| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. தே²ரனாமகஸுத்தங்
10. Theranāmakasuttaṃ
244. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன அஞ்ஞதரோ பி⁴க்கு² தே²ரனாமகோ ஏகவிஹாரீ சேவ ஹோதி ஏகவிஹாரஸ்ஸ ச வண்ணவாதீ³. ஸோ ஏகோ கா³மங் பிண்டா³ய பவிஸதி ஏகோ படிக்கமதி ஏகோ ரஹோ நிஸீத³தி ஏகோ சங்கமங் அதி⁴ட்டா²தி. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு ; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘இத⁴, ப⁴ந்தே, அஞ்ஞதரோ பி⁴க்கு² தே²ரனாமகோ ஏகவிஹாரீ ஏகவிஹாரஸ்ஸ ச வண்ணவாதீ³’’தி.
244. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena aññataro bhikkhu theranāmako ekavihārī ceva hoti ekavihārassa ca vaṇṇavādī. So eko gāmaṃ piṇḍāya pavisati eko paṭikkamati eko raho nisīdati eko caṅkamaṃ adhiṭṭhāti. Atha kho sambahulā bhikkhū yena bhagavā tenupasaṅkamiṃsu ; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, aññataro bhikkhu theranāmako ekavihārī ekavihārassa ca vaṇṇavādī’’ti.
அத² கோ² ப⁴க³வா அஞ்ஞதரங் பி⁴க்கு²ங் ஆமந்தேஸி – ‘‘ஏஹி த்வங், பி⁴க்கு², மம வசனேன தே²ரங் பி⁴க்கு²ங் ஆமந்தேஹி – ‘ஸத்தா² தங், ஆவுஸோ தே²ர, ஆமந்தேதீ’’’தி. ‘‘ஏவங், ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா யேனாயஸ்மா தே²ரோ தேனுபஸங்கமி; உபஸங்கமித்வா ஆயஸ்மந்தங் தே²ரங் ஏதத³வோச – ‘‘ஸத்தா² தங், ஆவுஸோ தே²ர, ஆமந்தேதீ’’தி. ‘‘ஏவமாவுஸோ’’தி கோ² ஆயஸ்மா தே²ரோ தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் தே²ரங் ப⁴க³வா ஏதத³வோச – ‘‘ஸச்சங் கிர த்வங், தே²ர, ஏகவிஹாரீ ஏகவிஹாரஸ்ஸ ச வண்ணவாதீ³’’தி? ‘‘ஏவங், ப⁴ந்தே’’. ‘‘யதா² கத²ங் பன த்வங், தே²ர, ஏகவிஹாரீ ஏகவிஹாரஸ்ஸ ச வண்ணவாதீ³’’தி? ‘‘இதா⁴ஹங், ப⁴ந்தே, ஏகோ கா³மங் பிண்டா³ய பவிஸாமி ஏகோ படிக்கமாமி ஏகோ ரஹோ நிஸீதா³மி ஏகோ சங்கமங் அதி⁴ட்டா²மி. ஏவங் க்²வாஹங், ப⁴ந்தே, ஏகவிஹாரீ ஏகவிஹாரஸ்ஸ ச வண்ணவாதீ³’’தி.
Atha kho bhagavā aññataraṃ bhikkhuṃ āmantesi – ‘‘ehi tvaṃ, bhikkhu, mama vacanena theraṃ bhikkhuṃ āmantehi – ‘satthā taṃ, āvuso thera, āmantetī’’’ti. ‘‘Evaṃ, bhante’’ti kho so bhikkhu bhagavato paṭissutvā yenāyasmā thero tenupasaṅkami; upasaṅkamitvā āyasmantaṃ theraṃ etadavoca – ‘‘satthā taṃ, āvuso thera, āmantetī’’ti. ‘‘Evamāvuso’’ti kho āyasmā thero tassa bhikkhuno paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ theraṃ bhagavā etadavoca – ‘‘saccaṃ kira tvaṃ, thera, ekavihārī ekavihārassa ca vaṇṇavādī’’ti? ‘‘Evaṃ, bhante’’. ‘‘Yathā kathaṃ pana tvaṃ, thera, ekavihārī ekavihārassa ca vaṇṇavādī’’ti? ‘‘Idhāhaṃ, bhante, eko gāmaṃ piṇḍāya pavisāmi eko paṭikkamāmi eko raho nisīdāmi eko caṅkamaṃ adhiṭṭhāmi. Evaṃ khvāhaṃ, bhante, ekavihārī ekavihārassa ca vaṇṇavādī’’ti.
‘‘அத்தே²ஸோ, தே²ர, ஏகவிஹாரோ நேஸோ நத்தீ²தி வதா³மி. அபி ச, தே²ர, யதா² ஏகவிஹாரோ வித்தா²ரேன பரிபுண்ணோ ஹோதி தங் ஸுணாஹி, ஸாது⁴கங் மனஸி கரோஹி; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ²…பே॰…. ‘‘கத²ஞ்ச , தே²ர, ஏகவிஹாரோ வித்தா²ரேன பரிபுண்ணோ ஹோதி. இத⁴, தே²ர, யங் அதீதங் தங் பஹீனங், யங் அனாக³தங் தங் படினிஸ்ஸட்ட²ங், பச்சுப்பன்னேஸு ச அத்தபா⁴வபடிலாபே⁴ஸு ச²ந்த³ராகோ³ ஸுப்படிவினீதோ. ஏவங் கோ², தே²ர, ஏகவிஹாரோ வித்தா²ரேன பரிபுண்ணோ ஹோதீ’’தி.
‘‘Attheso, thera, ekavihāro neso natthīti vadāmi. Api ca, thera, yathā ekavihāro vitthārena paripuṇṇo hoti taṃ suṇāhi, sādhukaṃ manasi karohi; bhāsissāmī’’ti. ‘‘Evaṃ, bhante’’ti kho…pe…. ‘‘Kathañca , thera, ekavihāro vitthārena paripuṇṇo hoti. Idha, thera, yaṃ atītaṃ taṃ pahīnaṃ, yaṃ anāgataṃ taṃ paṭinissaṭṭhaṃ, paccuppannesu ca attabhāvapaṭilābhesu chandarāgo suppaṭivinīto. Evaṃ kho, thera, ekavihāro vitthārena paripuṇṇo hotī’’ti.
இத³மவோச ப⁴க³வா. இத³ங் வத்வான ஸுக³தோ அதா²பரங் ஏதத³வோச ஸத்தா² –
Idamavoca bhagavā. Idaṃ vatvāna sugato athāparaṃ etadavoca satthā –
‘‘ஸப்³பா³பி⁴பு⁴ங் ஸப்³ப³விது³ங் ஸுமேத⁴ங்,
‘‘Sabbābhibhuṃ sabbaviduṃ sumedhaṃ,
ஸப்³பே³ஸு த⁴ம்மேஸு அனூபலித்தங்;
Sabbesu dhammesu anūpalittaṃ;
ஸப்³ப³ஞ்ஜஹங் தண்ஹாக்க²யே விமுத்தங்,
Sabbañjahaṃ taṇhākkhaye vimuttaṃ,
தமஹங் நரங் ஏகவிஹாரீதி ப்³ரூமீ’’தி. த³ஸமங்;
Tamahaṃ naraṃ ekavihārīti brūmī’’ti. dasamaṃ;
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. தே²ரனாமகஸுத்தவண்ணனா • 10. Theranāmakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. தே²ரனாமகஸுத்தவண்ணனா • 10. Theranāmakasuttavaṇṇanā
