| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. ඨානසුත්‌තං
8. Ṭhānasuttaṃ
311. ‘‘පඤ්‌චිමානි , භික්‌ඛවෙ, ඨානානි දුල්‌ලභානි අකතපුඤ්‌ඤෙන මාතුගාමෙන. කතමානි පඤ්‌ච? පතිරූපෙ කුලෙ ජායෙය්‍යන්‌ති – ඉදං, භික්‌ඛවෙ, පඨමං ඨානං දුල්‌ලභං අකතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා පතිරූපං කුලං ගච්‌ඡෙය්‍යන්‌ති – ඉදං, භික්‌ඛවෙ, දුතියං ඨානං දුල්‌ලභං අකතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා, පතිරූපං කුලං ගන්‌ත්‌වා, අසපත්‌ති අගාරං අජ්‌ඣාවසෙය්‍යන්‌ති – ඉදං, භික්‌ඛවෙ, තතියං ඨානං දුල්‌ලභං අකතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා, පතිරූපං කුලං ගන්‌ත්‌වා, අසපත්‌ති අගාරං අජ්‌ඣාවසන්‌තී පුත්‌තවතී අස්‌සන්‌ති – ඉදං, භික්‌ඛවෙ, චතුත්‌ථං ඨානං දුල්‌ලභං අකතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා, පතිරූපං කුලං ගන්‌ත්‌වා, අසපත්‌ති අගාරං අජ්‌ඣාවසන්‌තී පුත්‌තවතී සමානා සාමිකං අභිභුය්‍ය වත්‌තෙය්‍යන්‌ති – ඉදං, භික්‌ඛවෙ, පඤ්‌චමං ඨානං දුල්‌ලභං අකතපුඤ්‌ඤෙන මාතුගාමෙන . ඉමානි ඛො, භික්‌ඛවෙ, පඤ්‌ච ඨානානි දුල්‌ලභානි අකතපුඤ්‌ඤෙන මාතුගාමෙනාති.
311. ‘‘Pañcimāni , bhikkhave, ṭhānāni dullabhāni akatapuññena mātugāmena. Katamāni pañca? Patirūpe kule jāyeyyanti – idaṃ, bhikkhave, paṭhamaṃ ṭhānaṃ dullabhaṃ akatapuññena mātugāmena. Patirūpe kule jāyitvā patirūpaṃ kulaṃ gaccheyyanti – idaṃ, bhikkhave, dutiyaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvaseyyanti – idaṃ, bhikkhave, tatiyaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvasantī puttavatī assanti – idaṃ, bhikkhave, catutthaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvasantī puttavatī samānā sāmikaṃ abhibhuyya vatteyyanti – idaṃ, bhikkhave, pañcamaṃ ṭhānaṃ dullabhaṃ akatapuññena mātugāmena . Imāni kho, bhikkhave, pañca ṭhānāni dullabhāni akatapuññena mātugāmenāti.
‘‘පඤ්‌චිමානි, භික්‌ඛවෙ, ඨානානි සුලභානි කතපුඤ්‌ඤෙන මාතුගාමෙන. කතමානි පඤ්‌ච? පතිරූපෙ කුලෙ ජායෙය්‍යන්‌ති – ඉදං, භික්‌ඛවෙ, පඨමං ඨානං සුලභං කතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා පතිරූපං කුලං ගච්‌ඡෙය්‍යන්‌ති – ඉදං, භික්‌ඛවෙ, දුතියං ඨානං සුලභං කතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා පතිරූපං කුලං ගන්‌ත්‌වා අසපත්‌ති අගාරං අජ්‌ඣාවසෙය්‍යන්‌ති – ඉදං, භික්‌ඛවෙ, තතියං ඨානං සුලභං කතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා පතිරූපං කුලං ගන්‌ත්‌වා අසපත්‌ති අගාරං අජ්‌ඣාවසන්‌තී පුත්‌තවතී අස්‌සන්‌ති – ඉදං, භික්‌ඛවෙ, චතුත්‌ථං ඨානං සුලභං කතපුඤ්‌ඤෙන මාතුගාමෙන. පතිරූපෙ කුලෙ ජායිත්‌වා පතිරූපං කුලං ගන්‌ත්‌වා අසපත්‌ති අගාරං අජ්‌ඣාවසන්‌තී පුත්‌තවතී සමානා සාමිකං අභිභුය්‍ය වත්‌තෙය්‍යන්‌ති – ඉදං, භික්‌ඛවෙ, පඤ්‌චමං ඨානං සුලභං කතපුඤ්‌ඤෙන මාතුගාමෙන. ඉමානි ඛො, භික්‌ඛවෙ, පඤ්‌ච ඨානානි සුලභානි කතපුඤ්‌ඤෙන මාතුගාමෙනා’’ති. අට්‌ඨමං.
‘‘Pañcimāni, bhikkhave, ṭhānāni sulabhāni katapuññena mātugāmena. Katamāni pañca? Patirūpe kule jāyeyyanti – idaṃ, bhikkhave, paṭhamaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gaccheyyanti – idaṃ, bhikkhave, dutiyaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvaseyyanti – idaṃ, bhikkhave, tatiyaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvasantī puttavatī assanti – idaṃ, bhikkhave, catutthaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvasantī puttavatī samānā sāmikaṃ abhibhuyya vatteyyanti – idaṃ, bhikkhave, pañcamaṃ ṭhānaṃ sulabhaṃ katapuññena mātugāmena. Imāni kho, bhikkhave, pañca ṭhānāni sulabhāni katapuññena mātugāmenā’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-10. පසය්‌හසුත්‌තාදිවණ්‌ණනා • 2-10. Pasayhasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-10. පසය්‌හසුත්‌තාදිවණ්‌ණනා • 2-10. Pasayhasuttādivaṇṇanā
