரந்தரா தத்த² க³ந்த்வா வஸந்தி.
519.Abhiññātā abhiññātāti kulacārittādisampattiyā tattha tattha paññātā. Caṅkītiādīni tesaṃ nāmāni. Tattha caṅkī opāsādavāsiko. Tārukkho icchānaṅgalavāsiko. Pokkharasātī ukkaṭṭhavāsiko. Jāṇusoṇī sāvatthivāsiko. Todeyyo tudigāmavāsiko. Aññe cāti aññe ca bahujanā. Attano attano nivāsaṭṭhānehi āgantvā mantasajjhāyakaraṇatthaṃ tattha paṭivasanti. Manasākaṭassa kira ramaṇīyatāya te brāhmaṇā tattha nadītīre gehāni kāretvā parikkhipāpetvā aññesaṃ bahūnaṃ pavesanaṃ nivāretvā antarantarā tattha gantvā vasanti.
520-521. வாஸெட்ட²பா⁴ரத்³வாஜானந்தி வாஸெட்ட²ஸ்ஸ ச பொக்க²ரஸாதினோ அந்தேவாஸிகஸ்ஸ, பா⁴ரத்³வாஜஸ்ஸ ச தாருக்க²ந்தேவாஸிகஸ்ஸ. ஏதே கிர த்³வே ஜாதிஸம்பன்னா திண்ணங் வேதா³னங் பாரகூ³ அஹேஸுங். ஜங்க⁴விஹாரந்தி அதிசிரனிஸஜ்ஜபச்சயா கிலமத²வினோத³னத்தா²ய ஜங்க⁴சாரங். தே கிர தி³வஸங் ஸஜ்ஜா²யங் கத்வா ஸாயன்ஹே வுட்டா²ய ந்ஹானீயஸம்பா⁴ரக³ந்த⁴மாலதேலதோ⁴தவத்தா²னி கா³ஹாபெத்வா அத்தனோ பரிஜனபரிவுதா ந்ஹாயிதுகாமா நதீ³தீரங் க³ந்த்வா ரஜதபட்டவண்ணே வாலிகாஸண்டே³ அபராபரங் சங்கமிங்ஸு. ஏகங் சங்கமந்தங் இதரோ அனுசங்கமி, புன இதரங் இதரோதி. தேன வுத்தங் ‘‘அனுசங்கமந்தானங் அனுவிசரந்தான’’ந்தி. மக்³கா³மக்³கே³தி மக்³கே³ ச அமக்³கே³ ச. கதமங் நு கோ² படிபத³ங் பூரெத்வா கதமேன மக்³கே³ன ஸக்கா ஸுக²ங் ப்³ரஹ்மலோகங் க³ந்துந்தி ஏவங் மக்³கா³மக்³க³ங் ஆரப்³ப⁴ கத²ங் ஸமுட்டா²பேஸுந்தி அத்தோ². அஞ்ஜஸாயனோதி உஜுமக்³க³ஸ்ஸேதங் வேவசனங், அஞ்ஜஸா வா உஜுகமேவ ஏதேன ஆயந்தி ஆக³ச்ச²ந்தீதி அஞ்ஜஸாயனோ நிய்யானிகோ நிய்யாதீதி நிய்யாயந்தோ நிய்யாதி, க³ச்ச²ந்தோ க³ச்ச²தீதி அத்தோ².
520-521.Vāseṭṭhabhāradvājānanti vāseṭṭhassa ca pokkharasātino antevāsikassa, bhāradvājassa ca tārukkhantevāsikassa. Ete kira dve jātisampannā tiṇṇaṃ vedānaṃ pāragū ahesuṃ. Jaṅghavihāranti aticiranisajjapaccayā kilamathavinodanatthāya jaṅghacāraṃ. Te kira divasaṃ sajjhāyaṃ katvā sāyanhe vuṭṭhāya nhānīyasambhāragandhamālateladhotavatthāni gāhāpetvā attano parijanaparivutā nhāyitukāmā nadītīraṃ gantvā rajatapaṭṭavaṇṇe vālikāsaṇḍe aparāparaṃ caṅkamiṃsu. Ekaṃ caṅkamantaṃ itaro anucaṅkami, puna itaraṃ itaroti. Tena vuttaṃ ‘‘anucaṅkamantānaṃ anuvicarantāna’’nti. Maggāmaggeti magge ca amagge ca. Katamaṃ nu kho paṭipadaṃ pūretvā katamena maggena sakkā sukhaṃ brahmalokaṃ gantunti evaṃ maggāmaggaṃ ārabbha kathaṃ samuṭṭhāpesunti attho. Añjasāyanoti ujumaggassetaṃ vevacanaṃ, añjasā vā ujukameva etena āyanti āgacchantīti añjasāyano niyyāniko niyyātīti niyyāyanto niyyāti, gacchanto gacchatīti attho.
தக்கரஸ்ஸ ப்³ரஹ்மஸஹப்³யதாயாதி யோ தங் மக்³க³ங் கரோதி படிபஜ்ஜதி, தஸ்ஸ ப்³ரஹ்முனா ஸத்³தி⁴ங் ஸஹபா⁴வாய, ஏகட்டா²னே பாதுபா⁴வாய க³ச்ச²தீதி அத்தோ². ய்வாயந்தி யோ அயங். அக்கா²தோதி கதி²தோ தீ³பிதோ. ப்³ராஹ்மணேன பொக்க²ரஸாதினாதி அத்தனோ ஆசரியங் அபதி³ஸதி. இதி வாஸெட்டோ² ஸகமேவ ஆசரியவாத³ங் தோ²மெத்வா பக்³க³ண்ஹித்வா விசரதி. பா⁴ரத்³வாஜோபி ஸகமேவாதி. தேன வுத்தங் ‘‘நேவ கோ² அஸக்கி² வாஸெட்டோ²’’திஆதி³.
Takkarassa brahmasahabyatāyāti yo taṃ maggaṃ karoti paṭipajjati, tassa brahmunā saddhiṃ sahabhāvāya, ekaṭṭhāne pātubhāvāya gacchatīti attho. Yvāyanti yo ayaṃ. Akkhātoti kathito dīpito. Brāhmaṇena pokkharasātināti attano ācariyaṃ apadisati. Iti vāseṭṭho sakameva ācariyavādaṃ thometvā paggaṇhitvā vicarati. Bhāradvājopi sakamevāti. Tena vuttaṃ ‘‘neva kho asakkhi vāseṭṭho’’tiādi.
ததோ வாஸெட்டோ² ‘‘உபி⁴ன்னம்பி அம்ஹாகங் கதா² அனிய்யானிகாவ, இமஸ்மிஞ்ச லோகே மக்³க³குஸலோ நாம போ⁴தா கோ³தமேன ஸதி³ஸோ நத்தி², ப⁴வஞ்ச கோ³தமோ அவிதூ³ரே வஸதி, ஸோ நோ துலங் க³ஹெத்வா நிஸின்னவாணிஜோ விய கங்க²ங் சி²ந்தி³ஸ்ஸதீ’’தி சிந்தெத்வா தமத்த²ங் பா⁴ரத்³வாஜஸ்ஸ ஆரோசெத்வா உபோ⁴பி க³ந்த்வா அத்தனோ கத²ங் ப⁴க³வதோ ஆரோசேஸுங். தேன வுத்தங் ‘‘அத² கோ² வாஸெட்டோ²…பே॰… ய்வாயங் அக்கா²தோ ப்³ராஹ்மணேன தாருக்கே²னா’’தி.
Tato vāseṭṭho ‘‘ubhinnampi amhākaṃ kathā aniyyānikāva, imasmiñca loke maggakusalo nāma bhotā gotamena sadiso natthi, bhavañca gotamo avidūre vasati, so no tulaṃ gahetvā nisinnavāṇijo viya kaṅkhaṃ chindissatī’’ti cintetvā tamatthaṃ bhāradvājassa ārocetvā ubhopi gantvā attano kathaṃ bhagavato ārocesuṃ. Tena vuttaṃ ‘‘atha kho vāseṭṭho…pe… yvāyaṃ akkhāto brāhmaṇena tārukkhenā’’ti.
522. எத்த² போ⁴ கோ³தமாதி ஏதஸ்மிங் மக்³கா³மக்³கே³. விக்³க³ஹோ விவாதோ³திஆதீ³ஸு புப்³பு³ப்பத்திகோ விக்³க³ஹோ. அபரபா⁴கே³ விவாதோ³. து³விதோ⁴பி ஏஸோ நானாஆசரியானங் வாத³தோ நானாவாதோ³.
522.Ettha bho gotamāti etasmiṃ maggāmagge. Viggaho vivādotiādīsu pubbuppattiko viggaho. Aparabhāge vivādo. Duvidhopi eso nānāācariyānaṃ vādato nānāvādo.
523. அத² கிஸ்மிங் பன வோதி த்வம்பி அயமேவ மக்³கோ³தி அத்தனோ ஆசரியவாத³மேவ பக்³க³ய்ஹ திட்ட²ஸி, பா⁴ரத்³வாஜோபி அத்தனோ ஆசரியவாத³மேவ, ஏகஸ்ஸாபி ஏகஸ்மிங் ஸங்ஸயோ நத்தி². ஏவங் ஸதி கிஸ்மிங் வோ விக்³க³ஹோதி புச்ச²தி.
523.Atha kismiṃ pana voti tvampi ayameva maggoti attano ācariyavādameva paggayha tiṭṭhasi, bhāradvājopi attano ācariyavādameva, ekassāpi ekasmiṃ saṃsayo natthi. Evaṃ sati kismiṃ vo viggahoti pucchati.
524. மக்³கா³மக்³கே³ , போ⁴ கோ³தமாதி மக்³கே³ போ⁴ கோ³தம அமக்³கே³ ச, உஜுமக்³கே³ ச அனுஜுமக்³கே³ சாதி அத்தோ². ஏஸ கிர ஏகப்³ராஹ்மணஸ்ஸாபி மக்³க³ங் ‘‘ந மக்³கோ³’’தி ந வத³தி. யதா² பன அத்தனோ ஆசரியஸ்ஸ மக்³கோ³ உஜுமக்³கோ³, ந ஏவங் அஞ்ஞேஸங் அனுஜானாதி, தஸ்மா தமேவத்த²ங் தீ³பெந்தோ ‘‘கிஞ்சாபி போ⁴ கோ³தமா’’திஆதி³மாஹ.
524.Maggāmagge, bho gotamāti magge bho gotama amagge ca, ujumagge ca anujumagge cāti attho. Esa kira ekabrāhmaṇassāpi maggaṃ ‘‘na maggo’’ti na vadati. Yathā pana attano ācariyassa maggo ujumaggo, na evaṃ aññesaṃ anujānāti, tasmā tamevatthaṃ dīpento ‘‘kiñcāpi bho gotamā’’tiādimāha.
ஸப்³பா³னி தானீதி லிங்க³விபல்லாஸேன வத³தி, ஸப்³பே³ தேதி வுத்தங் ஹோதி. ப³ஹூனீதி அட்ட² வா த³ஸ வா. நானாமக்³கா³னீதி மஹந்தாமஹந்தஜங்க⁴மக்³க³ஸகடமக்³கா³தி³வஸேன நானாவிதா⁴னி ஸாமந்தா கா³மனதீ³தளாககெ²த்தாதீ³ஹி ஆக³ந்த்வா கா³மங் பவிஸனமக்³கா³னி.
Sabbāni tānīti liṅgavipallāsena vadati, sabbe teti vuttaṃ hoti. Bahūnīti aṭṭha vā dasa vā. Nānāmaggānīti mahantāmahantajaṅghamaggasakaṭamaggādivasena nānāvidhāni sāmantā gāmanadītaḷākakhettādīhi āgantvā gāmaṃ pavisanamaggāni.
525-526. ‘‘நிய்யந்தீதி வாஸெட்ட² வதே³ஸீ’’தி ப⁴க³வா திக்க²த்துங் வசீபே⁴த³ங் கத்வா படிஞ்ஞங் காராபேஸி. கஸ்மா? தித்தி²யா ஹி படிஜானித்வா பச்சா² நிக்³க³ய்ஹமானா அவஜானந்தி. ஸோ ததா² காதுங் ந ஸக்கி²ஸ்ஸதீதி.
525-526.‘‘Niyyantīti vāseṭṭha vadesī’’ti bhagavā tikkhattuṃ vacībhedaṃ katvā paṭiññaṃ kārāpesi. Kasmā? Titthiyā hi paṭijānitvā pacchā niggayhamānā avajānanti. So tathā kātuṃ na sakkhissatīti.
527-529. தேவ தேவிஜ்ஜாதி தே தேவிஜ்ஜா. வகாரோ ஆக³மஸந்தி⁴மத்தங். அந்த⁴வேணீதி அந்த⁴பவேணீ, ஏகேன சக்கு²மதா க³ஹிதயட்டி²யா கோடிங் ஏகோ அந்தோ⁴ க³ண்ஹதி, தங் அந்த⁴ங் அஞ்ஞோ தங் அஞ்ஞோதி ஏவங் பண்ணாஸஸட்டி² அந்தா⁴ படிபாடியா க⁴டிதா அந்த⁴வேணீதி வுச்சதி. பரம்பரஸங்ஸத்தாதி அஞ்ஞமஞ்ஞங் லக்³கா³, யட்டி²கா³ஹகேனபி சக்கு²மதா விரஹிதாதி அத்தோ². ஏகோ கிர து⁴த்தோ அந்த⁴க³ணங் தி³ஸ்வா ‘‘அஸுகஸ்மிங் நாம கா³மே க²ஜ்ஜபோ⁴ஜ்ஜங் ஸுலப⁴’’ந்தி உஸ்ஸாஹெத்வா ‘‘தேன ஹி தத்த² நோ ஸாமி நேஹி, இத³ங் நாம தே தே³மா’’தி வுத்தே, லஞ்ஜங் க³ஹெத்வா அந்தராமக்³கே³ மக்³கா³ ஓக்கம்ம மஹந்தங் க³ச்ச²ங் அனுபரிக³ந்த்வா புரிமஸ்ஸ ஹத்தே²ன பச்சி²மஸ்ஸ கச்ச²ங் க³ண்ஹாபெத்வா ‘‘கிஞ்சி கம்மங் அத்தி², க³ச்ச²த² தாவ தும்ஹே’’தி வத்வா பலாயி, தே தி³வஸம்பி க³ந்த்வா மக்³க³ங் அவிந்த³மானா ‘‘குஹிங் நோ சக்கு²மா, குஹிங் மக்³கோ³’’தி பரிதே³வித்வா மக்³க³ங் அவிந்த³மானா தத்தே²வ மரிங்ஸு. தே ஸந்தா⁴ய வுத்தங் ‘‘பரம்பரஸங்ஸத்தா’’தி. புரிமோபீதி புரிமேஸு த³ஸஸு ப்³ராஹ்மணேஸு ஏகோபி. மஜ்ஜி²மோபீதி மஜ்ஜி²மேஸு ஆசரியபாசரியேஸு ஏகோபி. பச்சி²மோபீதி இதா³னி தேவிஜ்ஜேஸு ப்³ராஹ்மணேஸு ஏகோபி. ஹஸ்ஸகஞ்ஞேவாதி ஹஸிதப்³ப³மேவ. நாமகஞ்ஞேவாதி லாமகங்யேவ. ததே³தங் அத்தா²பா⁴வேன ரித்தகங், ரித்தகத்தாயேவ துச்ச²கங். இதா³னி ப்³ரஹ்மலோகோ தாவ திட்ட²து, யோ தேவிஜ்ஜேஹி ந தி³ட்ட²புப்³போ³வ. யேபி சந்தி³மஸூரியே தேவிஜ்ஜா பஸ்ஸந்தி, தேஸம்பி ஸஹப்³யதாய மக்³க³ங் தே³ஸேதுங் நப்பஹொந்தீதி த³ஸ்ஸனத்த²ங் ‘‘தங் கிங் மஞ்ஞஸீ’’திஆதி³மாஹ.
527-529.Teva tevijjāti te tevijjā. Vakāro āgamasandhimattaṃ. Andhaveṇīti andhapaveṇī, ekena cakkhumatā gahitayaṭṭhiyā koṭiṃ eko andho gaṇhati, taṃ andhaṃ añño taṃ aññoti evaṃ paṇṇāsasaṭṭhi andhā paṭipāṭiyā ghaṭitā andhaveṇīti vuccati. Paramparasaṃsattāti aññamaññaṃ laggā, yaṭṭhigāhakenapi cakkhumatā virahitāti attho. Eko kira dhutto andhagaṇaṃ disvā ‘‘asukasmiṃ nāma gāme khajjabhojjaṃ sulabha’’nti ussāhetvā ‘‘tena hi tattha no sāmi nehi, idaṃ nāma te demā’’ti vutte, lañjaṃ gahetvā antarāmagge maggā okkamma mahantaṃ gacchaṃ anuparigantvā purimassa hatthena pacchimassa kacchaṃ gaṇhāpetvā ‘‘kiñci kammaṃ atthi, gacchatha tāva tumhe’’ti vatvā palāyi, te divasampi gantvā maggaṃ avindamānā ‘‘kuhiṃ no cakkhumā, kuhiṃ maggo’’ti paridevitvā maggaṃ avindamānā tattheva mariṃsu. Te sandhāya vuttaṃ ‘‘paramparasaṃsattā’’ti. Purimopīti purimesu dasasu brāhmaṇesu ekopi. Majjhimopīti majjhimesu ācariyapācariyesu ekopi. Pacchimopīti idāni tevijjesu brāhmaṇesu ekopi. Hassakaññevāti hasitabbameva. Nāmakaññevāti lāmakaṃyeva. Tadetaṃ atthābhāvena rittakaṃ, rittakattāyeva tucchakaṃ. Idāni brahmaloko tāva tiṭṭhatu, yo tevijjehi na diṭṭhapubbova. Yepi candimasūriye tevijjā passanti, tesampi sahabyatāya maggaṃ desetuṃ nappahontīti dassanatthaṃ ‘‘taṃ kiṃ maññasī’’tiādimāha.
530. தத்த² யதோ சந்தி³மஸூரியா உக்³க³ச்ச²ந்தீதி யஸ்மிங் காலே உக்³க³ச்ச²ந்தி. யத்த² ச ஒக்³க³ச்ச²ந்தீதி யஸ்மிங் காலே அத்த²மெந்தி, உக்³க³மனகாலே ச அத்த²ங்க³மனகாலே ச பஸ்ஸந்தீதி அத்தோ². ஆயாசந்தீதி ‘‘உதே³ஹி ப⁴வங் சந்த³, உதே³ஹி ப⁴வங் ஸூரியா’’தி ஏவங் ஆயாசந்தி. தோ²மயந்தீதி ‘‘ஸொம்மோ சந்தோ³, பரிமண்ட³லோ சந்தோ³, ஸப்பபோ⁴ சந்தோ³’’திஆதீ³னி வத³ந்தா பஸங்ஸந்தி. பஞ்ஜலிகாதி பக்³க³ஹிதஅஞ்ஜலிகா. நமஸ்ஸமானாதி ‘‘நமோ நமோ’’தி வத³மானா.
530. Tattha yato candimasūriyā uggacchantīti yasmiṃ kāle uggacchanti. Yattha ca oggacchantīti yasmiṃ kāle atthamenti, uggamanakāle ca atthaṅgamanakāle ca passantīti attho. Āyācantīti ‘‘udehi bhavaṃ canda, udehi bhavaṃ sūriyā’’ti evaṃ āyācanti. Thomayantīti ‘‘sommo cando, parimaṇḍalo cando, sappabho cando’’tiādīni vadantā pasaṃsanti. Pañjalikāti paggahitaañjalikā. Namassamānāti ‘‘namo namo’’ti vadamānā.
531-532. யங் பஸ்ஸந்தீதி எத்த² யந்தி நிபாதமத்தங். கிங் பன ந கிராதி எத்த² இத⁴ பன கிங் வத்தப்³ப³ங். யத்த² கிர தேவிஜ்ஜேஹி ப்³ராஹ்மணேஹி ந ப்³ரஹ்மா ஸக்கி²தி³ட்டோ²தி ஏவமத்தோ² த³ட்ட²ப்³போ³.
531-532.Yaṃ passantīti ettha yanti nipātamattaṃ. Kiṃ pana na kirāti ettha idha pana kiṃ vattabbaṃ. Yattha kira tevijjehi brāhmaṇehi na brahmā sakkhidiṭṭhoti evamattho daṭṭhabbo.
அசிரவதீனதீ³உபமாகதா²
Aciravatīnadīupamākathā
542. ஸமதித்திகாதி ஸமப⁴ரிதா. காகபெய்யாதி யத்த² கத்த²சி தீரே டி²தேன காகேன ஸக்கா பாதுந்தி காகபெய்யா. பாரங் தரிதுகாமோதி நதி³ங் அதிக்கமித்வா பரதீரங் க³ந்துகாமோ. அவ்ஹெய்யாதி பக்கோஸெய்ய. ஏஹி பாராபாரந்தி அம்போ⁴ பார அபாரங் ஏஹி, அத² மங் ஸஹஸாவ க³ஹெத்வா க³மிஸ்ஸஸி, அத்தி² மே அச்சாயிககம்மந்தி அத்தோ².
542.Samatittikāti samabharitā. Kākapeyyāti yattha katthaci tīre ṭhitena kākena sakkā pātunti kākapeyyā. Pāraṃ taritukāmoti nadiṃ atikkamitvā paratīraṃ gantukāmo. Avheyyāti pakkoseyya. Ehi pārāpāranti ambho pāra apāraṃ ehi, atha maṃ sahasāva gahetvā gamissasi, atthi me accāyikakammanti attho.
544. யே த⁴ம்மா ப்³ராஹ்மணகாரகாதி எத்த² பஞ்சஸீலத³ஸகுஸலகம்மபத²பே⁴தா³ த⁴ம்மா ப்³ராஹ்மணகாரகாதி வேதி³தப்³பா³ , தப்³பி³பரீதா அப்³ராஹ்மணகாரகா. இந்த³மவ்ஹாயாமாதி இந்த³ங் அவ்ஹாயாம பக்கோஸாம. ஏவங் ப்³ராஹ்மணானங் அவ்ஹாயனஸ்ஸ நிரத்த²கதங் த³ஸ்ஸெத்வா புனபி ப⁴க³வா அண்ணவகுச்சி²யங் ஸூரியோ விய ஜலமானோ பஞ்சஸதபி⁴க்கு²பரிவுதோ அசிரவதியா தீரே நிஸின்னோ அபரம்பி நதீ³உபமங்யேவ ஆஹரந்தோ ‘‘ஸெய்யதா²பீ’’திஆதி³மாஹ.
544.Ye dhammā brāhmaṇakārakāti ettha pañcasīladasakusalakammapathabhedā dhammā brāhmaṇakārakāti veditabbā , tabbiparītā abrāhmaṇakārakā. Indamavhāyāmāti indaṃ avhāyāma pakkosāma. Evaṃ brāhmaṇānaṃ avhāyanassa niratthakataṃ dassetvā punapi bhagavā aṇṇavakucchiyaṃ sūriyo viya jalamāno pañcasatabhikkhuparivuto aciravatiyā tīre nisinno aparampi nadīupamaṃyeva āharanto ‘‘seyyathāpī’’tiādimāha.
546. காமகு³ணாதி காமயிதப்³ப³ட்டே²ன காமா, ப³ந்த⁴னட்டே²ன கு³ணா. ‘‘அனுஜானாமி பி⁴க்க²வே, அஹதானங் வத்தா²னங் தி³கு³ணங் ஸங்கா⁴டி’’ந்தி (மஹாவ॰ 348) எத்த² ஹி படலட்டோ² கு³ணட்டோ². ‘‘அச்செந்தி காலா தரயந்தி ரத்தியோ, வயோகு³ணா அனுபுப்³ப³ங் ஜஹந்தீ’’தி எத்த² ராஸட்டோ² கு³ணட்டோ². ‘‘ஸதகு³ணா த³க்கி²ணா பாடிகங்கி²தப்³பா³’’தி (ம॰ நி॰ 3.379) எத்த² ஆனிஸங்ஸட்டோ² கு³ணட்டோ². ‘‘அந்தங் அந்தகு³ணங் (கு²॰ பா॰ 3.1) கயிரா மாலாகு³ணே ப³ஹூ’’தி (த⁴॰ ப॰ 53) ச எத்த² ப³ந்த⁴னட்டோ² கு³ணட்டோ². இதா⁴பி ஏஸேவ அதி⁴ப்பேதோ. தேன வுத்தங் ‘‘ப³ந்த⁴னட்டே²ன கு³ணா’’தி. சக்கு²விஞ்ஞெய்யாதி சக்கு²விஞ்ஞாணேன பஸ்ஸிதப்³பா³. ஏதேனுபாயேன ஸோதவிஞ்ஞெய்யாதீ³ஸுபி அத்தோ² வேதி³தப்³போ³. இட்டா²தி பரியிட்டா² வா ஹொந்து, மா வா, இட்டா²ரம்மணபூ⁴தாதி அத்தோ². கந்தாதி காமனீயா. மனாபாதி மனவட்³ட⁴னகா. பியரூபாதி பியஜாதிகா. காமூபஸஞ்ஹிதாதி ஆரம்மணங் கத்வா உப்பஜ்ஜமானேன காமேன உபஸஞ்ஹிதா. ரஜனீயாதி ரஞ்ஜனீயா, ராகு³ப்பத்திகாரணபூ⁴தாதி அத்தோ².
546.Kāmaguṇāti kāmayitabbaṭṭhena kāmā, bandhanaṭṭhena guṇā. ‘‘Anujānāmi bhikkhave, ahatānaṃ vatthānaṃ diguṇaṃ saṅghāṭi’’nti (mahāva. 348) ettha hi paṭalaṭṭho guṇaṭṭho. ‘‘Accenti kālā tarayanti rattiyo, vayoguṇā anupubbaṃ jahantī’’ti ettha rāsaṭṭho guṇaṭṭho. ‘‘Sataguṇā dakkhiṇā pāṭikaṅkhitabbā’’ti (ma. ni. 3.379) ettha ānisaṃsaṭṭho guṇaṭṭho. ‘‘Antaṃ antaguṇaṃ (khu. pā. 3.1) kayirā mālāguṇe bahū’’ti (dha. pa. 53) ca ettha bandhanaṭṭho guṇaṭṭho. Idhāpi eseva adhippeto. Tena vuttaṃ ‘‘bandhanaṭṭhena guṇā’’ti. Cakkhuviññeyyāti cakkhuviññāṇena passitabbā. Etenupāyena sotaviññeyyādīsupi attho veditabbo. Iṭṭhāti pariyiṭṭhā vā hontu, mā vā, iṭṭhārammaṇabhūtāti attho. Kantāti kāmanīyā. Manāpāti manavaḍḍhanakā. Piyarūpāti piyajātikā. Kāmūpasañhitāti ārammaṇaṃ katvā uppajjamānena kāmena upasañhitā. Rajanīyāti rañjanīyā, rāguppattikāraṇabhūtāti attho.
க³தி⁴தாதி கே³தே⁴ன அபி⁴பூ⁴தா ஹுத்வா. முச்சி²தாதி முச்சா²காரப்பத்தாய அதி⁴மத்தகாய தண்ஹாய அபி⁴பூ⁴தா. அஜ்ஜோ²பன்னாதி அதி⁴ஓபன்னா ஓகா³ள்ஹா ‘‘இத³ங் ஸார’’ந்தி பரினிட்டா²னப்பத்தா ஹுத்வா. அனாதீ³னவத³ஸ்ஸாவினோதி ஆதீ³னவங் அபஸ்ஸந்தா. அனிஸ்ஸரணபஞ்ஞாதி இத³மெத்த² நிஸ்ஸரணந்தி, ஏவங் பரிஜானநபஞ்ஞாவிரஹிதா, பச்சவெக்க²ணபரிபோ⁴க³விரஹிதாதி அத்தோ².
Gadhitāti gedhena abhibhūtā hutvā. Mucchitāti mucchākārappattāya adhimattakāya taṇhāya abhibhūtā. Ajjhopannāti adhiopannā ogāḷhā ‘‘idaṃ sāra’’nti pariniṭṭhānappattā hutvā. Anādīnavadassāvinoti ādīnavaṃ apassantā. Anissaraṇapaññāti idamettha nissaraṇanti, evaṃ parijānanapaññāvirahitā, paccavekkhaṇaparibhogavirahitāti attho.
548. ஆவரணாதிஆதீ³ஸு ஆவரந்தீதி ஆவரணா. நிவாரெந்தீதி நீவரணா. ஓனந்த⁴ந்தீதி ஓனாஹனா. பரியோனந்த⁴ந்தீதி பரியோனாஹனா. காமச்ச²ந்தா³தீ³னங் வித்தா²ரகதா² விஸுத்³தி⁴மக்³க³தோ க³ஹேதப்³பா³.
548.Āvaraṇātiādīsu āvarantīti āvaraṇā. Nivārentīti nīvaraṇā. Onandhantīti onāhanā. Pariyonandhantīti pariyonāhanā. Kāmacchandādīnaṃ vitthārakathā visuddhimaggato gahetabbā.
549-550. ஆவுதா நிவுதா ஓனத்³தா⁴ பரியோனத்³தா⁴தி பதா³னி ஆவரணாதீ³னங் வஸேன வுத்தானி. ஸபரிக்³க³ஹோதி இத்தி²பரிக்³க³ஹேன ஸபரிக்³க³ஹோதி புச்ச²தி. அபரிக்³க³ஹோ போ⁴ கோ³தமாதிஆதீ³ஸுபி காமச்ச²ந்த³ஸ்ஸ அபா⁴வதோ இத்தி²பரிக்³க³ஹேன அபரிக்³க³ஹோ. ப்³யாபாத³ஸ்ஸ அபா⁴வதோ கேனசி ஸத்³தி⁴ங் வேரசித்தேன அவேரோ. தி²னமித்³த⁴ஸ்ஸ அபா⁴வதோ சித்தகே³லஞ்ஞஸங்கா²தேன ப்³யாபஜ்ஜேன அப்³யாபஜ்ஜோ. உத்³த⁴ச்சகுக்குச்சாபா⁴வதோ உத்³த⁴ச்சகுக்குச்சாதீ³ஹி ஸங்கிலேஸேஹி அஸங்கிலிட்ட²சித்தோ ஸுபரிஸுத்³த⁴மானஸோ. விசிகிச்சா²ய அபா⁴வதோ சித்தங் வஸே வத்தேதி. யதா² ச ப்³ராஹ்மணா சித்தக³திகா ஹொந்தீதி, சித்தஸ்ஸ வஸேன வத்தந்தி, ந தாதி³ஸோதி வஸவத்தீ.
549-550.Āvutā nivutā onaddhā pariyonaddhāti padāni āvaraṇādīnaṃ vasena vuttāni. Sapariggahoti itthipariggahena sapariggahoti pucchati. Apariggaho bho gotamātiādīsupi kāmacchandassa abhāvato itthipariggahena apariggaho. Byāpādassa abhāvato kenaci saddhiṃ veracittena avero. Thinamiddhassa abhāvato cittagelaññasaṅkhātena byāpajjena abyāpajjo. Uddhaccakukkuccābhāvato uddhaccakukkuccādīhi saṃkilesehi asaṃkiliṭṭhacitto suparisuddhamānaso. Vicikicchāya abhāvato cittaṃ vase vatteti. Yathā ca brāhmaṇā cittagatikā hontīti, cittassa vasena vattanti, na tādisoti vasavattī.
552. இத⁴ கோ² பனாதி இத⁴ ப்³ரஹ்மலோகமக்³கே³. ஆஸீதி³த்வாதி அமக்³க³மேவ ‘‘மக்³கோ³’’தி உபக³ந்த்வா. ஸங்ஸீத³ந்தீதி ‘‘ஸமதல’’ந்தி ஸஞ்ஞாய பங்கங் ஓதிண்ணா விய அனுப்பவிஸந்தி. ஸங்ஸீதி³த்வா விஸாரங் பாபுணந்தீதி ஏவங் பங்கே விய ஸங்ஸீதி³த்வா விஸாரங் அங்க³மங்க³ஸங்ப⁴ஞ்ஜனங் பாபுணந்தி. ஸுக்க²தரங் மஞ்ஞே தரந்தீதி மரீசிகாய வஞ்செத்வா ‘‘காகபெய்யா நதீ³’’தி ஸஞ்ஞாய ‘‘தரிஸ்ஸாமா’’தி ஹத்தே²ஹி ச பாதே³ஹி ச வாயமமானா ஸுக்க²தரணங் மஞ்ஞே தரந்தி. தஸ்மா யதா² ஹத்த²பாதா³தீ³னங் ஸங்ப⁴ஞ்ஜனங் பரிப⁴ஞ்ஜனங், ஏவங் அபாயேஸு ஸங்ப⁴ஞ்ஜனங் பரிப⁴ஞ்ஜனங் பாபுணந்தி. இதே⁴வ ச ஸுக²ங் வா ஸாதங் வா ந லப⁴ந்தி. தஸ்மா இத³ங் தேவிஜ்ஜானங் ப்³ராஹ்மணானந்தி தஸ்மா இத³ங் ப்³ரஹ்மஸஹப்³யதாய மக்³க³தீ³பகங் தேவிஜ்ஜகங் பாவசனங் தேவிஜ்ஜானங் ப்³ராஹ்மணானங். தேவிஜ்ஜாஇரிணந்தி தேவிஜ்ஜாஅரஞ்ஞங் இரிணந்தி ஹி அகா³மகங் மஹாஅரஞ்ஞங் வுச்சதி. தேவிஜ்ஜாவிவனந்தி புப்ப²ப²லேஹி அபரிபோ⁴க³ருக்கே²ஹி ஸஞ்ச²ன்னங் நிருத³கங் அரஞ்ஞங் . யத்த² மக்³க³தோ உக்கமித்வா பரிவத்திதும்பி ந ஸக்கா ஹொந்தி, தங் ஸந்தா⁴யாஹ ‘‘தேவிஜ்ஜாவிவனந்திபி வுச்சதீ’’தி. தேவிஜ்ஜாப்³யஸனந்தி தேவிஜ்ஜானங் பஞ்சவித⁴ப்³யஸனஸதி³ஸமேதங். யதா² ஹி ஞாதிரோக³போ⁴க³ தி³ட்டி² ஸீலப்³யஸனப்பத்தஸ்ஸ ஸுக²ங் நாம நத்தி², ஏவங் தேவிஜ்ஜானங் தேவிஜ்ஜகங் பாவசனங் ஆக³ம்ம ஸுக²ங் நாம நத்தீ²தி த³ஸ்ஸேதி.
552.Idhakho panāti idha brahmalokamagge. Āsīditvāti amaggameva ‘‘maggo’’ti upagantvā. Saṃsīdantīti ‘‘samatala’’nti saññāya paṅkaṃ otiṇṇā viya anuppavisanti. Saṃsīditvā visāraṃ pāpuṇantīti evaṃ paṅke viya saṃsīditvā visāraṃ aṅgamaṅgasaṃbhañjanaṃ pāpuṇanti. Sukkhataraṃ maññe tarantīti marīcikāya vañcetvā ‘‘kākapeyyā nadī’’ti saññāya ‘‘tarissāmā’’ti hatthehi ca pādehi ca vāyamamānā sukkhataraṇaṃ maññe taranti. Tasmā yathā hatthapādādīnaṃ saṃbhañjanaṃ paribhañjanaṃ, evaṃ apāyesu saṃbhañjanaṃ paribhañjanaṃ pāpuṇanti. Idheva ca sukhaṃ vā sātaṃ vā na labhanti. Tasmā idaṃ tevijjānaṃ brāhmaṇānanti tasmā idaṃ brahmasahabyatāya maggadīpakaṃ tevijjakaṃ pāvacanaṃ tevijjānaṃ brāhmaṇānaṃ. Tevijjāiriṇanti tevijjāaraññaṃ iriṇanti hi agāmakaṃ mahāaraññaṃ vuccati. Tevijjāvivananti pupphaphalehi aparibhogarukkhehi sañchannaṃ nirudakaṃ araññaṃ . Yattha maggato ukkamitvā parivattitumpi na sakkā honti, taṃ sandhāyāha ‘‘tevijjāvivanantipi vuccatī’’ti. Tevijjābyasananti tevijjānaṃ pañcavidhabyasanasadisametaṃ. Yathā hi ñātirogabhoga diṭṭhi sīlabyasanappattassa sukhaṃ nāma natthi, evaṃ tevijjānaṃ tevijjakaṃ pāvacanaṃ āgamma sukhaṃ nāma natthīti dasseti.
554. ஜாதஸங்வட்³டோ⁴தி ஜாதோ ச வட்³டி⁴தோ ச, யோ ஹி கேவலங் தத்த² ஜாதோவ ஹோதி, அஞ்ஞத்த² வட்³டி⁴தோ, தஸ்ஸ ஸமந்தா கா³மமக்³கா³ ந ஸப்³ப³ஸோ பச்சக்கா² ஹொந்தி, தஸ்மா ஜாதஸங்வட்³டோ⁴தி ஆஹ. ஜாதஸங்வட்³டோ⁴பி யோ சிரனிக்க²ந்தோ, தஸ்ஸ ந ஸப்³ப³ஸோ பச்சக்கா² ஹொந்தி. தஸ்மா ‘‘தாவதே³வ அவஸட’’ந்தி ஆஹ, தங்க²ணமேவ நிக்க²ந்தந்தி அத்தோ². த³ந்தா⁴யிதத்தந்தி அயங் நு கோ² மக்³கோ³, அயங் ந நுகோ²தி கங்கா²வஸேன சிராயிதத்தங். வித்தா²யிதத்தந்தி யதா² ஸுகு²மங் அத்த²ஜாதங் ஸஹஸா புச்சி²தஸ்ஸ கஸ்ஸசி ஸரீரங் த²த்³த⁴பா⁴வங் க³ண்ஹாதி, ஏவங் த²த்³த⁴பா⁴வக்³க³ஹணங். ந த்வேவாதி இமினா ஸப்³ப³ஞ்ஞுதஞ்ஞாணஸ்ஸ அப்படிஹதபா⁴வங் த³ஸ்ஸேதி. தஸ்ஸ ஹி புரிஸஸ்ஸ மாராவட்டனாதி³வஸேன ஸியா ஞாணஸ்ஸ படிகா⁴தோ. தேன ஸோ த³ந்தா⁴யெய்ய வா வித்தா²யெய்ய வா. ஸப்³ப³ஞ்ஞுதஞ்ஞாணங் பன அப்படிஹதங், ந ஸக்கா தஸ்ஸ கேனசி அந்தராயோ காதுந்தி தீ³பேதி.
554.Jātasaṃvaḍḍhoti jāto ca vaḍḍhito ca, yo hi kevalaṃ tattha jātova hoti, aññattha vaḍḍhito, tassa samantā gāmamaggā na sabbaso paccakkhā honti, tasmā jātasaṃvaḍḍhoti āha. Jātasaṃvaḍḍhopi yo ciranikkhanto, tassa na sabbaso paccakkhā honti. Tasmā ‘‘tāvadeva avasaṭa’’nti āha, taṅkhaṇameva nikkhantanti attho. Dandhāyitattanti ayaṃ nu kho maggo, ayaṃ na nukhoti kaṅkhāvasena cirāyitattaṃ. Vitthāyitattanti yathā sukhumaṃ atthajātaṃ sahasā pucchitassa kassaci sarīraṃ thaddhabhāvaṃ gaṇhāti, evaṃ thaddhabhāvaggahaṇaṃ. Na tvevāti iminā sabbaññutaññāṇassa appaṭihatabhāvaṃ dasseti. Tassa hi purisassa mārāvaṭṭanādivasena siyā ñāṇassa paṭighāto. Tena so dandhāyeyya vā vitthāyeyya vā. Sabbaññutaññāṇaṃ pana appaṭihataṃ, na sakkā tassa kenaci antarāyo kātunti dīpeti.
555. உல்லும்பது ப⁴வங் கோ³தமோதி உத்³த⁴ரது ப⁴வங் கோ³தமோ. ப்³ராஹ்மணிங் பஜந்தி ப்³ராஹ்மணதா³ரகங், ப⁴வங் கோ³தமோ மம ப்³ராஹ்மணபுத்தங் அபாயமக்³க³தோ உத்³த⁴ரித்வா ப்³ரஹ்மலோகமக்³கே³ பதிட்ட²பேதூதி அத்தோ². அத²ஸ்ஸ ப⁴க³வா பு³த்³து⁴ப்பாத³ங் த³ஸ்ஸெத்வா ஸத்³தி⁴ங் புப்³ப³பா⁴க³படிபதா³ய மெத்தாவிஹாராதி³ப்³ரஹ்மலோககா³மிமக்³க³ங் தே³ஸேதுகாமோ ‘‘தேன ஹி வாஸெட்டா²’’திஆதி³மாஹ. தத்த² ‘‘இத⁴ ததா²க³தோ’’திஆதி³ ஸாமஞ்ஞப²லே வித்தா²ரிதங். மெத்தாஸஹக³தேனாதிஆதீ³ஸு யங் வத்தப்³ப³ங், தங் ஸப்³ப³ங் விஸுத்³தி⁴மக்³கே³ ப்³ரஹ்மவிஹாரகம்மட்டா²னகதா²யங் வுத்தங். ஸெய்யதா²பி வாஸெட்ட² ப³லவா ஸங்க²த⁴மோதிஆதி³ பன இத⁴ அபுப்³ப³ங். தத்த² ப³லவாதி ப³லஸம்பன்னோ. ஸங்க²த⁴மோதி ஸங்க²த⁴மகோ. அப்பகஸிரேனாதி அகிச்சே²ன அது³க்கே²ன. து³ப்³ப³லோ ஹி ஸங்க²த⁴மோ ஸங்க²ங் த⁴மந்தோபி ந ஸக்கோதி சதஸ்ஸோ தி³ஸா ஸரேன விஞ்ஞாபேதுங், நாஸ்ஸ ஸங்க²ஸத்³தோ³ ஸப்³ப³தோ ப²ரதி. ப³லவதோ பன விப்பா²ரிகோ ஹோதி, தஸ்மா ‘‘ப³லவா’’திஆதி³மாஹ. மெத்தாய சேதோவிமுத்தியாதி எத்த² மெத்தாதி வுத்தே உபசாரோபி அப்பனாபி வட்டதி, ‘‘செத்தோவிமுத்தீ’’தி வுத்தே பன அப்பனாவ வட்டதி. யங் பமாணகதங் கம்மந்தி பமாணகதங் கம்மங் நாம காமாவசரங் வுச்சதி. அப்பமாணகதங் கம்மங் நாம ரூபாரூபாவசரங். தஞ்ஹி பமாணங் அதிக்கமித்வா ஓதி³ஸ்ஸகஅனோதி³ஸ்ஸகதி³ஸாப²ரணவஸேன வட்³டெ⁴த்வா கதத்தா அப்பமாணகதந்தி வுச்சதி. ந தங் தத்ராவஸிஸ்ஸதி ந தங் தத்ராவதிட்ட²தீதி தங் காமாவசரகம்மங் தஸ்மிங் ரூபாவசராரூபாவசரகம்மே ந ஓஹீயதி, ந திட்ட²தி. கிங் வுத்தங் ஹோதி – தங் காமாவசரகம்மங் தஸ்ஸ ரூபாரூபாவசரகம்மஸ்ஸ அந்தரா லக்³கி³துங் வா டா²துங் வா ரூபாரூபாவசரகம்மங் ப²ரித்வா பரியாதி³யித்வா அத்தனோ ஓகாஸங் க³ஹெத்வா பதிட்டா²துங் ந ஸக்கோதி. அத² கோ² ரூபாவசராரூபாவசரகம்மமேவ காமாவசரங் மஹோகோ⁴ விய பரித்தங் உத³கங் ப²ரித்வா பரியாதி³யித்வா அத்தனோ ஓகாஸங் க³ஹெத்வா திட்ட²தி. தஸ்ஸ விபாகங் படிபா³ஹித்வா ஸயமேவ ப்³ரஹ்மஸஹப்³யதங் உபனேதீதி. ஏவங்விஹாரீதி ஏவங் மெத்தாதி³விஹாரீ.
555.Ullumpatu bhavaṃ gotamoti uddharatu bhavaṃ gotamo. Brāhmaṇiṃ pajanti brāhmaṇadārakaṃ, bhavaṃ gotamo mama brāhmaṇaputtaṃ apāyamaggato uddharitvā brahmalokamagge patiṭṭhapetūti attho. Athassa bhagavā buddhuppādaṃ dassetvā saddhiṃ pubbabhāgapaṭipadāya mettāvihārādibrahmalokagāmimaggaṃ desetukāmo ‘‘tena hi vāseṭṭhā’’tiādimāha. Tattha ‘‘idha tathāgato’’tiādi sāmaññaphale vitthāritaṃ. Mettāsahagatenātiādīsu yaṃ vattabbaṃ, taṃ sabbaṃ visuddhimagge brahmavihārakammaṭṭhānakathāyaṃ vuttaṃ. Seyyathāpi vāseṭṭha balavā saṅkhadhamotiādi pana idha apubbaṃ. Tattha balavāti balasampanno. Saṅkhadhamoti saṅkhadhamako. Appakasirenāti akicchena adukkhena. Dubbalo hi saṅkhadhamo saṅkhaṃ dhamantopi na sakkoti catasso disā sarena viññāpetuṃ, nāssa saṅkhasaddo sabbato pharati. Balavato pana vipphāriko hoti, tasmā ‘‘balavā’’tiādimāha. Mettāya cetovimuttiyāti ettha mettāti vutte upacāropi appanāpi vaṭṭati, ‘‘cettovimuttī’’ti vutte pana appanāva vaṭṭati. Yaṃ pamāṇakataṃ kammanti pamāṇakataṃ kammaṃ nāma kāmāvacaraṃ vuccati. Appamāṇakataṃ kammaṃ nāma rūpārūpāvacaraṃ. Tañhi pamāṇaṃ atikkamitvā odissakaanodissakadisāpharaṇavasena vaḍḍhetvā katattā appamāṇakatanti vuccati. Na taṃ tatrāvasissati na taṃ tatrāvatiṭṭhatīti taṃ kāmāvacarakammaṃ tasmiṃ rūpāvacarārūpāvacarakamme na ohīyati, na tiṭṭhati. Kiṃ vuttaṃ hoti – taṃ kāmāvacarakammaṃ tassa rūpārūpāvacarakammassa antarā laggituṃ vā ṭhātuṃ vā rūpārūpāvacarakammaṃ pharitvā pariyādiyitvā attano okāsaṃ gahetvā patiṭṭhātuṃ na sakkoti. Atha kho rūpāvacarārūpāvacarakammameva kāmāvacaraṃ mahogho viya parittaṃ udakaṃ pharitvā pariyādiyitvā attano okāsaṃ gahetvā tiṭṭhati. Tassa vipākaṃ paṭibāhitvā sayameva brahmasahabyataṃ upanetīti. Evaṃvihārīti evaṃ mettādivihārī.
559. ஏதே மயங் ப⁴வந்தங் கோ³தமந்தி இத³ங் தேஸங் து³தியங் ஸரணக³மனங். பட²மமேவ ஹேதே மஜ்ஜி²மபண்ணாஸகே வாஸெட்ட²ஸுத்தங் ஸுத்வா ஸரணங் க³தா, இமங் பன தேவிஜ்ஜஸுத்தங் ஸுத்வா து³தியம்பி ஸரணங் க³தா. கதிபாஹச்சயேன பப்³ப³ஜித்வா அக்³க³ஞ்ஞஸுத்தே உபஸம்பத³ஞ்சேவ அரஹத்தஞ்ச அலத்து²ங். ஸேஸங் ஸப்³ப³த்த² உத்தானமேவாதி.
559.Etemayaṃ bhavantaṃ gotamanti idaṃ tesaṃ dutiyaṃ saraṇagamanaṃ. Paṭhamameva hete majjhimapaṇṇāsake vāseṭṭhasuttaṃ sutvā saraṇaṃ gatā, imaṃ pana tevijjasuttaṃ sutvā dutiyampi saraṇaṃ gatā. Katipāhaccayena pabbajitvā aggaññasutte upasampadañceva arahattañca alatthuṃ. Sesaṃ sabbattha uttānamevāti.
இதி ஸுமங்க³லவிலாஸினியா தீ³க⁴னிகாயட்ட²கதா²யங்
Iti sumaṅgalavilāsiniyā dīghanikāyaṭṭhakathāyaṃ
தேவிஜ்ஜஸுத்தவண்ணனா நிட்டி²தா.
Tevijjasuttavaṇṇanā niṭṭhitā.
நிட்டி²தா ச தேரஸஸுத்தபடிமண்டி³தஸ்ஸ ஸீலக்க²ந்த⁴வக்³க³ஸ்ஸ
Niṭṭhitā ca terasasuttapaṭimaṇḍitassa sīlakkhandhavaggassa
அத்த²வண்ணனாதி.
Atthavaṇṇanāti.
ஸீலக்க²ந்த⁴வக்³க³ட்ட²கதா² நிட்டி²தா.
Sīlakkhandhavaggaṭṭhakathā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / தீ³க⁴னிகாய • Dīghanikāya / 13. தேவிஜ்ஜஸுத்தங் • 13. Tevijjasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 13. தேவிஜ்ஜஸுத்தவண்ணனா • 13. Tevijjasuttavaṇṇanā
