| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. டா²னஸுத்தவண்ணனா
2. Ṭhānasuttavaṇṇanā
192. து³தியே டா²னானீதி காரணானி. டா²னேஹீதி காரணேஹி. ஸோசெய்யந்தி ஸுசிபா⁴வோ. ஸங்வஸமானோதி ஏகதோ வஸமானோ. ந ஸந்ததகாரீதி ந ஸததகாரீ. ந ஸந்ததவுத்தி ஸீலேஸூதி ஸததங் ஸப்³ப³காலங் ஸீலஜீவிதங் ந ஜீவதீதி அத்தோ². ஸங்வோஹாரமானோதி கதெ²ந்தோ. ஏகேன ஏகோ வோஹரதீதி ஏகேன ஸத்³தி⁴ங் ஏகோ ஹுத்வா கதே²தி. வோக்கமதீதி ஓக்கமதி. புரிமவோஹாரா பச்சி²மவோஹாரந்தி புரிமகதா²ய பச்சி²மகத²ங், புரிமகதா²ய ச பச்சி²மகதா², பச்சி²மகதா²ய ச புரிமகதா² ந ஸமேதீதி அத்தோ².
192. Dutiye ṭhānānīti kāraṇāni. Ṭhānehīti kāraṇehi. Soceyyanti sucibhāvo. Saṃvasamānoti ekato vasamāno. Na santatakārīti na satatakārī. Na santatavutti sīlesūti satataṃ sabbakālaṃ sīlajīvitaṃ na jīvatīti attho. Saṃvohāramānoti kathento. Ekena eko voharatīti ekena saddhiṃ eko hutvā katheti. Vokkamatīti okkamati. Purimavohārā pacchimavohāranti purimakathāya pacchimakathaṃ, purimakathāya ca pacchimakathā, pacchimakathāya ca purimakathā na sametīti attho.
ஞாதிப்³யஸனேனாதிஆதீ³ஸு ஞாதீனங் ப்³யஸனங் ஞாதிப்³யஸனங், ஞாதிவினாஸோதி அத்தோ². து³தியபதே³பி ஏஸேவ நயோ. ரோக³ப்³யஸனே பன ரோகோ³யேவ ஆரொக்³யவினாஸனதோ ப்³யஸனங் ரோக³ப்³யஸனங். அனுபரிவத்தந்தீதி அனுப³ந்த⁴ந்தி. லாபோ⁴ சாதிஆதீ³ஸு ஏகங் அத்தபா⁴வங் லாபோ⁴ அனுபரிவத்ததி, ஏகங் அலாபோ⁴தி ஏவங் நயோ நேதப்³போ³. ஸாகச்சா²யமானோதி பஞ்ஹபுச்ச²னவிஸ்ஸஜ்ஜனவஸேன ஸாகச்ச²ங் கரொந்தோ. யதா²தி யேனாகாரேன . உம்மக்³கோ³தி பஞ்ஹும்மக்³கோ³. அபி⁴னீஹாரோதி பஞ்ஹாபி⁴ஸங்க²ரணவஸேன சித்தஸ்ஸ அபி⁴னீஹாரோ. ஸமுதா³ஹாரோதி பஞ்ஹபுச்ச²னங். ஸந்தந்தி பச்சனீகஸந்ததாய ஸந்தங் கத்வா ந கதே²தீதி அத்தோ². பணீதந்தி அதப்பகங். அதக்காவசரந்தி யதா² தக்கேன நயக்³கா³ஹேன க³ஹேதுங் ஸக்கா ஹோதி, ஏவங் ந கதே²தீதி அத்தோ². நிபுணந்தி ஸண்ஹங். பண்டி³தவேத³னீயந்தி பண்டி³தேஹி ஜானிதப்³ப³கங். ஸேஸங் ஸப்³ப³த்த² வுத்தானுஸாரேனேவ வேதி³தப்³ப³ங்.
Ñātibyasanenātiādīsu ñātīnaṃ byasanaṃ ñātibyasanaṃ, ñātivināsoti attho. Dutiyapadepi eseva nayo. Rogabyasane pana rogoyeva ārogyavināsanato byasanaṃ rogabyasanaṃ. Anuparivattantīti anubandhanti. Lābho cātiādīsu ekaṃ attabhāvaṃ lābho anuparivattati, ekaṃ alābhoti evaṃ nayo netabbo. Sākacchāyamānoti pañhapucchanavissajjanavasena sākacchaṃ karonto. Yathāti yenākārena . Ummaggoti pañhummaggo. Abhinīhāroti pañhābhisaṅkharaṇavasena cittassa abhinīhāro. Samudāhāroti pañhapucchanaṃ. Santanti paccanīkasantatāya santaṃ katvā na kathetīti attho. Paṇītanti atappakaṃ. Atakkāvacaranti yathā takkena nayaggāhena gahetuṃ sakkā hoti, evaṃ na kathetīti attho. Nipuṇanti saṇhaṃ. Paṇḍitavedanīyanti paṇḍitehi jānitabbakaṃ. Sesaṃ sabbattha vuttānusāreneva veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. டா²னஸுத்தங் • 2. Ṭhānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. டா²னஸுத்தவண்ணனா • 2. Ṭhānasuttavaṇṇanā
