| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
6. ථපතිසුත්‌තවණ්‌ණනා
6. Thapatisuttavaṇṇanā
1002. (විතානං කායානං කාලනකාය, කාරණස්‌ස උපගතානං සාතපරියා සිජ්‌ඣති. තත්‌ථ කායපරිපජ්‌ඣායමුඛෙන තන්‌තිං ඨපෙසි භගවා. න හි පස්‌සථ නමත්‌ථෙහි කරණෙ නිරත්‌ථකො පිති වත්‌තති. ‘‘නියතත්‌තා’’ති වුත්‌තං. තමෙව නියමං ‘‘මජ්‌ඣිමපදෙසෙයෙවා’’ති අවධාරණෙන විභාවෙති . මහාමණ්‌ඩලචාරිකං චරන්‌තොපි මජ්‌ඣිමපදෙසස්‌ස අන්‌තන්‌තෙනෙව චරති. තත්‌ථ ච විනෙය්‍යජනස්‌ස සමොසරණතා මත්‌තපනවාචමහත්‌ථසුපනන්‌ති.) [එත්‌ථන්‌තරෙ පාඨො අසුද්‌ධො දුස්‌සොධනීයො ච, සුද්‌ධපාඨො ගවෙසිතබ්‌බො.] අරුණුට්‌ඨාපනම්‌පි තත්‌ථෙව හොති. පච්‌චන්‌තපදෙසෙ පන දූරෙ විනෙය්‍යජනා හොන්‌ති, තත්‌ථ ගන්‌ත්‌වා මග්‌ගඵලෙසු පතිට්‌ඨාපෙත්‌වා තතො පච්‌චාගන්‌ත්‌වා මජ්‌ඣිමපදෙසෙ එව වාසං උපගච්‌ඡති, තත්‌ථ මනුස්‌සෙහි කතානං කාරානං මහප්‌ඵලභාවනියමනත්‌ථන්‌ති දට්‌ඨබ්‌බං. ‘‘ආසන්‌නෙ නො භගවා’’ති ඉදං නිදස්‌සනමත්‌තන්‌ති දස්‌සෙන්‌තො ‘‘න කෙවල’’න්‌ති ආදිමාහ.
1002. (Vitānaṃ kāyānaṃ kālanakāya, kāraṇassa upagatānaṃ sātapariyā sijjhati. Tattha kāyaparipajjhāyamukhena tantiṃ ṭhapesi bhagavā. Na hi passatha namatthehi karaṇe niratthako piti vattati. ‘‘Niyatattā’’ti vuttaṃ. Tameva niyamaṃ ‘‘majjhimapadeseyevā’’ti avadhāraṇena vibhāveti . Mahāmaṇḍalacārikaṃ carantopi majjhimapadesassa antanteneva carati. Tattha ca vineyyajanassa samosaraṇatā mattapanavācamahatthasupananti.) [Etthantare pāṭho asuddho dussodhanīyo ca, suddhapāṭho gavesitabbo.] Aruṇuṭṭhāpanampi tattheva hoti. Paccantapadese pana dūre vineyyajanā honti, tattha gantvā maggaphalesu patiṭṭhāpetvā tato paccāgantvā majjhimapadese eva vāsaṃ upagacchati, tattha manussehi katānaṃ kārānaṃ mahapphalabhāvaniyamanatthanti daṭṭhabbaṃ. ‘‘Āsanne no bhagavā’’ti idaṃ nidassanamattanti dassento ‘‘na kevala’’nti ādimāha.
සකිඤ්‌චනසපලිබොධනට්‌ඨෙනාති එත්‌ථ කිඤ්‌චනං පලිබොධො අසමාපිතකිච්‌චතා, තදුභයස්‌ස අත්‌ථිභාවෙනාති අත්‌ථො. මහාවාසෙති මහාගෙහෙ.
Sakiñcanasapalibodhanaṭṭhenāti ettha kiñcanaṃ palibodho asamāpitakiccatā, tadubhayassa atthibhāvenāti attho. Mahāvāseti mahāgehe.
ද්‌වෙපි ජනාති ඉසිදත්‌තපුරාණා. සිතං නාම මන්‌දහසිතං. හසිතං නාම විස්‌සට්‌ඨහසිතං. මුත්‌තචාගොතිආදීසු යං වත්‌තබ්‌බං, තං විසුද්‌ධිමග්‌ගටීකායං (විසුද්‌ධි. මහාටී. 1.160) වුත්‌තනයෙන වෙදිතබ්‌බං. සංවිභාගෙති පරස්‌ස දානවසෙන සංවිභජනෙ. අකතවිභාගන්‌ති දෙය්‍යධම්‌මවසෙන න කතවිභාගං. පුග්‌ගලවසෙන පන ‘‘සීලවන්‌තෙහී’’ති වුත්‌තත්‌තා කතවිභාගමෙව මහප්‌ඵලතාකරණෙන. තෙනාහ ‘‘සබ්‌බං දාතබ්‌බමෙව හුත්‌වා ඨිත’’න්‌ති.
Dvepi janāti isidattapurāṇā. Sitaṃ nāma mandahasitaṃ. Hasitaṃ nāma vissaṭṭhahasitaṃ. Muttacāgotiādīsu yaṃ vattabbaṃ, taṃ visuddhimaggaṭīkāyaṃ (visuddhi. mahāṭī. 1.160) vuttanayena veditabbaṃ. Saṃvibhāgeti parassa dānavasena saṃvibhajane. Akatavibhāganti deyyadhammavasena na katavibhāgaṃ. Puggalavasena pana ‘‘sīlavantehī’’ti vuttattā katavibhāgameva mahapphalatākaraṇena. Tenāha ‘‘sabbaṃ dātabbameva hutvā ṭhita’’nti.
(එත්‌ථන්‌තරෙ පාඨො අසුද්‌ධො දුස්‌සොධනීයො ච, සුද්‌ධපාඨො ගවෙසිතබ්‌බො.)
(Etthantare pāṭho asuddho dussodhanīyo ca, suddhapāṭho gavesitabbo.)
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. ථපතිසුත්‌තං • 6. Thapatisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. ථපතිසුත්‌තවණ්‌ණනා • 6. Thapatisuttavaṇṇanā
