| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೨. ಥಮ್ಭಾರೋಪಕತ್ಥೇರಅಪದಾನವಣ್ಣನಾ
2. Thambhāropakattheraapadānavaṇṇanā
ನಿಬ್ಬುತೇ ಲೋಕನಾಥಮ್ಹೀತಿಆದಿಕಂ ಆಯಸ್ಮತೋ ಥಮ್ಭಾರೋಪಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಧಮ್ಮದಸ್ಸಿಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ಸದ್ಧೋ ಪಸನ್ನೋ ಪರಿನಿಬ್ಬುತೇ ಭಗವತಿ ತಸ್ಸ ಭಗವತೋ ಧಾತುಗಬ್ಭಮಾಳಕೇ ಥಮ್ಭಂ ನಿಖನಿತ್ವಾ ಧಜಂ ಆರೋಪೇಸಿ। ಬಹೂನಿ ಜಾತಿಸುಮನಪುಪ್ಫಾನಿ ಗನ್ಥಿತ್ವಾ ನಿಸ್ಸೇಣಿಯಾ ಆರೋಹಿತ್ವಾ ಪೂಜೇಸಿ।
Nibbutelokanāthamhītiādikaṃ āyasmato thambhāropakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto dhammadassissa bhagavato kāle kulagehe nibbatto saddho pasanno parinibbute bhagavati tassa bhagavato dhātugabbhamāḷake thambhaṃ nikhanitvā dhajaṃ āropesi. Bahūni jātisumanapupphāni ganthitvā nisseṇiyā ārohitvā pūjesi.
೫. ಸೋ ಯಾವತಾಯುಕಂ ಠತ್ವಾ ಕಾಲಂ ಕತ್ವಾ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಸಬ್ಬತ್ಥ ಪೂಜಿತೋ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ದಹರಕಾಲತೋ ಪಭುತಿ ಪೂಜನೀಯೋ ಸಾಸನೇ ಬದ್ಧಸದ್ಧೋ ಪಬ್ಬಜಿತ್ವಾ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ತೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ನಿಬ್ಬುತೇ ಲೋಕನಾಥಮ್ಹೀತಿಆದಿಮಾಹ। ತತ್ಥ ನಿಬ್ಬುತೇ ಲೋಕನಾಥಮ್ಹೀತಿ ಸಕಲಲೋಕಸ್ಸ ನಾಥೇ ಪಧಾನಭೂತೇ ಪಟಿಸರಣೇ ಚ ಸತ್ಥರಿ ಖನ್ಧಪರಿನಿಬ್ಬಾನೇನ ನಿಬ್ಬುತೇ ನಿಬ್ಬುತದೀಪಸಿಖಾ ವಿಯ ಅದಸ್ಸನಂ ಗತೇತಿ ಅತ್ಥೋ। ಧಮ್ಮದಸ್ಸೀನರಾಸಭೇತಿ ಚತುಸಚ್ಚಧಮ್ಮಂ ಪಸ್ಸತೀತಿ ಧಮ್ಮದಸ್ಸೀ, ಅಥ ವಾ ಸತಿಪಟ್ಠಾನಾದಿಕೇ ಸತ್ತತಿಂಸಬೋಧಿಪಕ್ಖಿಯಧಮ್ಮೇ ದಸ್ಸನಸೀಲೋ ಪಸ್ಸನಸೀಲೋತಿ ಧಮ್ಮದಸ್ಸೀ, ನರಾನಂ ಆಸಭೋ ಪವರೋ ಉತ್ತಮೋತಿ ನರಾಸಭೋ, ಧಮ್ಮದಸ್ಸೀ ಚ ಸೋ ನರಾಸಭೋ ಚೇತಿ ಧಮ್ಮದಸ್ಸೀನರಾಸಭೋ, ತಸ್ಮಿಂ ಧಮ್ಮದಸ್ಸೀನರಾಸಭೇ। ಆರೋಪೇಸಿಂ ಧಜಂ ಥಮ್ಭನ್ತಿ ಚೇತಿಯಮಾಳಕೇ ಥಮ್ಭಂ ನಿಖನಿತ್ವಾ ತತ್ಥ ಧಜಂ ಆರೋಪೇಸಿಂ ಬನ್ಧಿತ್ವಾ ಠಪೇಸಿನ್ತಿ ಅತ್ಥೋ।
5. So yāvatāyukaṃ ṭhatvā kālaṃ katvā devamanussesu saṃsaranto ubhayasampattiyo anubhavitvā sabbattha pūjito imasmiṃ buddhuppāde ekasmiṃ kulagehe nibbatto daharakālato pabhuti pūjanīyo sāsane baddhasaddho pabbajitvā saha paṭisambhidāhi arahattaṃ patto attano pubbakammaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Tattha nibbute lokanāthamhīti sakalalokassa nāthe padhānabhūte paṭisaraṇe ca satthari khandhaparinibbānena nibbute nibbutadīpasikhā viya adassanaṃ gateti attho. Dhammadassīnarāsabheti catusaccadhammaṃ passatīti dhammadassī, atha vā satipaṭṭhānādike sattatiṃsabodhipakkhiyadhamme dassanasīlo passanasīloti dhammadassī, narānaṃ āsabho pavaro uttamoti narāsabho, dhammadassī ca so narāsabho ceti dhammadassīnarāsabho, tasmiṃ dhammadassīnarāsabhe. Āropesiṃ dhajaṃ thambhanti cetiyamāḷake thambhaṃ nikhanitvā tattha dhajaṃ āropesiṃ bandhitvā ṭhapesinti attho.
೬. ನಿಸ್ಸೇಣಿಂ ಮಾಪಯಿತ್ವಾನಾತಿ ನಿಸ್ಸಾಯ ತಂ ಇಣನ್ತಿ ಗಚ್ಛನ್ತಿ ಆರೋಹನ್ತಿ ಉಪರೀತಿ ನಿಸ್ಸೇಣಿ, ತಂ ನಿಸ್ಸೇಣಿಂ ಮಾಪಯಿತ್ವಾ ಕಾರೇತ್ವಾ ಬನ್ಧಿತ್ವಾ ಥೂಪಸೇಟ್ಠಂ ಸಮಾರುಹಿನ್ತಿ ಸಮ್ಬನ್ಧೋ। ಜಾತಿಪುಪ್ಫಂ ಗಹೇತ್ವಾನಾತಿ ಜಾಯಮಾನಮೇವ ಜನಾನಂ ಸುನ್ದರಂ ಮನಂ ಕರೋತೀತಿ ಜಾತಿಸುಮನಂ, ಜಾತಿಸುಮನಮೇವ ಪುಪ್ಫಂ ‘‘ಜಾತಿಸುಮನಪುಪ್ಫ’’ನ್ತಿ ವತ್ತಬ್ಬೇ ಗಾಥಾಬನ್ಧಸುಖತ್ಥಂ ಸುಮನಸದ್ದಸ್ಸ ಲೋಪಂ ಕತ್ವಾ ‘‘ಜಾತಿಪುಪ್ಫ’’ನ್ತಿ ವುತ್ತಂ, ತಂ ಜಾತಿಸುಮನಪುಪ್ಫಂ ಗಹೇತ್ವಾ ಗನ್ಥಿತ್ವಾ ಥೂಪಮ್ಹಿ ಆರೋಪಯಿಂ, ಆರೋಪೇತ್ವಾ ಪೂಜೇಸಿನ್ತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
6.Nisseṇiṃ māpayitvānāti nissāya taṃ iṇanti gacchanti ārohanti uparīti nisseṇi, taṃ nisseṇiṃ māpayitvā kāretvā bandhitvā thūpaseṭṭhaṃ samāruhinti sambandho. Jātipupphaṃ gahetvānāti jāyamānameva janānaṃ sundaraṃ manaṃ karotīti jātisumanaṃ, jātisumanameva pupphaṃ ‘‘jātisumanapuppha’’nti vattabbe gāthābandhasukhatthaṃ sumanasaddassa lopaṃ katvā ‘‘jātipuppha’’nti vuttaṃ, taṃ jātisumanapupphaṃ gahetvā ganthitvā thūpamhi āropayiṃ, āropetvā pūjesinti attho. Sesaṃ suviññeyyamevāti.
ಥಮ್ಭಾರೋಪಕತ್ಥೇರಅಪದಾನವಣ್ಣನಾ ಸಮತ್ತಾ।
Thambhāropakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೨. ಥಮ್ಭಾರೋಪಕತ್ಥೇರಅಪದಾನಂ • 2. Thambhāropakattheraapadānaṃ
