| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၇. သတ္တရသမဝဂ္ဂော
17. Sattarasamavaggo
(၁၇၀) ၅. ဌပေတ္ဝာ အရိယမဂ္ဂန္တိကထာ
(170) 5. Ṭhapetvā ariyamaggantikathā
၇၈၉. ဌပေတ္ဝာ အရိယမဂ္ဂံ အဝသေသာ သင္ခာရာ ဒုက္ခာတိ? အာမန္တာ။ ဒုက္ခသမုဒယောပိ ဒုက္ခောတိ? န ဟေဝံ ဝတ္တဗ္ဗေ။ပေ.။ ဒုက္ခသမုဒယောပိ ဒုက္ခောတိ? အာမန္တာ။ တီဏေဝ အရိယသစ္စာနီတိ? န ဟေဝံ ဝတ္တဗ္ဗေ။ပေ.။ တီဏေဝ အရိယသစ္စာနီတိ? အာမန္တာ။ နနု စတ္တာရိ အရိယသစ္စာနိ ဝုတ္တာနိ ဘဂဝတာ – ဒုက္ခံ, ဒုက္ခသမုဒယော, ဒုက္ခနိရောဓော, ဒုက္ခနိရောဓဂာမိနီ ပဋိပဒာတိ? အာမန္တာ။ ဟဉ္စိ စတ္တာရိ အရိယသစ္စာနိ ဝုတ္တာနိ ဘဂဝတာ – ဒုက္ခံ, ဒုက္ခသမုဒယော, ဒုက္ခနိရောဓော, ဒုက္ခနိရောဓဂာမိနီ ပဋိပဒာ; နော စ ဝတ ရေ ဝတ္တဗ္ဗေ – ‘‘တီဏေဝ အရိယသစ္စာနီ’’တိ။
789. Ṭhapetvā ariyamaggaṃ avasesā saṅkhārā dukkhāti? Āmantā. Dukkhasamudayopi dukkhoti? Na hevaṃ vattabbe…pe… dukkhasamudayopi dukkhoti? Āmantā. Tīṇeva ariyasaccānīti? Na hevaṃ vattabbe…pe… tīṇeva ariyasaccānīti? Āmantā. Nanu cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadāti? Āmantā. Hañci cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadā; no ca vata re vattabbe – ‘‘tīṇeva ariyasaccānī’’ti.
ဒုက္ခသမုဒယောပိ ဒုက္ခောတိ? အာမန္တာ။ ကေနဋ္ဌေနာတိ? အနိစ္စဋ္ဌေန။ အရိယမဂ္ဂော အနိစ္စောတိ? အာမန္တာ။ အရိယမဂ္ဂော ဒုက္ခောတိ? န ဟေဝံ ဝတ္တဗ္ဗေ။ပေ.။။
Dukkhasamudayopi dukkhoti? Āmantā. Kenaṭṭhenāti? Aniccaṭṭhena. Ariyamaggo aniccoti? Āmantā. Ariyamaggo dukkhoti? Na hevaṃ vattabbe…pe….
အရိယမဂ္ဂော အနိစ္စော, သော စ န ဒုက္ခောတိ? အာမန္တာ။ ဒုက္ခသမုဒယော အနိစ္စော, သော စ န ဒုက္ခောတိ? န ဟေဝံ ဝတ္တဗ္ဗေ။ပေ.။ ဒုက္ခသမုဒယော အနိစ္စော, သော စ ဒုက္ခောတိ? အာမန္တာ။ အရိယမဂ္ဂော အနိစ္စော, သော စ ဒုက္ခောတိ? န ဟေဝံ ဝတ္တဗ္ဗေ။ပေ.။။
Ariyamaggo anicco, so ca na dukkhoti? Āmantā. Dukkhasamudayo anicco, so ca na dukkhoti? Na hevaṃ vattabbe…pe… dukkhasamudayo anicco, so ca dukkhoti? Āmantā. Ariyamaggo anicco, so ca dukkhoti? Na hevaṃ vattabbe…pe….
၇၉၀. န ဝတ္တဗ္ဗံ – ‘‘ဌပေတ္ဝာ အရိယမဂ္ဂံ အဝသေသာ သင္ခာရာ ဒုက္ခာ’’တိ? အာမန္တာ။ နနု သာ ဒုက္ခနိရောဓဂာမိနီ ပဋိပဒာတိ? အာမန္တာ။ ဟဉ္စိ သာ ဒုက္ခနိရောဓဂာမိနီ ပဋိပဒာ, တေန ဝတ ရေ ဝတ္တဗ္ဗေ – ‘‘ဌပေတ္ဝာ အရိယမဂ္ဂံ အဝသေသာ သင္ခာရာ ဒုက္ခာ’’တိ။
790. Na vattabbaṃ – ‘‘ṭhapetvā ariyamaggaṃ avasesā saṅkhārā dukkhā’’ti? Āmantā. Nanu sā dukkhanirodhagāminī paṭipadāti? Āmantā. Hañci sā dukkhanirodhagāminī paṭipadā, tena vata re vattabbe – ‘‘ṭhapetvā ariyamaggaṃ avasesā saṅkhārā dukkhā’’ti.
ဌပေတ္ဝာ အရိယမဂ္ဂန္တိကထာ နိဋ္ဌိတာ။
Ṭhapetvā ariyamaggantikathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၅. ဌပေတ္ဝာ အရိယမဂ္ဂန္တိကထာဝဏ္ဏနာ • 5. Ṭhapetvā ariyamaggantikathāvaṇṇanā
