| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. ထေရပဋိသန္ဒဟနာပဋိသန္ဒဟနပဉ္ဟော
7. Therapaṭisandahanāpaṭisandahanapañho
၇. ရာဇာ အာဟ ‘‘ဘန္တေ နာဂသေန, တ္ဝံ ပန ပဋိသန္ဒဟိသ္သသီ’’တိ? ‘‘အလံ, မဟာရာဇ, ကိံ တေ တေန ပုစ္ဆိတေန, နနု မယာ ပဋိကစ္စေဝ အက္ခာတံ ‘သစေ, မဟာရာဇ, သဥပာဒာနော ဘဝိသ္သာမိ , ပဋိသန္ဒဟိသ္သာမိ, သစေ အနုပာဒာနော ဘဝိသ္သာမိ, န ပဋိသန္ဒဟိသ္သာမီ’’’တိ။
7. Rājā āha ‘‘bhante nāgasena, tvaṃ pana paṭisandahissasī’’ti? ‘‘Alaṃ, mahārāja, kiṃ te tena pucchitena, nanu mayā paṭikacceva akkhātaṃ ‘sace, mahārāja, saupādāno bhavissāmi , paṭisandahissāmi, sace anupādāno bhavissāmi, na paṭisandahissāmī’’’ti.
‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ရညော အဓိကာရံ ကရေယ္ယ။ ရာဇာ တုဋ္ဌော အဓိကာရံ ဒဒေယ္ယ, သော တေန အဓိကာရေန ပဉ္စဟိ ကာမဂုဏေဟိ သမပ္ပိတော သမင္ဂိဘူတော ပရိစရေယ္ယ, သော စေ ဇနသ္သ အာရောစေယ္ယ ‘န မေ ရာဇာ ကိဉ္စိ ပဋိကရောတီ’ တိ။ ကိံ နု ခော သော, မဟာရာဇ, ပုရိသော ယုတ္တကာရီ ဘဝေယ္ယာ’’တိ? ‘‘န ဟိ ဘန္တေ’’တိ။ ‘‘ဧဝမေဝ ခော, မဟာရာဇ , ကိံ တေ တေန ပုစ္ဆိတေန, နနု မယာ ပဋိကစ္စေဝ အက္ခာတံ ‘သစေ သဥပာဒာနော ဘဝိသ္သာမိ, ပဋိသန္ဒဟိသ္သာမိ, သစေ အနုပာဒာနော ဘဝိသ္သာမိ, န ပဋိသန္ဒဟိသ္သာမီ’’’တိ။
‘‘Opammaṃ karohī’’ti. ‘‘Yathā, mahārāja, kocideva puriso rañño adhikāraṃ kareyya. Rājā tuṭṭho adhikāraṃ dadeyya, so tena adhikārena pañcahi kāmaguṇehi samappito samaṅgibhūto paricareyya, so ce janassa āroceyya ‘na me rājā kiñci paṭikarotī’ ti. Kiṃ nu kho so, mahārāja, puriso yuttakārī bhaveyyā’’ti? ‘‘Na hi bhante’’ti. ‘‘Evameva kho, mahārāja , kiṃ te tena pucchitena, nanu mayā paṭikacceva akkhātaṃ ‘sace saupādāno bhavissāmi, paṭisandahissāmi, sace anupādāno bhavissāmi, na paṭisandahissāmī’’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ထေရပဋိသန္ဒဟနာပဋိသန္ဒဟနပဉ္ဟော သတ္တမော။
Therapaṭisandahanāpaṭisandahanapañho sattamo.
