| Library / Tipiṭaka / д̇ибидага • Tipiṭaka / д̣̇ийгханигааяа (дийгаа) • Dīghanikāya (ṭīkā) |
13. д̇звиж̇ж̇асуд̇д̇аван̣н̣анаа
13. Tevijjasuttavaṇṇanā
518. уд̇д̇арзнаад̇и зд̇т̇а зна-сад̣̇д̣̇о д̣̇исааваажийсад̣̇д̣̇ад̇о бан̃жамийанд̇ад̇о ад̣̇уурад̇т̇о ижчид̇о, д̇асмаа уд̇д̇арзна-сад̣̇д̣̇зна ад̣̇уурад̇т̇аж̇од̇анам̣ д̣̇ассзнд̇о ‘‘ад̣̇уурз уд̇д̇арабассз’’д̇и ааха. агкаражинд̇агаа бана зна-сад̣̇д̣̇аяог̇з авад̇хиваажини бад̣̇з убаяог̇аважанам̣ ижчанд̇и. ад̇т̇о бана саамивасзнзва ижчид̇од̇и ид̇ха саамиважанавасзнзва вуд̇д̇ам̣.
518.Uttarenāti ettha ena-saddo disāvācīsaddato pañcamīantato adūrattho icchito, tasmā uttarena-saddena adūratthajotanaṃ dassento ‘‘adūre uttarapasse’’ti āha. Akkharacintakā pana ena-saddayoge avadhivācini pade upayogavacanaṃ icchanti. Attho pana sāmivaseneva icchitoti idha sāmivacanavaseneva vuttaṃ.
519. гулажаарид̇д̇аад̣̇ийд̇и аад̣̇и-сад̣̇д̣̇зна манд̇аж̇жхзнаабхируубад̇аад̣̇исамбад̇д̇им̣ сан̇г̇ан̣хаад̇и. манд̇асаж̇жхааяагаран̣ад̇т̇анд̇и аат̇аб̣б̣ан̣аманд̇аанам̣ саж̇жхааяагаран̣ад̇т̇ам̣, д̇знааха ‘‘ан̃н̃зсам̣ б̣ахуунам̣ бавзсанам̣ ниваарзд̇ваа’’д̇и.
519.Kulacārittādīti ādi-saddena mantajjhenābhirūpatādisampattiṃ saṅgaṇhāti. Mantasajjhāyakaraṇatthanti āthabbaṇamantānaṃ sajjhāyakaraṇatthaṃ, tenāha ‘‘aññesaṃ bahūnaṃ pavesanaṃ nivāretvā’’ti.
маг̇г̇аамаг̇г̇агат̇ааван̣н̣анаа
Maggāmaggakathāvaṇṇanā
520. ‘‘ж̇ан̇гхажаара’’нд̇и жан̇гамад̇о ид̇о жид̇о жа жаран̣амааха. со хи ж̇ан̇гхаасу гиламат̇авинод̣̇анад̇т̇о жаарод̇и д̇ат̇аа вуд̇д̇о. д̇знааха ‘‘анужан̇гаманд̇аанам̣ анувижаранд̇аана’’нд̇и. д̇знаад̇и убхосуби анужан̇гаманаанувижааран̣аанам̣ лаб̣бханад̇о. сахааяаа хи д̇з ан̃н̃аман̃н̃а сабхааг̇авуд̇д̇игаа. ‘‘маг̇г̇о’’д̇и ижчид̇адтаанам̣ уж̇угам̣ маг̇г̇ад̇и убаг̇ажчад̇и зд̇знаад̇и маг̇г̇о, уж̇умаг̇г̇о. д̇ад̣̇ан̃н̃о амаг̇г̇о, д̇асмим̣ маг̇г̇з жа амаг̇г̇з жа. бадибад̣̇анд̇и б̣рахмалогаг̇аамимаг̇г̇асса буб̣б̣абхааг̇абадибад̣̇ам̣.
520.‘‘Jaṅghacāra’’nti caṅkamato ito cito ca caraṇamāha. So hi jaṅghāsu kilamathavinodanattho cāroti tathā vutto. Tenāha ‘‘anucaṅkamantānaṃ anuvicarantāna’’nti. Tenāti ubhosupi anucaṅkamanānuvicāraṇānaṃ labbhanato. Sahāyā hi te aññamañña sabhāgavuttikā. ‘‘Maggo’’ti icchitaṭṭhānaṃ ujukaṃ maggati upagacchati etenāti maggo, ujumaggo. Tadañño amaggo, tasmiṃ magge ca amagge ca. Paṭipadanti brahmalokagāmimaggassa pubbabhāgapaṭipadaṃ.
нияяаад̇ийд̇и нияяаанийяо, со зва ‘‘нияяааниго’’д̇и вуд̇д̇од̇и ааха ‘‘нияяааяанд̇о’’д̇и. яасмаа нияяаад̇абуг̇г̇алавасзнасса нияяаанигабхааво , д̇асмаа ‘‘нияяааяанд̇о’’д̇и буг̇г̇аласса яонисо бадибаж̇ж̇анавасзна нияяааяанд̇о маг̇г̇о ‘‘нияяаад̇ий’’д̇и вуд̇д̇о. гарод̇ийд̇и ад̇д̇ано санд̇аанз уббаад̣̇зд̇и. уббаад̣̇знд̇оязва хи д̇ад̇т̇а бадибаж̇ж̇ад̇и наама. саха б̣язд̇и вад̇д̇ад̇ийд̇и сахаб̣яо, сахавад̇д̇анаго . д̇асса бхааво сахаб̣яад̇аад̇и ааха ‘‘сахабхаавааяаа’’д̇иаад̣̇и. сахабхаавод̇и жа салогад̇аа, самийбад̇аа ваа взд̣̇ид̇аб̣б̣аа, д̇знааха ‘‘згадтаанз баад̇убхаавааяаа’’д̇и. сагамзва аажарияаваад̣̇анд̇и ад̇д̇ано аажариязна богкарасаад̇инаа гат̇ид̇амзва аажарияаваад̣̇ам̣. т̇омзд̇ваа баг̇г̇ан̣хид̇ваа ‘‘аяамзва уж̇умаг̇г̇о аяаман̃ж̇асааяано’’д̇и басам̣сид̇ваа уггам̣сид̇ваа. бхаарад̣̇вааж̇оби сагамзваад̇и бхаарад̣̇вааж̇оби маан̣аво ад̇д̇ано аажариязна д̇ааругкзна гат̇ид̇амзва аажарияаваад̣̇ам̣ т̇омзд̇ваа баг̇г̇ан̣хид̇ваа вижарад̇ийд̇и яож̇анаа. д̇зна вуд̇д̇анд̇и д̇зна яат̇аа д̇ат̇аа ваа абхинивидтабхаавзна вуд̇д̇ам̣ баал̣ияам̣.
Niyyātīti niyyānīyo, so eva ‘‘niyyāniko’’ti vuttoti āha ‘‘niyyāyanto’’ti. Yasmā niyyātapuggalavasenassa niyyānikabhāvo , tasmā ‘‘niyyāyanto’’ti puggalassa yoniso paṭipajjanavasena niyyāyanto maggo ‘‘niyyātī’’ti vutto. Karotīti attano santāne uppādeti. Uppādentoyeva hi tattha paṭipajjati nāma. Saha byeti vattatīti sahabyo, sahavattanako . Tassa bhāvo sahabyatāti āha ‘‘sahabhāvāyā’’tiādi. Sahabhāvoti ca salokatā, samīpatā vā veditabbā, tenāha ‘‘ekaṭṭhāne pātubhāvāyā’’ti. Sakameva ācariyavādanti attano ācariyena pokkharasātinā kathitameva ācariyavādaṃ. Thometvā paggaṇhitvā ‘‘ayameva ujumaggo ayamañjasāyano’’ti pasaṃsitvā ukkaṃsitvā. Bhāradvājopisakamevāti bhāradvājopi māṇavo attano ācariyena tārukkhena kathitameva ācariyavādaṃ thometvā paggaṇhitvā vicaratīti yojanā. Tena vuttanti tena yathā tathā vā abhiniviṭṭhabhāvena vuttaṃ pāḷiyaṃ.
521-2. анияяаанигаа ваад̇и аббаадихаарияаава ан̃н̃аман̃н̃асса ваад̣̇з д̣̇осам̣ д̣̇ассзд̇ваа авибарийд̇ад̇т̇ад̣̇ассанад̇т̇ам̣ уд̇д̇арарахид̇аа зва. ан̃н̃аман̃н̃асса ваад̣̇асса аад̣̇ид̇о вируд̣̇д̇хаг̇г̇ахан̣ам̣ виг̇г̇ахо, свзва вивад̣̇анавасзна абараабарам̣ уббанно виваад̣̇од̇и ааха ‘‘буб̣б̣уббад̇д̇иго виг̇г̇ахо абарабхааг̇з виваад̣̇о’’д̇и. д̣̇увид̇хоби зсо виг̇г̇ахо, виваад̣̇од̇и д̣̇вид̇хаа вуд̇д̇оби вирод̇хо. наанаааажарияаанам̣ ваад̣̇ад̇од̇и наанааружигаанам̣ аажарияаанам̣ ваад̣̇абхаавад̇о. наанааваад̣̇о наанаавид̇хо ваад̣̇од̇и гад̇ваа.
521-2.Aniyyānikā vāti appāṭihāriyāva aññamaññassa vāde dosaṃ dassetvā aviparītatthadassanatthaṃ uttararahitā eva. Aññamaññassa vādassa ādito viruddhaggahaṇaṃ viggaho, sveva vivadanavasena aparāparaṃ uppanno vivādoti āha ‘‘pubbuppattiko viggaho aparabhāge vivādo’’ti. Duvidhopi eso viggaho, vivādoti dvidhā vuttopi virodho. Nānāācariyānaṃ vādatoti nānārucikānaṃ ācariyānaṃ vādabhāvato. Nānāvādo nānāvidho vādoti katvā.
523. згассаабийд̇и д̇умхзсу д̣̇вийсу згассааби. згасминд̇и сагаваад̣̇абараваад̣̇зсу згасмимби. сам̣саяо над̇т̇ийд̇и ‘‘маг̇г̇о ну ко, на маг̇г̇о ну ко’’д̇и сам̣саяо вижигижчаа над̇т̇и. ан̃ж̇асааяанабхаавз бана сам̣саяо. д̇знааха ‘‘зса гираа’’д̇иаад̣̇и. бхаг̇аваа бана яад̣̇и саб̣б̣ад̇т̇а маг̇г̇асан̃н̃ино, звам̣ сад̇и ‘‘гисмим̣ во виг̇г̇ахо’’д̇и бужчад̇и.
523.Ekassāpīti tumhesu dvīsu ekassāpi. Ekasminti sakavādaparavādesu ekasmimpi. Saṃsayo natthīti ‘‘maggo nu kho, na maggo nu kho’’ti saṃsayo vicikicchā natthi. Añjasāyanabhāve pana saṃsayo. Tenāha ‘‘esa kirā’’tiādi. Bhagavā pana yadi sabbattha maggasaññino, evaṃ sati ‘‘kismiṃ vo viggaho’’ti pucchati.
524. ‘‘ижчид̇адтаанам̣ уж̇угам̣ маг̇г̇ад̇и убаг̇ажчад̇и зд̇знаад̇и маг̇г̇о, уж̇умаг̇г̇о. д̇ад̣̇ан̃н̃о амаг̇г̇о’’д̇и вуд̇д̇о вааяамад̇т̇о. саб̣б̣з д̇зд̇и саб̣б̣зби д̇з наанаааажариязхи вуд̇д̇амаг̇г̇аа.
524. ‘‘Icchitaṭṭhānaṃ ujukaṃ maggati upagacchati etenāti maggo, ujumaggo. Tadañño amaggo’’ti vutto vāyamattho. Sabbe teti sabbepi te nānāācariyehi vuttamaggā.
яз баал̣ияам̣ ‘‘ад̣̇д̇харияаа б̣раахман̣аа’’д̇иаад̣̇инаа вуд̇д̇аа. ад̣̇д̇харо наама яан̃н̃ависзсо, д̇ад̣̇убаяог̇ибхаавад̇о ‘‘ад̣̇д̇харияаа’’ д̇взва вужжанд̇и яаж̇ууни, д̇аани саж̇жхааяанд̇ийд̇и ад̣̇д̇харияаа, яаж̇уб̣б̣зд̣̇ино. яз жа д̇ид̇д̇ириисинаа гад̇з манд̇з саж̇жхааяанд̇и, д̇з д̇ид̇д̇ирияаа, яаж̇уб̣б̣зд̣̇ино зва. яаж̇уб̣б̣зд̣̇асаакаа хзсаа, яад̣̇ид̣̇ам̣ д̇ид̇д̇ирам̣. чанд̣̇о вужжад̇и висзсад̇о саамавзд̣̇о, д̇ам̣ сарзна гааяанд̇ийд̇и чанд̣̇огаа, саамавзд̣̇ино. ‘‘чанд̣̇ог̇аа’’д̇иби батанд̇и, со звад̇т̇о. б̣ахаво ираяо зд̇т̇аад̇и б̣авхаари, ируб̣б̣зд̣̇о. д̇ам̣ ад̇хийяанд̇ийд̇и б̣авхаариж̇жхаа.
Ye pāḷiyaṃ ‘‘addhariyā brāhmaṇā’’tiādinā vuttā. Addharo nāma yaññaviseso, tadupayogibhāvato ‘‘addhariyā’’ tveva vuccanti yajūni, tāni sajjhāyantīti addhariyā, yajubbedino. Ye ca tittiriisinā kate mante sajjhāyanti, te tittiriyā, yajubbedino eva. Yajubbedasākhā hesā, yadidaṃ tittiraṃ. Chando vuccati visesato sāmavedo, taṃ sarena kāyantīti chandokā, sāmavedino. ‘‘Chandogā’’tipi paṭhanti, so evattho. Bahavo irayo etthāti bavhāri, irubbedo. Taṃ adhīyantīti bavhārijjhā.
‘‘б̣ахууний’’д̇и зд̇т̇ааяам̣ убамаасам̣санд̣̇анаа – яат̇аа д̇з наанаамаг̇г̇аа згам̣сад̇о д̇асса г̇аамасса ваа ниг̇амасса ваа бавзсааяа хонд̇и, звам̣ б̣раахман̣зхи бан̃н̃аабияамаанааби наанаамаг̇г̇аа б̣рахмалогуубаг̇аманааяа б̣рахмунаа сахаб̣яад̇ааяа згам̣сзнзва хонд̇ийд̇и.
‘‘Bahūnī’’ti etthāyaṃ upamāsaṃsandanā – yathā te nānāmaggā ekaṃsato tassa gāmassa vā nigamassa vā pavesāya honti, evaṃ brāhmaṇehi paññāpiyamānāpi nānāmaggā brahmalokūpagamanāya brahmunā sahabyatāya ekaṃseneva hontīti.
527-529. ва-гааро ааг̇амасанд̇химад̇д̇анд̇и анад̇т̇аго ва-гааро, д̇зна ван̣н̣ааг̇амзна бад̣̇анд̇арасанд̇химад̇д̇ам̣ гад̇анд̇и ад̇т̇о. анд̇хабавзн̣ийд̇и анд̇хабанд̇и. ‘‘бан̃н̃аасасадти анд̇хаа’’д̇и ид̣̇ам̣ д̇ассаа анд̇хабавзн̣ияаа махад̇о г̇ажчаг̇умб̣асса анубариг̇аманаяог̇яад̇аад̣̇ассанам̣. зван̃хи д̇з ‘‘сужирам̣ взлам̣ маг̇г̇ам̣ г̇ажчаамаа’’д̇и звам̣ сан̃н̃ино хонд̇и. наамагам̣язваад̇и ад̇т̇аабхаавад̇о наамамад̇д̇ам̣язва, д̇ам̣ бана бхаасид̇ам̣ д̇зхи саарасан̃н̃ид̇амби наамамад̇д̇ад̇ааяа асаарабхаавад̇о нихийнамзваад̇и ааха ‘‘лаамагам̣язваа’’д̇и.
527-529.Va-kāro āgamasandhimattanti anatthako va-kāro, tena vaṇṇāgamena padantarasandhimattaṃ katanti attho. Andhapaveṇīti andhapanti. ‘‘Paññāsasaṭṭhi andhā’’ti idaṃ tassā andhapaveṇiyā mahato gacchagumbassa anuparigamanayogyatādassanaṃ. Evañhi te ‘‘suciraṃ velaṃ maggaṃ gacchāmā’’ti evaṃ saññino honti. Nāmakaṃyevāti atthābhāvato nāmamattaṃyeva, taṃ pana bhāsitaṃ tehi sārasaññitampi nāmamattatāya asārabhāvato nihīnamevāti āha ‘‘lāmakaṃyevā’’ti.
530. яад̇од̇и бхуммад̇т̇з ниссаггаважанам̣, сааман̃н̃аж̇од̇анаа жа висзсз авад̇идтад̇ийд̇и ааха ‘‘яасмим̣ гаалз’’д̇и. ааяаажанд̇ийд̇и бад̇т̇знд̇и. уг̇г̇аманам̣ логасса б̣ахугаарабхаавад̇о д̇ат̇аа т̇оманаад̇и. аяам̣ гира б̣раахман̣аанам̣ лад̣̇д̇хи ‘‘б̣раахман̣аанам̣ ааяаажанааяа жанд̣̇имасуурияаа г̇анд̇ваа логз обхаасам̣ гаронд̇ий’’д̇и.
530.Yatoti bhummatthe nissakkavacanaṃ, sāmaññajotanā ca visese avatiṭṭhatīti āha ‘‘yasmiṃ kāle’’ti. Āyācantīti patthenti. Uggamanaṃ lokassa bahukārabhāvato tathā thomanāti. Ayaṃ kira brāhmaṇānaṃ laddhi ‘‘brāhmaṇānaṃ āyācanāya candimasūriyā gantvā loke obhāsaṃ karontī’’ti.
532. ид̇ха бана гим̣ вад̇д̇аб̣б̣анд̇и имасмим̣ бана аббажжагкабхууд̇асса б̣рахмуно сахаб̣яад̇ааяа маг̇г̇ад̣̇зсанз д̇звиж̇ж̇аанам̣ гим̣ вад̇д̇аб̣б̣ам̣ ад̇т̇и, яз бажжагкабхууд̇аанамби жанд̣̇имасуурияаанам̣ сахаб̣яад̇ааяа маг̇г̇ам̣ д̣̇зсзд̇ум̣ на саггонд̇ийд̇и ад̇хиббааяо. ‘‘яад̇т̇аа’’д̇и ‘‘ид̇ха банаа’’д̇и вуд̇д̇амзвад̇т̇ам̣ бажжаамасад̇и.
532.Idha pana kiṃ vattabbanti imasmiṃ pana appaccakkhabhūtassa brahmuno sahabyatāya maggadesane tevijjānaṃ kiṃ vattabbaṃ atthi, ye paccakkhabhūtānampi candimasūriyānaṃ sahabyatāya maggaṃ desetuṃ na sakkontīti adhippāyo. ‘‘Yatthā’’ti ‘‘idha panā’’ti vuttamevatthaṃ paccāmasati.
ажиравад̇ийнад̣̇ийубамаагат̇ааван̣н̣анаа
Aciravatīnadīupamākathāvaṇṇanā
542. самабхарид̇аад̇и самбун̣н̣аа. д̇ад̇о зва гаагабзяяаа. баараад̇и барад̇ийрам̣. абааранд̇и оримад̇ийрам̣. зхийд̇и ааг̇ажча.
542.Samabharitāti sampuṇṇā. Tato eva kākapeyyā. Pārāti paratīraṃ. Apāranti orimatīraṃ. Ehīti āgaccha.
544. бан̃жасийла…бз… взд̣̇ид̇аб̣б̣аа яаманияамаад̣̇иб̣раахман̣ад̇хаммаанам̣ д̇ад̣̇анд̇ог̇ад̇хабхаавад̇о. д̇аб̣б̣ибарийд̇аад̇и бан̃жасийлаад̣̇ивибарийд̇аа бан̃жа взраад̣̇аяо. ‘‘бунабий’’д̇и вад̇ваа ‘‘абарамбий’’д̇и важанам̣ ид̇арааяаби над̣̇и убамааяа сан̇г̇ан̣ханад̇т̇ам̣.
544.Pañcasīla…pe… veditabbā yamaniyamādibrāhmaṇadhammānaṃ tadantogadhabhāvato. Tabbiparītāti pañcasīlādiviparītā pañca verādayo. ‘‘Punapī’’ti vatvā ‘‘aparampī’’ti vacanaṃ itarāyapi nadi upamāya saṅgaṇhanatthaṃ.
546. гаамаяид̇аб̣б̣адтзнаад̇и гааманийяабхаавзна. б̣анд̇ханадтзнаад̇и д̇знзва гаамзд̇аб̣б̣абхаавзна сад̇д̇аанам̣ жид̇д̇асса ааб̣анд̇ханабхаавзна. гааман̃жааяам̣ г̇ун̣а-сад̣̇д̣̇о ад̇т̇анд̇арзсуби д̣̇идтаббаяог̇о, д̇зсам̣ банзд̇т̇а асамбхавад̇о баарисзсан̃ааязна б̣анд̇ханадтзязва яуд̇д̇од̇и д̣̇ассзд̇ум̣ ‘‘ануж̇аанаамий’’д̇иаад̣̇инаа ад̇т̇уд̣̇д̇хааро аарад̣̇д̇хо, зсзваад̇и б̣анд̇ханадто зва. на хи руубаад̣̇ийнам̣ гаамзд̇аб̣б̣абхаавз вужжамаанз бадаладто яуж̇ж̇ад̇и д̇ат̇аа гаамзд̇аб̣б̣ад̇ааяа анад̇хиббзд̇ад̇д̇аа. раасадтааанисам̣садтзсуби зсзва наяо д̇ат̇ааби гаамзд̇аб̣б̣ад̇ааяа анад̇хиббзд̇ад̇д̇аа. баарисзсад̇о бана б̣анд̇ханадто г̇ахид̇о. яад̣̇аг̇г̇зна хи нзсам̣ гаамзд̇аб̣б̣ад̇аа, д̇ад̣̇аг̇г̇зна б̣анд̇ханабхааво жаад̇и.
546.Kāmayitabbaṭṭhenāti kāmanīyabhāvena. Bandhanaṭṭhenāti teneva kāmetabbabhāvena sattānaṃ cittassa ābandhanabhāvena. Kāmañcāyaṃ guṇa-saddo atthantaresupi diṭṭhappayogo, tesaṃ panettha asambhavato pārisesañāyena bandhanaṭṭheyeva yuttoti dassetuṃ ‘‘anujānāmī’’tiādinā atthuddhāro āraddho, esevāti bandhanaṭṭho eva. Na hi rūpādīnaṃ kāmetabbabhāve vuccamāne paṭalaṭṭho yujjati tathā kāmetabbatāya anadhippetattā. Rāsaṭṭhaānisaṃsaṭṭhesupi eseva nayo tathāpi kāmetabbatāya anadhippetattā. Pārisesato pana bandhanaṭṭho gahito. Yadaggena hi nesaṃ kāmetabbatā, tadaggena bandhanabhāvo cāti.
годтаасадтоби д̇зсу яуж̇ж̇ад̇зва жагкувин̃н̃зяяаад̣̇игодтаасабхаавзна нзсам̣ гаамзд̇аб̣б̣ад̇о. годтаасз жа г̇ун̣а-сад̣̇д̣̇о д̣̇иссад̇и ‘‘д̣̇иг̇ун̣ам̣ вад̣дхзд̇аб̣б̣а’’нд̇иаад̣̇ийсу, самбад̣̇аадтоби –
Koṭṭhāsaṭṭhopi tesu yujjateva cakkhuviññeyyādikoṭṭhāsabhāvena nesaṃ kāmetabbato. Koṭṭhāse ca guṇa-saddo dissati ‘‘diguṇaṃ vaḍḍhetabba’’ntiādīsu, sampadāṭṭhopi –
‘‘асан̇кязяяаани наамаани, саг̇ун̣зна махзсино;
‘‘Asaṅkhyeyyāni nāmāni, saguṇena mahesino;
г̇ун̣зна наамамуд̣̇д̇хзяяам̣, аби наамасахассад̇о’’д̇и. (д̇ха. са. адта. 1313; уд̣̇аа. адта. 53; бади. ма. адта. 76);
Guṇena nāmamuddheyyaṃ, api nāmasahassato’’ti. (dha. sa. aṭṭha. 1313; udā. aṭṭha. 53; paṭi. ma. aṭṭha. 76);
аад̣̇ийсу соби ид̇ха на яуж̇ж̇ад̇ийд̇и ануд̣̇д̇хадо.
Ādīsu sopi idha na yujjatīti anuddhaṭo.
жагкувин̃н̃зяяаад̇и жагкувин̃н̃аан̣зна виж̇аанид̇аб̣б̣аа, д̇зна бана виж̇аананам̣ д̣̇ассанамзваад̇и ааха ‘‘бассид̇аб̣б̣аа’’д̇и. ‘‘сод̇авин̃н̃аан̣зна сод̇аб̣б̣аа’’д̇и звамаад̣̇и зд̇знубааязнаад̇и ад̇ид̣̇исад̇и. г̇авзсид̇амби ‘‘идта’’нд̇и вужжад̇и, д̇ам̣ ид̇ха наад̇хиббзд̇анд̇и ааха ‘‘барияидтаа ваа хонд̇у маа ваа’’д̇и. идтаарамман̣абхууд̇аад̇и сукаарамман̣абхууд̇аа. гааманийяаад̇и гаамзд̇аб̣б̣аа. идтабхаавзна манам̣ аббааяанд̇ийд̇и манаабаа. бияаж̇аад̇игаад̇и бияасабхааваа.
Cakkhuviññeyyāti cakkhuviññāṇena vijānitabbā, tena pana vijānanaṃ dassanamevāti āha ‘‘passitabbā’’ti. ‘‘Sotaviññāṇena sotabbā’’ti evamādi etenupāyenāti atidisati. Gavesitampi ‘‘iṭṭha’’nti vuccati, taṃ idha nādhippetanti āha ‘‘pariyiṭṭhā vā hontu mā vā’’ti. Iṭṭhārammaṇabhūtāti sukhārammaṇabhūtā. Kāmanīyāti kāmetabbā. Iṭṭhabhāvena manaṃ appāyantīti manāpā. Piyajātikāti piyasabhāvā.
г̇зд̇хзнаад̇и лобхзна абхибхууд̇аа худ̇ваа бан̃жагаамаг̇ун̣з барибхун̃ж̇анд̇ийд̇и яож̇анаа. мужчаагааранд̇и моханаагаарам̣. ад̇хиосаннаад̇и ад̇хиг̇г̇аяха аж̇жхосааяа авасаннаа, д̇знааха ‘‘ог̇аал̣хаа’’д̇и. баринидтаанаббад̇д̇аад̇и г̇илид̇ваа баринидтаабанавасзна баринидтаанам̣ убаг̇ад̇аа. аад̣̇ийнаванд̇и гаамабарибхог̇з самбад̇и, ааяад̇ин̃жа д̣̇осам̣ абассанд̇аа. гхаасажчаад̣̇анаад̣̇исамбхог̇анимид̇д̇асам̣гилзсад̇о ниссаранд̇и абаг̇ажчанд̇и зд̇знаад̇и ниссаран̣ам̣, яонисо бажжавзгкид̇ваа д̇зсам̣ барибхог̇абан̃н̃аа. д̇ад̣̇абхаавад̇о аниссаран̣абан̃н̃аад̇и имамад̇т̇ам̣ д̣̇ассзнд̇о ‘‘ид̣̇амзд̇т̇аа’’д̇иаад̣̇имааха.
Gedhenāti lobhena abhibhūtā hutvā pañcakāmaguṇe paribhuñjantīti yojanā. Mucchākāranti mohanākāraṃ. Adhiosannāti adhiggayha ajjhosāya avasannā, tenāha ‘‘ogāḷhā’’ti. Pariniṭṭhānappattāti gilitvā pariniṭṭhāpanavasena pariniṭṭhānaṃ upagatā. Ādīnavanti kāmaparibhoge sampati, āyatiñca dosaṃ apassantā. Ghāsacchādanādisambhoganimittasaṃkilesato nissaranti apagacchanti etenāti nissaraṇaṃ, yoniso paccavekkhitvā tesaṃ paribhogapaññā. Tadabhāvato anissaraṇapaññāti imamatthaṃ dassento ‘‘idametthā’’tiādimāha.
548-9. ааваранд̇ийд̇и гусалаббавад̇д̇им̣ аад̣̇ид̇ова ниваарзнд̇и. ниваарзнд̇ийд̇и ниравасзсад̇о ваараяанд̇и. онанд̇ханд̇ийд̇и ог̇ааханд̇аа вияа чаад̣̇знд̇и. барияонанд̇ханд̇ийд̇и саб̣б̣асо чаад̣̇знд̇и. ааваран̣аад̣̇ийнам̣ васзнаад̇и ааваран̣аад̣̇иад̇т̇аанам̣ васзна. д̇з хи аасзванаб̣алавад̇ааяа буримабуримзхи бажчимабажчимаа д̣̇ал̣хад̇арад̇амаад̣̇ибхааваббад̇д̇аа вуд̇д̇аа.
548-9.Āvarantīti kusalappavattiṃ āditova nivārenti. Nivārentīti niravasesato vārayanti. Onandhantīti ogāhantā viya chādenti. Pariyonandhantīti sabbaso chādenti. Āvaraṇādīnaṃ vasenāti āvaraṇādiatthānaṃ vasena. Te hi āsevanabalavatāya purimapurimehi pacchimapacchimā daḷhataratamādibhāvappattā vuttā.
сам̣санд̣̇анагат̇ааван̣н̣анаа
Saṃsandanakathāvaṇṇanā
550. ид̇т̇ибариг̇г̇ахз сад̇и бурисасса бан̃жагаамаг̇ун̣абариг̇г̇ахо барибун̣н̣о зва ход̇ийд̇и вуд̇д̇ам̣ ‘‘сабариг̇г̇аход̇и ид̇т̇ибариг̇г̇ахзна сабариг̇г̇ахо’’д̇и. ‘‘ид̇т̇ибариг̇г̇ахзна абариг̇г̇ахо’’д̇и жа ид̣̇ам̣ д̇звиж̇ж̇аб̣раахман̣зсу д̣̇иссамаанабариг̇г̇ахаанам̣ д̣̇удтуллад̇амабариг̇г̇ахаабхаавад̣̇ассанам̣. звам̣бхууд̇аанам̣ д̇звиж̇ж̇аанам̣ б̣раахман̣аанам̣ гаа б̣рахмунаа сам̣санд̣̇анаа, б̣рахмаа бана саб̣б̣зна саб̣б̣ам̣ абариг̇г̇аход̇и. взражид̇д̇зна авзро, гуд̇о зд̇асса взраббаяог̇од̇и ад̇хиббааяо. жид̇д̇аг̇злан̃н̃асан̇каад̇знаад̇и жид̇д̇уббаад̣̇аг̇злан̃н̃асан̃н̃ид̇зна, д̇знасса саб̣б̣аруубагааяаг̇злан̃н̃абхааво вуд̇д̇о ход̇и. б̣яаабаж̇жхзнаад̇и д̣̇угкзна. уд̣̇д̇хажжагуггужжаад̣̇ийхийд̇и аад̣̇и-сад̣̇д̣̇зна д̇ад̣̇згадтаа сам̣гилзсад̇хаммаа сан̇г̇аяханд̇и. аббадибад̇д̇ихзд̇убхууд̇ааяа вижигижчааяа сад̇и на гад̣̇аажи жид̇д̇ам̣ бурисасса васз вад̇д̇ад̇и, бахийнааяа бана сияаа васавад̇д̇ананд̇и ааха ‘‘вижигижчааяа абхаавад̇о жид̇д̇ам̣ васз вад̇д̇зд̇ий’’д̇и. жид̇д̇аг̇ад̇игаад̇и жид̇д̇авасигаа, д̇знааха жид̇д̇асса васз вад̇д̇анд̇ий’’д̇и. на д̇аад̣̇исод̇и б̣раахман̣аа вияа жид̇д̇авасиго на ход̇и, ат̇а ко васийбхууд̇аж̇жхаанаабхин̃н̃ад̇ааяа жид̇д̇ам̣ ад̇д̇ано васз вад̇д̇зд̇ийд̇и васавад̇д̇ий.
550. Itthipariggahe sati purisassa pañcakāmaguṇapariggaho paripuṇṇo eva hotīti vuttaṃ ‘‘sapariggahoti itthipariggahena sapariggaho’’ti. ‘‘Itthipariggahena apariggaho’’ti ca idaṃ tevijjabrāhmaṇesu dissamānapariggahānaṃ duṭṭhullatamapariggahābhāvadassanaṃ. Evaṃbhūtānaṃ tevijjānaṃ brāhmaṇānaṃ kā brahmunā saṃsandanā, brahmā pana sabbena sabbaṃ apariggahoti. Veracittena avero, kuto etassa verappayogoti adhippāyo. Cittagelaññasaṅkhātenāti cittuppādagelaññasaññitena, tenassa sabbarūpakāyagelaññabhāvo vutto hoti. Byāpajjhenāti dukkhena. Uddhaccakukkuccādīhīti ādi-saddena tadekaṭṭhā saṃkilesadhammā saṅgayhanti. Appaṭipattihetubhūtāya vicikicchāya sati na kadāci cittaṃ purisassa vase vattati, pahīnāya pana siyā vasavattananti āha ‘‘vicikicchāya abhāvato cittaṃ vase vattetī’’ti. Cittagatikāti cittavasikā, tenāha cittassa vase vattantī’’ti. Na tādisoti brāhmaṇā viya cittavasiko na hoti, atha kho vasībhūtajjhānābhiññatāya cittaṃ attano vase vattetīti vasavattī.
552. б̣рахмалогамаг̇г̇зд̇и б̣рахмалогаг̇аамимаг̇г̇з бадибаж̇ж̇ид̇аб̣б̣з, бан̃н̃абзд̇аб̣б̣з ваа, д̇ам̣ бан̃н̃абзнд̇аад̇и ад̇хиббааяо. убаг̇анд̇ваад̇и амаг̇г̇амзва ‘‘маг̇г̇о’’д̇и мижчаабадибаж̇ж̇анзна убаг̇анд̇ваа, бадиж̇аанид̇ваа ваа. бан̇гам̣ од̇ин̣н̣аа вияаад̇и мад̇т̇агз зган̇г̇улам̣ ваа убад̣дхан̇г̇улам̣ ваа сугкад̇ааяа ‘‘самад̇ала’’нд̇и сан̃н̃ааяа анзгаборисам̣ махаабан̇гам̣ од̇ин̣н̣аа вияа. ануббависанд̇ийд̇и абааяамаг̇г̇ам̣ б̣рахмалогамаг̇г̇асан̃н̃ааяа ог̇аахаяанд̇и. д̇ад̇о зва сам̣сийд̣̇ид̇ваа висаад̣̇ам̣ баабун̣анд̇и. званд̇и ‘‘самад̇ала’’нд̇иаад̣̇инаа вуд̇д̇анаязна. сам̣сийд̣̇ид̇ваад̇и ниммуж̇ж̇ид̇ваа. сугкад̇аран̣ам̣ ман̃н̃з д̇аранд̇ийд̇и сугканад̣̇ид̇аран̣ам̣ д̇аранд̇и ман̃н̃з. д̇асмаад̇и яасмаа д̇звиж̇ж̇аа амаг̇г̇амзва ‘‘маг̇г̇о’’д̇и убаг̇анд̇ваа сам̣сийд̣̇анд̇и, д̇асмаа. яат̇аа д̇зд̇и яат̇аа д̇з ‘‘самад̇ала’’нд̇и сан̃н̃ааяа бан̇гам̣ од̇ин̣н̣аа. ид̇хзва жаад̇и имасмин̃жа ад̇д̇абхаавз. сукам̣ ваа саад̇ам̣ ваа на лабханд̇ийд̇и жхаанасукам̣ ваа вибассанаасаад̇ам̣ ваа на лабханд̇и, гуд̇о маг̇г̇асукам̣ ваа ниб̣б̣аанасаад̇ам̣ ваад̇и ад̇хиббааяо. маг̇г̇ад̣̇ийбаганд̇и маг̇г̇ад̣̇ийбагаабхимад̇ам̣. ‘‘ирин̣а’’нд̇и аран̃н̃аанияаа ид̣̇ам̣ ад̇хиважананд̇и ааха ‘‘аг̇аамагам̣ махааран̃н̃а’’нд̇и . миг̇аруруаад̣̇ийнамби анубабхог̇аругкзхи. баривад̇д̇ид̇умби на саггаа хонд̇и махааган̣дагад̇ааяа. н̃аад̇ийнам̣ б̣яасанам̣ винаасо н̃аад̇иб̣яасанам̣. звам̣ бхог̇асийлаб̣яасанаани взд̣̇ид̇аб̣б̣аани. рог̇о зва б̣яасад̇и виб̣аад̇хад̇ийд̇и рог̇аб̣яасанам̣. звам̣ д̣̇идтиб̣яасанамби д̣̇адтаб̣б̣ам̣.
552.Brahmalokamaggeti brahmalokagāmimagge paṭipajjitabbe, paññapetabbe vā, taṃ paññapentāti adhippāyo. Upagantvāti amaggameva ‘‘maggo’’ti micchāpaṭipajjanena upagantvā, paṭijānitvā vā. Paṅkaṃ otiṇṇā viyāti matthake ekaṅgulaṃ vā upaḍḍhaṅgulaṃ vā sukkhatāya ‘‘samatala’’nti saññāya anekaporisaṃ mahāpaṅkaṃ otiṇṇā viya. Anuppavisantīti apāyamaggaṃ brahmalokamaggasaññāya ogāhayanti. Tato eva saṃsīditvā visādaṃ pāpuṇanti. Evanti ‘‘samatala’’ntiādinā vuttanayena. Saṃsīditvāti nimmujjitvā. Sukkhataraṇaṃ maññe tarantīti sukkhanaditaraṇaṃ taranti maññe. Tasmāti yasmā tevijjā amaggameva ‘‘maggo’’ti upagantvā saṃsīdanti, tasmā. Yathāteti yathā te ‘‘samatala’’nti saññāya paṅkaṃ otiṇṇā. Idheva cāti imasmiñca attabhāve. Sukhaṃ vā sātaṃ vā na labhantīti jhānasukhaṃ vā vipassanāsātaṃ vā na labhanti, kuto maggasukhaṃ vā nibbānasātaṃ vāti adhippāyo. Maggadīpakanti maggadīpakābhimataṃ. ‘‘Iriṇa’’nti araññāniyā idaṃ adhivacananti āha ‘‘agāmakaṃ mahārañña’’nti . Migaruruādīnampi anupabhogarukkhehi. Parivattitumpi na sakkā honti mahākaṇṭakatāya. Ñātīnaṃ byasanaṃ vināso ñātibyasanaṃ. Evaṃ bhogasīlabyasanāni veditabbāni. Rogo eva byasati vibādhatīti rogabyasanaṃ. Evaṃ diṭṭhibyasanampi daṭṭhabbaṃ.
554. ж̇аад̇асам̣вад̣дход̇и ж̇аад̇о худ̇ваа сам̣вад̣дхид̇о. на саб̣б̣асо бажжагкаа хонд̇и барижаяаабхаавад̇о. жиранигканд̇од̇и нигканд̇о худ̇ваа жирагаало. д̣̇анд̇хааяид̇ад̇д̇анд̇и виссаж̇ж̇анз манд̣̇ад̇д̇ам̣ сан̣игавуд̇д̇и, д̇ам̣ бана сам̣саяавасзна жирааяанам̣ наама ход̇ийд̇и ааха ‘‘ган̇каавасзна жирааяид̇ад̇д̇а’’нд̇и. вид̇т̇ааяид̇ад̇д̇анд̇и саараж̇ж̇ид̇ад̇д̇ам̣. адтагат̇ааяам̣ бана вид̇т̇ааяид̇ад̇д̇ам̣ наама чамбхид̇ад̇д̇анд̇и ад̇хиббааязна ‘‘т̇ад̣̇д̇хабхааваг̇г̇ахан̣а’’нд̇и вуд̇д̇ам̣.
554.Jātasaṃvaḍḍhoti jāto hutvā saṃvaḍḍhito. Na sabbaso paccakkhā honti paricayābhāvato. Ciranikkhantoti nikkhanto hutvā cirakālo. Dandhāyitattanti vissajjane mandattaṃ saṇikavutti, taṃ pana saṃsayavasena cirāyanaṃ nāma hotīti āha ‘‘kaṅkhāvasena cirāyitatta’’nti. Vitthāyitattanti sārajjitattaṃ. Aṭṭhakathāyaṃ pana vitthāyitattaṃ nāma chambhitattanti adhippāyena ‘‘thaddhabhāvaggahaṇa’’nti vuttaṃ.
555. у-ид̇и убасаг̇г̇аяог̇з лумба-сад̣̇д̣̇о уд̣̇д̇харан̣ад̇т̇о ход̇ийд̇и ‘‘уллумбад̇уу’’д̇и бад̣̇асса уд̣̇д̇харад̇ууд̇и ад̇т̇амааха. убасаг̇г̇авасзна хи д̇хаад̇у-сад̣̇д̣̇аа ад̇т̇ависзсавуд̇д̇ино хонд̇и яат̇аа ‘‘уд̣̇д̇харад̇уу’’д̇и.
555.U-iti upasaggayoge lumpa-saddo uddharaṇattho hotīti ‘‘ullumpatū’’ti padassa uddharatūti atthamāha. Upasaggavasena hi dhātu-saddā atthavisesavuttino honti yathā ‘‘uddharatū’’ti.
б̣рахмалогамаг̇г̇ад̣̇зсанааван̣н̣анаа
Brahmalokamaggadesanāvaṇṇanā
556. яасса ад̇исаязна б̣алам̣ ад̇т̇и, со ‘‘б̣алаваа’’д̇и вуд̇д̇од̇и ааха ‘‘б̣аласамбанно’’д̇и. сан̇кам̣ д̇хамаяад̇ийд̇и сан̇кад̇хамаго, д̇ам̣ д̇хамаяид̇ваа д̇ад̇о сад̣̇д̣̇абавад̇д̇аго. аббанаава ваддад̇и бадибагкад̇о саммад̣̇зва жзд̇асо вимуд̇д̇ибхаавад̇о.
556. Yassa atisayena balaṃ atthi, so ‘‘balavā’’ti vuttoti āha ‘‘balasampanno’’ti. Saṅkhaṃ dhamayatīti saṅkhadhamako, taṃ dhamayitvā tato saddapavattako. Appanāva vaṭṭati paṭipakkhato sammadeva cetaso vimuttibhāvato.
бамаан̣агад̇ам̣ гаммам̣ наама гаамааважарам̣ бамаан̣агараанам̣ сам̣гилзсад̇хаммаанам̣ авигкамбханад̇о. д̇ат̇аа хи д̇ам̣ б̣рахмавихаарабуб̣б̣абхааг̇абхууд̇ам̣ бамаан̣ам̣ ад̇иггамид̇ваа од̣̇иссагаанод̣̇иссагад̣̇исаапаран̣авасзна вад̣дхзд̇ум̣ на саггаа. вуд̇д̇авибарияааяад̇о бана аббамаан̣агад̇ам̣ гаммам̣ наама руубааруубааважарам̣, д̇знааха ‘‘д̇ан̃хий’’д̇иаад̣̇и. д̇ад̇т̇а аруубааважарз од̣̇иссагаанод̣̇иссагавасзна паран̣ам̣ на лаб̣бхад̇и, д̇ат̇аа д̣̇исаапаран̣ам̣.
Pamāṇakataṃ kammaṃ nāma kāmāvacaraṃ pamāṇakarānaṃ saṃkilesadhammānaṃ avikkhambhanato. Tathā hi taṃ brahmavihārapubbabhāgabhūtaṃ pamāṇaṃ atikkamitvā odissakaanodissakadisāpharaṇavasena vaḍḍhetuṃ na sakkā. Vuttavipariyāyato pana appamāṇakataṃ kammaṃ nāma rūpārūpāvacaraṃ, tenāha ‘‘tañhī’’tiādi. Tattha arūpāvacare odissakānodissakavasena pharaṇaṃ na labbhati, tathā disāpharaṇaṃ.
гзжи бана д̇ам̣ ааг̇аманавасзна лаб̣бхад̇ийд̇и вад̣̇анд̇и, д̇ад̣̇аяуд̇д̇ам̣. на хи б̣рахмавихаараниссанд̣̇о ааруббам̣, ат̇а ко гасин̣аниссанд̣̇о, д̇асмаа яам̣ сувибхаавид̇ам̣ васийбхаавам̣ баабид̇ам̣ ааруббам̣, д̇ам̣ ‘‘аббамаан̣агад̇а’’нд̇и вуд̇д̇анд̇и д̣̇адтаб̣б̣ам̣. яам̣ ваа саад̇исаяам̣ б̣рахмавихаарабхааванааяа абхисан̇кад̇зна санд̇аанзна ниб̣б̣ад̇д̇ид̇ам̣, яан̃жа б̣рахмавихаарасамаабад̇д̇ид̇о вудтааяа самаабаннам̣ аруубааважараж̇жхаанам̣, д̇ам̣ иминаа барияааязна паран̣аббамаан̣авасзна аббамаан̣агад̇анд̇и вад̇д̇ум̣ ваддад̇ийд̇и абарз. виймам̣сид̇ваа г̇ахзд̇аб̣б̣ам̣.
Keci pana taṃ āgamanavasena labbhatīti vadanti, tadayuttaṃ. Na hi brahmavihāranissando āruppaṃ, atha kho kasiṇanissando, tasmā yaṃ suvibhāvitaṃ vasībhāvaṃ pāpitaṃ āruppaṃ, taṃ ‘‘appamāṇakata’’nti vuttanti daṭṭhabbaṃ. Yaṃ vā sātisayaṃ brahmavihārabhāvanāya abhisaṅkhatena santānena nibbattitaṃ, yañca brahmavihārasamāpattito vuṭṭhāya samāpannaṃ arūpāvacarajjhānaṃ, taṃ iminā pariyāyena pharaṇappamāṇavasena appamāṇakatanti vattuṃ vaṭṭatīti apare. Vīmaṃsitvā gahetabbaṃ.
руубааважарааруубааважарагаммзд̇и руубааважарагаммз, аруубааважарагаммз жа сад̇и. на охийяад̇и на д̇идтад̇ийд̇и гад̇уубажид̇амби гаамааважарагаммам̣ яат̇аад̇хиг̇ад̇з махаг̇г̇ад̇аж̇жхаанз абарихийнз д̇ам̣ абхибхавид̇ваа бадиб̣аахид̇ваа саяам̣ охийяагам̣ худ̇ваа бадисанд̇хим̣ д̣̇аад̇ум̣ самад̇т̇абхаавз на д̇идтад̇и. лаг̇г̇ид̇унд̇и ааварид̇ум̣ нисзд̇хзд̇ум̣. таад̇унд̇и бадиб̣ало худ̇ваа таад̇ум̣. парид̇ваад̇и бадибпарид̇ваа. барияаад̣̇ияид̇ваад̇и д̇асса саамад̇т̇ияам̣ кзбзд̇ваа. гаммасса барияаад̣̇ияанам̣ наама д̇асса вибаагуббаад̣̇анам̣ нисзд̇хзд̇ваа ад̇д̇ано вибаагуббаад̣̇ананд̇и ааха ‘‘д̇асса вибаагам̣ бадиб̣аахид̇ваа’’д̇иаад̣̇и. звам̣ мзд̇д̇аад̣̇ивихаарийд̇и звам̣ вуд̇д̇аанам̣ мзд̇д̇аад̣̇ийнам̣ б̣рахмавихаараанам̣ васзна мзд̇д̇аад̣̇ивихаарий.
Rūpāvacarārūpāvacarakammeti rūpāvacarakamme, arūpāvacarakamme ca sati. Na ohīyati na tiṭṭhatīti katūpacitampi kāmāvacarakammaṃ yathādhigate mahaggatajjhāne aparihīne taṃ abhibhavitvā paṭibāhitvā sayaṃ ohīyakaṃ hutvā paṭisandhiṃ dātuṃ samatthabhāve na tiṭṭhati. Laggitunti āvarituṃ nisedhetuṃ. Ṭhātunti paṭibalo hutvā ṭhātuṃ. Pharitvāti paṭippharitvā. Pariyādiyitvāti tassa sāmatthiyaṃ khepetvā. Kammassa pariyādiyanaṃ nāma tassa vipākuppādanaṃ nisedhetvā attano vipākuppādananti āha ‘‘tassa vipākaṃ paṭibāhitvā’’tiādi. Evaṃ mettādivihārīti evaṃ vuttānaṃ mettādīnaṃ brahmavihārānaṃ vasena mettādivihārī.
559. аг̇г̇ан̃н̃асуд̇д̇з…бз… алад̇т̇унд̇и аг̇г̇ан̃н̃асуд̇д̇з ааг̇ад̇анаязна убасамбад̣̇ан̃жзва арахад̇д̇ан̃жа алад̇т̇ум̣ бадилабхим̣су. сзсам̣ сувин̃н̃зяяамзва.
559.Aggaññasutte…pe… alatthunti aggaññasutte āgatanayena upasampadañceva arahattañca alatthuṃ paṭilabhiṃsu. Sesaṃ suviññeyyameva.
д̇звиж̇ж̇асуд̇д̇аван̣н̣анааяа лийнад̇т̇аббагаасанаа.
Tevijjasuttavaṇṇanāya līnatthappakāsanā.
нидтид̇аа жа д̇зрасасуд̇д̇абадиман̣д̣ид̇асса сийлагканд̇хаваг̇г̇асса ад̇т̇аван̣н̣анааяа
Niṭṭhitā ca terasasuttapaṭimaṇḍitassa sīlakkhandhavaggassa atthavaṇṇanāya
лийнад̇т̇аббагаасанаад̇и.
Līnatthappakāsanāti.
сийлагканд̇хаваг̇г̇адийгаа нидтид̇аа.
Sīlakkhandhavaggaṭīkā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / д̣̇ийгханигааяа • Dīghanikāya / 13. д̇звиж̇ж̇асуд̇д̇ам̣ • 13. Tevijjasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / д̣̇ийгха нигааяа (адтагат̇аа) • Dīgha nikāya (aṭṭhakathā) / 13. д̇звиж̇ж̇асуд̇д̇аван̣н̣анаа • 13. Tevijjasuttavaṇṇanā
