| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
१७. सत्तरसमवग्गो
17. Sattarasamavaggo
(१७०) ५. ठपेत्वा अरियमग्गन्तिकथा
(170) 5. Ṭhapetvā ariyamaggantikathā
७८९. ठपेत्वा अरियमग्गं अवसेसा सङ्खारा दुक्खाति? आमन्ता। दुक्खसमुदयोपि दुक्खोति? न हेवं वत्तब्बे…पे॰… दुक्खसमुदयोपि दुक्खोति? आमन्ता। तीणेव अरियसच्चानीति? न हेवं वत्तब्बे…पे॰… तीणेव अरियसच्चानीति? आमन्ता। ननु चत्तारि अरियसच्चानि वुत्तानि भगवता – दुक्खं, दुक्खसमुदयो, दुक्खनिरोधो, दुक्खनिरोधगामिनी पटिपदाति? आमन्ता। हञ्चि चत्तारि अरियसच्चानि वुत्तानि भगवता – दुक्खं, दुक्खसमुदयो, दुक्खनिरोधो, दुक्खनिरोधगामिनी पटिपदा; नो च वत रे वत्तब्बे – ‘‘तीणेव अरियसच्चानी’’ति।
789. Ṭhapetvā ariyamaggaṃ avasesā saṅkhārā dukkhāti? Āmantā. Dukkhasamudayopi dukkhoti? Na hevaṃ vattabbe…pe… dukkhasamudayopi dukkhoti? Āmantā. Tīṇeva ariyasaccānīti? Na hevaṃ vattabbe…pe… tīṇeva ariyasaccānīti? Āmantā. Nanu cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadāti? Āmantā. Hañci cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadā; no ca vata re vattabbe – ‘‘tīṇeva ariyasaccānī’’ti.
दुक्खसमुदयोपि दुक्खोति? आमन्ता। केनट्ठेनाति? अनिच्चट्ठेन। अरियमग्गो अनिच्चोति? आमन्ता। अरियमग्गो दुक्खोति? न हेवं वत्तब्बे…पे॰…।
Dukkhasamudayopi dukkhoti? Āmantā. Kenaṭṭhenāti? Aniccaṭṭhena. Ariyamaggo aniccoti? Āmantā. Ariyamaggo dukkhoti? Na hevaṃ vattabbe…pe….
अरियमग्गो अनिच्चो, सो च न दुक्खोति? आमन्ता। दुक्खसमुदयो अनिच्चो, सो च न दुक्खोति? न हेवं वत्तब्बे…पे॰… दुक्खसमुदयो अनिच्चो, सो च दुक्खोति? आमन्ता। अरियमग्गो अनिच्चो, सो च दुक्खोति? न हेवं वत्तब्बे…पे॰…।
Ariyamaggo anicco, so ca na dukkhoti? Āmantā. Dukkhasamudayo anicco, so ca na dukkhoti? Na hevaṃ vattabbe…pe… dukkhasamudayo anicco, so ca dukkhoti? Āmantā. Ariyamaggo anicco, so ca dukkhoti? Na hevaṃ vattabbe…pe….
७९०. न वत्तब्बं – ‘‘ठपेत्वा अरियमग्गं अवसेसा सङ्खारा दुक्खा’’ति? आमन्ता। ननु सा दुक्खनिरोधगामिनी पटिपदाति? आमन्ता। हञ्चि सा दुक्खनिरोधगामिनी पटिपदा, तेन वत रे वत्तब्बे – ‘‘ठपेत्वा अरियमग्गं अवसेसा सङ्खारा दुक्खा’’ति।
790. Na vattabbaṃ – ‘‘ṭhapetvā ariyamaggaṃ avasesā saṅkhārā dukkhā’’ti? Āmantā. Nanu sā dukkhanirodhagāminī paṭipadāti? Āmantā. Hañci sā dukkhanirodhagāminī paṭipadā, tena vata re vattabbe – ‘‘ṭhapetvā ariyamaggaṃ avasesā saṅkhārā dukkhā’’ti.
ठपेत्वा अरियमग्गन्तिकथा निट्ठिता।
Ṭhapetvā ariyamaggantikathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ५. ठपेत्वा अरियमग्गन्तिकथावण्णना • 5. Ṭhapetvā ariyamaggantikathāvaṇṇanā
