| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. டா²னியஸுத்தங்
3. Ṭhāniyasuttaṃ
204. ‘‘காமராக³ட்டா²னியானங் , 1 பி⁴க்க²வே, த⁴ம்மானங் மனஸிகாரப³ஹுலீகாரா அனுப்பன்னோ சேவ காமச்ச²ந்தோ³ உப்பஜ்ஜதி, உப்பன்னோ ச காமச்ச²ந்தோ³ பி⁴ய்யோபா⁴வாய வேபுல்லாய ஸங்வத்ததி. ப்³யாபாத³ட்டா²னியானங், பி⁴க்க²வே, த⁴ம்மானங் மனஸிகாரப³ஹுலீகாரா அனுப்பன்னோ சேவ ப்³யாபாதோ³ உப்பஜ்ஜதி, உப்பன்னோ ச ப்³யாபாதோ³ பி⁴ய்யோபா⁴வாய வேபுல்லாய ஸங்வத்ததி. தி²னமித்³த⁴ட்டா²னியானங், பி⁴க்க²வே, த⁴ம்மானங் மனஸிகாரப³ஹுலீகாரா அனுப்பன்னஞ்சேவ தி²னமித்³த⁴ங் உப்பஜ்ஜதி, உப்பன்னஞ்ச தி²னமித்³த⁴ங் பி⁴ய்யோபா⁴வாய வேபுல்லாயங் ஸங்வத்ததி. உத்³த⁴ச்சகுக்குச்சட்டா²னியானங், பி⁴க்க²வே, த⁴ம்மானங் மனஸிகாரப³ஹுலீகாரா அனுப்பன்னஞ்சேவ உத்³த⁴ச்சகுக்குச்சங் உப்பஜ்ஜதி, உப்பன்னஞ்ச உத்³த⁴ச்சகுக்குச்சங் பி⁴ய்யோபா⁴வாய வேபுல்லாய ஸங்வத்ததி. விசிகிச்சா²ட்டா²னியானங், பி⁴க்க²வே, த⁴ம்மானங் மனஸிகாரப³ஹுலீகாரா அனுப்பன்னா சேவ விசிகிச்சா² உப்பஜ்ஜதி, உப்பன்னா ச விசிகிச்சா² பி⁴ய்யோபா⁴வாய வேபுல்லாய ஸங்வத்ததி.
204. ‘‘Kāmarāgaṭṭhāniyānaṃ , 2 bhikkhave, dhammānaṃ manasikārabahulīkārā anuppanno ceva kāmacchando uppajjati, uppanno ca kāmacchando bhiyyobhāvāya vepullāya saṃvattati. Byāpādaṭṭhāniyānaṃ, bhikkhave, dhammānaṃ manasikārabahulīkārā anuppanno ceva byāpādo uppajjati, uppanno ca byāpādo bhiyyobhāvāya vepullāya saṃvattati. Thinamiddhaṭṭhāniyānaṃ, bhikkhave, dhammānaṃ manasikārabahulīkārā anuppannañceva thinamiddhaṃ uppajjati, uppannañca thinamiddhaṃ bhiyyobhāvāya vepullāyaṃ saṃvattati. Uddhaccakukkuccaṭṭhāniyānaṃ, bhikkhave, dhammānaṃ manasikārabahulīkārā anuppannañceva uddhaccakukkuccaṃ uppajjati, uppannañca uddhaccakukkuccaṃ bhiyyobhāvāya vepullāya saṃvattati. Vicikicchāṭṭhāniyānaṃ, bhikkhave, dhammānaṃ manasikārabahulīkārā anuppannā ceva vicikicchā uppajjati, uppannā ca vicikicchā bhiyyobhāvāya vepullāya saṃvattati.
‘‘ஸதிஸம்பொ³ஜ்ஜ²ங்க³ட்டா²னியானங், பி⁴க்க²வே, த⁴ம்மானங் மனஸிகாரப³ஹுலீகாரா அனுப்பன்னோ சேவ ஸதிஸம்பொ³ஜ்ஜ²ங்கோ³ உப்பஜ்ஜதி, உப்பன்னோ ச ஸதிஸம்பொ³ஜ்ஜ²ங்கோ³ பா⁴வனாபாரிபூரிங் க³ச்ச²தி…பே॰… உபெக்கா²ஸம்பொ³ஜ்ஜ²ங்க³ட்டா²னியானங், பி⁴க்க²வே, த⁴ம்மானங் மனஸிகாரப³ஹுலீகாரா அனுப்பன்னோ சேவ உபெக்கா²ஸம்பொ³ஜ்ஜ²ங்கோ³ உப்பஜ்ஜதி, உப்பன்னோ ச உபெக்கா²ஸம்பொ³ஜ்ஜ²ங்கோ³ பா⁴வனாபாரிபூரிங் க³ச்ச²தீ’’தி. ததியங்.
‘‘Satisambojjhaṅgaṭṭhāniyānaṃ, bhikkhave, dhammānaṃ manasikārabahulīkārā anuppanno ceva satisambojjhaṅgo uppajjati, uppanno ca satisambojjhaṅgo bhāvanāpāripūriṃ gacchati…pe… upekkhāsambojjhaṅgaṭṭhāniyānaṃ, bhikkhave, dhammānaṃ manasikārabahulīkārā anuppanno ceva upekkhāsambojjhaṅgo uppajjati, uppanno ca upekkhāsambojjhaṅgo bhāvanāpāripūriṃ gacchatī’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-5. டா²னியஸுத்தாதி³வண்ணனா • 3-5. Ṭhāniyasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-5. டா²னியஸுத்தாதி³வண்ணனா • 3-5. Ṭhāniyasuttādivaṇṇanā
