| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. டா²னஸுத்தவண்ணனா
2. Ṭhānasuttavaṇṇanā
192. து³தியே ஸங்வாஸேனாதி ஸஹவாஸேன. ஸீலங் வேதி³தப்³ப³ந்தி ‘‘அயங் ஸுஸீலோ வா து³ஸ்ஸீலோ வா’’தி ஸஹ வஸந்தேன உபஸங்கமந்தேன ஜானிதப்³போ³. தஞ்ச கோ² தீ³கே⁴ன அத்³து⁴னா, ந இத்தரந்தி தஞ்ச ஸீலங் தீ³கே⁴ன காலேன வேதி³தப்³ப³ங், ந இத்தரேன. த்³வீஹதீஹஞ்ஹி ஸங்யதாகாரோ ச ஸங்வுதிந்த்³ரியாகாரோ ச ந ஸக்கா த³ஸ்ஸேதுங். மனஸி கரோதாதி தம்பி ‘‘ஸீலமஸ்ஸ பரிக்³க³ஹெஸ்ஸாமீ’’தி மனஸிகரொந்தேன பச்சவெக்க²ந்தேனேவ ஸக்கா ஜானிதுங், ந இதரேன. பஞ்ஞவதாதி தம்பி ஸப்பஞ்ஞேனேவ பண்டி³தேன. பா³லோ ஹி மனஸிகரொந்தோபி ஜானிதுங் ந ஸக்கோதி.
192. Dutiye saṃvāsenāti sahavāsena. Sīlaṃ veditabbanti ‘‘ayaṃ susīlo vā dussīlo vā’’ti saha vasantena upasaṅkamantena jānitabbo. Tañca kho dīghena addhunā, na ittaranti tañca sīlaṃ dīghena kālena veditabbaṃ, na ittarena. Dvīhatīhañhi saṃyatākāro ca saṃvutindriyākāro ca na sakkā dassetuṃ. Manasi karotāti tampi ‘‘sīlamassa pariggahessāmī’’ti manasikarontena paccavekkhanteneva sakkā jānituṃ, na itarena. Paññavatāti tampi sappaññeneva paṇḍitena. Bālo hi manasikarontopi jānituṃ na sakkoti.
ஸங்வோஹாரேனாதி அபராபரங் கத²னேன.
Saṃvohārenāti aparāparaṃ kathanena.
‘‘யோ ஹி கோசி மனுஸ்ஸேஸு, வோஹாரங் உபஜீவதி;
‘‘Yo hi koci manussesu, vohāraṃ upajīvati;
ஏவங் வாஸெட்ட² ஜானாஹி, வாணிஜோ ஸோ ந ப்³ராஹ்மணோ’’தி. (ம॰ நி॰ 2.457; ஸு॰ நி॰ 619) –
Evaṃ vāseṭṭha jānāhi, vāṇijo so na brāhmaṇo’’ti. (ma. ni. 2.457; su. ni. 619) –
எத்த² ஹி ப்³யவஹாரோ நாம. ‘‘சத்தாரோ அரியவோஹாரா, சத்தாரோ அனரியவோஹாரா’’தி (தீ³॰ நி॰ 3.313) எத்த² சேதனா. ‘‘ஸங்கா² ஸமஞ்ஞா பஞ்ஞத்தி வோஹாரோ’’தி (த⁴॰ ஸ॰ 1313-1315; மஹானி॰ 73) எத்த² பஞ்ஞத்தி. ‘‘வோஹாரமத்தேன ஸோ வோஹரெய்யா’’தி (ஸங்॰ நி॰ 1.25) எத்த² கதா²வோஹாரோ. இதா⁴பி ஏஸோவ அதி⁴ப்பேதோ. ஏகச்சஸ்ஸ ஹி ஸம்முகா²கதா² பரம்முகா²கதா²ய ந ஸமேதி பரம்முகா²கதா² ஸம்முகா²கதா²ய. ததா² புரிமகதா² பச்சி²மகதா²ய, பச்சி²மகதா² ச புரிமகதா²ய. ஸோ கத²னேனேவ ஸக்கா ஜானிதுங் ‘‘அஸுசி ஏஸோ புக்³க³லோ’’தி. ஸுசிஸீலஸ்ஸ பன புரிமங் பச்சி²மேன, பச்சி²மஞ்ச புரிமேன ஸமேதி. ஸம்முகா²கதி²தங் பரம்முகா²கதி²தேன ஸமேதி, பரம்முகா²கதி²தஞ்ச ஸம்முகா²கதி²தேன, தஸ்மா கத²னேன ஸக்கா ஸுசிபா⁴வோ ஜானிதுந்தி பகாஸெந்தோ ஏவமாஹ.
Ettha hi byavahāro nāma. ‘‘Cattāro ariyavohārā, cattāro anariyavohārā’’ti (dī. ni. 3.313) ettha cetanā. ‘‘Saṅkhā samaññā paññatti vohāro’’ti (dha. sa. 1313-1315; mahāni. 73) ettha paññatti. ‘‘Vohāramattena so vohareyyā’’ti (saṃ. ni. 1.25) ettha kathāvohāro. Idhāpi esova adhippeto. Ekaccassa hi sammukhākathā parammukhākathāya na sameti parammukhākathā sammukhākathāya. Tathā purimakathā pacchimakathāya, pacchimakathā ca purimakathāya. So kathaneneva sakkā jānituṃ ‘‘asuci eso puggalo’’ti. Sucisīlassa pana purimaṃ pacchimena, pacchimañca purimena sameti. Sammukhākathitaṃ parammukhākathitena sameti, parammukhākathitañca sammukhākathitena, tasmā kathanena sakkā sucibhāvo jānitunti pakāsento evamāha.
தா²மோதி ஞாணதா²மோ. யஸ்ஸ ஹி ஞாணதா²மோ நத்தி², ஸோ உப்பன்னேஸு உபத்³த³வேஸு க³ஹேதப்³ப³ங் க³ஹணங் கத்தப்³ப³ங் கிச்சங் அபஸ்ஸந்தோ அத்³வாரகக⁴ரங் பவிட்டோ² விய சரதி. தேனாஹ ‘‘ஆபதா³ஸு, பி⁴க்க²வே, தா²மோ வேதி³தப்³போ³’’தி.
Thāmoti ñāṇathāmo. Yassa hi ñāṇathāmo natthi, so uppannesu upaddavesu gahetabbaṃ gahaṇaṃ kattabbaṃ kiccaṃ apassanto advārakagharaṃ paviṭṭho viya carati. Tenāha ‘‘āpadāsu, bhikkhave, thāmo veditabbo’’ti.
ஸாகச்சா²யாதி ஸங்கதா²ய. து³ப்பஞ்ஞஸ்ஸ ஹி கதா² உத³கே கெ³ண்டு³ விய உப்பிலவதி. பஞ்ஞவதோ கதெ²ந்தஸ்ஸ படிபா⁴னங் அனந்தங் ஹோதி. உத³கவிப்ப²ந்தி³தேனேவ ஹி மச்சோ² கு²த்³த³கோ வா மஹந்தோ வாதி ஞாயதி.
Sākacchāyāti saṃkathāya. Duppaññassa hi kathā udake geṇḍu viya uppilavati. Paññavato kathentassa paṭibhānaṃ anantaṃ hoti. Udakavipphanditeneva hi maccho khuddako vā mahanto vāti ñāyati.
ஞாதிவினாஸோதி சோரரோக³ப⁴யாதீ³ஹி ஞாதீனங் வினாஸோ. போ⁴கா³னங் ப்³யஸனங் போ⁴க³ப்³யஸனங், ராஜசோராதி³வஸேன போ⁴க³வினாஸோதி அத்தோ². தேனாஹ ‘‘து³தியபதே³பி ஏஸேவ நயோ’’தி. பஞ்ஹும்மக்³கோ³தி பஞ்ஹக³வேஸனங், ஞாதுங் இச்சி²தஸ்ஸ அத்த²ஸ்ஸ வீமங்ஸனந்தி அத்தோ². அதப்பகந்தி அதித்திகரட்டே²ன அதப்பகங் ஸாது³ரஸபோ⁴ஜனங் விய. ஸண்ஹந்தி ஸுகு²மஸபா⁴வங்.
Ñātivināsoti corarogabhayādīhi ñātīnaṃ vināso. Bhogānaṃ byasanaṃ bhogabyasanaṃ, rājacorādivasena bhogavināsoti attho. Tenāha ‘‘dutiyapadepi eseva nayo’’ti. Pañhummaggoti pañhagavesanaṃ, ñātuṃ icchitassa atthassa vīmaṃsananti attho. Atappakanti atittikaraṭṭhena atappakaṃ sādurasabhojanaṃ viya. Saṇhanti sukhumasabhāvaṃ.
டா²னஸுத்தவண்ணனா நிட்டி²தா.
Ṭhānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. டா²னஸுத்தங் • 2. Ṭhānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. டா²னஸுத்தவண்ணனா • 2. Ṭhānasuttavaṇṇanā
