| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. ཋཱནསུཏྟཾ
2. Ṭhānasuttaṃ
༡༩༢. ‘‘ཙཏྟཱརིམཱནི, བྷིཀྑཝེ, ཋཱནཱནི ཙཏཱུཧི ཋཱནེཧི ཝེདིཏབྦཱནི། ཀཏམཱནི ཙཏྟཱརི? སཾཝཱསེན, བྷིཀྑཝེ, སཱིལཾ ཝེདིཏབྦཾ, ཏཉྩ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེན། སཾཝོཧཱརེན, བྷིཀྑཝེ, སོཙེཡྻཾ ཝེདིཏབྦཾ, ཏཉྩ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེན། ཨཱཔདཱསུ, བྷིཀྑཝེ, ཐཱམོ ཝེདིཏབྦོ, སོ ཙ ཁོ དཱིགྷེན ཨདྡྷུནཱ , ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེན། སཱཀཙྪཱཡ, བྷིཀྑཝེ, པཉྙཱ ཝེདིཏབྦཱ, སཱ ཙ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱཏི།
192. ‘‘Cattārimāni, bhikkhave, ṭhānāni catūhi ṭhānehi veditabbāni. Katamāni cattāri? Saṃvāsena, bhikkhave, sīlaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Saṃvohārena, bhikkhave, soceyyaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññena. Āpadāsu, bhikkhave, thāmo veditabbo, so ca kho dīghena addhunā , na ittaraṃ; manasikarotā, no amanasikarotā; paññavatā, no duppaññena. Sākacchāya, bhikkhave, paññā veditabbā, sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenāti.
1 ‘‘‘སཾཝཱསེན , བྷིཀྑཝེ, སཱིལཾ ཝེདིཏབྦཾ, ཏཉྩ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཨིདྷ, བྷིཀྑཝེ, པུགྒལོ པུགྒལེན སདྡྷིཾ སཾཝསམཱནོ ཨེཝཾ ཛཱནཱཏི – ‘དཱིགྷརཏྟཾ ཁོ ཨཡམཱཡསྨཱ ཁཎྜཀཱརཱི ཚིདྡཀཱརཱི སབལཀཱརཱི ཀམྨཱསཀཱརཱི, ན སནྟཏཀཱརཱི ན སནྟཏཝུཏྟི 2; སཱིལེསུ དུསྶཱིལོ ཨཡམཱཡསྨཱ, ནཱཡམཱཡསྨཱ སཱིལཝཱ’’’ཏི།
3 ‘‘‘Saṃvāsena , bhikkhave, sīlaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, puggalo puggalena saddhiṃ saṃvasamāno evaṃ jānāti – ‘dīgharattaṃ kho ayamāyasmā khaṇḍakārī chiddakārī sabalakārī kammāsakārī, na santatakārī na santatavutti 4; sīlesu dussīlo ayamāyasmā, nāyamāyasmā sīlavā’’’ti.
‘‘‘ཨིདྷ པན, བྷིཀྑཝེ, པུགྒལོ པུགྒལེན སདྡྷིཾ སཾཝསམཱནོ ཨེཝཾ ཛཱནཱཏི – ‘དཱིགྷརཏྟཾ ཁོ ཨཡམཱཡསྨཱ ཨཁཎྜཀཱརཱི ཨཙྪིདྡཀཱརཱི ཨསབལཀཱརཱི ཨཀམྨཱསཀཱརཱི སནྟཏཀཱརཱི སནྟཏཝུཏྟི; སཱིལེསུ སཱིལཝཱ ཨཡམཱཡསྨཱ, ནཱཡམཱཡསྨཱ དུསྶཱིལོ’ཏི། ‘སཾཝཱསེན, བྷིཀྑཝེ, སཱིལཾ ཝེདིཏབྦཾ, ཏཉྩ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི, ཨིཏི ཡཾ ཏཾ ཝུཏྟཾ ཨིདམེཏཾ པཊིཙྩ ཝུཏྟཾ།
‘‘‘Idha pana, bhikkhave, puggalo puggalena saddhiṃ saṃvasamāno evaṃ jānāti – ‘dīgharattaṃ kho ayamāyasmā akhaṇḍakārī acchiddakārī asabalakārī akammāsakārī santatakārī santatavutti; sīlesu sīlavā ayamāyasmā, nāyamāyasmā dussīlo’ti. ‘Saṃvāsena, bhikkhave, sīlaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti yaṃ taṃ vuttaṃ idametaṃ paṭicca vuttaṃ.
‘‘‘སཾཝོཧཱརེན, བྷིཀྑཝེ, སོཙེཡྻཾ ཝེདིཏབྦཾ, ཏཉྩ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཨིདྷ, བྷིཀྑཝེ, པུགྒལོ པུགྒལེན སདྡྷིཾ སཾཝོཧརམཱནོ ཨེཝཾ ཛཱནཱཏི – ‘ཨཉྙཐཱ ཁོ ཨཡམཱཡསྨཱ ཨེཀེན ཨེཀོ ཝོཧརཏི, ཨཉྙཐཱ དྭཱིཧི, ཨཉྙཐཱ ཏཱིཧི, ཨཉྙཐཱ སམྦཧུལེཧི; ཝོཀྐམཏི ཨཡམཱཡསྨཱ པུརིམཝོཧཱརཱ པཙྪིམཝོཧཱརཾ; ཨཔརིསུདྡྷཝོཧཱརོ ཨཡམཱཡསྨཱ, ནཱཡམཱཡསྨཱ པརིསུདྡྷཝོཧཱརོ’’’ཏི།
‘‘‘Saṃvohārena, bhikkhave, soceyyaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, puggalo puggalena saddhiṃ saṃvoharamāno evaṃ jānāti – ‘aññathā kho ayamāyasmā ekena eko voharati, aññathā dvīhi, aññathā tīhi, aññathā sambahulehi; vokkamati ayamāyasmā purimavohārā pacchimavohāraṃ; aparisuddhavohāro ayamāyasmā, nāyamāyasmā parisuddhavohāro’’’ti.
‘‘ཨིདྷ པན, བྷིཀྑཝེ, པུགྒལོ པུགྒལེན སདྡྷིཾ སཾཝོཧརམཱནོ ཨེཝཾ ཛཱནཱཏི – ‘ཡཐེཝ ཁོ ཨཡམཱཡསྨཱ ཨེཀེན ཨེཀོ ཝོཧརཏི, ཏཐཱ དྭཱིཧི, ཏཐཱ ཏཱིཧི, ཏཐཱ སམྦཧུལེཧི། ནཱཡམཱཡསྨཱ ཝོཀྐམཏི པུརིམཝོཧཱརཱ པཙྪིམཝོཧཱརཾ; པརིསུདྡྷཝོཧཱརོ ཨཡམཱཡསྨཱ, ནཱཡམཱཡསྨཱ ཨཔརིསུདྡྷཝོཧཱརོ’ཏི ། ‘སཾཝོཧཱརེན, བྷིཀྑཝེ, སོཙེཡྻཾ ཝེདིཏབྦཾ, ཏཉྩ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི, ཨིཏི ཡཾ ཏཾ ཝུཏྟཾ ཨིདམེཏཾ པཊིཙྩ ཝུཏྟཾ།
‘‘Idha pana, bhikkhave, puggalo puggalena saddhiṃ saṃvoharamāno evaṃ jānāti – ‘yatheva kho ayamāyasmā ekena eko voharati, tathā dvīhi, tathā tīhi, tathā sambahulehi. Nāyamāyasmā vokkamati purimavohārā pacchimavohāraṃ; parisuddhavohāro ayamāyasmā, nāyamāyasmā aparisuddhavohāro’ti . ‘Saṃvohārena, bhikkhave, soceyyaṃ veditabbaṃ, tañca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti yaṃ taṃ vuttaṃ idametaṃ paṭicca vuttaṃ.
‘‘‘ཨཱཔདཱསུ, བྷིཀྑཝེ, ཐཱམོ ཝེདིཏབྦོ, སོ ཙ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཨིདྷ, བྷིཀྑཝེ, ཨེཀཙྩོ ཉཱཏིབྱསནེན ཝཱ ཕུཊྛོ སམཱནོ, བྷོགབྱསནེན ཝཱ ཕུཊྛོ སམཱནོ, རོགབྱསནེན ཝཱ ཕུཊྛོ སམཱནོ ན ཨིཏི པཊིསཉྩིཀྑཏི – ‘ཏཐཱབྷཱུཏོ ཁོ ཨཡཾ ལོཀསནྣིཝཱསོ ཏཐཱབྷཱུཏོ ཨཡཾ ཨཏྟབྷཱཝཔཊིལཱབྷོ ཡཐཱབྷཱུཏེ ལོཀསནྣིཝཱསེ ཡཐཱབྷཱུཏེ ཨཏྟབྷཱཝཔཊིལཱབྷེ ཨཊྛ ལོཀདྷམྨཱ ལོཀཾ ཨནུཔརིཝཏྟནྟི ལོཀོ ཙ ཨཊྛ ལོཀདྷམྨེ ཨནུཔརིཝཏྟཏི – ལཱབྷོ ཙ, ཨལཱབྷོ ཙ, ཡསོ ཙ, ཨཡསོ ཙ, ནིནྡཱ ཙ, པསཾསཱ ཙ, སུཁཉྩ, དུཀྑཉྩཱ’ཏི། སོ ཉཱཏིབྱསནེན ཝཱ ཕུཊྛོ སམཱནོ བྷོགབྱསནེན ཝཱ ཕུཊྛོ སམཱནོ རོགབྱསནེན ཝཱ ཕུཊྛོ སམཱནོ སོཙཏི ཀིལམཏི པརིདེཝཏི, ཨུརཏྟཱལི༹ཾ ཀནྡཏི, སམྨོཧཾ ཨཱཔཛྫཏི།
‘‘‘Āpadāsu, bhikkhave, thāmo veditabbo, so ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, ekacco ñātibyasanena vā phuṭṭho samāno, bhogabyasanena vā phuṭṭho samāno, rogabyasanena vā phuṭṭho samāno na iti paṭisañcikkhati – ‘tathābhūto kho ayaṃ lokasannivāso tathābhūto ayaṃ attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṃ anuparivattanti loko ca aṭṭha lokadhamme anuparivattati – lābho ca, alābho ca, yaso ca, ayaso ca, nindā ca, pasaṃsā ca, sukhañca, dukkhañcā’ti. So ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno socati kilamati paridevati, urattāḷiṃ kandati, sammohaṃ āpajjati.
‘‘ཨིདྷ པན, བྷིཀྑཝེ, ཨེཀཙྩོ ཉཱཏིབྱསནེན ཝཱ ཕུཊྛོ སམཱནོ བྷོགབྱསནེན ཝཱ ཕུཊྛོ སམཱནོ རོགབྱསནེན ཝཱ ཕུཊྛོ སམཱནོ ཨིཏི པཊིསཉྩིཀྑཏི – ‘ཏཐཱབྷཱུཏོ ཁོ ཨཡཾ ལོཀསནྣིཝཱསོ ཏཐཱབྷཱུཏོ ཨཡཾ ཨཏྟབྷཱཝཔཊིལཱབྷོ ཡཐཱབྷཱུཏེ ལོཀསནྣིཝཱསེ ཡཐཱབྷཱུཏེ ཨཏྟབྷཱཝཔཊིལཱབྷེ ཨཊྛ ལོཀདྷམྨཱ ལོཀཾ ཨནུཔརིཝཏྟནྟི ལོཀོ ཙ ཨཊྛ ལོཀདྷམྨེ ཨནུཔརིཝཏྟཏི – ལཱབྷོ ཙ, ཨལཱབྷོ ཙ, ཡསོ ཙ, ཨཡསོ ཙ, ནིནྡཱ ཙ, པསཾསཱ ཙ, སུཁཉྩ, དུཀྑཉྩཱ’ཏི། སོ ཉཱཏིབྱསནེན ཝཱ ཕུཊྛོ སམཱནོ བྷོགབྱསནེན ཝཱ ཕུཊྛོ སམཱནོ རོགབྱསནེན ཝཱ ཕུཊྛོ སམཱནོ ན སོཙཏི ན ཀིལམཏི ན པརིདེཝཏི, ན ཨུརཏྟཱལི༹ཾ ཀནྡཏི, ན སམྨོཧཾ ཨཱཔཛྫཏི། ‘ཨཱཔདཱསུ, བྷིཀྑཝེ, ཐཱམོ ཝེདིཏབྦོ, སོ ཙ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི, ཨིཏི ཡཾ ཏཾ ཝུཏྟཾ ཨིདམེཏཾ པཊིཙྩ ཝུཏྟཾ།
‘‘Idha pana, bhikkhave, ekacco ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno iti paṭisañcikkhati – ‘tathābhūto kho ayaṃ lokasannivāso tathābhūto ayaṃ attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṃ anuparivattanti loko ca aṭṭha lokadhamme anuparivattati – lābho ca, alābho ca, yaso ca, ayaso ca, nindā ca, pasaṃsā ca, sukhañca, dukkhañcā’ti. So ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno na socati na kilamati na paridevati, na urattāḷiṃ kandati, na sammohaṃ āpajjati. ‘Āpadāsu, bhikkhave, thāmo veditabbo, so ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti, iti yaṃ taṃ vuttaṃ idametaṃ paṭicca vuttaṃ.
‘‘‘སཱཀཙྪཱཡ, བྷིཀྑཝེ, པཉྙཱ ཝེདིཏབྦཱ, སཱ ཙ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི , ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཨིདྷ, བྷིཀྑཝེ, པུགྒལོ པུགྒལེན སདྡྷིཾ སཱཀཙྪཱཡམཱནོ ཨེཝཾ ཛཱནཱཏི – ‘ཡཐཱ ཁོ ཨིམསྶ ཨཱཡསྨཏོ ཨུམྨགྒོ ཡཐཱ ཙ ཨབྷིནཱིཧཱརོ ཡཐཱ ཙ པཉྷཱསམུདཱཧཱརོ, དུཔྤཉྙོ ཨཡམཱཡསྨཱ, ནཱཡམཱཡསྨཱ པཉྙཝཱ། ཏཾ ཀིསྶ ཧེཏུ? ཏཐཱ ཧི ཨཡམཱཡསྨཱ ན ཙེཝ གམྦྷཱིརཾ ཨཏྠཔདཾ ཨུདཱཧརཏི སནྟཾ པཎཱིཏཾ ཨཏཀྐཱཝཙརཾ ནིཔུཎཾ པཎྜིཏཝེདནཱིཡཾ། ཡཉྩ ཨཡམཱཡསྨཱ དྷམྨཾ བྷཱསཏི ཏསྶ ཙ ནཔྤཊིབལོ སཾཁིཏྟེན ཝཱ ཝིཏྠཱརེན ཝཱ ཨཏྠཾ ཨཱཙིཀྑིཏུཾ དེསེཏུཾ པཉྙཱཔེཏུཾ པཊྛཔེཏུཾ ཝིཝརིཏུཾ ཝིབྷཛིཏུཾ ཨུཏྟཱནཱིཀཱཏུཾ། དུཔྤཉྙོ ཨཡམཱཡསྨཱ, ནཱཡམཱཡསྨཱ པཉྙཝཱ’’’ཏི།
‘‘‘Sākacchāya, bhikkhave, paññā veditabbā, sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti , iti kho panetaṃ vuttaṃ. Kiñcetaṃ paṭicca vuttaṃ? Idha, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, duppañño ayamāyasmā, nāyamāyasmā paññavā. Taṃ kissa hetu? Tathā hi ayamāyasmā na ceva gambhīraṃ atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati tassa ca nappaṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Duppañño ayamāyasmā, nāyamāyasmā paññavā’’’ti.
‘‘སེཡྻཐཱཔི, བྷིཀྑཝེ, ཙཀྑུམཱ པུརིསོ ཨུདཀརཧདསྶ ཏཱིརེ ཋིཏོ པསྶེཡྻ པརིཏྟཾ མཙྪཾ ཨུམྨུཛྫམཱནཾ། ཏསྶ ཨེཝམསྶ – ‘ཡཐཱ ཁོ ཨིམསྶ མཙྪསྶ ཨུམྨགྒོ ཡཐཱ ཙ ཨཱུམིགྷཱཏོ ཡཐཱ ཙ ཝེགཱཡིཏཏྟཾ, པརིཏྟོ ཨཡཾ མཙྪོ, ནཱཡཾ མཙྪོ མཧནྟོ’ཏི། ཨེཝམེཝཾ ཁོ, བྷིཀྑཝེ, པུགྒལོ པུགྒལེན སདྡྷིཾ སཱཀཙྪཱཡམཱནོ ཨེཝཾ ཛཱནཱཏི – ‘ཡཐཱ ཁོ ཨིམསྶ ཨཱཡསྨཏོ ཨུམྨགྒོ ཡཐཱ ཙ ཨབྷིནཱིཧཱརོ ཡཐཱ ཙ པཉྷཱསམུདཱཧཱརོ, དུཔྤཉྙོ ཨཡམཱཡསྨཱ, ནཱཡམཱཡསྨཱ པཉྙཝཱ། ཏཾ ཀིསྶ ཧེཏུ? ཏཐཱ ཧི ཨཡམཱཡསྨཱ ན ཙེཝ གམྦྷཱིརཾ ཨཏྠཔདཾ ཨུདཱཧརཏི སནྟཾ པཎཱིཏཾ ཨཏཀྐཱཝཙརཾ ནིཔུཎཾ པཎྜིཏཝེདནཱིཡཾ། ཡཉྩ ཨཡམཱཡསྨཱ དྷམྨཾ བྷཱསཏི, ཏསྶ ཙ ན པཊིབལོ སཾཁིཏྟེན ཝཱ ཝིཏྠཱརེན ཝཱ ཨཏྠཾ ཨཱཙིཀྑིཏུཾ དེསེཏུཾ པཉྙཱཔེཏུཾ པཊྛཔེཏུཾ ཝིཝརིཏུཾ ཝིབྷཛིཏུཾ ཨུཏྟཱནཱིཀཱཏུཾ། དུཔྤཉྙོ ཨཡམཱཡསྨཱ, ནཱཡམཱཡསྨཱ པཉྙཝཱ’’’ཏི།
‘‘Seyyathāpi, bhikkhave, cakkhumā puriso udakarahadassa tīre ṭhito passeyya parittaṃ macchaṃ ummujjamānaṃ. Tassa evamassa – ‘yathā kho imassa macchassa ummaggo yathā ca ūmighāto yathā ca vegāyitattaṃ, paritto ayaṃ maccho, nāyaṃ maccho mahanto’ti. Evamevaṃ kho, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, duppañño ayamāyasmā, nāyamāyasmā paññavā. Taṃ kissa hetu? Tathā hi ayamāyasmā na ceva gambhīraṃ atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati, tassa ca na paṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Duppañño ayamāyasmā, nāyamāyasmā paññavā’’’ti.
‘‘ཨིདྷ པན, བྷིཀྑཝེ, པུགྒལོ པུགྒལེན སདྡྷིཾ སཱཀཙྪཱཡམཱནོ ཨེཝཾ ཛཱནཱཏི – ‘ཡཐཱ ཁོ ཨིམསྶ ཨཱཡསྨཏོ ཨུམྨགྒོ ཡཐཱ ཙ ཨབྷིནཱིཧཱརོ ཡཐཱ ཙ པཉྷཱསམུདཱཧཱརོ, པཉྙཝཱ ཨཡམཱཡསྨཱ, ནཱཡམཱཡསྨཱ དུཔྤཉྙོ། ཏཾ ཀིསྶ ཧེཏུ? ཏཐཱ ཧི ཨཡམཱཡསྨཱ གམྦྷཱིརཉྩེཝ ཨཏྠཔདཾ ཨུདཱཧརཏི སནྟཾ པཎཱིཏཾ ཨཏཀྐཱཝཙརཾ ནིཔུཎཾ པཎྜིཏཝེདནཱིཡཾ། ཡཉྩ ཨཡམཱཡསྨཱ དྷམྨཾ བྷཱསཏི, ཏསྶ ཙ པཊིབལོ སཾཁིཏྟེན ཝཱ ཝིཏྠཱརེན ཝཱ ཨཏྠཾ ཨཱཙིཀྑིཏུཾ དེསེཏུཾ པཉྙཱཔེཏུཾ པཊྛཔེཏུཾ ཝིཝརིཏུཾ ཝིབྷཛིཏུཾ ཨུཏྟཱནཱིཀཱཏུཾ། པཉྙཝཱ ཨཡམཱཡསྨཱ, ནཱཡམཱཡསྨཱ དུཔྤཉྙོ’’’ཏི།
‘‘Idha pana, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, paññavā ayamāyasmā, nāyamāyasmā duppañño. Taṃ kissa hetu? Tathā hi ayamāyasmā gambhīrañceva atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati, tassa ca paṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Paññavā ayamāyasmā, nāyamāyasmā duppañño’’’ti.
‘‘སེཡྻཐཱཔི , བྷིཀྑཝེ, ཙཀྑུམཱ པུརིསོ ཨུདཀརཧདསྶ ཏཱིརེ ཋིཏོ པསྶེཡྻ མཧནྟཾ མཙྪཾ ཨུམྨུཛྫམཱནཾ། ཏསྶ ཨེཝམསྶ – ‘ཡཐཱ ཁོ ཨིམསྶ མཙྪསྶ ཨུམྨགྒོ ཡཐཱ ཙ ཨཱུམིགྷཱཏོ ཡཐཱ ཙ ཝེགཱཡིཏཏྟཾ, མཧནྟོ ཨཡཾ མཙྪོ, ནཱཡཾ མཙྪོ པརིཏྟོ’ཏི། ཨེཝམེཝཾ ཁོ, བྷིཀྑཝེ, པུགྒལོ པུགྒལེན སདྡྷིཾ སཱཀཙྪཱཡམཱནོ ཨེཝཾ ཛཱནཱཏི – ‘ཡཐཱ ཁོ ཨིམསྶ ཨཱཡསྨཏོ ཨུམྨགྒོ ཡཐཱ ཙ ཨབྷིནཱིཧཱརོ ཡཐཱ ཙ པཉྷཱསམུདཱཧཱརོ, པཉྙཝཱ ཨཡམཱཡསྨཱ, ནཱཡམཱཡསྨཱ དུཔྤཉྙོ། ཏཾ ཀིསྶ ཧེཏུ? ཏཐཱ ཧི ཨཡམཱཡསྨཱ གམྦྷཱིརཉྩེཝ ཨཏྠཔདཾ ཨུདཱཧརཏི སནྟཾ པཎཱིཏཾ ཨཏཀྐཱཝཙརཾ ནིཔུཎཾ པཎྜིཏཝེདནཱིཡཾ། ཡཉྩ ཨཡམཱཡསྨཱ དྷམྨཾ བྷཱསཏི, ཏསྶ ཙ པཊིབལོ སཾཁིཏྟེན ཝཱ ཝིཏྠཱརེན ཝཱ ཨཏྠཾ ཨཱཙིཀྑིཏུཾ དེསེཏུཾ པཉྙཱཔེཏུཾ པཊྛཔེཏུཾ ཝིཝརིཏུཾ ཝིབྷཛིཏུཾ ཨུཏྟཱནཱིཀཱཏུཾ། པཉྙཝཱ ཨཡམཱཡསྨཱ, ནཱཡམཱཡསྨཱ དུཔྤཉྙོ’ཏི།
‘‘Seyyathāpi , bhikkhave, cakkhumā puriso udakarahadassa tīre ṭhito passeyya mahantaṃ macchaṃ ummujjamānaṃ. Tassa evamassa – ‘yathā kho imassa macchassa ummaggo yathā ca ūmighāto yathā ca vegāyitattaṃ, mahanto ayaṃ maccho, nāyaṃ maccho paritto’ti. Evamevaṃ kho, bhikkhave, puggalo puggalena saddhiṃ sākacchāyamāno evaṃ jānāti – ‘yathā kho imassa āyasmato ummaggo yathā ca abhinīhāro yathā ca pañhāsamudāhāro, paññavā ayamāyasmā, nāyamāyasmā duppañño. Taṃ kissa hetu? Tathā hi ayamāyasmā gambhīrañceva atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ. Yañca ayamāyasmā dhammaṃ bhāsati, tassa ca paṭibalo saṃkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Paññavā ayamāyasmā, nāyamāyasmā duppañño’ti.
‘‘‘སཱཀཙྪཱཡ, བྷིཀྑཝེ, པཉྙཱ ཝེདིཏབྦཱ, སཱ ཙ ཁོ དཱིགྷེན ཨདྡྷུནཱ, ན ཨིཏྟརཾ; མནསིཀརོཏཱ, ནོ ཨམནསིཀརོཏཱ; པཉྙཝཏཱ, ནོ དུཔྤཉྙེནཱ’ཏི , ཨིཏི ཡཾ ཏཾ ཝུཏྟཾ ཨིདམེཏཾ པཊིཙྩ ཝུཏྟཾ། ཨིམཱནི ཁོ, བྷིཀྑཝེ, ཙཏྟཱརི ཋཱནཱནི ཨིམེཧི ཙཏཱུཧི ཋཱནེཧི ཝེདིཏབྦཱནཱི’’ཏི། དུཏིཡཾ།
‘‘‘Sākacchāya, bhikkhave, paññā veditabbā, sā ca kho dīghena addhunā, na ittaraṃ; manasikarotā, no amanasikarotā; paññavatā, no duppaññenā’ti , iti yaṃ taṃ vuttaṃ idametaṃ paṭicca vuttaṃ. Imāni kho, bhikkhave, cattāri ṭhānāni imehi catūhi ṭhānehi veditabbānī’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. ཋཱནསུཏྟཝཎྞནཱ • 2. Ṭhānasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢. ཋཱནསུཏྟཝཎྞནཱ • 2. Ṭhānasuttavaṇṇanā
