| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. ථෙරපටිසන්‌දහනාපටිසන්‌දහනපඤ්‌හො
7. Therapaṭisandahanāpaṭisandahanapañho
7. රාජා ආහ ‘‘භන්‌තෙ නාගසෙන, ත්‌වං පන පටිසන්‌දහිස්‌සසී’’ති? ‘‘අලං, මහාරාජ, කිං තෙ තෙන පුච්‌ඡිතෙන, නනු මයා පටිකච්‌චෙව අක්‌ඛාතං ‘සචෙ, මහාරාජ, සඋපාදානො භවිස්‌සාමි , පටිසන්‌දහිස්‌සාමි, සචෙ අනුපාදානො භවිස්‌සාමි, න පටිසන්‌දහිස්‌සාමී’’’ති.
7. Rājā āha ‘‘bhante nāgasena, tvaṃ pana paṭisandahissasī’’ti? ‘‘Alaṃ, mahārāja, kiṃ te tena pucchitena, nanu mayā paṭikacceva akkhātaṃ ‘sace, mahārāja, saupādāno bhavissāmi , paṭisandahissāmi, sace anupādāno bhavissāmi, na paṭisandahissāmī’’’ti.
‘‘ඔපම්‌මං කරොහී’’ති. ‘‘යථා, මහාරාජ, කොචිදෙව පුරිසො රඤ්‌ඤො අධිකාරං කරෙය්‍ය. රාජා තුට්‌ඨො අධිකාරං දදෙය්‍ය, සො තෙන අධිකාරෙන පඤ්‌චහි කාමගුණෙහි සමප්‌පිතො සමඞ්‌ගිභූතො පරිචරෙය්‍ය, සො චෙ ජනස්‌ස ආරොචෙය්‍ය ‘න මෙ රාජා කිඤ්‌චි පටිකරොතී’ ති. කිං නු ඛො සො, මහාරාජ, පුරිසො යුත්‌තකාරී භවෙය්‍යා’’ති? ‘‘න හි භන්‌තෙ’’ති. ‘‘එවමෙව ඛො, මහාරාජ , කිං තෙ තෙන පුච්‌ඡිතෙන, නනු මයා පටිකච්‌චෙව අක්‌ඛාතං ‘සචෙ සඋපාදානො භවිස්‌සාමි, පටිසන්‌දහිස්‌සාමි, සචෙ අනුපාදානො භවිස්‌සාමි, න පටිසන්‌දහිස්‌සාමී’’’ති.
‘‘Opammaṃ karohī’’ti. ‘‘Yathā, mahārāja, kocideva puriso rañño adhikāraṃ kareyya. Rājā tuṭṭho adhikāraṃ dadeyya, so tena adhikārena pañcahi kāmaguṇehi samappito samaṅgibhūto paricareyya, so ce janassa āroceyya ‘na me rājā kiñci paṭikarotī’ ti. Kiṃ nu kho so, mahārāja, puriso yuttakārī bhaveyyā’’ti? ‘‘Na hi bhante’’ti. ‘‘Evameva kho, mahārāja , kiṃ te tena pucchitena, nanu mayā paṭikacceva akkhātaṃ ‘sace saupādāno bhavissāmi, paṭisandahissāmi, sace anupādāno bhavissāmi, na paṭisandahissāmī’’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
ථෙරපටිසන්‌දහනාපටිසන්‌දහනපඤ්‌හො සත්‌තමො.
Therapaṭisandahanāpaṭisandahanapañho sattamo.
