| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. த²ம்பா⁴ரோபகத்தே²ரஅபதா³னவண்ணனா
2. Thambhāropakattheraapadānavaṇṇanā
நிப்³பு³தே லோகனாத²ம்ஹீதிஆதி³கங் ஆயஸ்மதோ த²ம்பா⁴ரோபகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ த⁴ம்மத³ஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ ஸத்³தோ⁴ பஸன்னோ பரினிப்³பு³தே ப⁴க³வதி தஸ்ஸ ப⁴க³வதோ தா⁴துக³ப்³ப⁴மாளகே த²ம்ப⁴ங் நிக²னித்வா த⁴ஜங் ஆரோபேஸி. ப³ஹூனி ஜாதிஸுமனபுப்பா²னி க³ந்தி²த்வா நிஸ்ஸேணியா ஆரோஹித்வா பூஜேஸி.
Nibbutelokanāthamhītiādikaṃ āyasmato thambhāropakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto dhammadassissa bhagavato kāle kulagehe nibbatto saddho pasanno parinibbute bhagavati tassa bhagavato dhātugabbhamāḷake thambhaṃ nikhanitvā dhajaṃ āropesi. Bahūni jātisumanapupphāni ganthitvā nisseṇiyā ārohitvā pūjesi.
5. ஸோ யாவதாயுகங் ட²த்வா காலங் கத்வா தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா ஸப்³ப³த்த² பூஜிதோ இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ த³ஹரகாலதோ பபு⁴தி பூஜனீயோ ஸாஸனே ப³த்³த⁴ஸத்³தோ⁴ பப்³ப³ஜித்வா ஸஹ படிஸம்பி⁴தா³ஹி அரஹத்தங் பத்தோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ நிப்³பு³தே லோகனாத²ம்ஹீதிஆதி³மாஹ. தத்த² நிப்³பு³தே லோகனாத²ம்ஹீதி ஸகலலோகஸ்ஸ நாதே² பதா⁴னபூ⁴தே படிஸரணே ச ஸத்த²ரி க²ந்த⁴பரினிப்³பா³னேன நிப்³பு³தே நிப்³பு³ததீ³பஸிகா² விய அத³ஸ்ஸனங் க³தேதி அத்தோ². த⁴ம்மத³ஸ்ஸீனராஸபே⁴தி சதுஸச்சத⁴ம்மங் பஸ்ஸதீதி த⁴ம்மத³ஸ்ஸீ, அத² வா ஸதிபட்டா²னாதி³கே ஸத்ததிங்ஸபோ³தி⁴பக்கி²யத⁴ம்மே த³ஸ்ஸனஸீலோ பஸ்ஸனஸீலோதி த⁴ம்மத³ஸ்ஸீ, நரானங் ஆஸபோ⁴ பவரோ உத்தமோதி நராஸபோ⁴, த⁴ம்மத³ஸ்ஸீ ச ஸோ நராஸபோ⁴ சேதி த⁴ம்மத³ஸ்ஸீனராஸபோ⁴, தஸ்மிங் த⁴ம்மத³ஸ்ஸீனராஸபே⁴. ஆரோபேஸிங் த⁴ஜங் த²ம்ப⁴ந்தி சேதியமாளகே த²ம்ப⁴ங் நிக²னித்வா தத்த² த⁴ஜங் ஆரோபேஸிங் ப³ந்தி⁴த்வா ட²பேஸிந்தி அத்தோ².
5. So yāvatāyukaṃ ṭhatvā kālaṃ katvā devamanussesu saṃsaranto ubhayasampattiyo anubhavitvā sabbattha pūjito imasmiṃ buddhuppāde ekasmiṃ kulagehe nibbatto daharakālato pabhuti pūjanīyo sāsane baddhasaddho pabbajitvā saha paṭisambhidāhi arahattaṃ patto attano pubbakammaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Tattha nibbute lokanāthamhīti sakalalokassa nāthe padhānabhūte paṭisaraṇe ca satthari khandhaparinibbānena nibbute nibbutadīpasikhā viya adassanaṃ gateti attho. Dhammadassīnarāsabheti catusaccadhammaṃ passatīti dhammadassī, atha vā satipaṭṭhānādike sattatiṃsabodhipakkhiyadhamme dassanasīlo passanasīloti dhammadassī, narānaṃ āsabho pavaro uttamoti narāsabho, dhammadassī ca so narāsabho ceti dhammadassīnarāsabho, tasmiṃ dhammadassīnarāsabhe. Āropesiṃ dhajaṃ thambhanti cetiyamāḷake thambhaṃ nikhanitvā tattha dhajaṃ āropesiṃ bandhitvā ṭhapesinti attho.
6. நிஸ்ஸேணிங் மாபயித்வானாதி நிஸ்ஸாய தங் இணந்தி க³ச்ச²ந்தி ஆரோஹந்தி உபரீதி நிஸ்ஸேணி, தங் நிஸ்ஸேணிங் மாபயித்வா காரெத்வா ப³ந்தி⁴த்வா தூ²பஸெட்ட²ங் ஸமாருஹிந்தி ஸம்ப³ந்தோ⁴. ஜாதிபுப்ப²ங் க³ஹெத்வானாதி ஜாயமானமேவ ஜனானங் ஸுந்த³ரங் மனங் கரோதீதி ஜாதிஸுமனங், ஜாதிஸுமனமேவ புப்ப²ங் ‘‘ஜாதிஸுமனபுப்ப²’’ந்தி வத்தப்³பே³ கா³தா²ப³ந்த⁴ஸுக²த்த²ங் ஸுமனஸத்³த³ஸ்ஸ லோபங் கத்வா ‘‘ஜாதிபுப்ப²’’ந்தி வுத்தங், தங் ஜாதிஸுமனபுப்ப²ங் க³ஹெத்வா க³ந்தி²த்வா தூ²பம்ஹி ஆரோபயிங், ஆரோபெத்வா பூஜேஸிந்தி அத்தோ². ஸேஸங் ஸுவிஞ்ஞெய்யமேவாதி.
6.Nisseṇiṃ māpayitvānāti nissāya taṃ iṇanti gacchanti ārohanti uparīti nisseṇi, taṃ nisseṇiṃ māpayitvā kāretvā bandhitvā thūpaseṭṭhaṃ samāruhinti sambandho. Jātipupphaṃ gahetvānāti jāyamānameva janānaṃ sundaraṃ manaṃ karotīti jātisumanaṃ, jātisumanameva pupphaṃ ‘‘jātisumanapuppha’’nti vattabbe gāthābandhasukhatthaṃ sumanasaddassa lopaṃ katvā ‘‘jātipuppha’’nti vuttaṃ, taṃ jātisumanapupphaṃ gahetvā ganthitvā thūpamhi āropayiṃ, āropetvā pūjesinti attho. Sesaṃ suviññeyyamevāti.
த²ம்பா⁴ரோபகத்தே²ரஅபதா³னவண்ணனா ஸமத்தா.
Thambhāropakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. த²ம்பா⁴ரோபகத்தே²ரஅபதா³னங் • 2. Thambhāropakattheraapadānaṃ
