| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. থেরনামকসুত্তং
10. Theranāmakasuttaṃ
২৪৪. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন অঞ্ঞতরো ভিক্খু থেরনামকো একৰিহারী চেৰ হোতি একৰিহারস্স চ ৰণ্ণৰাদী। সো একো গামং পিণ্ডায পৰিসতি একো পটিক্কমতি একো রহো নিসীদতি একো চঙ্কমং অধিট্ঠাতি। অথ খো সম্বহুলা ভিক্খূ যেন ভগৰা তেনুপসঙ্কমিংসু ; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, অঞ্ঞতরো ভিক্খু থেরনামকো একৰিহারী একৰিহারস্স চ ৰণ্ণৰাদী’’তি।
244. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena aññataro bhikkhu theranāmako ekavihārī ceva hoti ekavihārassa ca vaṇṇavādī. So eko gāmaṃ piṇḍāya pavisati eko paṭikkamati eko raho nisīdati eko caṅkamaṃ adhiṭṭhāti. Atha kho sambahulā bhikkhū yena bhagavā tenupasaṅkamiṃsu ; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, aññataro bhikkhu theranāmako ekavihārī ekavihārassa ca vaṇṇavādī’’ti.
অথ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন থেরং ভিক্খুং আমন্তেহি – ‘সত্থা তং, আৰুসো থের, আমন্তেতী’’’তি। ‘‘এৰং, ভন্তে’’তি খো সো ভিক্খু ভগৰতো পটিস্সুত্ৰা যেনাযস্মা থেরো তেনুপসঙ্কমি; উপসঙ্কমিত্ৰা আযস্মন্তং থেরং এতদৰোচ – ‘‘সত্থা তং, আৰুসো থের, আমন্তেতী’’তি। ‘‘এৰমাৰুসো’’তি খো আযস্মা থেরো তস্স ভিক্খুনো পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং থেরং ভগৰা এতদৰোচ – ‘‘সচ্চং কির ত্ৰং, থের, একৰিহারী একৰিহারস্স চ ৰণ্ণৰাদী’’তি? ‘‘এৰং, ভন্তে’’। ‘‘যথা কথং পন ত্ৰং, থের, একৰিহারী একৰিহারস্স চ ৰণ্ণৰাদী’’তি? ‘‘ইধাহং, ভন্তে, একো গামং পিণ্ডায পৰিসামি একো পটিক্কমামি একো রহো নিসীদামি একো চঙ্কমং অধিট্ঠামি। এৰং খ্ৰাহং, ভন্তে, একৰিহারী একৰিহারস্স চ ৰণ্ণৰাদী’’তি।
Atha kho bhagavā aññataraṃ bhikkhuṃ āmantesi – ‘‘ehi tvaṃ, bhikkhu, mama vacanena theraṃ bhikkhuṃ āmantehi – ‘satthā taṃ, āvuso thera, āmantetī’’’ti. ‘‘Evaṃ, bhante’’ti kho so bhikkhu bhagavato paṭissutvā yenāyasmā thero tenupasaṅkami; upasaṅkamitvā āyasmantaṃ theraṃ etadavoca – ‘‘satthā taṃ, āvuso thera, āmantetī’’ti. ‘‘Evamāvuso’’ti kho āyasmā thero tassa bhikkhuno paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ theraṃ bhagavā etadavoca – ‘‘saccaṃ kira tvaṃ, thera, ekavihārī ekavihārassa ca vaṇṇavādī’’ti? ‘‘Evaṃ, bhante’’. ‘‘Yathā kathaṃ pana tvaṃ, thera, ekavihārī ekavihārassa ca vaṇṇavādī’’ti? ‘‘Idhāhaṃ, bhante, eko gāmaṃ piṇḍāya pavisāmi eko paṭikkamāmi eko raho nisīdāmi eko caṅkamaṃ adhiṭṭhāmi. Evaṃ khvāhaṃ, bhante, ekavihārī ekavihārassa ca vaṇṇavādī’’ti.
‘‘অত্থেসো, থের, একৰিহারো নেসো নত্থীতি ৰদামি। অপি চ, থের, যথা একৰিহারো ৰিত্থারেন পরিপুণ্ণো হোতি তং সুণাহি, সাধুকং মনসি করোহি; ভাসিস্সামী’’তি। ‘‘এৰং, ভন্তে’’তি খো…পে॰…। ‘‘কথঞ্চ , থের, একৰিহারো ৰিত্থারেন পরিপুণ্ণো হোতি। ইধ, থের, যং অতীতং তং পহীনং, যং অনাগতং তং পটিনিস্সট্ঠং, পচ্চুপ্পন্নেসু চ অত্তভাৰপটিলাভেসু ছন্দরাগো সুপ্পটিৰিনীতো। এৰং খো, থের, একৰিহারো ৰিত্থারেন পরিপুণ্ণো হোতী’’তি।
‘‘Attheso, thera, ekavihāro neso natthīti vadāmi. Api ca, thera, yathā ekavihāro vitthārena paripuṇṇo hoti taṃ suṇāhi, sādhukaṃ manasi karohi; bhāsissāmī’’ti. ‘‘Evaṃ, bhante’’ti kho…pe…. ‘‘Kathañca , thera, ekavihāro vitthārena paripuṇṇo hoti. Idha, thera, yaṃ atītaṃ taṃ pahīnaṃ, yaṃ anāgataṃ taṃ paṭinissaṭṭhaṃ, paccuppannesu ca attabhāvapaṭilābhesu chandarāgo suppaṭivinīto. Evaṃ kho, thera, ekavihāro vitthārena paripuṇṇo hotī’’ti.
ইদমৰোচ ভগৰা। ইদং ৰত্ৰান সুগতো অথাপরং এতদৰোচ সত্থা –
Idamavoca bhagavā. Idaṃ vatvāna sugato athāparaṃ etadavoca satthā –
‘‘সব্বাভিভুং সব্বৰিদুং সুমেধং,
‘‘Sabbābhibhuṃ sabbaviduṃ sumedhaṃ,
সব্বেসু ধম্মেসু অনূপলিত্তং।
Sabbesu dhammesu anūpalittaṃ;
সব্বঞ্জহং তণ্হাক্খযে ৰিমুত্তং,
Sabbañjahaṃ taṇhākkhaye vimuttaṃ,
তমহং নরং একৰিহারীতি ব্রূমী’’তি॥ দসমং।
Tamahaṃ naraṃ ekavihārīti brūmī’’ti. dasamaṃ;
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. থেরনামকসুত্তৰণ্ণনা • 10. Theranāmakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. থেরনামকসুত্তৰণ্ণনা • 10. Theranāmakasuttavaṇṇanā
