| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. ঠানসুত্তং
2. Ṭhānasuttaṃ
১৯২. ‘‘চত্তারিমানি, ভিক্খৰে, ঠানানি চতূহি ঠানেহি ৰেদিতব্বানি। কতমানি চত্তারি? সংৰাসেন, ভিক্খৰে, সীলং ৰেদিতব্বং, তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। সংৰোহারেন, ভিক্খৰে, সোচেয্যং ৰেদিতব্বং, তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। আপদাসু, ভিক্খৰে, থামো ৰেদিতব্বো, সো চ খো দীঘেন অদ্ধুনা , ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেন। সাকচ্ছায, ভিক্খৰে, পঞ্ঞা ৰেদিতব্বা, সা চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনাতি।
192. ‘‘Cattārimāni, bhikkhave, ṭhānāni catūhi ṭhānehi veditabbāni. Katamāni cattāri? Saṃvāsena, bhikkhave, sīlaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Saṃvohārena, bhikkhave, soceyyaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Āpadāsu, bhikkhave, thāmo veditabbo, so ca kho dīghena addhunā , na ittaraṃ; manasikarotā, no amanasikarotā; paññavatā, no duppaññena. Sākacchāya, bhikkhave, paññā veditabbā, sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenāti.
1 ‘‘‘সংৰাসেন , ভিক্খৰে, সীলং ৰেদিতব্বং, তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি, ইতি খো পনেতং ৰুত্তং। কিঞ্চেতং পটিচ্চ ৰুত্তং? ইধ, ভিক্খৰে, পুগ্গলো পুগ্গলেন সদ্ধিং সংৰসমানো এৰং জানাতি – ‘দীঘরত্তং খো অযমাযস্মা খণ্ডকারী ছিদ্দকারী সবলকারী কম্মাসকারী, ন সন্ততকারী ন সন্ততৰুত্তি 2; সীলেসু দুস্সীলো অযমাযস্মা, নাযমাযস্মা সীলৰা’’’তি।
3 ‘‘‘Saṃvāsena , bhikkhave, sīlaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, puggalo puggalena saddhiṃ saṃvasamāno evaṃ jānāti – ‘dīgharattaṃ kho ayamāyasmā khaṇḍakārī chiddakārī sabalakārī kammāsakārī, na santatakārī na santatavutti 4; sīlesu dussīlo ayamāyasmā, nāyamāyasmā sīlavā’’’ti.
‘‘‘ইধ পন, ভিক্খৰে, পুগ্গলো পুগ্গলেন সদ্ধিং সংৰসমানো এৰং জানাতি – ‘দীঘরত্তং খো অযমাযস্মা অখণ্ডকারী অচ্ছিদ্দকারী অসবলকারী অকম্মাসকারী সন্ততকারী সন্ততৰুত্তি; সীলেসু সীলৰা অযমাযস্মা, নাযমাযস্মা দুস্সীলো’তি। ‘সংৰাসেন, ভিক্খৰে, সীলং ৰেদিতব্বং, তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি, ইতি যং তং ৰুত্তং ইদমেতং পটিচ্চ ৰুত্তং।
‘‘‘Idha pana, bhikkhave, puggalo puggalena saddhiṃ saṃvasamāno evaṃ jānāti – ‘dīgharattaṃ kho ayamāyasmā akhaṇḍakārī acchiddakārī asabalakārī akammāsakārī santatakārī santatavutti; sīlesu sīlavā ayamāyasmā, nāyamāyasmā dussīlo’ti. ‘Saṃvāsena, bhikkhave, sīlaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti yaṃ taṃ vuttaṃ idametaṃ paṭicca vuttaṃ.
‘‘‘সংৰোহারেন, ভিক্খৰে, সোচেয্যং ৰেদিতব্বং, তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি, ইতি খো পনেতং ৰুত্তং। কিঞ্চেতং পটিচ্চ ৰুত্তং? ইধ, ভিক্খৰে, পুগ্গলো পুগ্গলেন সদ্ধিং সংৰোহরমানো এৰং জানাতি – ‘অঞ্ঞথা খো অযমাযস্মা একেন একো ৰোহরতি, অঞ্ঞথা দ্ৰীহি, অঞ্ঞথা তীহি, অঞ্ঞথা সম্বহুলেহি; ৰোক্কমতি অযমাযস্মা পুরিমৰোহারা পচ্ছিমৰোহারং; অপরিসুদ্ধৰোহারো অযমাযস্মা, নাযমাযস্মা পরিসুদ্ধৰোহারো’’’তি।
‘‘‘Saṃvohārena, bhikkhave, soceyyaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, puggalo puggalena saddhiṃ saṃvoharamāno evaṃ jānāti – ‘aññathā kho ayamāyasmā ekena eko voharati, aññathā dvīhi, aññathā tīhi, aññathā sambahulehi; vokkamati ayamāyasmā purimavohārā pacchimavohāraṃ; aparisuddhavohāro ayamāyasmā, nāyamāyasmā parisuddhavohāro’’’ti.
‘‘ইধ পন, ভিক্খৰে, পুগ্গলো পুগ্গলেন সদ্ধিং সংৰোহরমানো এৰং জানাতি – ‘যথেৰ খো অযমাযস্মা একেন একো ৰোহরতি, তথা দ্ৰীহি, তথা তীহি, তথা সম্বহুলেহি। নাযমাযস্মা ৰোক্কমতি পুরিমৰোহারা পচ্ছিমৰোহারং; পরিসুদ্ধৰোহারো অযমাযস্মা, নাযমাযস্মা অপরিসুদ্ধৰোহারো’তি । ‘সংৰোহারেন, ভিক্খৰে, সোচেয্যং ৰেদিতব্বং, তঞ্চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি, ইতি যং তং ৰুত্তং ইদমেতং পটিচ্চ ৰুত্তং।
‘‘Idha pana, bhikkhave, puggalo puggalena saddhiṃ saṃvoharamāno evaṃ jānāti – ‘yatheva kho ayamāyasmā ekena eko voharati, tathā dvīhi, tathā tīhi, tathā sambahulehi. Nāyamāyasmā vokkamati purimavohārā pacchimavohāraṃ; parisuddhavohāro ayamāyasmā, nāyamāyasmā aparisuddhavohāro’ti . ‘Saṃvohārena, bhikkhave, soceyyaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti yaṃ taṃ vuttaṃ idametaṃ paṭicca vuttaṃ.
‘‘‘আপদাসু, ভিক্খৰে, থামো ৰেদিতব্বো, সো চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি, ইতি খো পনেতং ৰুত্তং। কিঞ্চেতং পটিচ্চ ৰুত্তং? ইধ, ভিক্খৰে, একচ্চো ঞাতিব্যসনেন ৰা ফুট্ঠো সমানো, ভোগব্যসনেন ৰা ফুট্ঠো সমানো, রোগব্যসনেন ৰা ফুট্ঠো সমানো ন ইতি পটিসঞ্চিক্খতি – ‘তথাভূতো খো অযং লোকসন্নিৰাসো তথাভূতো অযং অত্তভাৰপটিলাভো যথাভূতে লোকসন্নিৰাসে যথাভূতে অত্তভাৰপটিলাভে অট্ঠ লোকধম্মা লোকং অনুপরিৰত্তন্তি লোকো চ অট্ঠ লোকধম্মে অনুপরিৰত্ততি – লাভো চ, অলাভো চ, যসো চ, অযসো চ, নিন্দা চ, পসংসা চ, সুখঞ্চ, দুক্খঞ্চা’তি। সো ঞাতিব্যসনেন ৰা ফুট্ঠো সমানো ভোগব্যসনেন ৰা ফুট্ঠো সমানো রোগব্যসনেন ৰা ফুট্ঠো সমানো সোচতি কিলমতি পরিদেৰতি, উরত্তাল়িং কন্দতি, সম্মোহং আপজ্জতি।
‘‘‘Āpadāsu, bhikkhave, thāmo veditabbo, so ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, ekacco ñātibyasanena vā phuṭṭho samāno, bhogabyasanena vā phuṭṭho samāno, rogabyasanena vā phuṭṭho samāno na iti paṭisañcikkhati – ‘tathābhūto kho ayaṃ lokasannivāso tathābhūto ayaṃ attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṃ anuparivattanti loko ca aṭṭha lokadhamme anuparivattati – lābho ca, alābho ca, yaso ca, ayaso ca, nindā ca, pasaṃsā ca, sukhañca, dukkhañcā’ti. So ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno socati kilamati paridevati, urattāḷiṃ kandati, sammohaṃ āpajjati.
‘‘ইধ পন, ভিক্খৰে, একচ্চো ঞাতিব্যসনেন ৰা ফুট্ঠো সমানো ভোগব্যসনেন ৰা ফুট্ঠো সমানো রোগব্যসনেন ৰা ফুট্ঠো সমানো ইতি পটিসঞ্চিক্খতি – ‘তথাভূতো খো অযং লোকসন্নিৰাসো তথাভূতো অযং অত্তভাৰপটিলাভো যথাভূতে লোকসন্নিৰাসে যথাভূতে অত্তভাৰপটিলাভে অট্ঠ লোকধম্মা লোকং অনুপরিৰত্তন্তি লোকো চ অট্ঠ লোকধম্মে অনুপরিৰত্ততি – লাভো চ, অলাভো চ, যসো চ, অযসো চ, নিন্দা চ, পসংসা চ, সুখঞ্চ, দুক্খঞ্চা’তি। সো ঞাতিব্যসনেন ৰা ফুট্ঠো সমানো ভোগব্যসনেন ৰা ফুট্ঠো সমানো রোগব্যসনেন ৰা ফুট্ঠো সমানো ন সোচতি ন কিলমতি ন পরিদেৰতি, ন উরত্তাল়িং কন্দতি, ন সম্মোহং আপজ্জতি। ‘আপদাসু, ভিক্খৰে, থামো ৰেদিতব্বো, সো চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি, ইতি যং তং ৰুত্তং ইদমেতং পটিচ্চ ৰুত্তং।
‘‘Idha pana, bhikkhave, ekacco ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno iti paṭisañcikkhati – ‘tathābhūto kho ayaṃ lokasannivāso tathābhūto ayaṃ attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṃ anuparivattanti loko ca aṭṭha lokadhamme anuparivattati – lābho ca, alābho ca, yaso ca, ayaso ca, nindā ca, pasaṃsā ca, sukhañca, dukkhañcā’ti. So ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno na socati na kilamati na paridevati, na urattāḷiṃ kandati, na sammohaṃ āpajjati. ‘Āpadāsu, bhikkhave, thāmo veditabbo, so ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti yaṃ taṃ vuttaṃ idametaṃ paṭicca vuttaṃ.
‘‘‘সাকচ্ছায, ভিক্খৰে, পঞ্ঞা ৰেদিতব্বা, সা চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি , ইতি খো পনেতং ৰুত্তং। কিঞ্চেতং পটিচ্চ ৰুত্তং? ইধ, ভিক্খৰে, পুগ্গলো পুগ্গলেন সদ্ধিং সাকচ্ছাযমানো এৰং জানাতি – ‘যথা খো ইমস্স আযস্মতো উম্মগ্গো যথা চ অভিনীহারো যথা চ পঞ্হাসমুদাহারো, দুপ্পঞ্ঞো অযমাযস্মা, নাযমাযস্মা পঞ্ঞৰা। তং কিস্স হেতু? তথা হি অযমাযস্মা ন চেৰ গম্ভীরং অত্থপদং উদাহরতি সন্তং পণীতং অতক্কাৰচরং নিপুণং পণ্ডিতৰেদনীযং। যঞ্চ অযমাযস্মা ধম্মং ভাসতি তস্স চ নপ্পটিবলো সংখিত্তেন ৰা ৰিত্থারেন ৰা অত্থং আচিক্খিতুং দেসেতুং পঞ্ঞাপেতুং পট্ঠপেতুং ৰিৰরিতুং ৰিভজিতুং উত্তানীকাতুং। দুপ্পঞ্ঞো অযমাযস্মা, নাযমাযস্মা পঞ্ঞৰা’’’তি।
‘‘‘Sākacchāya, bhikkhave, paññā veditabbā, sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti , iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, duppañño ayamāyasmā, nāyamāyasmā paññavā. Taṃ kissa hetu? Tathā hi ayamāyasmā na ceva gambhīraṃ atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati tassa ca nappaṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Duppañño ayamāyasmā, nāyamāyasmā paññavā’’’ti.
‘‘সেয্যথাপি, ভিক্খৰে, চক্খুমা পুরিসো উদকরহদস্স তীরে ঠিতো পস্সেয্য পরিত্তং মচ্ছং উম্মুজ্জমানং। তস্স এৰমস্স – ‘যথা খো ইমস্স মচ্ছস্স উম্মগ্গো যথা চ ঊমিঘাতো যথা চ ৰেগাযিতত্তং, পরিত্তো অযং মচ্ছো, নাযং মচ্ছো মহন্তো’তি। এৰমেৰং খো, ভিক্খৰে, পুগ্গলো পুগ্গলেন সদ্ধিং সাকচ্ছাযমানো এৰং জানাতি – ‘যথা খো ইমস্স আযস্মতো উম্মগ্গো যথা চ অভিনীহারো যথা চ পঞ্হাসমুদাহারো, দুপ্পঞ্ঞো অযমাযস্মা, নাযমাযস্মা পঞ্ঞৰা। তং কিস্স হেতু? তথা হি অযমাযস্মা ন চেৰ গম্ভীরং অত্থপদং উদাহরতি সন্তং পণীতং অতক্কাৰচরং নিপুণং পণ্ডিতৰেদনীযং। যঞ্চ অযমাযস্মা ধম্মং ভাসতি, তস্স চ ন পটিবলো সংখিত্তেন ৰা ৰিত্থারেন ৰা অত্থং আচিক্খিতুং দেসেতুং পঞ্ঞাপেতুং পট্ঠপেতুং ৰিৰরিতুং ৰিভজিতুং উত্তানীকাতুং। দুপ্পঞ্ঞো অযমাযস্মা, নাযমাযস্মা পঞ্ঞৰা’’’তি।
‘‘Seyyathāpi, bhikkhave, cakkhumā puriso udakarahadassa tīre ṭhito passeyya parittaṃ macchaṃ ummujjamānaṃ. Tassa evamassa – ‘yathā kho imassa macchassa ummaggo yathā ca ūmighāto yathā ca vegāyitattaṃ, paritto ayaṃ maccho, nāyaṃ maccho mahanto’ti. Evamevaṃ kho, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, duppañño ayamāyasmā, nāyamāyasmā paññavā. Taṃ kissa hetu? Tathā hi ayamāyasmā na ceva gambhīraṃ atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati, tassa ca na paṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Duppañño ayamāyasmā, nāyamāyasmā paññavā’’’ti.
‘‘ইধ পন, ভিক্খৰে, পুগ্গলো পুগ্গলেন সদ্ধিং সাকচ্ছাযমানো এৰং জানাতি – ‘যথা খো ইমস্স আযস্মতো উম্মগ্গো যথা চ অভিনীহারো যথা চ পঞ্হাসমুদাহারো, পঞ্ঞৰা অযমাযস্মা, নাযমাযস্মা দুপ্পঞ্ঞো। তং কিস্স হেতু? তথা হি অযমাযস্মা গম্ভীরঞ্চেৰ অত্থপদং উদাহরতি সন্তং পণীতং অতক্কাৰচরং নিপুণং পণ্ডিতৰেদনীযং। যঞ্চ অযমাযস্মা ধম্মং ভাসতি, তস্স চ পটিবলো সংখিত্তেন ৰা ৰিত্থারেন ৰা অত্থং আচিক্খিতুং দেসেতুং পঞ্ঞাপেতুং পট্ঠপেতুং ৰিৰরিতুং ৰিভজিতুং উত্তানীকাতুং। পঞ্ঞৰা অযমাযস্মা, নাযমাযস্মা দুপ্পঞ্ঞো’’’তি।
‘‘Idha pana, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, paññavā ayamāyasmā, nāyamāyasmā duppañño. Taṃ kissa hetu? Tathā hi ayamāyasmā gambhīrañceva atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati, tassa ca paṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Paññavā ayamāyasmā, nāyamāyasmā duppañño’’’ti.
‘‘সেয্যথাপি , ভিক্খৰে, চক্খুমা পুরিসো উদকরহদস্স তীরে ঠিতো পস্সেয্য মহন্তং মচ্ছং উম্মুজ্জমানং। তস্স এৰমস্স – ‘যথা খো ইমস্স মচ্ছস্স উম্মগ্গো যথা চ ঊমিঘাতো যথা চ ৰেগাযিতত্তং, মহন্তো অযং মচ্ছো, নাযং মচ্ছো পরিত্তো’তি। এৰমেৰং খো, ভিক্খৰে, পুগ্গলো পুগ্গলেন সদ্ধিং সাকচ্ছাযমানো এৰং জানাতি – ‘যথা খো ইমস্স আযস্মতো উম্মগ্গো যথা চ অভিনীহারো যথা চ পঞ্হাসমুদাহারো, পঞ্ঞৰা অযমাযস্মা, নাযমাযস্মা দুপ্পঞ্ঞো। তং কিস্স হেতু? তথা হি অযমাযস্মা গম্ভীরঞ্চেৰ অত্থপদং উদাহরতি সন্তং পণীতং অতক্কাৰচরং নিপুণং পণ্ডিতৰেদনীযং। যঞ্চ অযমাযস্মা ধম্মং ভাসতি, তস্স চ পটিবলো সংখিত্তেন ৰা ৰিত্থারেন ৰা অত্থং আচিক্খিতুং দেসেতুং পঞ্ঞাপেতুং পট্ঠপেতুং ৰিৰরিতুং ৰিভজিতুং উত্তানীকাতুং। পঞ্ঞৰা অযমাযস্মা, নাযমাযস্মা দুপ্পঞ্ঞো’তি।
‘‘Seyyathāpi , bhikkhave, cakkhumā puriso udakarahadassa tīre ṭhito passeyya mahantaṃ macchaṃ ummujjamānaṃ. Tassa evamassa – ‘yathā kho imassa macchassa ummaggo yathā ca ūmighāto yathā ca vegāyitattaṃ, mahanto ayaṃ maccho, nāyaṃ maccho paritto’ti. Evamevaṃ kho, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, paññavā ayamāyasmā, nāyamāyasmā duppañño. Taṃ kissa hetu? Tathā hi ayamāyasmā gambhīrañceva atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati, tassa ca paṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Paññavā ayamāyasmā, nāyamāyasmā duppañño’ti.
‘‘‘সাকচ্ছায, ভিক্খৰে, পঞ্ঞা ৰেদিতব্বা, সা চ খো দীঘেন অদ্ধুনা, ন ইত্তরং; মনসিকরোতা, নো অমনসিকরোতা; পঞ্ঞৰতা, নো দুপ্পঞ্ঞেনা’তি , ইতি যং তং ৰুত্তং ইদমেতং পটিচ্চ ৰুত্তং। ইমানি খো, ভিক্খৰে, চত্তারি ঠানানি ইমেহি চতূহি ঠানেহি ৰেদিতব্বানী’’তি। দুতিযং।
‘‘‘Sākacchāya, bhikkhave, paññā veditabbā, sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti , iti yaṃ taṃ vuttaṃ idametaṃ paṭicca vuttaṃ. Imāni kho, bhikkhave, cattāri ṭhānāni imehi catūhi ṭhānehi veditabbānī’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. ঠানসুত্তৰণ্ণনা • 2. Ṭhānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. ঠানসুত্তৰণ্ণনা • 2. Ṭhānasuttavaṇṇanā
