| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৩. পরিব্বাজকৰগ্গো
3. Paribbājakavaggo
১. তেৰিজ্জৰচ্ছসুত্তৰণ্ণনা
1. Tevijjavacchasuttavaṇṇanā
১৮৫. এৰং মে সুতন্তি তেৰিজ্জৰচ্ছসুত্তং। তত্থ একপুণ্ডরীকেতি পুণ্ডরীকো ৰুচ্চতি সেতম্বরুক্খো, সো তস্মিং আরামে একো পুণ্ডরীকো অত্থীতি একপুণ্ডরীকো। এতদহোসীতি তত্থ পৰিসিতুকামতায অহোসি। চিরস্সং খো, ভন্তেতি পকতিযা আগতপুব্বতং উপাদায। ধম্মস্স চানুধম্মন্তি ইধ সব্বঞ্ঞুতঞ্ঞাণং ধম্মো নাম, মহাজনস্স ব্যাকরণং অনুধম্মো নাম। সেসং জীৰকসুত্তে (ম॰ নি॰ ২.৫১ আদযো) ৰুত্তনযমেৰ। ন মে তেতি অননুঞ্ঞায ঠত্ৰা অনুঞ্ঞম্পি পটিক্খিপতি। ‘‘সব্বঞ্ঞূ সব্বদস্সাৰী অপরিসেসং ঞাণদস্সনং পটিজানাতী’’তি হি ইদং অনুজানিতব্বং সিযা, – ‘‘চরতো চ মে…পে॰… পচ্চুপট্ঠিত’’ন্তি ইদং পন নানুজানিতব্বং। সব্বঞ্ঞুতঞ্ঞাণেন হি আৰজ্জিত্ৰা পজানাতি। তস্মা অননুঞ্ঞায ঠত্ৰা অনুঞ্ঞম্পি পটিক্খিপন্তো এৰমাহ।
185.Evaṃme sutanti tevijjavacchasuttaṃ. Tattha ekapuṇḍarīketi puṇḍarīko vuccati setambarukkho, so tasmiṃ ārāme eko puṇḍarīko atthīti ekapuṇḍarīko. Etadahosīti tattha pavisitukāmatāya ahosi. Cirassaṃ kho, bhanteti pakatiyā āgatapubbataṃ upādāya. Dhammassa cānudhammanti idha sabbaññutaññāṇaṃ dhammo nāma, mahājanassa byākaraṇaṃ anudhammo nāma. Sesaṃ jīvakasutte (ma. ni. 2.51 ādayo) vuttanayameva. Na me teti ananuññāya ṭhatvā anuññampi paṭikkhipati. ‘‘Sabbaññū sabbadassāvī aparisesaṃ ñāṇadassanaṃ paṭijānātī’’ti hi idaṃ anujānitabbaṃ siyā, – ‘‘carato ca me…pe… paccupaṭṭhita’’nti idaṃ pana nānujānitabbaṃ. Sabbaññutaññāṇena hi āvajjitvā pajānāti. Tasmā ananuññāya ṭhatvā anuññampi paṭikkhipanto evamāha.
১৮৬. আসৰানং খযাতি এত্থ সকিং খীণানং আসৰানং পুন খেপেতব্বাভাৰা যাৰদেৰাতি ন ৰুত্তং। পুব্বেনিৰাসঞাণেন চেত্থ ভগৰা অতীতজাননগুণং দস্সেতি, দিব্বচক্খুঞাণেন পচ্চুপ্পন্নজাননগুণং, আসৰক্খযঞাণেন লোকুত্তরগুণন্তি। ইতি ইমাহি তীহি ৰিজ্জাহি সকলবুদ্ধগুণে সংখিপিত্ৰা কথেসি।
186.Āsavānaṃ khayāti ettha sakiṃ khīṇānaṃ āsavānaṃ puna khepetabbābhāvā yāvadevāti na vuttaṃ. Pubbenivāsañāṇena cettha bhagavā atītajānanaguṇaṃ dasseti, dibbacakkhuñāṇena paccuppannajānanaguṇaṃ, āsavakkhayañāṇena lokuttaraguṇanti. Iti imāhi tīhi vijjāhi sakalabuddhaguṇe saṃkhipitvā kathesi.
গিহিসংযোজনন্তি গিহিবন্ধনং গিহিপরিক্খারেসু নিকন্তিং। নত্থি খো ৰচ্ছাতি গিহিসংযোজনং অপ্পহায দুক্খস্সন্তকরো নাম নত্থি। যেপি হি সন্ততিমহামত্তো উগ্গসেনো সেট্ঠিপুত্তো ৰীতসোকদারকোতি গিহিলিঙ্গে ঠিতাৰ অরহত্তং পত্তা, তেপি মগ্গেন সব্বসঙ্খারেসু নিকন্তিং সুক্খাপেত্ৰা পত্তা। তং পত্ৰা পন ন তেন লিঙ্গেন অট্ঠংসু, গিহিলিঙ্গং নামেতং হীনং, উত্তমগুণং ধারেতুং ন সক্কোতি। তস্মা তত্থ ঠিতো অরহত্তং পত্ৰা তংদিৰসমেৰ পব্বজতি ৰা পরিনিব্বাতি ৰা। ভূমদেৰতা পন তিট্ঠন্তি। কস্মা? নিলীযনোকাসস্স অত্থিতায। সেসকামভৰে মনুস্সেসু সোতাপন্নাদযো তযো তিট্ঠন্তি, কামাৰচরদেৰেসু সোতাপন্না সকদাগামিনো চ, অনাগামিখীণাসৰা পনেত্থ ন তিট্ঠন্তি। কস্মা? তঞ্হি ঠানং লল়িতজনস্স আৰাসো, নত্থি তত্থ তেসং পৰিৰেকারহং পটিচ্ছন্নট্ঠানঞ্চ। ইতি তত্থ খীণাসৰো পরিনিব্বাতি, অনাগামী চৰিত্ৰা সুদ্ধাৰাসে নিব্বত্ততি। কামাৰচরদেৰতো উপরি পন চত্তারোপি অরিযা তিট্ঠন্তি।
Gihisaṃyojananti gihibandhanaṃ gihiparikkhāresu nikantiṃ. Natthi kho vacchāti gihisaṃyojanaṃ appahāya dukkhassantakaro nāma natthi. Yepi hi santatimahāmatto uggaseno seṭṭhiputto vītasokadārakoti gihiliṅge ṭhitāva arahattaṃ pattā, tepi maggena sabbasaṅkhāresu nikantiṃ sukkhāpetvā pattā. Taṃ patvā pana na tena liṅgena aṭṭhaṃsu, gihiliṅgaṃ nāmetaṃ hīnaṃ, uttamaguṇaṃ dhāretuṃ na sakkoti. Tasmā tattha ṭhito arahattaṃ patvā taṃdivasameva pabbajati vā parinibbāti vā. Bhūmadevatā pana tiṭṭhanti. Kasmā? Nilīyanokāsassa atthitāya. Sesakāmabhave manussesu sotāpannādayo tayo tiṭṭhanti, kāmāvacaradevesu sotāpannā sakadāgāmino ca, anāgāmikhīṇāsavā panettha na tiṭṭhanti. Kasmā? Tañhi ṭhānaṃ laḷitajanassa āvāso, natthi tattha tesaṃ pavivekārahaṃ paṭicchannaṭṭhānañca. Iti tattha khīṇāsavo parinibbāti, anāgāmī cavitvā suddhāvāse nibbattati. Kāmāvacaradevato upari pana cattāropi ariyā tiṭṭhanti.
সোপাসি কম্মৰাদীতি সোপি কম্মৰাদী অহোসি, কিরিযম্পি ন পটিবাহিত্থ। তঞ্হি একনৰুতিকপ্পমত্থকে অত্তানংযেৰ গহেত্ৰা কথেতি। তদা কির মহাসত্তো পাসণ্ডপরিগ্গণ্হনত্থং পব্বজিতো তস্সপি পাসণ্ডস্স নিপ্ফলভাৰং জানিত্ৰা ৰীরিযং ন হাপেসি, কিরিযৰাদী হুত্ৰা সগ্গে নিব্বত্ততি। তস্মা এৰমাহ। সেসং সব্বত্থ উত্তানমেৰাতি।
Sopāsi kammavādīti sopi kammavādī ahosi, kiriyampi na paṭibāhittha. Tañhi ekanavutikappamatthake attānaṃyeva gahetvā katheti. Tadā kira mahāsatto pāsaṇḍapariggaṇhanatthaṃ pabbajito tassapi pāsaṇḍassa nipphalabhāvaṃ jānitvā vīriyaṃ na hāpesi, kiriyavādī hutvā sagge nibbattati. Tasmā evamāha. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
তেৰিজ্জৰচ্ছসুত্তৰণ্ণনা নিট্ঠিতা।
Tevijjavacchasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১. তেৰিজ্জৰচ্ছসুত্তং • 1. Tevijjavacchasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ১. তেৰিজ্জৰচ্ছসুত্তৰণ্ণনা • 1. Tevijjavacchasuttavaṇṇanā
