| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
২. ঠানসুত্তৰণ্ণনা
2. Ṭhānasuttavaṇṇanā
১৯২. দুতিযে সংৰাসেনাতি সহৰাসেন। সীলং ৰেদিতব্বন্তি ‘‘অযং সুসীলো ৰা দুস্সীলো ৰা’’তি সহ ৰসন্তেন উপসঙ্কমন্তেন জানিতব্বো। তঞ্চ খো দীঘেন অদ্ধুনা, ন ইত্তরন্তি তঞ্চ সীলং দীঘেন কালেন ৰেদিতব্বং, ন ইত্তরেন। দ্ৰীহতীহঞ্হি সংযতাকারো চ সংৰুতিন্দ্রিযাকারো চ ন সক্কা দস্সেতুং। মনসি করোতাতি তম্পি ‘‘সীলমস্স পরিগ্গহেস্সামী’’তি মনসিকরোন্তেন পচ্চৰেক্খন্তেনেৰ সক্কা জানিতুং, ন ইতরেন। পঞ্ঞৰতাতি তম্পি সপ্পঞ্ঞেনেৰ পণ্ডিতেন। বালো হি মনসিকরোন্তোপি জানিতুং ন সক্কোতি।
192. Dutiye saṃvāsenāti sahavāsena. Sīlaṃ veditabbanti ‘‘ayaṃ susīlo vā dussīlo vā’’ti saha vasantena upasaṅkamantena jānitabbo. Tañca kho dīghena addhunā, na ittaranti tañca sīlaṃ dīghena kālena veditabbaṃ, na ittarena. Dvīhatīhañhi saṃyatākāro ca saṃvutindriyākāro ca na sakkā dassetuṃ. Manasi karotāti tampi ‘‘sīlamassa pariggahessāmī’’ti manasikarontena paccavekkhanteneva sakkā jānituṃ, na itarena. Paññavatāti tampi sappaññeneva paṇḍitena. Bālo hi manasikarontopi jānituṃ na sakkoti.
সংৰোহারেনাতি অপরাপরং কথনেন।
Saṃvohārenāti aparāparaṃ kathanena.
‘‘যো হি কোচি মনুস্সেসু, ৰোহারং উপজীৰতি।
‘‘Yo hi koci manussesu, vohāraṃ upajīvati;
এৰং ৰাসেট্ঠ জানাহি, ৰাণিজো সো ন ব্রাহ্মণো’’তি॥ (ম॰ নি॰ ২.৪৫৭; সু॰ নি॰ ৬১৯) –
Evaṃ vāseṭṭha jānāhi, vāṇijo so na brāhmaṇo’’ti. (ma. ni. 2.457; su. ni. 619) –
এত্থ হি ব্যৰহারো নাম। ‘‘চত্তারো অরিযৰোহারা, চত্তারো অনরিযৰোহারা’’তি (দী॰ নি॰ ৩.৩১৩) এত্থ চেতনা। ‘‘সঙ্খা সমঞ্ঞা পঞ্ঞত্তি ৰোহারো’’তি (ধ॰ স॰ ১৩১৩-১৩১৫; মহানি॰ ৭৩) এত্থ পঞ্ঞত্তি। ‘‘ৰোহারমত্তেন সো ৰোহরেয্যা’’তি (সং॰ নি॰ ১.২৫) এত্থ কথাৰোহারো। ইধাপি এসোৰ অধিপ্পেতো। একচ্চস্স হি সম্মুখাকথা পরম্মুখাকথায ন সমেতি পরম্মুখাকথা সম্মুখাকথায। তথা পুরিমকথা পচ্ছিমকথায, পচ্ছিমকথা চ পুরিমকথায। সো কথনেনেৰ সক্কা জানিতুং ‘‘অসুচি এসো পুগ্গলো’’তি। সুচিসীলস্স পন পুরিমং পচ্ছিমেন, পচ্ছিমঞ্চ পুরিমেন সমেতি। সম্মুখাকথিতং পরম্মুখাকথিতেন সমেতি, পরম্মুখাকথিতঞ্চ সম্মুখাকথিতেন, তস্মা কথনেন সক্কা সুচিভাৰো জানিতুন্তি পকাসেন্তো এৰমাহ।
Ettha hi byavahāro nāma. ‘‘Cattāro ariyavohārā, cattāro anariyavohārā’’ti (dī. ni. 3.313) ettha cetanā. ‘‘Saṅkhā samaññā paññatti vohāro’’ti (dha. sa. 1313-1315; mahāni. 73) ettha paññatti. ‘‘Vohāramattena so vohareyyā’’ti (saṃ. ni. 1.25) ettha kathāvohāro. Idhāpi esova adhippeto. Ekaccassa hi sammukhākathā parammukhākathāya na sameti parammukhākathā sammukhākathāya. Tathā purimakathā pacchimakathāya, pacchimakathā ca purimakathāya. So kathaneneva sakkā jānituṃ ‘‘asuci eso puggalo’’ti. Sucisīlassa pana purimaṃ pacchimena, pacchimañca purimena sameti. Sammukhākathitaṃ parammukhākathitena sameti, parammukhākathitañca sammukhākathitena, tasmā kathanena sakkā sucibhāvo jānitunti pakāsento evamāha.
থামোতি ঞাণথামো। যস্স হি ঞাণথামো নত্থি, সো উপ্পন্নেসু উপদ্দৰেসু গহেতব্বং গহণং কত্তব্বং কিচ্চং অপস্সন্তো অদ্ৰারকঘরং পৰিট্ঠো ৰিয চরতি। তেনাহ ‘‘আপদাসু, ভিক্খৰে, থামো ৰেদিতব্বো’’তি।
Thāmoti ñāṇathāmo. Yassa hi ñāṇathāmo natthi, so uppannesu upaddavesu gahetabbaṃ gahaṇaṃ kattabbaṃ kiccaṃ apassanto advārakagharaṃ paviṭṭho viya carati. Tenāha ‘‘āpadāsu, bhikkhave, thāmo veditabbo’’ti.
সাকচ্ছাযাতি সংকথায। দুপ্পঞ্ঞস্স হি কথা উদকে গেণ্ডু ৰিয উপ্পিলৰতি। পঞ্ঞৰতো কথেন্তস্স পটিভানং অনন্তং হোতি। উদকৰিপ্ফন্দিতেনেৰ হি মচ্ছো খুদ্দকো ৰা মহন্তো ৰাতি ঞাযতি।
Sākacchāyāti saṃkathāya. Duppaññassa hi kathā udake geṇḍu viya uppilavati. Paññavato kathentassa paṭibhānaṃ anantaṃ hoti. Udakavipphanditeneva hi maccho khuddako vā mahanto vāti ñāyati.
ঞাতিৰিনাসোতি চোররোগভযাদীহি ঞাতীনং ৰিনাসো। ভোগানং ব্যসনং ভোগব্যসনং, রাজচোরাদিৰসেন ভোগৰিনাসোতি অত্থো। তেনাহ ‘‘দুতিযপদেপি এসেৰ নযো’’তি। পঞ্হুম্মগ্গোতি পঞ্হগৰেসনং, ঞাতুং ইচ্ছিতস্স অত্থস্স ৰীমংসনন্তি অত্থো। অতপ্পকন্তি অতিত্তিকরট্ঠেন অতপ্পকং সাদুরসভোজনং ৰিয। সণ্হন্তি সুখুমসভাৰং।
Ñātivināsoti corarogabhayādīhi ñātīnaṃ vināso. Bhogānaṃ byasanaṃ bhogabyasanaṃ, rājacorādivasena bhogavināsoti attho. Tenāha ‘‘dutiyapadepi eseva nayo’’ti. Pañhummaggoti pañhagavesanaṃ, ñātuṃ icchitassa atthassa vīmaṃsananti attho. Atappakanti atittikaraṭṭhena atappakaṃ sādurasabhojanaṃ viya. Saṇhanti sukhumasabhāvaṃ.
ঠানসুত্তৰণ্ণনা নিট্ঠিতা।
Ṭhānasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ২. ঠানসুত্তং • 2. Ṭhānasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. ঠানসুত্তৰণ্ণনা • 2. Ṭhānasuttavaṇṇanā
