| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༣. པརིབྦཱཛཀཝགྒོ
3. Paribbājakavaggo
༡. ཏེཝིཛྫཝཙྪསུཏྟཝཎྞནཱ
1. Tevijjavacchasuttavaṇṇanā
༡༨༥. ཨེཝཾ མེ སུཏནྟི ཏེཝིཛྫཝཙྪསུཏྟཾ། ཏཏྠ ཨེཀཔུཎྜརཱིཀེཏི པུཎྜརཱིཀོ ཝུཙྩཏི སེཏམྦརུཀྑོ, སོ ཏསྨིཾ ཨཱརཱམེ ཨེཀོ པུཎྜརཱིཀོ ཨཏྠཱིཏི ཨེཀཔུཎྜརཱིཀོ། ཨེཏདཧོསཱིཏི ཏཏྠ པཝིསིཏུཀཱམཏཱཡ ཨཧོསི། ཙིརསྶཾ ཁོ, བྷནྟེཏི པཀཏིཡཱ ཨཱགཏཔུབྦཏཾ ཨུཔཱདཱཡ། དྷམྨསྶ ཙཱནུདྷམྨནྟི ཨིདྷ སབྦཉྙུཏཉྙཱཎཾ དྷམྨོ ནཱམ, མཧཱཛནསྶ བྱཱཀརཎཾ ཨནུདྷམྨོ ནཱམ། སེསཾ ཛཱིཝཀསུཏྟེ (མ॰ ནི॰ ༢.༥༡ ཨཱདཡོ) ཝུཏྟནཡམེཝ། ན མེ ཏེཏི ཨནནུཉྙཱཡ ཋཏྭཱ ཨནུཉྙམྤི པཊིཀྑིཔཏི། ‘‘སབྦཉྙཱུ སབྦདསྶཱཝཱི ཨཔརིསེསཾ ཉཱཎདསྶནཾ པཊིཛཱནཱཏཱི’’ཏི ཧི ཨིདཾ ཨནུཛཱནིཏབྦཾ སིཡཱ, – ‘‘ཙརཏོ ཙ མེ…པེ॰… པཙྩུཔཊྛིཏ’’ནྟི ཨིདཾ པན ནཱནུཛཱནིཏབྦཾ། སབྦཉྙུཏཉྙཱཎེན ཧི ཨཱཝཛྫིཏྭཱ པཛཱནཱཏི། ཏསྨཱ ཨནནུཉྙཱཡ ཋཏྭཱ ཨནུཉྙམྤི པཊིཀྑིཔནྟོ ཨེཝམཱཧ།
185.Evaṃme sutanti tevijjavacchasuttaṃ. Tattha ekapuṇḍarīketi puṇḍarīko vuccati setambarukkho, so tasmiṃ ārāme eko puṇḍarīko atthīti ekapuṇḍarīko. Etadahosīti tattha pavisitukāmatāya ahosi. Cirassaṃ kho, bhanteti pakatiyā āgatapubbataṃ upādāya. Dhammassa cānudhammanti idha sabbaññutaññāṇaṃ dhammo nāma, mahājanassa byākaraṇaṃ anudhammo nāma. Sesaṃ jīvakasutte (ma. ni. 2.51 ādayo) vuttanayameva. Na me teti ananuññāya ṭhatvā anuññampi paṭikkhipati. ‘‘Sabbaññū sabbadassāvī aparisesaṃ ñāṇadassanaṃ paṭijānātī’’ti hi idaṃ anujānitabbaṃ siyā, – ‘‘carato ca me…pe… paccupaṭṭhita’’nti idaṃ pana nānujānitabbaṃ. Sabbaññutaññāṇena hi āvajjitvā pajānāti. Tasmā ananuññāya ṭhatvā anuññampi paṭikkhipanto evamāha.
༡༨༦. ཨཱསཝཱནཾ ཁཡཱཏི ཨེཏྠ སཀིཾ ཁཱིཎཱནཾ ཨཱསཝཱནཾ པུན ཁེཔེཏབྦཱབྷཱཝཱ ཡཱཝདེཝཱཏི ན ཝུཏྟཾ། པུབྦེནིཝཱསཉཱཎེན ཙེཏྠ བྷགཝཱ ཨཏཱིཏཛཱནནགུཎཾ དསྶེཏི, དིབྦཙཀྑུཉཱཎེན པཙྩུཔྤནྣཛཱནནགུཎཾ, ཨཱསཝཀྑཡཉཱཎེན ལོཀུཏྟརགུཎནྟི། ཨིཏི ཨིམཱཧི ཏཱིཧི ཝིཛྫཱཧི སཀལབུདྡྷགུཎེ སཾཁིཔིཏྭཱ ཀཐེསི།
186.Āsavānaṃ khayāti ettha sakiṃ khīṇānaṃ āsavānaṃ puna khepetabbābhāvā yāvadevāti na vuttaṃ. Pubbenivāsañāṇena cettha bhagavā atītajānanaguṇaṃ dasseti, dibbacakkhuñāṇena paccuppannajānanaguṇaṃ, āsavakkhayañāṇena lokuttaraguṇanti. Iti imāhi tīhi vijjāhi sakalabuddhaguṇe saṃkhipitvā kathesi.
གིཧིསཾཡོཛནནྟི གིཧིབནྡྷནཾ གིཧིཔརིཀྑཱརེསུ ནིཀནྟིཾ། ནཏྠི ཁོ ཝཙྪཱཏི གིཧིསཾཡོཛནཾ ཨཔྤཧཱཡ དུཀྑསྶནྟཀརོ ནཱམ ནཏྠི། ཡེཔི ཧི སནྟཏིམཧཱམཏྟོ ཨུགྒསེནོ སེཊྛིཔུཏྟོ ཝཱིཏསོཀདཱརཀོཏི གིཧིལིངྒེ ཋིཏཱཝ ཨརཧཏྟཾ པཏྟཱ, ཏེཔི མགྒེན སབྦསངྑཱརེསུ ནིཀནྟིཾ སུཀྑཱཔེཏྭཱ པཏྟཱ། ཏཾ པཏྭཱ པན ན ཏེན ལིངྒེན ཨཊྛཾསུ, གིཧིལིངྒཾ ནཱམེཏཾ ཧཱིནཾ, ཨུཏྟམགུཎཾ དྷཱརེཏུཾ ན སཀྐོཏི། ཏསྨཱ ཏཏྠ ཋིཏོ ཨརཧཏྟཾ པཏྭཱ ཏཾདིཝསམེཝ པབྦཛཏི ཝཱ པརིནིབྦཱཏི ཝཱ། བྷཱུམདེཝཏཱ པན ཏིཊྛནྟི། ཀསྨཱ? ནིལཱིཡནོཀཱསསྶ ཨཏྠིཏཱཡ། སེསཀཱམབྷཝེ མནུསྶེསུ སོཏཱཔནྣཱདཡོ ཏཡོ ཏིཊྛནྟི, ཀཱམཱཝཙརདེཝེསུ སོཏཱཔནྣཱ སཀདཱགཱམིནོ ཙ, ཨནཱགཱམིཁཱིཎཱསཝཱ པནེཏྠ ན ཏིཊྛནྟི། ཀསྨཱ? ཏཉྷི ཋཱནཾ ལལི༹ཏཛནསྶ ཨཱཝཱསོ, ནཏྠི ཏཏྠ ཏེསཾ པཝིཝེཀཱརཧཾ པཊིཙྪནྣཊྛཱནཉྩ། ཨིཏི ཏཏྠ ཁཱིཎཱསཝོ པརིནིབྦཱཏི, ཨནཱགཱམཱི ཙཝིཏྭཱ སུདྡྷཱཝཱསེ ནིབྦཏྟཏི། ཀཱམཱཝཙརདེཝཏོ ཨུཔརི པན ཙཏྟཱརོཔི ཨརིཡཱ ཏིཊྛནྟི།
Gihisaṃyojananti gihibandhanaṃ gihiparikkhāresu nikantiṃ. Natthi kho vacchāti gihisaṃyojanaṃ appahāya dukkhassantakaro nāma natthi. Yepi hi santatimahāmatto uggaseno seṭṭhiputto vītasokadārakoti gihiliṅge ṭhitāva arahattaṃ pattā, tepi maggena sabbasaṅkhāresu nikantiṃ sukkhāpetvā pattā. Taṃ patvā pana na tena liṅgena aṭṭhaṃsu, gihiliṅgaṃ nāmetaṃ hīnaṃ, uttamaguṇaṃ dhāretuṃ na sakkoti. Tasmā tattha ṭhito arahattaṃ patvā taṃdivasameva pabbajati vā parinibbāti vā. Bhūmadevatā pana tiṭṭhanti. Kasmā? Nilīyanokāsassa atthitāya. Sesakāmabhave manussesu sotāpannādayo tayo tiṭṭhanti, kāmāvacaradevesu sotāpannā sakadāgāmino ca, anāgāmikhīṇāsavā panettha na tiṭṭhanti. Kasmā? Tañhi ṭhānaṃ laḷitajanassa āvāso, natthi tattha tesaṃ pavivekārahaṃ paṭicchannaṭṭhānañca. Iti tattha khīṇāsavo parinibbāti, anāgāmī cavitvā suddhāvāse nibbattati. Kāmāvacaradevato upari pana cattāropi ariyā tiṭṭhanti.
སོཔཱསི ཀམྨཝཱདཱིཏི སོཔི ཀམྨཝཱདཱི ཨཧོསི, ཀིརིཡམྤི ན པཊིབཱཧིཏྠ། ཏཉྷི ཨེཀནཝུཏིཀཔྤམཏྠཀེ ཨཏྟཱནཾཡེཝ གཧེཏྭཱ ཀཐེཏི། ཏདཱ ཀིར མཧཱསཏྟོ པཱསཎྜཔརིགྒཎྷནཏྠཾ པབྦཛིཏོ ཏསྶཔི པཱསཎྜསྶ ནིཔྥལབྷཱཝཾ ཛཱནིཏྭཱ ཝཱིརིཡཾ ན ཧཱཔེསི, ཀིརིཡཝཱདཱི ཧུཏྭཱ སགྒེ ནིབྦཏྟཏི། ཏསྨཱ ཨེཝམཱཧ། སེསཾ སབྦཏྠ ཨུཏྟཱནམེཝཱཏི།
Sopāsi kammavādīti sopi kammavādī ahosi, kiriyampi na paṭibāhittha. Tañhi ekanavutikappamatthake attānaṃyeva gahetvā katheti. Tadā kira mahāsatto pāsaṇḍapariggaṇhanatthaṃ pabbajito tassapi pāsaṇḍassa nipphalabhāvaṃ jānitvā vīriyaṃ na hāpesi, kiriyavādī hutvā sagge nibbattati. Tasmā evamāha. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཏེཝིཛྫཝཙྪསུཏྟཝཎྞནཱ ནིཊྛིཏཱ།
Tevijjavacchasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༡. ཏེཝིཛྫཝཙྪསུཏྟཾ • 1. Tevijjavacchasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༡. ཏེཝིཛྫཝཙྪསུཏྟཝཎྞནཱ • 1. Tevijjavacchasuttavaṇṇanā
