| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২. থম্ভারোপকত্থেরঅপদানৰণ্ণনা
2. Thambhāropakattheraapadānavaṇṇanā
নিব্বুতে লোকনাথম্হীতিআদিকং আযস্মতো থম্ভারোপকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ধম্মদস্সিস্স ভগৰতো কালে কুলগেহে নিব্বত্তো সদ্ধো পসন্নো পরিনিব্বুতে ভগৰতি তস্স ভগৰতো ধাতুগব্ভমাল়কে থম্ভং নিখনিত্ৰা ধজং আরোপেসি। বহূনি জাতিসুমনপুপ্ফানি গন্থিত্ৰা নিস্সেণিযা আরোহিত্ৰা পূজেসি।
Nibbutelokanāthamhītiādikaṃ āyasmato thambhāropakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto dhammadassissa bhagavato kāle kulagehe nibbatto saddho pasanno parinibbute bhagavati tassa bhagavato dhātugabbhamāḷake thambhaṃ nikhanitvā dhajaṃ āropesi. Bahūni jātisumanapupphāni ganthitvā nisseṇiyā ārohitvā pūjesi.
৫. সো যাৰতাযুকং ঠত্ৰা কালং কত্ৰা দেৰমনুস্সেসু সংসরন্তো উভযসম্পত্তিযো অনুভৰিত্ৰা সব্বত্থ পূজিতো ইমস্মিং বুদ্ধুপ্পাদে একস্মিং কুলগেহে নিব্বত্তো দহরকালতো পভুতি পূজনীযো সাসনে বদ্ধসদ্ধো পব্বজিত্ৰা সহ পটিসম্ভিদাহি অরহত্তং পত্তো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো নিব্বুতে লোকনাথম্হীতিআদিমাহ। তত্থ নিব্বুতে লোকনাথম্হীতি সকললোকস্স নাথে পধানভূতে পটিসরণে চ সত্থরি খন্ধপরিনিব্বানেন নিব্বুতে নিব্বুতদীপসিখা ৰিয অদস্সনং গতেতি অত্থো। ধম্মদস্সীনরাসভেতি চতুসচ্চধম্মং পস্সতীতি ধম্মদস্সী, অথ ৰা সতিপট্ঠানাদিকে সত্ততিংসবোধিপক্খিযধম্মে দস্সনসীলো পস্সনসীলোতি ধম্মদস্সী, নরানং আসভো পৰরো উত্তমোতি নরাসভো, ধম্মদস্সী চ সো নরাসভো চেতি ধম্মদস্সীনরাসভো, তস্মিং ধম্মদস্সীনরাসভে। আরোপেসিং ধজং থম্ভন্তি চেতিযমাল়কে থম্ভং নিখনিত্ৰা তত্থ ধজং আরোপেসিং বন্ধিত্ৰা ঠপেসিন্তি অত্থো।
5. So yāvatāyukaṃ ṭhatvā kālaṃ katvā devamanussesu saṃsaranto ubhayasampattiyo anubhavitvā sabbattha pūjito imasmiṃ buddhuppāde ekasmiṃ kulagehe nibbatto daharakālato pabhuti pūjanīyo sāsane baddhasaddho pabbajitvā saha paṭisambhidāhi arahattaṃ patto attano pubbakammaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Tattha nibbute lokanāthamhīti sakalalokassa nāthe padhānabhūte paṭisaraṇe ca satthari khandhaparinibbānena nibbute nibbutadīpasikhā viya adassanaṃ gateti attho. Dhammadassīnarāsabheti catusaccadhammaṃ passatīti dhammadassī, atha vā satipaṭṭhānādike sattatiṃsabodhipakkhiyadhamme dassanasīlo passanasīloti dhammadassī, narānaṃ āsabho pavaro uttamoti narāsabho, dhammadassī ca so narāsabho ceti dhammadassīnarāsabho, tasmiṃ dhammadassīnarāsabhe. Āropesiṃ dhajaṃ thambhanti cetiyamāḷake thambhaṃ nikhanitvā tattha dhajaṃ āropesiṃ bandhitvā ṭhapesinti attho.
৬. নিস্সেণিং মাপযিত্ৰানাতি নিস্সায তং ইণন্তি গচ্ছন্তি আরোহন্তি উপরীতি নিস্সেণি, তং নিস্সেণিং মাপযিত্ৰা কারেত্ৰা বন্ধিত্ৰা থূপসেট্ঠং সমারুহিন্তি সম্বন্ধো। জাতিপুপ্ফং গহেত্ৰানাতি জাযমানমেৰ জনানং সুন্দরং মনং করোতীতি জাতিসুমনং, জাতিসুমনমেৰ পুপ্ফং ‘‘জাতিসুমনপুপ্ফ’’ন্তি ৰত্তব্বে গাথাবন্ধসুখত্থং সুমনসদ্দস্স লোপং কত্ৰা ‘‘জাতিপুপ্ফ’’ন্তি ৰুত্তং, তং জাতিসুমনপুপ্ফং গহেত্ৰা গন্থিত্ৰা থূপম্হি আরোপযিং, আরোপেত্ৰা পূজেসিন্তি অত্থো। সেসং সুৰিঞ্ঞেয্যমেৰাতি।
6.Nisseṇiṃ māpayitvānāti nissāya taṃ iṇanti gacchanti ārohanti uparīti nisseṇi, taṃ nisseṇiṃ māpayitvā kāretvā bandhitvā thūpaseṭṭhaṃ samāruhinti sambandho. Jātipupphaṃ gahetvānāti jāyamānameva janānaṃ sundaraṃ manaṃ karotīti jātisumanaṃ, jātisumanameva pupphaṃ ‘‘jātisumanapuppha’’nti vattabbe gāthābandhasukhatthaṃ sumanasaddassa lopaṃ katvā ‘‘jātipuppha’’nti vuttaṃ, taṃ jātisumanapupphaṃ gahetvā ganthitvā thūpamhi āropayiṃ, āropetvā pūjesinti attho. Sesaṃ suviññeyyamevāti.
থম্ভারোপকত্থেরঅপদানৰণ্ণনা সমত্তা।
Thambhāropakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ২. থম্ভারোপকত্থেরঅপদানং • 2. Thambhāropakattheraapadānaṃ
