| Library / Tipiṭaka / திபிடக • Tipiṭaka / தீ³க⁴னிகாய (டீகா) • Dīghanikāya (ṭīkā) |
13. தேவிஜ்ஜஸுத்தவண்ணனா
13. Tevijjasuttavaṇṇanā
518. உத்தரேனாதி எத்த² ஏன-ஸத்³தோ³ தி³ஸாவாசீஸத்³த³தோ பஞ்சமீஅந்ததோ அதூ³ரத்தோ² இச்சி²தோ, தஸ்மா உத்தரேன-ஸத்³தே³ன அதூ³ரத்த²ஜோதனங் த³ஸ்ஸெந்தோ ‘‘அதூ³ரே உத்தரபஸ்ஸே’’தி ஆஹ. அக்க²ரசிந்தகா பன ஏன-ஸத்³த³யோகே³ அவதி⁴வாசினி பதே³ உபயோக³வசனங் இச்ச²ந்தி. அத்தோ² பன ஸாமிவஸேனேவ இச்சி²தோதி இத⁴ ஸாமிவசனவஸேனேவ வுத்தங்.
518.Uttarenāti ettha ena-saddo disāvācīsaddato pañcamīantato adūrattho icchito, tasmā uttarena-saddena adūratthajotanaṃ dassento ‘‘adūre uttarapasse’’ti āha. Akkharacintakā pana ena-saddayoge avadhivācini pade upayogavacanaṃ icchanti. Attho pana sāmivaseneva icchitoti idha sāmivacanavaseneva vuttaṃ.
519. குலசாரித்தாதீ³தி ஆதி³-ஸத்³தே³ன மந்தஜ்ஜே²னாபி⁴ரூபதாதி³ஸம்பத்திங் ஸங்க³ண்ஹாதி. மந்தஸஜ்ஜா²யகரணத்த²ந்தி ஆத²ப்³ப³ணமந்தானங் ஸஜ்ஜா²யகரணத்த²ங், தேனாஹ ‘‘அஞ்ஞேஸங் ப³ஹூனங் பவேஸனங் நிவாரெத்வா’’தி.
519.Kulacārittādīti ādi-saddena mantajjhenābhirūpatādisampattiṃ saṅgaṇhāti. Mantasajjhāyakaraṇatthanti āthabbaṇamantānaṃ sajjhāyakaraṇatthaṃ, tenāha ‘‘aññesaṃ bahūnaṃ pavesanaṃ nivāretvā’’ti.
மக்³கா³மக்³க³கதா²வண்ணனா
Maggāmaggakathāvaṇṇanā
520. ‘‘ஜங்க⁴சார’’ந்தி சங்கமதோ இதோ சிதோ ச சரணமாஹ. ஸோ ஹி ஜங்கா⁴ஸு கிலமத²வினோத³னத்தோ² சாரோதி ததா² வுத்தோ. தேனாஹ ‘‘அனுசங்கமந்தானங் அனுவிசரந்தான’’ந்தி. தேனாதி உபோ⁴ஸுபி அனுசங்கமனானுவிசாரணானங் லப்³ப⁴னதோ. ஸஹாயா ஹி தே அஞ்ஞமஞ்ஞ ஸபா⁴க³வுத்திகா. ‘‘மக்³கோ³’’தி இச்சி²தட்டா²னங் உஜுகங் மக்³க³தி உபக³ச்ச²தி ஏதேனாதி மக்³கோ³, உஜுமக்³கோ³. தத³ஞ்ஞோ அமக்³கோ³, தஸ்மிங் மக்³கே³ ச அமக்³கே³ ச. படிபத³ந்தி ப்³ரஹ்மலோககா³மிமக்³க³ஸ்ஸ புப்³ப³பா⁴க³படிபத³ங்.
520.‘‘Jaṅghacāra’’nti caṅkamato ito cito ca caraṇamāha. So hi jaṅghāsu kilamathavinodanattho cāroti tathā vutto. Tenāha ‘‘anucaṅkamantānaṃ anuvicarantāna’’nti. Tenāti ubhosupi anucaṅkamanānuvicāraṇānaṃ labbhanato. Sahāyā hi te aññamañña sabhāgavuttikā. ‘‘Maggo’’ti icchitaṭṭhānaṃ ujukaṃ maggati upagacchati etenāti maggo, ujumaggo. Tadañño amaggo, tasmiṃ magge ca amagge ca. Paṭipadanti brahmalokagāmimaggassa pubbabhāgapaṭipadaṃ.
நிய்யாதீதி நிய்யானீயோ, ஸோ ஏவ ‘‘நிய்யானிகோ’’தி வுத்தோதி ஆஹ ‘‘நிய்யாயந்தோ’’தி. யஸ்மா நிய்யாதபுக்³க³லவஸேனஸ்ஸ நிய்யானிகபா⁴வோ , தஸ்மா ‘‘நிய்யாயந்தோ’’தி புக்³க³லஸ்ஸ யோனிஸோ படிபஜ்ஜனவஸேன நிய்யாயந்தோ மக்³கோ³ ‘‘நிய்யாதீ’’தி வுத்தோ. கரோதீதி அத்தனோ ஸந்தானே உப்பாதே³தி. உப்பாதெ³ந்தோயேவ ஹி தத்த² படிபஜ்ஜதி நாம. ஸஹ ப்³யேதி வத்ததீதி ஸஹப்³யோ, ஸஹவத்தனகோ . தஸ்ஸ பா⁴வோ ஸஹப்³யதாதி ஆஹ ‘‘ஸஹபா⁴வாயா’’திஆதி³. ஸஹபா⁴வோதி ச ஸலோகதா, ஸமீபதா வா வேதி³தப்³பா³, தேனாஹ ‘‘ஏகட்டா²னே பாதுபா⁴வாயா’’தி. ஸகமேவ ஆசரியவாத³ந்தி அத்தனோ ஆசரியேன பொக்க²ரஸாதினா கதி²தமேவ ஆசரியவாத³ங். தோ²மெத்வா பக்³க³ண்ஹித்வா ‘‘அயமேவ உஜுமக்³கோ³ அயமஞ்ஜஸாயனோ’’தி பஸங்ஸித்வா உக்கங்ஸித்வா. பா⁴ரத்³வாஜோபி ஸகமேவாதி பா⁴ரத்³வாஜோபி மாணவோ அத்தனோ ஆசரியேன தாருக்கே²ன கதி²தமேவ ஆசரியவாத³ங் தோ²மெத்வா பக்³க³ண்ஹித்வா விசரதீதி யோஜனா. தேன வுத்தந்தி தேன யதா² ததா² வா அபி⁴னிவிட்ட²பா⁴வேன வுத்தங் பாளியங்.
Niyyātīti niyyānīyo, so eva ‘‘niyyāniko’’ti vuttoti āha ‘‘niyyāyanto’’ti. Yasmā niyyātapuggalavasenassa niyyānikabhāvo , tasmā ‘‘niyyāyanto’’ti puggalassa yoniso paṭipajjanavasena niyyāyanto maggo ‘‘niyyātī’’ti vutto. Karotīti attano santāne uppādeti. Uppādentoyeva hi tattha paṭipajjati nāma. Saha byeti vattatīti sahabyo, sahavattanako . Tassa bhāvo sahabyatāti āha ‘‘sahabhāvāyā’’tiādi. Sahabhāvoti ca salokatā, samīpatā vā veditabbā, tenāha ‘‘ekaṭṭhāne pātubhāvāyā’’ti. Sakameva ācariyavādanti attano ācariyena pokkharasātinā kathitameva ācariyavādaṃ. Thometvā paggaṇhitvā ‘‘ayameva ujumaggo ayamañjasāyano’’ti pasaṃsitvā ukkaṃsitvā. Bhāradvājopisakamevāti bhāradvājopi māṇavo attano ācariyena tārukkhena kathitameva ācariyavādaṃ thometvā paggaṇhitvā vicaratīti yojanā. Tena vuttanti tena yathā tathā vā abhiniviṭṭhabhāvena vuttaṃ pāḷiyaṃ.
521-2. அனிய்யானிகா வாதி அப்பாடிஹாரியாவ அஞ்ஞமஞ்ஞஸ்ஸ வாதே³ தோ³ஸங் த³ஸ்ஸெத்வா அவிபரீதத்த²த³ஸ்ஸனத்த²ங் உத்தரரஹிதா ஏவ. அஞ்ஞமஞ்ஞஸ்ஸ வாத³ஸ்ஸ ஆதி³தோ விருத்³த⁴க்³க³ஹணங் விக்³க³ஹோ, ஸ்வேவ விவத³னவஸேன அபராபரங் உப்பன்னோ விவாதோ³தி ஆஹ ‘‘புப்³பு³ப்பத்திகோ விக்³க³ஹோ அபரபா⁴கே³ விவாதோ³’’தி. து³விதோ⁴பி ஏஸோ விக்³க³ஹோ, விவாதோ³தி த்³விதா⁴ வுத்தோபி விரோதோ⁴. நானாஆசரியானங் வாத³தோதி நானாருசிகானங் ஆசரியானங் வாத³பா⁴வதோ. நானாவாதோ³ நானாவிதோ⁴ வாதோ³தி கத்வா.
521-2.Aniyyānikā vāti appāṭihāriyāva aññamaññassa vāde dosaṃ dassetvā aviparītatthadassanatthaṃ uttararahitā eva. Aññamaññassa vādassa ādito viruddhaggahaṇaṃ viggaho, sveva vivadanavasena aparāparaṃ uppanno vivādoti āha ‘‘pubbuppattiko viggaho aparabhāge vivādo’’ti. Duvidhopi eso viggaho, vivādoti dvidhā vuttopi virodho. Nānāācariyānaṃ vādatoti nānārucikānaṃ ācariyānaṃ vādabhāvato. Nānāvādo nānāvidho vādoti katvā.
523. ஏகஸ்ஸாபீதி தும்ஹேஸு த்³வீஸு ஏகஸ்ஸாபி. ஏகஸ்மிந்தி ஸகவாத³பரவாதே³ஸு ஏகஸ்மிம்பி. ஸங்ஸயோ நத்தீ²தி ‘‘மக்³கோ³ நு கோ², ந மக்³கோ³ நு கோ²’’தி ஸங்ஸயோ விசிகிச்சா² நத்தி². அஞ்ஜஸாயனபா⁴வே பன ஸங்ஸயோ. தேனாஹ ‘‘ஏஸ கிரா’’திஆதி³. ப⁴க³வா பன யதி³ ஸப்³ப³த்த² மக்³க³ஸஞ்ஞினோ, ஏவங் ஸதி ‘‘கிஸ்மிங் வோ விக்³க³ஹோ’’தி புச்ச²தி.
523.Ekassāpīti tumhesu dvīsu ekassāpi. Ekasminti sakavādaparavādesu ekasmimpi. Saṃsayo natthīti ‘‘maggo nu kho, na maggo nu kho’’ti saṃsayo vicikicchā natthi. Añjasāyanabhāve pana saṃsayo. Tenāha ‘‘esa kirā’’tiādi. Bhagavā pana yadi sabbattha maggasaññino, evaṃ sati ‘‘kismiṃ vo viggaho’’ti pucchati.
524. ‘‘இச்சி²தட்டா²னங் உஜுகங் மக்³க³தி உபக³ச்ச²தி ஏதேனாதி மக்³கோ³, உஜுமக்³கோ³. தத³ஞ்ஞோ அமக்³கோ³’’தி வுத்தோ வாயமத்தோ². ஸப்³பே³ தேதி ஸப்³பே³பி தே நானாஆசரியேஹி வுத்தமக்³கா³.
524. ‘‘Icchitaṭṭhānaṃ ujukaṃ maggati upagacchati etenāti maggo, ujumaggo. Tadañño amaggo’’ti vutto vāyamattho. Sabbe teti sabbepi te nānāācariyehi vuttamaggā.
யே பாளியங் ‘‘அத்³த⁴ரியா ப்³ராஹ்மணா’’திஆதி³னா வுத்தா. அத்³த⁴ரோ நாம யஞ்ஞவிஸேஸோ, தது³பயோகி³பா⁴வதோ ‘‘அத்³த⁴ரியா’’ த்வேவ வுச்சந்தி யஜூனி, தானி ஸஜ்ஜா²யந்தீதி அத்³த⁴ரியா, யஜுப்³பே³தி³னோ. யே ச தித்திரிஇஸினா கதே மந்தே ஸஜ்ஜா²யந்தி, தே தித்திரியா, யஜுப்³பே³தி³னோ ஏவ. யஜுப்³பே³த³ஸாகா² ஹேஸா, யதி³த³ங் தித்திரங். ச²ந்தோ³ வுச்சதி விஸேஸதோ ஸாமவேதோ³, தங் ஸரேன காயந்தீதி ச²ந்தோ³கா, ஸாமவேதி³னோ. ‘‘ச²ந்தோ³கா³’’திபி பட²ந்தி, ஸோ ஏவத்தோ². ப³ஹவோ இரயோ எத்தா²தி ப³வ்ஹாரி, இருப்³பே³தோ³. தங் அதீ⁴யந்தீதி ப³வ்ஹாரிஜ்ஜா².
Ye pāḷiyaṃ ‘‘addhariyā brāhmaṇā’’tiādinā vuttā. Addharo nāma yaññaviseso, tadupayogibhāvato ‘‘addhariyā’’ tveva vuccanti yajūni, tāni sajjhāyantīti addhariyā, yajubbedino. Ye ca tittiriisinā kate mante sajjhāyanti, te tittiriyā, yajubbedino eva. Yajubbedasākhā hesā, yadidaṃ tittiraṃ. Chando vuccati visesato sāmavedo, taṃ sarena kāyantīti chandokā, sāmavedino. ‘‘Chandogā’’tipi paṭhanti, so evattho. Bahavo irayo etthāti bavhāri, irubbedo. Taṃ adhīyantīti bavhārijjhā.
‘‘ப³ஹூனீ’’தி எத்தா²யங் உபமாஸங்ஸந்த³னா – யதா² தே நானாமக்³கா³ ஏகங்ஸதோ தஸ்ஸ கா³மஸ்ஸ வா நிக³மஸ்ஸ வா பவேஸாய ஹொந்தி, ஏவங் ப்³ராஹ்மணேஹி பஞ்ஞாபியமானாபி நானாமக்³கா³ ப்³ரஹ்மலோகூபக³மனாய ப்³ரஹ்முனா ஸஹப்³யதாய ஏகங்ஸேனேவ ஹொந்தீதி.
‘‘Bahūnī’’ti etthāyaṃ upamāsaṃsandanā – yathā te nānāmaggā ekaṃsato tassa gāmassa vā nigamassa vā pavesāya honti, evaṃ brāhmaṇehi paññāpiyamānāpi nānāmaggā brahmalokūpagamanāya brahmunā sahabyatāya ekaṃseneva hontīti.
527-529. வ-காரோ ஆக³மஸந்தி⁴மத்தந்தி அனத்த²கோ வ-காரோ, தேன வண்ணாக³மேன பத³ந்தரஸந்தி⁴மத்தங் கதந்தி அத்தோ². அந்த⁴பவேணீதி அந்த⁴பந்தி. ‘‘பஞ்ஞாஸஸட்டி² அந்தா⁴’’தி இத³ங் தஸ்ஸா அந்த⁴பவேணியா மஹதோ க³ச்ச²கு³ம்ப³ஸ்ஸ அனுபரிக³மனயொக்³யதாத³ஸ்ஸனங். ஏவஞ்ஹி தே ‘‘ஸுசிரங் வேலங் மக்³க³ங் க³ச்சா²மா’’தி ஏவங் ஸஞ்ஞினோ ஹொந்தி. நாமகங்யேவாதி அத்தா²பா⁴வதோ நாமமத்தங்யேவ, தங் பன பா⁴ஸிதங் தேஹி ஸாரஸஞ்ஞிதம்பி நாமமத்ததாய அஸாரபா⁴வதோ நிஹீனமேவாதி ஆஹ ‘‘லாமகங்யேவா’’தி.
527-529.Va-kāro āgamasandhimattanti anatthako va-kāro, tena vaṇṇāgamena padantarasandhimattaṃ katanti attho. Andhapaveṇīti andhapanti. ‘‘Paññāsasaṭṭhi andhā’’ti idaṃ tassā andhapaveṇiyā mahato gacchagumbassa anuparigamanayogyatādassanaṃ. Evañhi te ‘‘suciraṃ velaṃ maggaṃ gacchāmā’’ti evaṃ saññino honti. Nāmakaṃyevāti atthābhāvato nāmamattaṃyeva, taṃ pana bhāsitaṃ tehi sārasaññitampi nāmamattatāya asārabhāvato nihīnamevāti āha ‘‘lāmakaṃyevā’’ti.
530. யதோதி பு⁴ம்மத்தே² நிஸ்ஸக்கவசனங், ஸாமஞ்ஞஜோதனா ச விஸேஸே அவதிட்ட²தீதி ஆஹ ‘‘யஸ்மிங் காலே’’தி. ஆயாசந்தீதி பத்தெ²ந்தி. உக்³க³மனங் லோகஸ்ஸ ப³ஹுகாரபா⁴வதோ ததா² தோ²மனாதி. அயங் கிர ப்³ராஹ்மணானங் லத்³தி⁴ ‘‘ப்³ராஹ்மணானங் ஆயாசனாய சந்தி³மஸூரியா க³ந்த்வா லோகே ஓபா⁴ஸங் கரொந்தீ’’தி.
530.Yatoti bhummatthe nissakkavacanaṃ, sāmaññajotanā ca visese avatiṭṭhatīti āha ‘‘yasmiṃ kāle’’ti. Āyācantīti patthenti. Uggamanaṃ lokassa bahukārabhāvato tathā thomanāti. Ayaṃ kira brāhmaṇānaṃ laddhi ‘‘brāhmaṇānaṃ āyācanāya candimasūriyā gantvā loke obhāsaṃ karontī’’ti.
532. இத⁴ பன கிங் வத்தப்³ப³ந்தி இமஸ்மிங் பன அப்பச்சக்க²பூ⁴தஸ்ஸ ப்³ரஹ்முனோ ஸஹப்³யதாய மக்³க³தே³ஸனே தேவிஜ்ஜானங் கிங் வத்தப்³ப³ங் அத்தி², யே பச்சக்க²பூ⁴தானம்பி சந்தி³மஸூரியானங் ஸஹப்³யதாய மக்³க³ங் தே³ஸேதுங் ந ஸக்கொந்தீதி அதி⁴ப்பாயோ. ‘‘யத்தா²’’தி ‘‘இத⁴ பனா’’தி வுத்தமேவத்த²ங் பச்சாமஸதி.
532.Idha pana kiṃ vattabbanti imasmiṃ pana appaccakkhabhūtassa brahmuno sahabyatāya maggadesane tevijjānaṃ kiṃ vattabbaṃ atthi, ye paccakkhabhūtānampi candimasūriyānaṃ sahabyatāya maggaṃ desetuṃ na sakkontīti adhippāyo. ‘‘Yatthā’’ti ‘‘idha panā’’ti vuttamevatthaṃ paccāmasati.
அசிரவதீனதீ³உபமாகதா²வண்ணனா
Aciravatīnadīupamākathāvaṇṇanā
542. ஸமப⁴ரிதாதி ஸம்புண்ணா. ததோ ஏவ காகபெய்யா. பாராதி பரதீரங். அபாரந்தி ஓரிமதீரங். ஏஹீதி ஆக³ச்ச².
542.Samabharitāti sampuṇṇā. Tato eva kākapeyyā. Pārāti paratīraṃ. Apāranti orimatīraṃ. Ehīti āgaccha.
544. பஞ்சஸீல…பே॰… வேதி³தப்³பா³ யமனியமாதி³ப்³ராஹ்மணத⁴ம்மானங் தத³ந்தோக³த⁴பா⁴வதோ. தப்³பி³பரீதாதி பஞ்சஸீலாதி³விபரீதா பஞ்ச வேராத³யோ. ‘‘புனபீ’’தி வத்வா ‘‘அபரம்பீ’’தி வசனங் இதராயபி நதி³ உபமாய ஸங்க³ண்ஹனத்த²ங்.
544.Pañcasīla…pe… veditabbā yamaniyamādibrāhmaṇadhammānaṃ tadantogadhabhāvato. Tabbiparītāti pañcasīlādiviparītā pañca verādayo. ‘‘Punapī’’ti vatvā ‘‘aparampī’’ti vacanaṃ itarāyapi nadi upamāya saṅgaṇhanatthaṃ.
546. காமயிதப்³ப³ட்டே²னாதி காமனீயபா⁴வேன. ப³ந்த⁴னட்டே²னாதி தேனேவ காமேதப்³ப³பா⁴வேன ஸத்தானங் சித்தஸ்ஸ ஆப³ந்த⁴னபா⁴வேன. காமஞ்சாயங் கு³ண-ஸத்³தோ³ அத்த²ந்தரேஸுபி தி³ட்ட²ப்பயோகோ³, தேஸங் பனெத்த² அஸம்ப⁴வதோ பாரிஸேஸஞாயேன ப³ந்த⁴னட்டே²யேவ யுத்தோதி த³ஸ்ஸேதுங் ‘‘அனுஜானாமீ’’திஆதி³னா அத்து²த்³தா⁴ரோ ஆரத்³தோ⁴, ஏஸேவாதி ப³ந்த⁴னட்டோ² ஏவ. ந ஹி ரூபாதீ³னங் காமேதப்³ப³பா⁴வே வுச்சமானே படலட்டோ² யுஜ்ஜதி ததா² காமேதப்³ப³தாய அனதி⁴ப்பேதத்தா. ராஸட்ட²ஆனிஸங்ஸட்டே²ஸுபி ஏஸேவ நயோ ததா²பி காமேதப்³ப³தாய அனதி⁴ப்பேதத்தா. பாரிஸேஸதோ பன ப³ந்த⁴னட்டோ² க³ஹிதோ. யத³க்³கே³ன ஹி நேஸங் காமேதப்³ப³தா, தத³க்³கே³ன ப³ந்த⁴னபா⁴வோ சாதி.
546.Kāmayitabbaṭṭhenāti kāmanīyabhāvena. Bandhanaṭṭhenāti teneva kāmetabbabhāvena sattānaṃ cittassa ābandhanabhāvena. Kāmañcāyaṃ guṇa-saddo atthantaresupi diṭṭhappayogo, tesaṃ panettha asambhavato pārisesañāyena bandhanaṭṭheyeva yuttoti dassetuṃ ‘‘anujānāmī’’tiādinā atthuddhāro āraddho, esevāti bandhanaṭṭho eva. Na hi rūpādīnaṃ kāmetabbabhāve vuccamāne paṭalaṭṭho yujjati tathā kāmetabbatāya anadhippetattā. Rāsaṭṭhaānisaṃsaṭṭhesupi eseva nayo tathāpi kāmetabbatāya anadhippetattā. Pārisesato pana bandhanaṭṭho gahito. Yadaggena hi nesaṃ kāmetabbatā, tadaggena bandhanabhāvo cāti.
கொட்டா²ஸட்டோ²பி தேஸு யுஜ்ஜதேவ சக்கு²விஞ்ஞெய்யாதி³கொட்டா²ஸபா⁴வேன நேஸங் காமேதப்³ப³தோ. கொட்டா²ஸே ச கு³ண-ஸத்³தோ³ தி³ஸ்ஸதி ‘‘தி³கு³ணங் வட்³டே⁴தப்³ப³’’ந்திஆதீ³ஸு, ஸம்பதா³ட்டோ²பி –
Koṭṭhāsaṭṭhopi tesu yujjateva cakkhuviññeyyādikoṭṭhāsabhāvena nesaṃ kāmetabbato. Koṭṭhāse ca guṇa-saddo dissati ‘‘diguṇaṃ vaḍḍhetabba’’ntiādīsu, sampadāṭṭhopi –
‘‘அஸங்க்²யெய்யானி நாமானி, ஸகு³ணேன மஹேஸினோ;
‘‘Asaṅkhyeyyāni nāmāni, saguṇena mahesino;
கு³ணேன நாமமுத்³தெ⁴ய்யங், அபி நாமஸஹஸ்ஸதோ’’தி. (த⁴॰ ஸ॰ அட்ட²॰ 1313; உதா³॰ அட்ட²॰ 53; படி॰ ம॰ அட்ட²॰ 76);
Guṇena nāmamuddheyyaṃ, api nāmasahassato’’ti. (dha. sa. aṭṭha. 1313; udā. aṭṭha. 53; paṭi. ma. aṭṭha. 76);
ஆதீ³ஸு ஸோபி இத⁴ ந யுஜ்ஜதீதி அனுத்³த⁴டோ.
Ādīsu sopi idha na yujjatīti anuddhaṭo.
சக்கு²விஞ்ஞெய்யாதி சக்கு²விஞ்ஞாணேன விஜானிதப்³பா³, தேன பன விஜானநங் த³ஸ்ஸனமேவாதி ஆஹ ‘‘பஸ்ஸிதப்³பா³’’தி. ‘‘ஸோதவிஞ்ஞாணேன ஸோதப்³பா³’’தி ஏவமாதி³ ஏதேனுபாயேனாதி அதிதி³ஸதி. க³வேஸிதம்பி ‘‘இட்ட²’’ந்தி வுச்சதி, தங் இத⁴ நாதி⁴ப்பேதந்தி ஆஹ ‘‘பரியிட்டா² வா ஹொந்து மா வா’’தி. இட்டா²ரம்மணபூ⁴தாதி ஸுகா²ரம்மணபூ⁴தா. காமனீயாதி காமேதப்³பா³. இட்ட²பா⁴வேன மனங் அப்பாயந்தீதி மனாபா. பியஜாதிகாதி பியஸபா⁴வா.
Cakkhuviññeyyāti cakkhuviññāṇena vijānitabbā, tena pana vijānanaṃ dassanamevāti āha ‘‘passitabbā’’ti. ‘‘Sotaviññāṇena sotabbā’’ti evamādi etenupāyenāti atidisati. Gavesitampi ‘‘iṭṭha’’nti vuccati, taṃ idha nādhippetanti āha ‘‘pariyiṭṭhā vā hontu mā vā’’ti. Iṭṭhārammaṇabhūtāti sukhārammaṇabhūtā. Kāmanīyāti kāmetabbā. Iṭṭhabhāvena manaṃ appāyantīti manāpā. Piyajātikāti piyasabhāvā.
கே³தே⁴னாதி லோபே⁴ன அபி⁴பூ⁴தா ஹுத்வா பஞ்சகாமகு³ணே பரிபு⁴ஞ்ஜந்தீதி யோஜனா. முச்சா²காரந்தி மோஹனாகாரங். அதி⁴ஓஸன்னாதி அதி⁴க்³க³ய்ஹ அஜ்ஜோ²ஸாய அவஸன்னா, தேனாஹ ‘‘ஓகா³ள்ஹா’’தி. பரினிட்டா²னப்பத்தாதி கி³லித்வா பரினிட்டா²பனவஸேன பரினிட்டா²னங் உபக³தா. ஆதீ³னவந்தி காமபரிபோ⁴கே³ ஸம்பதி, ஆயதிஞ்ச தோ³ஸங் அபஸ்ஸந்தா. கா⁴ஸச்சா²த³னாதி³ஸம்போ⁴க³னிமித்தஸங்கிலேஸதோ நிஸ்ஸரந்தி அபக³ச்ச²ந்தி ஏதேனாதி நிஸ்ஸரணங், யோனிஸோ பச்சவெக்கி²த்வா தேஸங் பரிபோ⁴க³பஞ்ஞா. தத³பா⁴வதோ அனிஸ்ஸரணபஞ்ஞாதி இமமத்த²ங் த³ஸ்ஸெந்தோ ‘‘இத³மெத்தா²’’திஆதி³மாஹ.
Gedhenāti lobhena abhibhūtā hutvā pañcakāmaguṇe paribhuñjantīti yojanā. Mucchākāranti mohanākāraṃ. Adhiosannāti adhiggayha ajjhosāya avasannā, tenāha ‘‘ogāḷhā’’ti. Pariniṭṭhānappattāti gilitvā pariniṭṭhāpanavasena pariniṭṭhānaṃ upagatā. Ādīnavanti kāmaparibhoge sampati, āyatiñca dosaṃ apassantā. Ghāsacchādanādisambhoganimittasaṃkilesato nissaranti apagacchanti etenāti nissaraṇaṃ, yoniso paccavekkhitvā tesaṃ paribhogapaññā. Tadabhāvato anissaraṇapaññāti imamatthaṃ dassento ‘‘idametthā’’tiādimāha.
548-9. ஆவரந்தீதி குஸலப்பவத்திங் ஆதி³தோவ நிவாரெந்தி. நிவாரெந்தீதி நிரவஸேஸதோ வாரயந்தி. ஓனந்த⁴ந்தீதி ஓகா³ஹந்தா விய சா²தெ³ந்தி. பரியோனந்த⁴ந்தீதி ஸப்³ப³ஸோ சா²தெ³ந்தி. ஆவரணாதீ³னங் வஸேனாதி ஆவரணாதி³அத்தா²னங் வஸேன. தே ஹி ஆஸேவனப³லவதாய புரிமபுரிமேஹி பச்சி²மபச்சி²மா த³ள்ஹதரதமாதி³பா⁴வப்பத்தா வுத்தா.
548-9.Āvarantīti kusalappavattiṃ āditova nivārenti. Nivārentīti niravasesato vārayanti. Onandhantīti ogāhantā viya chādenti. Pariyonandhantīti sabbaso chādenti. Āvaraṇādīnaṃ vasenāti āvaraṇādiatthānaṃ vasena. Te hi āsevanabalavatāya purimapurimehi pacchimapacchimā daḷhataratamādibhāvappattā vuttā.
ஸங்ஸந்த³னகதா²வண்ணனா
Saṃsandanakathāvaṇṇanā
550. இத்தி²பரிக்³க³ஹே ஸதி புரிஸஸ்ஸ பஞ்சகாமகு³ணபரிக்³க³ஹோ பரிபுண்ணோ ஏவ ஹோதீதி வுத்தங் ‘‘ஸபரிக்³க³ஹோதி இத்தி²பரிக்³க³ஹேன ஸபரிக்³க³ஹோ’’தி. ‘‘இத்தி²பரிக்³க³ஹேன அபரிக்³க³ஹோ’’தி ச இத³ங் தேவிஜ்ஜப்³ராஹ்மணேஸு தி³ஸ்ஸமானபரிக்³க³ஹானங் து³ட்டு²ல்லதமபரிக்³க³ஹாபா⁴வத³ஸ்ஸனங். ஏவங்பூ⁴தானங் தேவிஜ்ஜானங் ப்³ராஹ்மணானங் கா ப்³ரஹ்முனா ஸங்ஸந்த³னா, ப்³ரஹ்மா பன ஸப்³பே³ன ஸப்³ப³ங் அபரிக்³க³ஹோதி. வேரசித்தேன அவேரோ, குதோ ஏதஸ்ஸ வேரப்பயோகோ³தி அதி⁴ப்பாயோ. சித்தகே³லஞ்ஞஸங்கா²தேனாதி சித்துப்பாத³கே³லஞ்ஞஸஞ்ஞிதேன, தேனஸ்ஸ ஸப்³ப³ரூபகாயகே³லஞ்ஞபா⁴வோ வுத்தோ ஹோதி. ப்³யாபஜ்ஜே²னாதி து³க்கே²ன. உத்³த⁴ச்சகுக்குச்சாதீ³ஹீதி ஆதி³-ஸத்³தே³ன ததே³கட்டா² ஸங்கிலேஸத⁴ம்மா ஸங்க³ய்ஹந்தி. அப்படிபத்திஹேதுபூ⁴தாய விசிகிச்சா²ய ஸதி ந கதா³சி சித்தங் புரிஸஸ்ஸ வஸே வத்ததி, பஹீனாய பன ஸியா வஸவத்தனந்தி ஆஹ ‘‘விசிகிச்சா²ய அபா⁴வதோ சித்தங் வஸே வத்தேதீ’’தி. சித்தக³திகாதி சித்தவஸிகா, தேனாஹ சித்தஸ்ஸ வஸே வத்தந்தீ’’தி. ந தாதி³ஸோதி ப்³ராஹ்மணா விய சித்தவஸிகோ ந ஹோதி, அத² கோ² வஸீபூ⁴தஜ்ஜா²னாபி⁴ஞ்ஞதாய சித்தங் அத்தனோ வஸே வத்தேதீதி வஸவத்தீ.
550. Itthipariggahe sati purisassa pañcakāmaguṇapariggaho paripuṇṇo eva hotīti vuttaṃ ‘‘sapariggahoti itthipariggahena sapariggaho’’ti. ‘‘Itthipariggahena apariggaho’’ti ca idaṃ tevijjabrāhmaṇesu dissamānapariggahānaṃ duṭṭhullatamapariggahābhāvadassanaṃ. Evaṃbhūtānaṃ tevijjānaṃ brāhmaṇānaṃ kā brahmunā saṃsandanā, brahmā pana sabbena sabbaṃ apariggahoti. Veracittena avero, kuto etassa verappayogoti adhippāyo. Cittagelaññasaṅkhātenāti cittuppādagelaññasaññitena, tenassa sabbarūpakāyagelaññabhāvo vutto hoti. Byāpajjhenāti dukkhena. Uddhaccakukkuccādīhīti ādi-saddena tadekaṭṭhā saṃkilesadhammā saṅgayhanti. Appaṭipattihetubhūtāya vicikicchāya sati na kadāci cittaṃ purisassa vase vattati, pahīnāya pana siyā vasavattananti āha ‘‘vicikicchāya abhāvato cittaṃ vase vattetī’’ti. Cittagatikāti cittavasikā, tenāha cittassa vase vattantī’’ti. Na tādisoti brāhmaṇā viya cittavasiko na hoti, atha kho vasībhūtajjhānābhiññatāya cittaṃ attano vase vattetīti vasavattī.
552. ப்³ரஹ்மலோகமக்³கே³தி ப்³ரஹ்மலோககா³மிமக்³கே³ படிபஜ்ஜிதப்³பே³, பஞ்ஞபேதப்³பே³ வா, தங் பஞ்ஞபெந்தாதி அதி⁴ப்பாயோ. உபக³ந்த்வாதி அமக்³க³மேவ ‘‘மக்³கோ³’’தி மிச்சா²படிபஜ்ஜனேன உபக³ந்த்வா, படிஜானித்வா வா. பங்கங் ஓதிண்ணா வியாதி மத்த²கே ஏகங்கு³லங் வா உபட்³ட⁴ங்கு³லங் வா ஸுக்க²தாய ‘‘ஸமதல’’ந்தி ஸஞ்ஞாய அனேகபோரிஸங் மஹாபங்கங் ஓதிண்ணா விய. அனுப்பவிஸந்தீதி அபாயமக்³க³ங் ப்³ரஹ்மலோகமக்³க³ஸஞ்ஞாய ஓகா³ஹயந்தி. ததோ ஏவ ஸங்ஸீதி³த்வா விஸாத³ங் பாபுணந்தி. ஏவந்தி ‘‘ஸமதல’’ந்திஆதி³னா வுத்தனயேன. ஸங்ஸீதி³த்வாதி நிம்முஜ்ஜித்வா. ஸுக்க²தரணங் மஞ்ஞே தரந்தீதி ஸுக்க²னதி³தரணங் தரந்தி மஞ்ஞே. தஸ்மாதி யஸ்மா தேவிஜ்ஜா அமக்³க³மேவ ‘‘மக்³கோ³’’தி உபக³ந்த்வா ஸங்ஸீத³ந்தி, தஸ்மா. யதா² தேதி யதா² தே ‘‘ஸமதல’’ந்தி ஸஞ்ஞாய பங்கங் ஓதிண்ணா. இதே⁴வ சாதி இமஸ்மிஞ்ச அத்தபா⁴வே. ஸுக²ங் வா ஸாதங் வா ந லப⁴ந்தீதி ஜா²னஸுக²ங் வா விபஸ்ஸனாஸாதங் வா ந லப⁴ந்தி, குதோ மக்³க³ஸுக²ங் வா நிப்³பா³னஸாதங் வாதி அதி⁴ப்பாயோ. மக்³க³தீ³பகந்தி மக்³க³தீ³பகாபி⁴மதங். ‘‘இரிண’’ந்தி அரஞ்ஞானியா இத³ங் அதி⁴வசனந்தி ஆஹ ‘‘அகா³மகங் மஹாரஞ்ஞ’’ந்தி . மிக³ருருஆதீ³னம்பி அனுபபோ⁴க³ருக்கே²ஹி. பரிவத்திதும்பி ந ஸக்கா ஹொந்தி மஹாகண்டகதாய. ஞாதீனங் ப்³யஸனங் வினாஸோ ஞாதிப்³யஸனங். ஏவங் போ⁴க³ஸீலப்³யஸனானி வேதி³தப்³பா³னி. ரோகோ³ ஏவ ப்³யஸதி விபா³த⁴தீதி ரோக³ப்³யஸனங். ஏவங் தி³ட்டி²ப்³யஸனம்பி த³ட்ட²ப்³ப³ங்.
552.Brahmalokamaggeti brahmalokagāmimagge paṭipajjitabbe, paññapetabbe vā, taṃ paññapentāti adhippāyo. Upagantvāti amaggameva ‘‘maggo’’ti micchāpaṭipajjanena upagantvā, paṭijānitvā vā. Paṅkaṃ otiṇṇā viyāti matthake ekaṅgulaṃ vā upaḍḍhaṅgulaṃ vā sukkhatāya ‘‘samatala’’nti saññāya anekaporisaṃ mahāpaṅkaṃ otiṇṇā viya. Anuppavisantīti apāyamaggaṃ brahmalokamaggasaññāya ogāhayanti. Tato eva saṃsīditvā visādaṃ pāpuṇanti. Evanti ‘‘samatala’’ntiādinā vuttanayena. Saṃsīditvāti nimmujjitvā. Sukkhataraṇaṃ maññe tarantīti sukkhanaditaraṇaṃ taranti maññe. Tasmāti yasmā tevijjā amaggameva ‘‘maggo’’ti upagantvā saṃsīdanti, tasmā. Yathāteti yathā te ‘‘samatala’’nti saññāya paṅkaṃ otiṇṇā. Idheva cāti imasmiñca attabhāve. Sukhaṃ vā sātaṃ vā na labhantīti jhānasukhaṃ vā vipassanāsātaṃ vā na labhanti, kuto maggasukhaṃ vā nibbānasātaṃ vāti adhippāyo. Maggadīpakanti maggadīpakābhimataṃ. ‘‘Iriṇa’’nti araññāniyā idaṃ adhivacananti āha ‘‘agāmakaṃ mahārañña’’nti . Migaruruādīnampi anupabhogarukkhehi. Parivattitumpi na sakkā honti mahākaṇṭakatāya. Ñātīnaṃ byasanaṃ vināso ñātibyasanaṃ. Evaṃ bhogasīlabyasanāni veditabbāni. Rogo eva byasati vibādhatīti rogabyasanaṃ. Evaṃ diṭṭhibyasanampi daṭṭhabbaṃ.
554. ஜாதஸங்வட்³டோ⁴தி ஜாதோ ஹுத்வா ஸங்வட்³டி⁴தோ. ந ஸப்³ப³ஸோ பச்சக்கா² ஹொந்தி பரிசயாபா⁴வதோ. சிரனிக்க²ந்தோதி நிக்க²ந்தோ ஹுத்வா சிரகாலோ. த³ந்தா⁴யிதத்தந்தி விஸ்ஸஜ்ஜனே மந்த³த்தங் ஸணிகவுத்தி, தங் பன ஸங்ஸயவஸேன சிராயனங் நாம ஹோதீதி ஆஹ ‘‘கங்கா²வஸேன சிராயிதத்த’’ந்தி. வித்தா²யிதத்தந்தி ஸாரஜ்ஜிதத்தங். அட்ட²கதா²யங் பன வித்தா²யிதத்தங் நாம ச²ம்பி⁴தத்தந்தி அதி⁴ப்பாயேன ‘‘த²த்³த⁴பா⁴வக்³க³ஹண’’ந்தி வுத்தங்.
554.Jātasaṃvaḍḍhoti jāto hutvā saṃvaḍḍhito. Na sabbaso paccakkhā honti paricayābhāvato. Ciranikkhantoti nikkhanto hutvā cirakālo. Dandhāyitattanti vissajjane mandattaṃ saṇikavutti, taṃ pana saṃsayavasena cirāyanaṃ nāma hotīti āha ‘‘kaṅkhāvasena cirāyitatta’’nti. Vitthāyitattanti sārajjitattaṃ. Aṭṭhakathāyaṃ pana vitthāyitattaṃ nāma chambhitattanti adhippāyena ‘‘thaddhabhāvaggahaṇa’’nti vuttaṃ.
555. உ-இதி உபஸக்³க³யோகே³ லும்ப-ஸத்³தோ³ உத்³த⁴ரணத்தோ² ஹோதீதி ‘‘உல்லும்பதூ’’தி பத³ஸ்ஸ உத்³த⁴ரதூதி அத்த²மாஹ. உபஸக்³க³வஸேன ஹி தா⁴து-ஸத்³தா³ அத்த²விஸேஸவுத்தினோ ஹொந்தி யதா² ‘‘உத்³த⁴ரதூ’’தி.
555.U-iti upasaggayoge lumpa-saddo uddharaṇattho hotīti ‘‘ullumpatū’’ti padassa uddharatūti atthamāha. Upasaggavasena hi dhātu-saddā atthavisesavuttino honti yathā ‘‘uddharatū’’ti.
ப்³ரஹ்மலோகமக்³க³தே³ஸனாவண்ணனா
Brahmalokamaggadesanāvaṇṇanā
556. யஸ்ஸ அதிஸயேன ப³லங் அத்தி², ஸோ ‘‘ப³லவா’’தி வுத்தோதி ஆஹ ‘‘ப³லஸம்பன்னோ’’தி. ஸங்க²ங் த⁴மயதீதி ஸங்க²த⁴மகோ, தங் த⁴மயித்வா ததோ ஸத்³த³பவத்தகோ. அப்பனாவ வட்டதி படிபக்க²தோ ஸம்மதே³வ சேதஸோ விமுத்திபா⁴வதோ.
556. Yassa atisayena balaṃ atthi, so ‘‘balavā’’ti vuttoti āha ‘‘balasampanno’’ti. Saṅkhaṃ dhamayatīti saṅkhadhamako, taṃ dhamayitvā tato saddapavattako. Appanāva vaṭṭati paṭipakkhato sammadeva cetaso vimuttibhāvato.
பமாணகதங் கம்மங் நாம காமாவசரங் பமாணகரானங் ஸங்கிலேஸத⁴ம்மானங் அவிக்க²ம்ப⁴னதோ. ததா² ஹி தங் ப்³ரஹ்மவிஹாரபுப்³ப³பா⁴க³பூ⁴தங் பமாணங் அதிக்கமித்வா ஓதி³ஸ்ஸகஅனோதி³ஸ்ஸகதி³ஸாப²ரணவஸேன வட்³டே⁴துங் ந ஸக்கா. வுத்தவிபரியாயதோ பன அப்பமாணகதங் கம்மங் நாம ரூபாரூபாவசரங், தேனாஹ ‘‘தஞ்ஹீ’’திஆதி³. தத்த² அரூபாவசரே ஓதி³ஸ்ஸகானோதி³ஸ்ஸகவஸேன ப²ரணங் ந லப்³ப⁴தி, ததா² தி³ஸாப²ரணங்.
Pamāṇakataṃ kammaṃ nāma kāmāvacaraṃ pamāṇakarānaṃ saṃkilesadhammānaṃ avikkhambhanato. Tathā hi taṃ brahmavihārapubbabhāgabhūtaṃ pamāṇaṃ atikkamitvā odissakaanodissakadisāpharaṇavasena vaḍḍhetuṃ na sakkā. Vuttavipariyāyato pana appamāṇakataṃ kammaṃ nāma rūpārūpāvacaraṃ, tenāha ‘‘tañhī’’tiādi. Tattha arūpāvacare odissakānodissakavasena pharaṇaṃ na labbhati, tathā disāpharaṇaṃ.
கேசி பன தங் ஆக³மனவஸேன லப்³ப⁴தீதி வத³ந்தி, தத³யுத்தங். ந ஹி ப்³ரஹ்மவிஹாரனிஸ்ஸந்தோ³ ஆருப்பங், அத² கோ² கஸிணனிஸ்ஸந்தோ³, தஸ்மா யங் ஸுவிபா⁴விதங் வஸீபா⁴வங் பாபிதங் ஆருப்பங், தங் ‘‘அப்பமாணகத’’ந்தி வுத்தந்தி த³ட்ட²ப்³ப³ங். யங் வா ஸாதிஸயங் ப்³ரஹ்மவிஹாரபா⁴வனாய அபி⁴ஸங்க²தேன ஸந்தானேன நிப்³ப³த்திதங், யஞ்ச ப்³ரஹ்மவிஹாரஸமாபத்திதோ வுட்டா²ய ஸமாபன்னங் அரூபாவசரஜ்ஜா²னங், தங் இமினா பரியாயேன ப²ரணப்பமாணவஸேன அப்பமாணகதந்தி வத்துங் வட்டதீதி அபரே. வீமங்ஸித்வா க³ஹேதப்³ப³ங்.
Keci pana taṃ āgamanavasena labbhatīti vadanti, tadayuttaṃ. Na hi brahmavihāranissando āruppaṃ, atha kho kasiṇanissando, tasmā yaṃ suvibhāvitaṃ vasībhāvaṃ pāpitaṃ āruppaṃ, taṃ ‘‘appamāṇakata’’nti vuttanti daṭṭhabbaṃ. Yaṃ vā sātisayaṃ brahmavihārabhāvanāya abhisaṅkhatena santānena nibbattitaṃ, yañca brahmavihārasamāpattito vuṭṭhāya samāpannaṃ arūpāvacarajjhānaṃ, taṃ iminā pariyāyena pharaṇappamāṇavasena appamāṇakatanti vattuṃ vaṭṭatīti apare. Vīmaṃsitvā gahetabbaṃ.
ரூபாவசராரூபாவசரகம்மேதி ரூபாவசரகம்மே, அரூபாவசரகம்மே ச ஸதி. ந ஓஹீயதி ந திட்ட²தீதி கதூபசிதம்பி காமாவசரகம்மங் யதா²தி⁴க³தே மஹக்³க³தஜ்ஜா²னே அபரிஹீனே தங் அபி⁴ப⁴வித்வா படிபா³ஹித்வா ஸயங் ஓஹீயகங் ஹுத்வா படிஸந்தி⁴ங் தா³துங் ஸமத்த²பா⁴வே ந திட்ட²தி. லக்³கி³துந்தி ஆவரிதுங் நிஸேதே⁴துங். டா²துந்தி படிப³லோ ஹுத்வா டா²துங். ப²ரித்வாதி படிப்ப²ரித்வா. பரியாதி³யித்வாதி தஸ்ஸ ஸாமத்தி²யங் கே²பெத்வா. கம்மஸ்ஸ பரியாதி³யனங் நாம தஸ்ஸ விபாகுப்பாத³னங் நிஸேதெ⁴த்வா அத்தனோ விபாகுப்பாத³னந்தி ஆஹ ‘‘தஸ்ஸ விபாகங் படிபா³ஹித்வா’’திஆதி³. ஏவங் மெத்தாதி³விஹாரீதி ஏவங் வுத்தானங் மெத்தாதீ³னங் ப்³ரஹ்மவிஹாரானங் வஸேன மெத்தாதி³விஹாரீ.
Rūpāvacarārūpāvacarakammeti rūpāvacarakamme, arūpāvacarakamme ca sati. Na ohīyati na tiṭṭhatīti katūpacitampi kāmāvacarakammaṃ yathādhigate mahaggatajjhāne aparihīne taṃ abhibhavitvā paṭibāhitvā sayaṃ ohīyakaṃ hutvā paṭisandhiṃ dātuṃ samatthabhāve na tiṭṭhati. Laggitunti āvarituṃ nisedhetuṃ. Ṭhātunti paṭibalo hutvā ṭhātuṃ. Pharitvāti paṭippharitvā. Pariyādiyitvāti tassa sāmatthiyaṃ khepetvā. Kammassa pariyādiyanaṃ nāma tassa vipākuppādanaṃ nisedhetvā attano vipākuppādananti āha ‘‘tassa vipākaṃ paṭibāhitvā’’tiādi. Evaṃ mettādivihārīti evaṃ vuttānaṃ mettādīnaṃ brahmavihārānaṃ vasena mettādivihārī.
559. அக்³க³ஞ்ஞஸுத்தே…பே॰… அலத்து²ந்தி அக்³க³ஞ்ஞஸுத்தே ஆக³தனயேன உபஸம்பத³ஞ்சேவ அரஹத்தஞ்ச அலத்து²ங் படிலபி⁴ங்ஸு. ஸேஸங் ஸுவிஞ்ஞெய்யமேவ.
559.Aggaññasutte…pe… alatthunti aggaññasutte āgatanayena upasampadañceva arahattañca alatthuṃ paṭilabhiṃsu. Sesaṃ suviññeyyameva.
தேவிஜ்ஜஸுத்தவண்ணனாய லீனத்த²ப்பகாஸனா.
Tevijjasuttavaṇṇanāya līnatthappakāsanā.
நிட்டி²தா ச தேரஸஸுத்தபடிமண்டி³தஸ்ஸ ஸீலக்க²ந்த⁴வக்³க³ஸ்ஸ அத்த²வண்ணனாய
Niṭṭhitā ca terasasuttapaṭimaṇḍitassa sīlakkhandhavaggassa atthavaṇṇanāya
லீனத்த²ப்பகாஸனாதி.
Līnatthappakāsanāti.
ஸீலக்க²ந்த⁴வக்³க³டீகா நிட்டி²தா.
Sīlakkhandhavaggaṭīkā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / தீ³க⁴னிகாய • Dīghanikāya / 13. தேவிஜ்ஜஸுத்தங் • 13. Tevijjasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 13. தேவிஜ்ஜஸுத்தவண்ணனா • 13. Tevijjasuttavaṇṇanā
