| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. থপতিসুত্তং
6. Thapatisuttaṃ
১০০২. সাৰত্থিনিদানং। তেন খো পন সমযেন সম্বহুলা ভিক্খূ ভগৰতো চীৰরকম্মং করোন্তি – ‘‘নিট্ঠিতচীৰরো ভগৰা তেমাসচ্চযেন চারিকং পক্কমিস্সতী’’তি। তেন খো পন সমযেন ইসিদত্তপুরাণা থপতযো সাধুকে পটিৰসন্তি কেনচিদেৰ করণীযেন। অস্সোসুং খো ইসিদত্তপুরাণা থপতযো – ‘‘সম্বহুলা কির ভিক্খূ ভগৰতো চীৰরকম্মং করোন্তি – ‘নিট্ঠিতচীৰরো ভগৰা তেমাসচ্চযেন চারিকং পক্কমিস্সতী’’’তি।
1002. Sāvatthinidānaṃ. Tena kho pana samayena sambahulā bhikkhū bhagavato cīvarakammaṃ karonti – ‘‘niṭṭhitacīvaro bhagavā temāsaccayena cārikaṃ pakkamissatī’’ti. Tena kho pana samayena isidattapurāṇā thapatayo sādhuke paṭivasanti kenacideva karaṇīyena. Assosuṃ kho isidattapurāṇā thapatayo – ‘‘sambahulā kira bhikkhū bhagavato cīvarakammaṃ karonti – ‘niṭṭhitacīvaro bhagavā temāsaccayena cārikaṃ pakkamissatī’’’ti.
অথ খো ইসিদত্তপুরাণা থপতযো মগ্গে পুরিসং ঠপেসুং – ‘‘যদা ত্ৰং, অম্ভো পুরিস, পস্সেয্যাসি ভগৰন্তং আগচ্ছন্তং অরহন্তং সম্মাসম্বুদ্ধং, অথ অম্হাকং আরোচেয্যাসী’’তি। দ্ৰীহতীহং ঠিতো খো সো পুরিসো অদ্দস ভগৰন্তং দূরতোৰ আগচ্ছন্তং। দিস্ৰান যেন ইসিদত্তপুরাণা থপতযো তেনুপসঙ্কমি; উপসঙ্কমিত্ৰা ইসিদত্তপুরাণে থপতযো এতদৰোচ – ‘‘অযং সো, ভন্তে, ভগৰা আগচ্ছতি অরহং সম্মাসম্বুদ্ধো। যস্স দানি কালং মঞ্ঞথা’’তি।
Atha kho isidattapurāṇā thapatayo magge purisaṃ ṭhapesuṃ – ‘‘yadā tvaṃ, ambho purisa, passeyyāsi bhagavantaṃ āgacchantaṃ arahantaṃ sammāsambuddhaṃ, atha amhākaṃ āroceyyāsī’’ti. Dvīhatīhaṃ ṭhito kho so puriso addasa bhagavantaṃ dūratova āgacchantaṃ. Disvāna yena isidattapurāṇā thapatayo tenupasaṅkami; upasaṅkamitvā isidattapurāṇe thapatayo etadavoca – ‘‘ayaṃ so, bhante, bhagavā āgacchati arahaṃ sammāsambuddho. Yassa dāni kālaṃ maññathā’’ti.
অথ খো ইসিদত্তপুরাণা থপতযো যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা ভগৰন্তং পিট্ঠিতো পিট্ঠিতো অনুবন্ধিংসু। অথ খো ভগৰা মগ্গা ওক্কম্ম যেন অঞ্ঞতরং রুক্খমূলং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। ইসিদত্তপুরাণা থপতযো ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ইসিদত্তপুরাণা থপতযো ভগৰন্তং এতদৰোচুং –
Atha kho isidattapurāṇā thapatayo yena bhagavā tenupasaṅkamiṃsu; upasaṅkamitvā bhagavantaṃ abhivādetvā bhagavantaṃ piṭṭhito piṭṭhito anubandhiṃsu. Atha kho bhagavā maggā okkamma yena aññataraṃ rukkhamūlaṃ tenupasaṅkami; upasaṅkamitvā paññatte āsane nisīdi. Isidattapurāṇā thapatayo bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te isidattapurāṇā thapatayo bhagavantaṃ etadavocuṃ –
‘‘যদা মযং, ভন্তে, ভগৰন্তং সুণাম – ‘সাৰত্থিযা কোসলেসু চারিকং পক্কমিস্সতী’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘সাৰত্থিযা কোসলেসু চারিকং পক্কন্তো’তি , হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা’’’তি।
‘‘Yadā mayaṃ, bhante, bhagavantaṃ suṇāma – ‘sāvatthiyā kosalesu cārikaṃ pakkamissatī’ti, hoti no tasmiṃ samaye anattamanatā hoti domanassaṃ – ‘dūre no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘sāvatthiyā kosalesu cārikaṃ pakkanto’ti , hoti no tasmiṃ samaye anattamanatā hoti domanassaṃ – ‘dūre no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘কোসলেহি মল্লেসু চারিকং পক্কমিস্সতী’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা ভৰিস্সতী’তি। যদা পন মযং, ভন্তে , ভগৰন্তং সুণাম – ‘কোসলেহি মল্লেসু চারিকং পক্কন্তো’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘kosalehi mallesu cārikaṃ pakkamissatī’ti, hoti no tasmiṃ samaye anattamanatā hoti domanassaṃ – ‘dūre no bhagavā bhavissatī’ti. Yadā pana mayaṃ, bhante , bhagavantaṃ suṇāma – ‘kosalehi mallesu cārikaṃ pakkanto’ti, hoti no tasmiṃ samaye anattamanatā hoti domanassaṃ – ‘dūre no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘মল্লেহি ৰজ্জীসু চারিকং পক্কমিস্সতী’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘মল্লেহি ৰজ্জীসু চারিকং পক্কন্তো’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘mallehi vajjīsu cārikaṃ pakkamissatī’ti, hoti no tasmiṃ samaye anattamanatā hoti domanassaṃ – ‘dūre no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘mallehi vajjīsu cārikaṃ pakkanto’ti, hoti no tasmiṃ samaye anattamanatā hoti domanassaṃ – ‘dūre no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘ৰজ্জীহি কাসীসু চারিকং পক্কমিস্সতী’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা ভৰিস্সতী’তি। যদা পন মযং, ভন্তে ভগৰন্তং সুণাম – ‘ৰজ্জীহি কাসীসু চারিকং পক্কন্তো’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘vajjīhi kāsīsu cārikaṃ pakkamissatī’ti, hoti no tasmiṃ samaye anattamanatā hoti domanassaṃ – ‘dūre no bhagavā bhavissatī’ti. Yadā pana mayaṃ, bhante bhagavantaṃ suṇāma – ‘vajjīhi kāsīsu cārikaṃ pakkanto’ti, hoti no tasmiṃ samaye anattamanatā hoti domanassaṃ – ‘dūre no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘কাসীহি মাগধে চারিকং পক্কমিস্সতী’তি, হোতি নো তস্মিং সমযে অনত্তমনতা হোতি দোমনস্সং – ‘দূরে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘কাসীহি মাগধে চারিকং পক্কন্তো’তি, হোতি অনপ্পকা নো তস্মিং সমযে অনত্তমনতা হোতি অনপ্পকং দোমনস্সং – ‘দূরে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘kāsīhi māgadhe cārikaṃ pakkamissatī’ti, hoti no tasmiṃ samaye anattamanatā hoti domanassaṃ – ‘dūre no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘kāsīhi māgadhe cārikaṃ pakkanto’ti, hoti anappakā no tasmiṃ samaye anattamanatā hoti anappakaṃ domanassaṃ – ‘dūre no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘মাগধেহি কাসীসু চারিকং পক্কমিস্সতী’তি , হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘মাগধেহি কাসীসু চারিকং পক্কন্তো’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘māgadhehi kāsīsu cārikaṃ pakkamissatī’ti , hoti no tasmiṃ samaye attamanatā hoti somanassaṃ – ‘āsanne no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘māgadhehi kāsīsu cārikaṃ pakkanto’ti, hoti no tasmiṃ samaye attamanatā hoti somanassaṃ – ‘āsanne no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘কাসীহি ৰজ্জীসু চারিকং পক্কমিস্সতী’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘কাসীহি ৰজ্জীসু চারিকং পক্কন্তো’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘kāsīhi vajjīsu cārikaṃ pakkamissatī’ti, hoti no tasmiṃ samaye attamanatā hoti somanassaṃ – ‘āsanne no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘kāsīhi vajjīsu cārikaṃ pakkanto’ti, hoti no tasmiṃ samaye attamanatā hoti somanassaṃ – ‘āsanne no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘ৰজ্জীহি মল্লেসু চারিকং পক্কমিস্সতী’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘ৰজ্জীহি মল্লেসু চারিকং পক্কন্তো’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘vajjīhi mallesu cārikaṃ pakkamissatī’ti, hoti no tasmiṃ samaye attamanatā hoti somanassaṃ – ‘āsanne no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘vajjīhi mallesu cārikaṃ pakkanto’ti, hoti no tasmiṃ samaye attamanatā hoti somanassaṃ – ‘āsanne no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘মল্লেহি কোসলে চারিকং পক্কমিস্সতী’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘মল্লেহি কোসলে চারিকং পক্কন্তো’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘mallehi kosale cārikaṃ pakkamissatī’ti, hoti no tasmiṃ samaye attamanatā hoti somanassaṃ – ‘āsanne no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘mallehi kosale cārikaṃ pakkanto’ti, hoti no tasmiṃ samaye attamanatā hoti somanassaṃ – ‘āsanne no bhagavā’’’ti.
‘‘যদা পন মযং, ভন্তে, ভগৰন্তং সুণাম – ‘কোসলেহি সাৰত্থিং চারিকং পক্কমিস্সতী’তি, হোতি নো তস্মিং সমযে অত্তমনতা হোতি সোমনস্সং – ‘আসন্নে নো ভগৰা ভৰিস্সতী’তি। যদা পন মযং, ভন্তে, ভগৰন্তং সুণাম – ‘সাৰত্থিযং ৰিহরতি জেতৰনে অনাথপিণ্ডিকস্স আরামে’তি, হোতি অনপ্পকা নো তস্মিং সমযে অত্তমনতা হোতি অনপ্পকং সোমনস্সং – ‘আসন্নে নো ভগৰা’’’তি।
‘‘Yadā pana mayaṃ, bhante, bhagavantaṃ suṇāma – ‘kosalehi sāvatthiṃ cārikaṃ pakkamissatī’ti, hoti no tasmiṃ samaye attamanatā hoti somanassaṃ – ‘āsanne no bhagavā bhavissatī’ti. Yadā pana mayaṃ, bhante, bhagavantaṃ suṇāma – ‘sāvatthiyaṃ viharati jetavane anāthapiṇḍikassa ārāme’ti, hoti anappakā no tasmiṃ samaye attamanatā hoti anappakaṃ somanassaṃ – ‘āsanne no bhagavā’’’ti.
‘‘তস্মাতিহ, থপতযো, সম্বাধো ঘরাৰাসো রজাপথো, অব্ভোকাসো পব্বজ্জা। অলঞ্চ পন ৰো, থপতযো, অপ্পমাদাযা’’তি। ‘‘অত্থি খো নো, ভন্তে, এতম্হা সম্বাধা অঞ্ঞো সম্বাধো সম্বাধতরো চেৰ সম্বাধসঙ্খাততরো চা’’তি। ‘‘কতমো পন ৰো, থপতযো, এতম্হা সম্বাধা অঞ্ঞো সম্বাধো সম্বাধতরো চেৰ সম্বাধসঙ্খাততরো চা’’তি?
‘‘Tasmātiha, thapatayo, sambādho gharāvāso rajāpatho, abbhokāso pabbajjā. Alañca pana vo, thapatayo, appamādāyā’’ti. ‘‘Atthi kho no, bhante, etamhā sambādhā añño sambādho sambādhataro ceva sambādhasaṅkhātataro cā’’ti. ‘‘Katamo pana vo, thapatayo, etamhā sambādhā añño sambādho sambādhataro ceva sambādhasaṅkhātataro cā’’ti?
‘‘ইধ মযং, ভন্তে, যদা রাজা পসেনদি কোসলো উয্যানভূমিং নিয্যাতুকামো হোতি, যে তে রঞ্ঞো পসেনদিস্স কোসলস্স নাগা ওপৰয্হা তে কপ্পেত্ৰা, যা তা রঞ্ঞো পসেনদিস্স কোসলস্স পজাপতিযো পিযা মনাপা তা একং পুরতো একং পচ্ছতো নিসীদাপেম। তাসং খো পন, ভন্তে, ভগিনীনং এৰরূপো গন্ধো হোতি, সেয্যথাপি নাম গন্ধকরণ্ডকস্স তাৰদেৰ ৰিৰরিযমানস্স, যথা তং রাজকঞ্ঞানং গন্ধেন ৰিভূসিতানং। তাসং খো পন, ভন্তে, ভগিনীনং এৰরূপো কাযসম্ফস্সো হোতি, সেয্যথাপি নাম তূলপিচুনো ৰা কপ্পাসপিচুনো ৰা, যথা তং রাজকঞ্ঞানং সুখেধিতানং। তস্মিং খো পন, ভন্তে, সমযে নাগোপি রক্খিতব্বো হোতি, তাপি ভগিনিযো রক্খিতব্বা হোন্তি, অত্তাপি রক্খিতব্বো হোতি। ন খো পন মযং, ভন্তে, অভিজানাম তাসু ভগিনীসু পাপকং চিত্তং উপ্পাদেতা। অযং খো নো, ভন্তে, এতম্হা সম্বাধা অঞ্ঞো সম্বাধো সম্বাধতরো চেৰ সম্বাধসঙ্খাততরো চা’’তি।
‘‘Idha mayaṃ, bhante, yadā rājā pasenadi kosalo uyyānabhūmiṃ niyyātukāmo hoti, ye te rañño pasenadissa kosalassa nāgā opavayhā te kappetvā, yā tā rañño pasenadissa kosalassa pajāpatiyo piyā manāpā tā ekaṃ purato ekaṃ pacchato nisīdāpema. Tāsaṃ kho pana, bhante, bhaginīnaṃ evarūpo gandho hoti, seyyathāpi nāma gandhakaraṇḍakassa tāvadeva vivariyamānassa, yathā taṃ rājakaññānaṃ gandhena vibhūsitānaṃ. Tāsaṃ kho pana, bhante, bhaginīnaṃ evarūpo kāyasamphasso hoti, seyyathāpi nāma tūlapicuno vā kappāsapicuno vā, yathā taṃ rājakaññānaṃ sukhedhitānaṃ. Tasmiṃ kho pana, bhante, samaye nāgopi rakkhitabbo hoti, tāpi bhaginiyo rakkhitabbā honti, attāpi rakkhitabbo hoti. Na kho pana mayaṃ, bhante, abhijānāma tāsu bhaginīsu pāpakaṃ cittaṃ uppādetā. Ayaṃ kho no, bhante, etamhā sambādhā añño sambādho sambādhataro ceva sambādhasaṅkhātataro cā’’ti.
‘‘তস্মাতিহ, থপতযো, সম্বাধো ঘরাৰাসো রজাপথো, অব্ভোকাসো পব্বজ্জা। অলঞ্চ পন ৰো, থপতযো, অপ্পমাদায। চতূহি খো, থপতযো, ধম্মেহি সমন্নাগতো অরিযসাৰকো সোতাপন্নো হোতি অৰিনিপাতধম্মো নিযতো সম্বোধিপরাযণো।
‘‘Tasmātiha, thapatayo, sambādho gharāvāso rajāpatho, abbhokāso pabbajjā. Alañca pana vo, thapatayo, appamādāya. Catūhi kho, thapatayo, dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘কতমেহি চতূহি? ইধ, থপতযো, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। ধম্মে…পে॰… সঙ্ঘে…পে॰… ৰিগতমলমচ্ছেরেন চেতসা অজ্ঝাগারং ৰসতি মুত্তচাগো পযতপাণি ৰোস্সগ্গরতো যাচযোগো দানসংৰিভাগরতো। ইমেহি খো, থপতযো, চতূহি ধম্মেহি সমন্নাগতো অরিযসাৰকো সোতাপন্নো হোতি অৰিনিপাতধম্মো নিযতো সম্বোধিপরাযণো।
‘‘Katamehi catūhi? Idha, thapatayo, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… vigatamalamaccherena cetasā ajjhāgāraṃ vasati muttacāgo payatapāṇi vossaggarato yācayogo dānasaṃvibhāgarato. Imehi kho, thapatayo, catūhi dhammehi samannāgato ariyasāvako sotāpanno hoti avinipātadhammo niyato sambodhiparāyaṇo.
‘‘তুম্হে খো, থপতযো, বুদ্ধে অৰেচ্চপ্পসাদেন সমন্নাগতা – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। ধম্মে…পে॰… সঙ্ঘে…পে॰… যং খো পন কিঞ্চি কুলে দেয্যধম্মং সব্বং তং অপ্পটিৰিভত্তং সীলৰন্তেহি কল্যাণধম্মেহি। তং কিং মঞ্ঞথ, থপতযো, কতিৰিধা তে কোসলেসু মনুস্সা যে তুম্হাকং সমসমা, যদিদং – দানসংৰিভাগে’’তি? ‘‘লাভা নো, ভন্তে, সুলদ্ধং নো, ভন্তে! যেসং নো ভগৰা এৰং পজানাতী’’তি। ছট্ঠং।
‘‘Tumhe kho, thapatayo, buddhe aveccappasādena samannāgatā – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… yaṃ kho pana kiñci kule deyyadhammaṃ sabbaṃ taṃ appaṭivibhattaṃ sīlavantehi kalyāṇadhammehi. Taṃ kiṃ maññatha, thapatayo, katividhā te kosalesu manussā ye tumhākaṃ samasamā, yadidaṃ – dānasaṃvibhāge’’ti? ‘‘Lābhā no, bhante, suladdhaṃ no, bhante! Yesaṃ no bhagavā evaṃ pajānātī’’ti. Chaṭṭhaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. থপতিসুত্তৰণ্ণনা • 6. Thapatisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. থপতিসুত্তৰণ্ণনা • 6. Thapatisuttavaṇṇanā
