| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
48. தெ²ய்யஸங்வாஸகவத்து²கதா²
48. Theyyasaṃvāsakavatthukathā
110. பாரிஜஞ்ஞபத்தஸ்ஸாதி பரிஹாயதீதி பரிஜானி, இஸ்ஸரியபோ⁴கா³தி³, தஸ்ஸ பா⁴வோ பாரிஜஞ்ஞங், இஸ்ஸரியபோ⁴கா³தி³க்க²யோ, தங் பத்தோதி பாரிஜஞ்ஞபத்தோ, தஸ்ஸ. ‘‘பாரிஜுஞ்ஞபத்தஸ்ஸா’’திபி உகாரேன ஸஹ பாடோ² அத்தி². கீ²ணகோலஞ்ஞோதி எத்த² குலே ஜாதா கோலஞ்ஞா, ண்யபச்சயோ, நகாராக³மோ. கீ²ணா கோலஞ்ஞா அஸ்ஸாதி கீ²ணகோலஞ்ஞோதி வசனத்த²ங் த³ஸ்ஸெந்தோ ஆஹ ‘‘மாதிபக்க²பிதிபக்க²தோ’’திஆதி³. தத்த² மாதிபக்க²பிதிபக்க²தோதி மாதுயா பக்கோ² மாதிபக்கோ², பிதுனோ பக்கோ² பிதிபக்கோ², மாதிபக்கோ² ச பிதிபக்கோ² ச மாதிபக்க²பிதிபக்கா². பா²திங் காதுந்தி எத்த² பா²-தா⁴து வட்³ட⁴னத்தோ²தி ஆஹ ‘‘வட்³டே⁴து’’ந்தி. ‘‘புச்சி²யமானோ’’தி இமினா அனுயுஞ்ஜியமானோதி எத்த² அனுத்யூபஸக்³க³வஸேன யுஜஸத்³தோ³ புச்ச²னத்தோ²தி த³ஸ்ஸேதி.
110.Pārijaññapattassāti parihāyatīti parijāni, issariyabhogādi, tassa bhāvo pārijaññaṃ, issariyabhogādikkhayo, taṃ pattoti pārijaññapatto, tassa. ‘‘Pārijuññapattassā’’tipi ukārena saha pāṭho atthi. Khīṇakolaññoti ettha kule jātā kolaññā, ṇyapaccayo, nakārāgamo. Khīṇā kolaññā assāti khīṇakolaññoti vacanatthaṃ dassento āha ‘‘mātipakkhapitipakkhato’’tiādi. Tattha mātipakkhapitipakkhatoti mātuyā pakkho mātipakkho, pituno pakkho pitipakkho, mātipakkho ca pitipakkho ca mātipakkhapitipakkhā. Phātiṃ kātunti ettha phā-dhātu vaḍḍhanatthoti āha ‘‘vaḍḍhetu’’nti. ‘‘Pucchiyamāno’’ti iminā anuyuñjiyamānoti ettha anutyūpasaggavasena yujasaddo pucchanatthoti dasseti.
தெ²ய்யஸங்வாஸகோதி தே²னநங் தெ²ய்யங் நகாரஸ்ஸ யகாரங் கத்வா, தெ²ய்யாய ஸங்வாஸகோ இமஸ்ஸாதி தெ²ய்யஸங்வாஸகோ. எத்த² ச ந கேவலங் வஸ்ஸக³ணனாதி³கோயேவ ஸங்வாஸோ நாம ஹோதி, அத² கோ² தெ²ய்யாய லிங்க³க³ஹணம்பி ஸங்வாஸோயேவ நாம. தஸ்மா தஸ்ஸ திவித⁴பா⁴வங் த³ஸ்ஸெந்தோ ஆஹ ‘‘தயோ’’திஆதி³. தத்த² லிங்க³ங் தே²னேதீதி லிங்க³தே²னகோ, ஏஸேவ நயோ இதரேஸுபி. தமத்த²ங் வித்தா²ரெந்தோ ஆஹ ‘‘தத்தா²’’திஆதி³. தத்த² யோதி தெ²ய்யஸங்வாஸகோ. லிங்க³மத்தஸ்ஸேவாதி எத்த² மத்தஸத்³தே³ன ஸங்வாஸாத³யோ நிவத்தேதி.
Theyyasaṃvāsakoti thenanaṃ theyyaṃ nakārassa yakāraṃ katvā, theyyāya saṃvāsako imassāti theyyasaṃvāsako. Ettha ca na kevalaṃ vassagaṇanādikoyeva saṃvāso nāma hoti, atha kho theyyāya liṅgagahaṇampi saṃvāsoyeva nāma. Tasmā tassa tividhabhāvaṃ dassento āha ‘‘tayo’’tiādi. Tattha liṅgaṃ thenetīti liṅgathenako, eseva nayo itaresupi. Tamatthaṃ vitthārento āha ‘‘tatthā’’tiādi. Tattha yoti theyyasaṃvāsako. Liṅgamattassevāti ettha mattasaddena saṃvāsādayo nivatteti.
விதே³ஸந்தி அத்தனோ தே³ஸதோ வியோக³ங் தே³ஸங். விஸத்³தோ³ ஹெத்த² வியோக³த்த²வாசகோ. அத² வா வி தூ³ரங் தே³ஸங். விஸத்³தோ³ ஹெத்த² தூ³ரத்த²வாசகோ. முஸாதி அபூ⁴தத்தே² து³தியந்தனிபாதோ, அபூ⁴தங் வசனந்தி அத்தோ². படிபா³ஹதீதி அஞ்ஞே நிவாரேதி. ஸங்வாஸதே²னகோ நாமாதி எத்த² கோ ஸங்வாஸோ நாம, நனு ஏககம்மாதி³கோதி ஆஹ ‘‘பி⁴க்கு²வஸ்ஸக³ணனாதி³கோ’’திஆதி³. பி⁴க்கு²வஸ்ஸக³ணனாதி³கோதி ஆதி³ஸத்³தே³ன யதா²வுட்³ட⁴ங் வந்த³னஸாதி³யனங் ஆஸனபடிபா³ஹனங் உபோஸத²பவாரணாதீ³ஸு ஸந்தி³ஸ்ஸனந்தி இமானி ஸங்க³ண்ஹாதி. ‘‘கிரியபே⁴தோ³’’தி இமினா ஸங் ஏகதோ வஸியதி அனேனாதி ஸங்வாஸோதி வசனத்தே²ன கிரியபே⁴தோ³ ஸங்வாஸோ நாமாதி த³ஸ்ஸேதி. இமஸ்மிங் அத்தே²தி இமஸ்மிங் வத்து²ம்ஹி, இமஸ்மிங் டா²னேதி அத்தோ². இமினா பாராஜிகாதி³ட்டா²னே பன ஏககம்மாதி³கோ ஸங்வாஸோ நாமாதி த³ஸ்ஸேதி.
Videsanti attano desato viyogaṃ desaṃ. Visaddo hettha viyogatthavācako. Atha vā vi dūraṃ desaṃ. Visaddo hettha dūratthavācako. Musāti abhūtatthe dutiyantanipāto, abhūtaṃ vacananti attho. Paṭibāhatīti aññe nivāreti. Saṃvāsathenako nāmāti ettha ko saṃvāso nāma, nanu ekakammādikoti āha ‘‘bhikkhuvassagaṇanādiko’’tiādi. Bhikkhuvassagaṇanādikoti ādisaddena yathāvuḍḍhaṃ vandanasādiyanaṃ āsanapaṭibāhanaṃ uposathapavāraṇādīsu sandissananti imāni saṅgaṇhāti. ‘‘Kiriyabhedo’’ti iminā saṃ ekato vasiyati anenāti saṃvāsoti vacanatthena kiriyabhedo saṃvāso nāmāti dasseti. Imasmiṃ attheti imasmiṃ vatthumhi, imasmiṃ ṭhāneti attho. Iminā pārājikādiṭṭhāne pana ekakammādiko saṃvāso nāmāti dasseti.
‘‘லிங்க³ஸ்ஸ சேவ ஸங்வாஸஸ்ஸ சா’’தி இமினா உப⁴யதே²னகோதி எத்த² உப⁴யஸரூபங் த³ஸ்ஸேதி.
‘‘Liṅgassa ceva saṃvāsassa cā’’ti iminā ubhayathenakoti ettha ubhayasarūpaṃ dasseti.
எத்தா²தி தெ²ய்யஸங்வாஸகட்டா²னே. ராஜ…பே॰… ப⁴யேஹி வாதி எத்த² ப⁴யஸத்³தோ³ பச்சேகங் யோஜேதப்³போ³. ராஜப⁴யேன ச து³ப்³பி⁴க்க²ப⁴யேன ச கந்தாரப⁴யேன ச ரோக³ப⁴யேன ச வேரிப⁴யேன சாதி ஹி அத்தோ². சீவரக³ஹணத்த²ந்தி சீவராஹரணத்த²ங், அயமேவ வா பாடோ². வாஸத்³தோ³ ஹெத்வத்த²ங் வா ஸம்பதா³னத்த²ங் வா ஸம்பிண்டே³தி. அயங் கா³தா² விப⁴த்தியா உப்படிபாடித்தா ப⁴க்³க³ரீதிஸங்கா²தா அலங்காரதோ³ஸா ந முத்தா. லிங்க³ந்தி ஸமணலிங்க³ங். இதா⁴தி இமஸ்மிங் ஸாஸனே.
Etthāti theyyasaṃvāsakaṭṭhāne. Rāja…pe… bhayehi vāti ettha bhayasaddo paccekaṃ yojetabbo. Rājabhayena ca dubbhikkhabhayena ca kantārabhayena ca rogabhayena ca veribhayena cāti hi attho. Cīvaragahaṇatthanti cīvarāharaṇatthaṃ, ayameva vā pāṭho. Vāsaddo hetvatthaṃ vā sampadānatthaṃ vā sampiṇḍeti. Ayaṃ gāthā vibhattiyā uppaṭipāṭittā bhaggarītisaṅkhātā alaṅkāradosā na muttā. Liṅganti samaṇaliṅgaṃ. Idhāti imasmiṃ sāsane.
நாதி⁴வாஸேதீதி ந ஸம்படிச்ச²தி. யாவாதி யத்தகங் காலங், அயங் பனெத்த² யோஜனா – இத⁴ யோ ராஜ…பே॰… ப⁴யேன வா சீவரக³ஹணத்த²ங் வா லிங்க³ங் ஆதி³யதி, ஸோ ஸுத்³த⁴மானஸோ ஹுத்வா யாவ ஸங்வாஸங் நாதி⁴வாஸேதி, தாவ ஏஸோ ‘‘தெ²ய்யஸங்வாஸகோ நாமா’’தி ந வுச்சதீதி.
Nādhivāsetīti na sampaṭicchati. Yāvāti yattakaṃ kālaṃ, ayaṃ panettha yojanā – idha yo rāja…pe… bhayena vā cīvaragahaṇatthaṃ vā liṅgaṃ ādiyati, so suddhamānaso hutvā yāva saṃvāsaṃ nādhivāseti, tāva eso ‘‘theyyasaṃvāsako nāmā’’ti na vuccatīti.
தத்ராதி தாஸு கா³தா²ஸு. இதா⁴தி இமஸ்மிங் ஸாஸனே. ஏவந்தி லிங்கே³ க³ஹியமானே. தஸ்மிந்தி ஜனே. அனோஸரித்வாவாதி அனோக்கமித்வாவ. லிங்க³ங் அபனெத்வாதி ஸயங் க³ஹிதங் ஸமணலிங்க³ங் வினாஸெத்வா. பப்³ப³ஜிதாலயந்தி பப்³ப³ஜிதசா²யங். புப்³பே³தி ஸங்வாஸதே²னகே.
Tatrāti tāsu gāthāsu. Idhāti imasmiṃ sāsane. Evanti liṅge gahiyamāne. Tasminti jane. Anosaritvāvāti anokkamitvāva. Liṅgaṃ apanetvāti sayaṃ gahitaṃ samaṇaliṅgaṃ vināsetvā. Pabbajitālayanti pabbajitachāyaṃ. Pubbeti saṃvāsathenake.
ஸப்³ப³பாஸண்டி³யப⁴த்தானீதி ஸப்³பா³னி பாஸண்ட³ங் உத்³தி³ஸ்ஸ தி³ன்னானி ப⁴த்தானி.
Sabbapāsaṇḍiyabhattānīti sabbāni pāsaṇḍaṃ uddissa dinnāni bhattāni.
ஸத்தே வஹதீதி ஸத்தவாஹோ. விரமிதப்³ப³ந்தி வேரங், தங் பவத்தேதீதி வேரிகோ. காயேன பரிஹரிதப்³பா³னீதி காயபரிஹாரியானி. தந்தி துவங். ஹீனாயாவத்தபா⁴வந்தி ஹீனாய கி³ஹிபா⁴வாய ஆவத்தபா⁴வங்.
Satte vahatīti sattavāho. Viramitabbanti veraṃ, taṃ pavattetīti veriko. Kāyena pariharitabbānīti kāyaparihāriyāni. Tanti tuvaṃ. Hīnāyāvattabhāvanti hīnāya gihibhāvāya āvattabhāvaṃ.
உப்பப்³ப³ஜித்வாதி பப்³ப³ஜவியோக³ங் கத்வா. தமத்த²ந்தி உப்பப்³ப³ஜிதஸங்கா²தமத்த²ங். அஸ்ஸாதி மஹாஸாமணேரஸ்ஸ.
Uppabbajitvāti pabbajaviyogaṃ katvā. Tamatthanti uppabbajitasaṅkhātamatthaṃ. Assāti mahāsāmaṇerassa.
மஹந்தோ வாதி எத்த² வாஸத்³தோ³ க³ரஹத்தோ². பகே³வ த³ஹரோதி த³ஸ்ஸேதி. அப்³யத்தோ ஹோதீதி யோஜனா. ஸோதி ஸாமணேரோ.
Mahanto vāti ettha vāsaddo garahattho. Pageva daharoti dasseti. Abyatto hotīti yojanā. Soti sāmaṇero.
வச்ச²கோ³ரக்கா²தீ³னீதி எத்த² வச்சோ²தி தருணகோ³ணோ. ஸோ ஹி மாதுஸந்திகே வஸதீதி வச்சோ². மாதுயா வியோக³காலே வா வஸ்ஸதீதி வச்சோ²தி வுச்சதி. இமினா த³ம்மக³வஜரக்³க³வாபி ஸாமஞ்ஞதோ க³ஹிதா. கோ³ வுச்சதி கெ²த்தபூ⁴மி. வச்சோ² ச கோ³ ச வச்ச²க³வா, தேஸங் ரக்க²னங் வச்ச²கோ³ரக்கோ², ஸோ ஆதி³ யேஸங் கஸிகம்மாதீ³னந்தி வச்ச²கோ³ரக்கா²தீ³னி. ‘‘ஸூபஸம்பன்னோ’’தி இமினா க³ஹட்ட²ம்பி ஸசே உபஸம்பாதே³தி, ஸூபஸம்பன்னோதி த³ஸ்ஸேதி. அனுபஸம்பன்னகாலேயேவாதி ஸாமணேரகாலேயேவ. வினயவினிச்ச²யேதி வினயே வுத்தஸ்ஸ தெ²ய்யஸங்வாஸகஸ்ஸ வினிச்ச²யே. தெ²ய்யஸங்வாஸகோ ஹோதி லிங்க³ஸ்ஸ அபனீதத்தா.
Vacchagorakkhādīnīti ettha vacchoti taruṇagoṇo. So hi mātusantike vasatīti vaccho. Mātuyā viyogakāle vā vassatīti vacchoti vuccati. Iminā dammagavajaraggavāpi sāmaññato gahitā. Go vuccati khettabhūmi. Vaccho ca go ca vacchagavā, tesaṃ rakkhanaṃ vacchagorakkho, so ādi yesaṃ kasikammādīnanti vacchagorakkhādīni. ‘‘Sūpasampanno’’ti iminā gahaṭṭhampi sace upasampādeti, sūpasampannoti dasseti. Anupasampannakāleyevāti sāmaṇerakāleyeva. Vinayavinicchayeti vinaye vuttassa theyyasaṃvāsakassa vinicchaye. Theyyasaṃvāsako hoti liṅgassa apanītattā.
தெ²ய்யஸங்வாஸகோ ந ஹோதி ஸலிங்கே³ டி²தத்தா. அயம்பி தெ²ய்யஸங்வாஸகோ ந ஹோதி காஸாயே ஸஉஸ்ஸாஹத்தா. தெ²ய்யஸங்வாஸகோ ஹோதி காஸாயே து⁴ரஸ்ஸ நிக்கி²த்தத்தா.
Theyyasaṃvāsako na hoti saliṅge ṭhitattā. Ayampi theyyasaṃvāsako na hoti kāsāye saussāhattā. Theyyasaṃvāsako hoti kāsāye dhurassa nikkhittattā.
தெ²ய்யஸங்வாஸகோ ந ஹோதி ஸலிங்கே³ டி²தத்தா. நேவ தெ²ய்யஸங்வாஸகோ ஹோதி காஸாயே ஸஉஸ்ஸாஹத்தா. மேது²னஸேவனாதீ³ஹீதிஆதி³ஸத்³தே³ன பாணாதிபாதாத³யோ ஸங்க³ண்ஹாதி. தெ²ய்யஸங்வாஸகோ ஹோதி காஸாயே து⁴ரஸ்ஸ நிக்கி²த்தத்தா. ஓவட்டிகந்தி அதோ⁴வட்டேன கரணங். ரக்க²தி தாவாதி தாவ ரக்க²தி வீமங்ஸனேன நிவாஸிதத்தா. லிங்க³ந்தி ஸமணலிங்க³ங். தெ²ய்யஸங்வாஸகோ ஹோதி கி³ஹிலிங்க³ஸ்ஸ ஸம்படிச்சி²தத்தா.
Theyyasaṃvāsako na hoti saliṅge ṭhitattā. Neva theyyasaṃvāsako hoti kāsāye saussāhattā. Methunasevanādīhītiādisaddena pāṇātipātādayo saṅgaṇhāti. Theyyasaṃvāsako hoti kāsāye dhurassa nikkhittattā. Ovaṭṭikanti adhovaṭṭena karaṇaṃ. Rakkhati tāvāti tāva rakkhati vīmaṃsanena nivāsitattā. Liṅganti samaṇaliṅgaṃ. Theyyasaṃvāsako hoti gihiliṅgassa sampaṭicchitattā.
வீமங்ஸதி வா ஸம்படிச்ச²தி வா ரக்க²தியேவ ஓதா³தவத்த²ஸ்ஸ அந்தோகாஸாயபா⁴வதோ. ‘‘பி⁴க்கு²னியாபி ஏஸேவ நயோ’’தி வுத்தமேவத்த²ங் விபா⁴வெந்தோ ஆஹ ‘‘ஸாபீ’’திஆதி³.
Vīmaṃsati vā sampaṭicchati vā rakkhatiyeva odātavatthassa antokāsāyabhāvato. ‘‘Bhikkhuniyāpi eseva nayo’’ti vuttamevatthaṃ vibhāvento āha ‘‘sāpī’’tiādi.
வுட்³ட⁴பப்³ப³ஜிதோ ஸாமணேரோதி ஸம்ப³ந்தோ⁴. பாளியம்பீதி பந்தியம்பி. ஸேனோ மங்ஸபேஸிங் க³ஹெத்வா க³ச்ச²தி விய ப⁴த்தபிண்டே³ பத்தங் உபனாமெத்வா க³ஹெத்வா க³ச்ச²தி. தெ²ய்யஸங்வாஸகோ ந ஹோதி வஸ்ஸானங் அக³ணனத்தா.
Vuḍḍhapabbajito sāmaṇeroti sambandho. Pāḷiyampīti pantiyampi. Seno maṃsapesiṃ gahetvā gacchati viya bhattapiṇḍe pattaṃ upanāmetvā gahetvā gacchati. Theyyasaṃvāsako na hoti vassānaṃ agaṇanattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 48. தெ²ய்யஸங்வாஸகவத்து² • 48. Theyyasaṃvāsakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / தெ²ய்யஸங்வாஸகவத்து²கதா² • Theyyasaṃvāsakavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / தெ²ய்யஸங்வாஸகவத்து²கதா²வண்ணனா • Theyyasaṃvāsakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / தெ²ய்யஸங்வாஸகவத்து²கதா²வண்ணனா • Theyyasaṃvāsakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / தெ²ய்யஸங்வாஸகவத்து²கதா²வண்ணனா • Theyyasaṃvāsakavatthukathāvaṇṇanā
