| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൧൭. സത്തരസമവഗ്ഗോ
17. Sattarasamavaggo
(൧൭൦) ൫. ഠപേത്വാ അരിയമഗ്ഗന്തികഥാ
(170) 5. Ṭhapetvā ariyamaggantikathā
൭൮൯. ഠപേത്വാ അരിയമഗ്ഗം അവസേസാ സങ്ഖാരാ ദുക്ഖാതി? ആമന്താ. ദുക്ഖസമുദയോപി ദുക്ഖോതി? ന ഹേവം വത്തബ്ബേ…പേ॰… ദുക്ഖസമുദയോപി ദുക്ഖോതി? ആമന്താ. തീണേവ അരിയസച്ചാനീതി? ന ഹേവം വത്തബ്ബേ…പേ॰… തീണേവ അരിയസച്ചാനീതി? ആമന്താ. നനു ചത്താരി അരിയസച്ചാനി വുത്താനി ഭഗവതാ – ദുക്ഖം, ദുക്ഖസമുദയോ, ദുക്ഖനിരോധോ, ദുക്ഖനിരോധഗാമിനീ പടിപദാതി? ആമന്താ. ഹഞ്ചി ചത്താരി അരിയസച്ചാനി വുത്താനി ഭഗവതാ – ദുക്ഖം, ദുക്ഖസമുദയോ, ദുക്ഖനിരോധോ, ദുക്ഖനിരോധഗാമിനീ പടിപദാ; നോ ച വത രേ വത്തബ്ബേ – ‘‘തീണേവ അരിയസച്ചാനീ’’തി.
789. Ṭhapetvā ariyamaggaṃ avasesā saṅkhārā dukkhāti? Āmantā. Dukkhasamudayopi dukkhoti? Na hevaṃ vattabbe…pe… dukkhasamudayopi dukkhoti? Āmantā. Tīṇeva ariyasaccānīti? Na hevaṃ vattabbe…pe… tīṇeva ariyasaccānīti? Āmantā. Nanu cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadāti? Āmantā. Hañci cattāri ariyasaccāni vuttāni bhagavatā – dukkhaṃ, dukkhasamudayo, dukkhanirodho, dukkhanirodhagāminī paṭipadā; no ca vata re vattabbe – ‘‘tīṇeva ariyasaccānī’’ti.
ദുക്ഖസമുദയോപി ദുക്ഖോതി? ആമന്താ. കേനട്ഠേനാതി? അനിച്ചട്ഠേന. അരിയമഗ്ഗോ അനിച്ചോതി? ആമന്താ. അരിയമഗ്ഗോ ദുക്ഖോതി? ന ഹേവം വത്തബ്ബേ…പേ॰….
Dukkhasamudayopi dukkhoti? Āmantā. Kenaṭṭhenāti? Aniccaṭṭhena. Ariyamaggo aniccoti? Āmantā. Ariyamaggo dukkhoti? Na hevaṃ vattabbe…pe….
അരിയമഗ്ഗോ അനിച്ചോ, സോ ച ന ദുക്ഖോതി? ആമന്താ. ദുക്ഖസമുദയോ അനിച്ചോ, സോ ച ന ദുക്ഖോതി? ന ഹേവം വത്തബ്ബേ…പേ॰… ദുക്ഖസമുദയോ അനിച്ചോ, സോ ച ദുക്ഖോതി? ആമന്താ. അരിയമഗ്ഗോ അനിച്ചോ, സോ ച ദുക്ഖോതി? ന ഹേവം വത്തബ്ബേ…പേ॰….
Ariyamaggo anicco, so ca na dukkhoti? Āmantā. Dukkhasamudayo anicco, so ca na dukkhoti? Na hevaṃ vattabbe…pe… dukkhasamudayo anicco, so ca dukkhoti? Āmantā. Ariyamaggo anicco, so ca dukkhoti? Na hevaṃ vattabbe…pe….
൭൯൦. ന വത്തബ്ബം – ‘‘ഠപേത്വാ അരിയമഗ്ഗം അവസേസാ സങ്ഖാരാ ദുക്ഖാ’’തി? ആമന്താ. നനു സാ ദുക്ഖനിരോധഗാമിനീ പടിപദാതി? ആമന്താ. ഹഞ്ചി സാ ദുക്ഖനിരോധഗാമിനീ പടിപദാ, തേന വത രേ വത്തബ്ബേ – ‘‘ഠപേത്വാ അരിയമഗ്ഗം അവസേസാ സങ്ഖാരാ ദുക്ഖാ’’തി.
790. Na vattabbaṃ – ‘‘ṭhapetvā ariyamaggaṃ avasesā saṅkhārā dukkhā’’ti? Āmantā. Nanu sā dukkhanirodhagāminī paṭipadāti? Āmantā. Hañci sā dukkhanirodhagāminī paṭipadā, tena vata re vattabbe – ‘‘ṭhapetvā ariyamaggaṃ avasesā saṅkhārā dukkhā’’ti.
ഠപേത്വാ അരിയമഗ്ഗന്തികഥാ നിട്ഠിതാ.
Ṭhapetvā ariyamaggantikathā niṭṭhitā.
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൫. ഠപേത്വാ അരിയമഗ്ഗന്തികഥാവണ്ണനാ • 5. Ṭhapetvā ariyamaggantikathāvaṇṇanā
