| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
२. थनस्सितदारकङ्गपञ्हो
2. Thanassitadārakaṅgapañho
२. ‘‘भन्ते नागसेन, ‘थनस्सितदारकस्स एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति ? ‘‘यथा, महाराज, थनस्सितदारको सदत्थे लग्गति, खीरत्थिको रोदति, एवमेव खो, महाराज, योगिना योगावचरेन सदत्थे लग्गितब्बं, सब्बत्थ धम्मञाणेन भवितब्बं, उद्देसे परिपुच्छाय सम्मप्पयोगे पविवेके गरुसंवासे कल्याणमित्तसेवने। इदं, महाराज, थनस्सितदारकस्स एकं अङ्गं गहेतब्बं। भासितम्पेतं, महाराज, भगवता देवातिदेवेन दीघनिकायवरे परिनिब्बानसुत्तन्ते –
2. ‘‘Bhante nāgasena, ‘thanassitadārakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti ? ‘‘Yathā, mahārāja, thanassitadārako sadatthe laggati, khīratthiko rodati, evameva kho, mahārāja, yoginā yogāvacarena sadatthe laggitabbaṃ, sabbattha dhammañāṇena bhavitabbaṃ, uddese paripucchāya sammappayoge paviveke garusaṃvāse kalyāṇamittasevane. Idaṃ, mahārāja, thanassitadārakassa ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena dīghanikāyavare parinibbānasuttante –
‘‘‘इङ्घं तुम्हे, आनन्द, सारत्थे 1 घटथ, सारत्थे अनुयुञ्जथ।
‘‘‘Iṅghaṃ tumhe, ānanda, sāratthe 2 ghaṭatha, sāratthe anuyuñjatha;
सारत्थे अप्पमत्ता आतापिनो पहितत्ता विहरथा’’’ति॥
Sāratthe appamattā ātāpino pahitattā viharathā’’’ti.
थनस्सितदारकङ्गपञ्हो दुतियो।
Thanassitadārakaṅgapañho dutiyo.
Footnotes:
