| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. தே²ரபடிஸந்த³ஹனாபடிஸந்த³ஹனபஞ்ஹோ
7. Therapaṭisandahanāpaṭisandahanapañho
7. ராஜா ஆஹ ‘‘ப⁴ந்தே நாக³ஸேன, த்வங் பன படிஸந்த³ஹிஸ்ஸஸீ’’தி? ‘‘அலங், மஹாராஜ, கிங் தே தேன புச்சி²தேன, நனு மயா படிகச்சேவ அக்கா²தங் ‘ஸசே, மஹாராஜ, ஸஉபாதா³னோ ப⁴விஸ்ஸாமி , படிஸந்த³ஹிஸ்ஸாமி, ஸசே அனுபாதா³னோ ப⁴விஸ்ஸாமி, ந படிஸந்த³ஹிஸ்ஸாமீ’’’தி.
7. Rājā āha ‘‘bhante nāgasena, tvaṃ pana paṭisandahissasī’’ti? ‘‘Alaṃ, mahārāja, kiṃ te tena pucchitena, nanu mayā paṭikacceva akkhātaṃ ‘sace, mahārāja, saupādāno bhavissāmi , paṭisandahissāmi, sace anupādāno bhavissāmi, na paṭisandahissāmī’’’ti.
‘‘ஓபம்மங் கரோஹீ’’தி. ‘‘யதா², மஹாராஜ, கோசிதே³வ புரிஸோ ரஞ்ஞோ அதி⁴காரங் கரெய்ய. ராஜா துட்டோ² அதி⁴காரங் த³தெ³ய்ய, ஸோ தேன அதி⁴காரேன பஞ்சஹி காமகு³ணேஹி ஸமப்பிதோ ஸமங்கி³பூ⁴தோ பரிசரெய்ய, ஸோ சே ஜனஸ்ஸ ஆரோசெய்ய ‘ந மே ராஜா கிஞ்சி படிகரோதீ’ தி. கிங் நு கோ² ஸோ, மஹாராஜ, புரிஸோ யுத்தகாரீ ப⁴வெய்யா’’தி? ‘‘ந ஹி ப⁴ந்தே’’தி. ‘‘ஏவமேவ கோ², மஹாராஜ , கிங் தே தேன புச்சி²தேன, நனு மயா படிகச்சேவ அக்கா²தங் ‘ஸசே ஸஉபாதா³னோ ப⁴விஸ்ஸாமி, படிஸந்த³ஹிஸ்ஸாமி, ஸசே அனுபாதா³னோ ப⁴விஸ்ஸாமி, ந படிஸந்த³ஹிஸ்ஸாமீ’’’தி.
‘‘Opammaṃ karohī’’ti. ‘‘Yathā, mahārāja, kocideva puriso rañño adhikāraṃ kareyya. Rājā tuṭṭho adhikāraṃ dadeyya, so tena adhikārena pañcahi kāmaguṇehi samappito samaṅgibhūto paricareyya, so ce janassa āroceyya ‘na me rājā kiñci paṭikarotī’ ti. Kiṃ nu kho so, mahārāja, puriso yuttakārī bhaveyyā’’ti? ‘‘Na hi bhante’’ti. ‘‘Evameva kho, mahārāja , kiṃ te tena pucchitena, nanu mayā paṭikacceva akkhātaṃ ‘sace saupādāno bhavissāmi, paṭisandahissāmi, sace anupādāno bhavissāmi, na paṭisandahissāmī’’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
தே²ரபடிஸந்த³ஹனாபடிஸந்த³ஹனபஞ்ஹோ ஸத்தமோ.
Therapaṭisandahanāpaṭisandahanapañho sattamo.
