| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. பரிப்³பா³ஜகவக்³கோ³
3. Paribbājakavaggo
1. தேவிஜ்ஜவச்ச²ஸுத்தவண்ணனா
1. Tevijjavacchasuttavaṇṇanā
185. தத்தா²தி ஏகபுண்ட³ரீகஸஞ்ஞிதே பரிப்³பா³ஜகாராமே. அனாக³தபுப்³போ³ லோகியஸமுதா³ஹாரவஸேன ‘‘சிரஸ்ஸங் கோ², ப⁴ந்தே’’திஆதி³னா வுச்சதி, அயங் பனெத்த² ஆக³தபுப்³ப³தங் உபாதா³ய ததா² வுத்தோ. ப⁴க³வா ஹி கேஸஞ்சி விமுத்திஜனநத்த²ங், கேஸஞ்சி இந்த்³ரியபரிபாகத்த²ங், கேஸஞ்சி விஸேஸாதி⁴க³மத்த²ங் கதா³சி தித்தி²யாராமங் உபக³ச்ச²தி. அனநுஞ்ஞாய ட²த்வாதி அனநுஜானிதப்³பே³ ட²த்வா. அனுஜானிதப்³ப³ங் ஸியா அனஞ்ஞாதஸ்ஸ ஞெய்யஸ்ஸ அபா⁴வதோ. யாவதகஞ்ஹி ஞெய்யங், தாவதகங் ப⁴க³வதோ ஞாணங், யாவதகஞ்ச ப⁴க³வதோ ஞாணங் தாவதகங் ஞெய்யங். தேனேவாஹ – ‘‘ந தஸ்ஸ அதி³ட்ட²மித⁴த்தி² கிஞ்சி, அதோ² அவிஞ்ஞாதமஜானிதப்³ப³’’ந்திஆதி³ (மஹானி॰ 156; சூளனி॰ தோ⁴தகமாணவபுச்சா²னித்³தே³ஸ 32; படி॰ ம॰ 1.121). ஸப்³ப³ஞ்ஞுதஞ்ஞாணேன ஹி ப⁴க³வா ஆவஜ்ஜெத்வா பஜானாதி. வுத்தஞ்ஹேதங் ‘‘ஆவஜ்ஜனபடிப³த்³த⁴ங் பு³த்³த⁴ஸ்ஸ ப⁴க³வதோ ஞாண’’ந்தி (மி॰ ப॰ 4.1.2). யதி³ ஏவங் ‘‘சரங் ஸமாஹிதோ நாகோ³, திட்ட²ங் நாகோ³ ஸமாஹிதோ’’தி (அ॰ நி॰ 6.43) இத³ங் ஸுத்தபத³ங் கத²ந்தி? விக்கே²பாபா⁴வதீ³பனபத³மேதங், ந அனாவஜ்ஜனேனபி ஞாணானங் பவத்திபரிதீ³பனங். யங் பனெத்த² வத்தப்³ப³ங், தங் ஹெட்டா² வித்தா²ரதோ வுத்தமேவ.
185.Tatthāti ekapuṇḍarīkasaññite paribbājakārāme. Anāgatapubbo lokiyasamudāhāravasena ‘‘cirassaṃ kho, bhante’’tiādinā vuccati, ayaṃ panettha āgatapubbataṃ upādāya tathā vutto. Bhagavā hi kesañci vimuttijananatthaṃ, kesañci indriyaparipākatthaṃ, kesañci visesādhigamatthaṃ kadāci titthiyārāmaṃ upagacchati. Ananuññāya ṭhatvāti ananujānitabbe ṭhatvā. Anujānitabbaṃ siyā anaññātassa ñeyyassa abhāvato. Yāvatakañhi ñeyyaṃ, tāvatakaṃ bhagavato ñāṇaṃ, yāvatakañca bhagavato ñāṇaṃ tāvatakaṃ ñeyyaṃ. Tenevāha – ‘‘na tassa adiṭṭhamidhatthi kiñci, atho aviññātamajānitabba’’ntiādi (mahāni. 156; cūḷani. dhotakamāṇavapucchāniddesa 32; paṭi. ma. 1.121). Sabbaññutaññāṇena hi bhagavā āvajjetvā pajānāti. Vuttañhetaṃ ‘‘āvajjanapaṭibaddhaṃ buddhassa bhagavato ñāṇa’’nti (mi. pa. 4.1.2). Yadi evaṃ ‘‘caraṃ samāhito nāgo, tiṭṭhaṃ nāgo samāhito’’ti (a. ni. 6.43) idaṃ suttapadaṃ kathanti? Vikkhepābhāvadīpanapadametaṃ, na anāvajjanenapi ñāṇānaṃ pavattiparidīpanaṃ. Yaṃ panettha vattabbaṃ, taṃ heṭṭhā vitthārato vuttameva.
186. யாவதே³வாதி இத³ங் யதா²ருசி பவத்தி விய அபராபருப்பத்திபி இச்சி²தப்³பா³தி தத³பா⁴வங் த³ஸ்ஸெந்தோ ஆஹ – ‘‘ஸகிங் கீ²ணானங் ஆஸவானங் புன கே²பேதப்³பா³பா⁴வா’’தி. பச்சுப்பன்னஜானநகு³ணந்தி இத³ங் தி³ப்³ப³சக்கு²ஞாணஸ்ஸ பரிப⁴ண்ட³ஞாணங் அனாக³தங்ஸஞாணங் அனாதி³யித்வா வுத்தங், தஸ்ஸ பன வஸேன அனாக³தங்ஸஞாணகு³ணங் த³ஸ்ஸேதீதி வத்தப்³ப³ங் ஸியா.
186.Yāvadevāti idaṃ yathāruci pavatti viya aparāparuppattipi icchitabbāti tadabhāvaṃ dassento āha – ‘‘sakiṃ khīṇānaṃ āsavānaṃ puna khepetabbābhāvā’’ti. Paccuppannajānanaguṇanti idaṃ dibbacakkhuñāṇassa paribhaṇḍañāṇaṃ anāgataṃsañāṇaṃ anādiyitvā vuttaṃ, tassa pana vasena anāgataṃsañāṇaguṇaṃ dassetīti vattabbaṃ siyā.
கி³ஹிபரிக்கா²ரேஸூதி வத்தா²ப⁴ரணாதி³த⁴னத⁴ஞ்ஞாதி³கி³ஹிபரிக்கா²ரேஸு. கி³ஹிலிங்க³ங் பன அப்பமாணங், தஸ்மா கி³ஹிப³ந்த⁴னங் சி²ந்தி³த்வா து³க்க²ஸ்ஸந்தகரா ஹொந்தியேவ. ஸதி பன து³க்க²ஸ்ஸந்தகிரியாய கி³ஹிலிங்கே³ தே ந திட்ட²ந்தியேவாதி த³ஸ்ஸெந்தோ ‘‘யேபீ’’திஆதி³மாஹ. ஸுக்கா²பெத்வா ஸமுச்சி²ந்தி³த்வா. அரஹத்தங் பத்ததி³வஸேயேவ பப்³ப³ஜனங் வா பரினிப்³பா³னங் வாதி அயங் நயோ ந ஸப்³ப³ஸாதா⁴ரணோதி ஆஹ ‘‘பூ⁴மதே³வதா பன திட்ட²ந்தீ’’தி. தத்த² காரணவசனங் ‘‘நிலீயனோகாஸஸ்ஸ அத்தி²தாயா’’தி. அரஞ்ஞபப்³ப³தாதி³பவிவேகட்டா²னங் நிலீயனோகாஸோ. ஸேஸகாமப⁴வேதி காமலோகே. லளிதஜனஸ்ஸாதி ஆப⁴ரணாலங்காரனச்சகீ³தாதி³வஸேன விலாஸயுத்தஜனஸ்ஸ.
Gihiparikkhāresūti vatthābharaṇādidhanadhaññādigihiparikkhāresu. Gihiliṅgaṃ pana appamāṇaṃ, tasmā gihibandhanaṃ chinditvā dukkhassantakarā hontiyeva. Sati pana dukkhassantakiriyāya gihiliṅge te na tiṭṭhantiyevāti dassento ‘‘yepī’’tiādimāha. Sukkhāpetvā samucchinditvā. Arahattaṃ pattadivaseyeva pabbajanaṃ vā parinibbānaṃ vāti ayaṃ nayo na sabbasādhāraṇoti āha ‘‘bhūmadevatā pana tiṭṭhantī’’ti. Tattha kāraṇavacanaṃ ‘‘nilīyanokāsassa atthitāyā’’ti. Araññapabbatādipavivekaṭṭhānaṃ nilīyanokāso. Sesakāmabhaveti kāmaloke. Laḷitajanassāti ābharaṇālaṅkāranaccagītādivasena vilāsayuttajanassa.
ஸோபீதி ‘‘ஸோ அஞ்ஞத்ர ஏகேனா’’தி வுத்தோ ஸோபி. கரதோ ந கரீயதி பாபந்தி ஏவங் ந கிரியங் படிபா³ஹதி. யதி³ அத்தானங்யேவ க³ஹெத்வா கதே²தி, அத² கஸ்மா மஹாஸத்தோ ததா³ ஆஜீவகபப்³ப³ஜ்ஜங் உபக³ச்சீ²தி ஆஹ ‘‘ததா³ கிரா’’திஆதி³. தஸ்ஸபீதி ந கேவலங் அஞ்ஞேஸங் ஏவ பாஸண்டா³னங், தஸ்ஸபி. வீரியங் ந ஹாபேஸீதி தபோஜிகு³ச்ச²வாத³ங் ஸமாதி³யித்வா டி²தோ விராக³த்தா²ய தங் ஸமாதி³ண்ணவத்தங் ந பரிச்சஜி, ஸத்து²ஸாஸனங் ந ச²ட்³டே³ஸி. தேனாஹ – ‘‘கிரியவாதீ³ ஹுத்வா ஸக்³கே³ நிப்³ப³த்ததீ’’தி.
Sopīti ‘‘so aññatra ekenā’’ti vutto sopi. Karato na karīyati pāpanti evaṃ na kiriyaṃ paṭibāhati. Yadi attānaṃyeva gahetvā katheti, atha kasmā mahāsatto tadā ājīvakapabbajjaṃ upagacchīti āha ‘‘tadā kirā’’tiādi. Tassapīti na kevalaṃ aññesaṃ eva pāsaṇḍānaṃ, tassapi. Vīriyaṃ na hāpesīti tapojigucchavādaṃ samādiyitvā ṭhito virāgatthāya taṃ samādiṇṇavattaṃ na pariccaji, satthusāsanaṃ na chaḍḍesi. Tenāha – ‘‘kiriyavādī hutvā sagge nibbattatī’’ti.
தேவிஜ்ஜவச்ச²ஸுத்தவண்ணனாய லீனத்த²ப்பகாஸனா ஸமத்தா.
Tevijjavacchasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. தேவிஜ்ஜவச்ச²ஸுத்தங் • 1. Tevijjavacchasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 1. தேவிஜ்ஜவச்ச²ஸுத்தவண்ணனா • 1. Tevijjavacchasuttavaṇṇanā
