| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. ཋཱནསུཏྟཾ
8. Ṭhānasuttaṃ
༣༡༡. ‘‘པཉྩིམཱནི , བྷིཀྑཝེ, ཋཱནཱནི དུལླབྷཱནི ཨཀཏཔུཉྙེན མཱཏུགཱམེན། ཀཏམཱནི པཉྩ? པཏིརཱུཔེ ཀུལེ ཛཱཡེཡྻནྟི – ཨིདཾ, བྷིཀྑཝེ, པཋམཾ ཋཱནཾ དུལླབྷཾ ཨཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ པཏིརཱུཔཾ ཀུལཾ གཙྪེཡྻནྟི – ཨིདཾ, བྷིཀྑཝེ, དུཏིཡཾ ཋཱནཾ དུལླབྷཾ ཨཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ, པཏིརཱུཔཾ ཀུལཾ གནྟྭཱ, ཨསཔཏྟི ཨགཱརཾ ཨཛ྄ཛྷཱཝསེཡྻནྟི – ཨིདཾ, བྷིཀྑཝེ, ཏཏིཡཾ ཋཱནཾ དུལླབྷཾ ཨཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ, པཏིརཱུཔཾ ཀུལཾ གནྟྭཱ, ཨསཔཏྟི ཨགཱརཾ ཨཛ྄ཛྷཱཝསནྟཱི པུཏྟཝཏཱི ཨསྶནྟི – ཨིདཾ, བྷིཀྑཝེ, ཙཏུཏྠཾ ཋཱནཾ དུལླབྷཾ ཨཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ, པཏིརཱུཔཾ ཀུལཾ གནྟྭཱ, ཨསཔཏྟི ཨགཱརཾ ཨཛ྄ཛྷཱཝསནྟཱི པུཏྟཝཏཱི སམཱནཱ སཱམིཀཾ ཨབྷིབྷུཡྻ ཝཏྟེཡྻནྟི – ཨིདཾ, བྷིཀྑཝེ, པཉྩམཾ ཋཱནཾ དུལླབྷཾ ཨཀཏཔུཉྙེན མཱཏུགཱམེན ། ཨིམཱནི ཁོ, བྷིཀྑཝེ, པཉྩ ཋཱནཱནི དུལླབྷཱནི ཨཀཏཔུཉྙེན མཱཏུགཱམེནཱཏི།
311. ‘‘Pañcimāni , bhikkhave, ṭhānāni dullabhāni akatapuññena mātugāmena. Katamāni pañca? Patirūpe kule jāyeyyanti – idaṃ, bhikkhave, paṭhamaṃ ṭhānaṃ dullabhaṃ akatapuññena mātugāmena. Patirūpe kule jāyitvā patirūpaṃ kulaṃ gaccheyyanti – idaṃ, bhikkhave, dutiyaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvaseyyanti – idaṃ, bhikkhave, tatiyaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvasantī puttavatī assanti – idaṃ, bhikkhave, catutthaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvasantī puttavatī samānā sāmikaṃ abhibhuyya vatteyyanti – idaṃ, bhikkhave, pañcamaṃ ṭhānaṃ dullabhaṃ akatapuññena mātugāmena . Imāni kho, bhikkhave, pañca ṭhānāni dullabhāni akatapuññena mātugāmenāti.
‘‘པཉྩིམཱནི, བྷིཀྑཝེ, ཋཱནཱནི སུལབྷཱནི ཀཏཔུཉྙེན མཱཏུགཱམེན། ཀཏམཱནི པཉྩ? པཏིརཱུཔེ ཀུལེ ཛཱཡེཡྻནྟི – ཨིདཾ, བྷིཀྑཝེ, པཋམཾ ཋཱནཾ སུལབྷཾ ཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ པཏིརཱུཔཾ ཀུལཾ གཙྪེཡྻནྟི – ཨིདཾ, བྷིཀྑཝེ, དུཏིཡཾ ཋཱནཾ སུལབྷཾ ཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ པཏིརཱུཔཾ ཀུལཾ གནྟྭཱ ཨསཔཏྟི ཨགཱརཾ ཨཛ྄ཛྷཱཝསེཡྻནྟི – ཨིདཾ, བྷིཀྑཝེ, ཏཏིཡཾ ཋཱནཾ སུལབྷཾ ཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ པཏིརཱུཔཾ ཀུལཾ གནྟྭཱ ཨསཔཏྟི ཨགཱརཾ ཨཛ྄ཛྷཱཝསནྟཱི པུཏྟཝཏཱི ཨསྶནྟི – ཨིདཾ, བྷིཀྑཝེ, ཙཏུཏྠཾ ཋཱནཾ སུལབྷཾ ཀཏཔུཉྙེན མཱཏུགཱམེན། པཏིརཱུཔེ ཀུལེ ཛཱཡིཏྭཱ པཏིརཱུཔཾ ཀུལཾ གནྟྭཱ ཨསཔཏྟི ཨགཱརཾ ཨཛ྄ཛྷཱཝསནྟཱི པུཏྟཝཏཱི སམཱནཱ སཱམིཀཾ ཨབྷིབྷུཡྻ ཝཏྟེཡྻནྟི – ཨིདཾ, བྷིཀྑཝེ, པཉྩམཾ ཋཱནཾ སུལབྷཾ ཀཏཔུཉྙེན མཱཏུགཱམེན། ཨིམཱནི ཁོ, བྷིཀྑཝེ, པཉྩ ཋཱནཱནི སུལབྷཱནི ཀཏཔུཉྙེན མཱཏུགཱམེནཱ’’ཏི། ཨཊྛམཾ།
‘‘Pañcimāni, bhikkhave, ṭhānāni sulabhāni katapuññena mātugāmena. Katamāni pañca? Patirūpe kule jāyeyyanti – idaṃ, bhikkhave, paṭhamaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gaccheyyanti – idaṃ, bhikkhave, dutiyaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvaseyyanti – idaṃ, bhikkhave, tatiyaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvasantī puttavatī assanti – idaṃ, bhikkhave, catutthaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvasantī puttavatī samānā sāmikaṃ abhibhuyya vatteyyanti – idaṃ, bhikkhave, pañcamaṃ ṭhānaṃ sulabhaṃ katapuññena mātugāmena. Imāni kho, bhikkhave, pañca ṭhānāni sulabhāni katapuññena mātugāmenā’’ti. Aṭṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢-༡༠. པསཡ྄ཧསུཏྟཱདིཝཎྞནཱ • 2-10. Pasayhasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢-༡༠. པསཡ྄ཧསུཏྟཱདིཝཎྞནཱ • 2-10. Pasayhasuttādivaṇṇanā
