| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. த²பதிஸுத்தவண்ணனா
6. Thapatisuttavaṇṇanā
1002. ச²ட்டே² ஸாது⁴கே படிவஸந்தீதி ஸாது⁴கனாமகே அத்தனோ போ⁴க³கா³மகே வஸந்தி. தேஸு இஸித³த்தோ ஸகதா³கா³மீ, புராணோ ஸோதாபன்னோ ஸதா³ரஸந்துட்டோ². மக்³கே³ புரிஸங் ட²பேஸுந்தி தேஸங் கிர கா³மத்³வாரேன ப⁴க³வதோ க³மனமக்³கோ³. தஸ்மா ‘‘ப⁴க³வா காலே வா அகாலே வா அம்ஹாகங் ஸுத்தானங் வா பமத்தானங் வா க³ச்செ²ய்ய, அத² பஸ்ஸிதுங் ந லபெ⁴ய்யாமா’’தி மக்³க³மஜ்ஜே² புரிஸங் ட²பேஸுங்.
1002. Chaṭṭhe sādhuke paṭivasantīti sādhukanāmake attano bhogagāmake vasanti. Tesu isidatto sakadāgāmī, purāṇo sotāpanno sadārasantuṭṭho. Magge purisaṃ ṭhapesunti tesaṃ kira gāmadvārena bhagavato gamanamaggo. Tasmā ‘‘bhagavā kāle vā akāle vā amhākaṃ suttānaṃ vā pamattānaṃ vā gaccheyya, atha passituṃ na labheyyāmā’’ti maggamajjhe purisaṃ ṭhapesuṃ.
அனுப³ந்தி⁴ங்ஸூதி ந தூ³ரதோவ பிட்டி²தோ பிட்டி²தோ அனுப³ந்தி⁴ங்ஸு, ப⁴க³வா பன ஸகடமக்³க³ஸ்ஸ மஜ்ஜே² ஜங்க⁴மக்³கே³ன அக³மாஸி, இதரே உபோ⁴ஸு பஸ்ஸேஸு அனுக³ச்ச²ந்தா அக³மங்ஸு. மக்³கா³ ஓக்கம்மாதி பு³த்³தா⁴னஞ்ஹி கேனசி ஸத்³தி⁴ங் க³ச்ச²ந்தானங்யேவ படிஸந்தா²ரங் காதுங் வட்டதி கேனசி ஸத்³தி⁴ங் டி²தகானங் , கேனசி ஸத்³தி⁴ங் தி³வஸபா⁴க³ங் நிஸின்னானங். தஸ்மா ப⁴க³வா சிந்தேஸி – ‘‘இமேஹி மே ஸத்³தி⁴ங் க³ச்ச²ந்தஸ்ஸ படிஸந்தா²ரங் காதுங் அயுத்தங், டி²தகேனபி காதுங் ந யுத்தங், இமே ஹி மய்ஹங் ஸாஸனே ஸாமினோ ஆக³தப²லா. இமேஹி ஸத்³தி⁴ங் நிஸீதி³த்வாவ தி³வஸபா⁴க³ங் படிஸந்தா²ரங் கரிஸ்ஸாமீ’’தி மக்³கா³ ஓக்கம்ம யேன அஞ்ஞதரங் ருக்க²மூலங் தேனுபஸங்கமி.
Anubandhiṃsūti na dūratova piṭṭhito piṭṭhito anubandhiṃsu, bhagavā pana sakaṭamaggassa majjhe jaṅghamaggena agamāsi, itare ubhosu passesu anugacchantā agamaṃsu. Maggā okkammāti buddhānañhi kenaci saddhiṃ gacchantānaṃyeva paṭisanthāraṃ kātuṃ vaṭṭati kenaci saddhiṃ ṭhitakānaṃ , kenaci saddhiṃ divasabhāgaṃ nisinnānaṃ. Tasmā bhagavā cintesi – ‘‘imehi me saddhiṃ gacchantassa paṭisanthāraṃ kātuṃ ayuttaṃ, ṭhitakenapi kātuṃ na yuttaṃ, ime hi mayhaṃ sāsane sāmino āgataphalā. Imehi saddhiṃ nisīditvāva divasabhāgaṃ paṭisanthāraṃ karissāmī’’ti maggā okkamma yena aññataraṃ rukkhamūlaṃ tenupasaṅkami.
பஞ்ஞத்தே ஆஸனே நிஸீதீ³தி தே கிர ச²த்துபாஹனங் கத்தரத³ண்ட³ங் பாத³ப்³ப⁴ஞ்ஜனதேலாதீ³னி சேவ அட்ட²வித⁴ஞ்ச பானகங் ஸரப⁴பாத³பல்லங்கஞ்ச கா³ஹாபெத்வா அக³மங்ஸு, ஆப⁴தங் பல்லங்கம்பி பஞ்ஞாபெத்வா அத³ங்ஸு , ஸத்தா² தஸ்மிங் நிஸீதி³. ஏகமந்தங் நிஸீதி³ங்ஸூதி ஸேஸானி ச²த்துபாஹனாதீ³னி பி⁴க்கு²ஸங்க⁴ஸ்ஸ தே³தா²தி வத்வா ஸயம்பி ப⁴க³வந்தங் வந்தி³த்வா ஏகமந்தங் நிஸீதி³ங்ஸு.
Paññatte āsane nisīdīti te kira chattupāhanaṃ kattaradaṇḍaṃ pādabbhañjanatelādīni ceva aṭṭhavidhañca pānakaṃ sarabhapādapallaṅkañca gāhāpetvā agamaṃsu, ābhataṃ pallaṅkampi paññāpetvā adaṃsu , satthā tasmiṃ nisīdi. Ekamantaṃ nisīdiṃsūti sesāni chattupāhanādīni bhikkhusaṅghassa dethāti vatvā sayampi bhagavantaṃ vanditvā ekamantaṃ nisīdiṃsu.
ஸாவத்தி²யா கோஸலேஸு சாரிகங் பக்கமிஸ்ஸதீதிஆதி³ ஸப்³ப³ங் மஜ்ஜி²மபதே³ஸவஸேனவ வுத்தங். கஸ்மா? நியதத்தா. ப⁴க³வதோ ஹி சாரிகாசரணம்பி அருணுட்டா²பனம்பி நியதங், மஜ்ஜி²மபதே³ஸேயேவ சாரிகங் சரதி, மஜ்ஜி²மதே³ஸே அருணங் உட்ட²பேதீதி நியதத்தா மஜ்ஜி²மதே³ஸவஸேன வுத்தங். ஆஸன்னே நோ ப⁴க³வா ப⁴விஸ்ஸதீதி எத்த² ந கேவலங் ஆஸன்னத்தாயேவ தேஸங் ஸோமனஸ்ஸங் ஹோதி, அத² கோ² ‘‘இதா³னி தா³னங் தா³துங் க³ந்த⁴மாலாதீ³ஹி பூஜங் காதுங் த⁴ம்மங் ஸோதுங் பஞ்ஹங் புச்சி²துங் லபி⁴ஸ்ஸாமா’’தி தேஸங் ஸோமனஸ்ஸங் ஹோதி.
Sāvatthiyākosalesu cārikaṃ pakkamissatītiādi sabbaṃ majjhimapadesavasenava vuttaṃ. Kasmā? Niyatattā. Bhagavato hi cārikācaraṇampi aruṇuṭṭhāpanampi niyataṃ, majjhimapadeseyeva cārikaṃ carati, majjhimadese aruṇaṃ uṭṭhapetīti niyatattā majjhimadesavasena vuttaṃ. Āsanne no bhagavā bhavissatīti ettha na kevalaṃ āsannattāyeva tesaṃ somanassaṃ hoti, atha kho ‘‘idāni dānaṃ dātuṃ gandhamālādīhi pūjaṃ kātuṃ dhammaṃ sotuṃ pañhaṃ pucchituṃ labhissāmā’’ti tesaṃ somanassaṃ hoti.
தஸ்மாதிஹ த²பதயோ ஸம்பா³தோ⁴ க⁴ராவாஸோதி த²பதயோ யஸ்மா தும்ஹாகங் மயி தூ³ரீபூ⁴தே அனப்பகங் தோ³மனஸ்ஸங், ஆஸன்னே அனப்பகங் ஸோமனஸ்ஸங் ஹோதி, தஸ்மாபி வேதி³தப்³ப³மேதங் ‘‘ஸம்பா³தோ⁴ க⁴ராவாஸோ’’தி. க⁴ராவாஸஸ்ஸ ஹி தோ³ஸேன தும்ஹாகங் ஏவங் ஹோதி. ஸசே பன க⁴ராவாஸங் பஹாய பப்³ப³ஜிதா, அத² ஏவங் வோ மயா ஸத்³தி⁴ங்யேவ க³ச்ச²ந்தானஞ்ச ஆக³ச்ச²ந்தானஞ்ச தங் ந ப⁴வெய்யாதி இமமத்த²ங் தீ³பெந்தோ ஏவமாஹ. தத்த² ஸகிஞ்சனஸபலிபோ³த⁴ட்டே²ன ஸம்பா³த⁴தா வேதி³தப்³பா³. மஹாவாஸே வஸந்தஸ்ஸபி ஹி ஸகிஞ்சனஸபலிபோ³த⁴ட்டே²ன க⁴ராவாஸோ ஸம்பா³தோ⁴வ. ரஜாபதோ²தி ராக³தோ³ஸமோஹரஜானங் ஆபதோ², ஆக³மனட்டா²னந்தி அத்தோ². அப்³போ⁴காஸோ பப்³ப³ஜ்ஜாதி பப்³ப³ஜ்ஜா பன அகிஞ்சனஅபலிபோ³த⁴ட்டே²ன அப்³போ⁴காஸோ. சதுரதனிகேபி ஹி க³ப்³பே⁴ த்³வின்னங் பி⁴க்கூ²னங் பல்லங்கேன பல்லங்கங் க⁴டெத்வா நிஸின்னானம்பி அகிஞ்சனஅபலிபோ³த⁴ட்டே²ன பப்³ப³ஜ்ஜா அப்³போ⁴காஸோ நாம ஹோதி. அலஞ்ச பன வோ த²பதயோ அப்பமாதா³யாதி ஏவங் ஸம்பா³தே⁴ க⁴ராவாஸே வஸந்தானங் தும்ஹாகங் அப்பமாத³மேவ காதுங் யுத்தந்தி அத்தோ².
Tasmātiha thapatayo sambādho gharāvāsoti thapatayo yasmā tumhākaṃ mayi dūrībhūte anappakaṃ domanassaṃ, āsanne anappakaṃ somanassaṃ hoti, tasmāpi veditabbametaṃ ‘‘sambādho gharāvāso’’ti. Gharāvāsassa hi dosena tumhākaṃ evaṃ hoti. Sace pana gharāvāsaṃ pahāya pabbajitā, atha evaṃ vo mayā saddhiṃyeva gacchantānañca āgacchantānañca taṃ na bhaveyyāti imamatthaṃ dīpento evamāha. Tattha sakiñcanasapalibodhaṭṭhena sambādhatā veditabbā. Mahāvāse vasantassapi hi sakiñcanasapalibodhaṭṭhena gharāvāso sambādhova. Rajāpathoti rāgadosamoharajānaṃ āpatho, āgamanaṭṭhānanti attho. Abbhokāsopabbajjāti pabbajjā pana akiñcanaapalibodhaṭṭhena abbhokāso. Caturatanikepi hi gabbhe dvinnaṃ bhikkhūnaṃ pallaṅkena pallaṅkaṃ ghaṭetvā nisinnānampi akiñcanaapalibodhaṭṭhena pabbajjā abbhokāso nāma hoti. Alañca pana vo thapatayo appamādāyāti evaṃ sambādhe gharāvāse vasantānaṃ tumhākaṃ appamādameva kātuṃ yuttanti attho.
ஏகங் புரதோ ஏகங் பச்ச²தோ நிஸீதா³பேமாதி தே கிர த்³வேபி ஜனா ஸப்³பா³லங்காரபடிமண்டி³தேஸு த்³வீஸு நாகே³ஸு தா இத்தி²யோ ஏவங் நிஸீதா³பெத்வா ரஞ்ஞோ நாக³ங் மஜ்ஜே² கத்வா உபோ⁴ஸு பஸ்ஸேஸு க³ச்ச²ந்தி, தஸ்மா ஏவமாஹங்ஸு. நாகோ³பி ரக்கி²தப்³போ³தி யதா² கிஞ்சி விஸேவிதங் ந கரோதி, ஏவங் ரக்கி²தப்³போ³ ஹோதி. தாபி ப⁴கி³னியோதி யதா² பமாத³ங் நாபஜ்ஜந்தி, ஏவங் ரக்கி²தப்³பா³ ஹொந்தி. அத்தாபீதி ஸிதஹஸிதகதி²தவிபெக்கி²தாதீ³னி அகரொந்தேஹி அத்தாபி ரக்கி²தப்³போ³ ஹோதி. (தேஹி ததா² கரொந்தேஹி ந அத்தாபி ரக்கி²தப்³போ³ ஹோதி). ததா² கரொந்தோ ஹி ‘‘ஸாமிது³ப்³போ⁴ ஏஸோ’’தி நிக்³க³ஹேதப்³போ³ ஹோதி. தஸ்மாதிஹ த²பதயோதி யஸ்மா தும்ஹே ராஜா நிச்சங் ராஜப⁴ண்ட³ங் படிச்சா²பேதி, தஸ்மாபி ஸம்பா³தோ⁴ க⁴ராவாஸோ ரஜாபதோ². யஸ்மா பன பங்ஸுகூலிகபி⁴க்கு²ங் ஏவங் படிச்சா²பெந்தோ நத்தி², தஸ்மா அப்³போ⁴காஸோ பப்³ப³ஜ்ஜா. ஏவங் ஸப்³ப³த்தா²பி அலஞ்ச பன வோ த²பதயோ அப்பமாதா³ய அப்பமாத³மேவ கரோதா²தி த³ஸ்ஸேதி.
Ekaṃ purato ekaṃ pacchato nisīdāpemāti te kira dvepi janā sabbālaṅkārapaṭimaṇḍitesu dvīsu nāgesu tā itthiyo evaṃ nisīdāpetvā rañño nāgaṃ majjhe katvā ubhosu passesu gacchanti, tasmā evamāhaṃsu. Nāgopi rakkhitabboti yathā kiñci visevitaṃ na karoti, evaṃ rakkhitabbo hoti. Tāpi bhaginiyoti yathā pamādaṃ nāpajjanti, evaṃ rakkhitabbā honti. Attāpīti sitahasitakathitavipekkhitādīni akarontehi attāpi rakkhitabbo hoti. (Tehi tathā karontehi na attāpi rakkhitabbo hoti). Tathā karonto hi ‘‘sāmidubbho eso’’ti niggahetabbo hoti. Tasmātiha thapatayoti yasmā tumhe rājā niccaṃ rājabhaṇḍaṃ paṭicchāpeti, tasmāpi sambādho gharāvāso rajāpatho. Yasmā pana paṃsukūlikabhikkhuṃ evaṃ paṭicchāpento natthi, tasmā abbhokāso pabbajjā. Evaṃ sabbatthāpi alañca pana vo thapatayo appamādāya appamādameva karothāti dasseti.
முத்தசாகோ³தி விஸ்ஸட்ட²சாகோ³. பயதபாணீதி ஆக³தாக³தானங் தா³னத்தா²ய தோ⁴தஹத்தோ². வொஸ்ஸக்³க³ரதோதி வொஸ்ஸக்³க³ஸங்கா²தே சாகே³ ரதோ. யாசயோகோ³தி யாசிதப்³ப³கயுத்தோ. தா³னஸங்விபா⁴க³ரதோதி தா³னேன சேவ அப்பமத்தகம்பி கிஞ்சி லத்³தா⁴ ததோபி ஸங்விபா⁴கே³ ரதோ. அப்படிவிப⁴த்தந்தி ‘‘இத³ங் அம்ஹாகங் ப⁴விஸ்ஸதி, இத³ங் பி⁴க்கூ²ன’’ந்தி ஏவங் அகதவிபா⁴க³ங், ஸப்³ப³ங் தா³தப்³ப³மேவ ஹுத்வா டி²தந்தி அத்தோ².
Muttacāgoti vissaṭṭhacāgo. Payatapāṇīti āgatāgatānaṃ dānatthāya dhotahattho. Vossaggaratoti vossaggasaṅkhāte cāge rato. Yācayogoti yācitabbakayutto. Dānasaṃvibhāgaratoti dānena ceva appamattakampi kiñci laddhā tatopi saṃvibhāge rato. Appaṭivibhattanti ‘‘idaṃ amhākaṃ bhavissati, idaṃ bhikkhūna’’nti evaṃ akatavibhāgaṃ, sabbaṃ dātabbameva hutvā ṭhitanti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. த²பதிஸுத்தங் • 6. Thapatisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. த²பதிஸுத்தவண்ணனா • 6. Thapatisuttavaṇṇanā
