| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
থেয্যসংৰাসকৰত্থুকথাৰণ্ণনা
Theyyasaṃvāsakavatthukathāvaṇṇanā
১১০. থেয্যসংৰাসকৰত্থুম্হি কোলঞ্ঞাতি মাতুৰংসে পিতুৰংসে চ জাতা মাতাপিতুপ্পভুতিসব্বঞাতযো। থেয্যায সংৰাসো এতস্সাতি থেয্যসংৰাসকো। সো চ ন সংৰাসমত্তস্সেৰ থেনকো ইধাধিপ্পেতো, অথ খো লিঙ্গস্স তদুভযস্স চ থেনকোপীতি আহ ‘‘তযো থেয্যসংৰাসকা’’তিআদি। ন যথাৰুড্ঢং ৰন্দনং সাদিযতীতি যথাৰুড্ঢং ভিক্খূনং ৰা সামণেরানং ৰা ৰন্দনং ন সাদিযতি। যথাৰুড্ঢং ৰন্দনং সাদিযতীতি অত্তনা মুসাৰাদং কত্ৰা দস্সিতৰস্সানুরূপং যথাৰুড্ঢং ৰন্দনং সাদিযতি। ভিক্খুৰস্সগণনাদিকোতি ইমিনা ন এককম্মাদিকোৰ ইধ সংৰাসো নামাতি দস্সেতি।
110. Theyyasaṃvāsakavatthumhi kolaññāti mātuvaṃse pituvaṃse ca jātā mātāpituppabhutisabbañātayo. Theyyāya saṃvāso etassāti theyyasaṃvāsako. So ca na saṃvāsamattasseva thenako idhādhippeto, atha kho liṅgassa tadubhayassa ca thenakopīti āha ‘‘tayo theyyasaṃvāsakā’’tiādi. Na yathāvuḍḍhaṃ vandanaṃ sādiyatīti yathāvuḍḍhaṃ bhikkhūnaṃ vā sāmaṇerānaṃ vā vandanaṃ na sādiyati. Yathāvuḍḍhaṃ vandanaṃ sādiyatīti attanā musāvādaṃ katvā dassitavassānurūpaṃ yathāvuḍḍhaṃ vandanaṃ sādiyati. Bhikkhuvassagaṇanādikoti iminā na ekakammādikova idha saṃvāso nāmāti dasseti.
রাজ…পে॰… ভযেনাতি এত্থ ভয-সদ্দো পচ্চেকং যোজেতব্বো ‘‘রাজভযেন দুব্ভিক্খভযেনা’’তিআদিনা । সংৰাসং নাধিৰাসেতি, যাৰ সো সুদ্ধমানসোতি রাজভযাদীহি গহিতলিঙ্গতায সো সুদ্ধমানসো যাৰ সংৰাসং নাধিৰাসেতীতি অত্থো। যো হি রাজভযাদিং ৰিনা কেৰলং ভিক্খূ ৰঞ্চেত্ৰা তেহি সদ্ধিং সংৰসিতুকামতায লিঙ্গং গণ্হাতি, সো অসুদ্ধচিত্ততায লিঙ্গগ্গহণেনেৰ থেয্যসংৰাসকো নাম হোতি। অযং পন তাদিসেন অসুদ্ধচিত্তেন ভিক্খূ ৰঞ্চেতুকামতায অভাৰতো যাৰ সংৰাসং নাধিৰাসেতি, তাৰ থেয্যসংৰাসকো নাম ন হোতি। তেনেৰ ‘‘রাজভযাদীহি গহিতলিঙ্গানং ‘গিহী মং সমণোতি জানন্তূ’তি ৰঞ্চনাচিত্তে সতিপি ভিক্খূনং ৰঞ্চেতুকামতায অভাৰা দোসো ন জাতো’’তি তীসুপি গণ্ঠিপদেসু ৰুত্তং। কেচি পন ‘‘ৰূপসন্তভযতা ইধ সুদ্ধচিত্ততা’’তি ৰদন্তি, এৰঞ্চ সতি সো ৰূপসন্তভযো যাৰ সংৰাসং নাধিৰাসেতি, তাৰ থেয্যসংৰাসকো ন হোতীতি অযমত্থো ৰিঞ্ঞাযতি। ইমস্মিঞ্চ অত্থে ৰিঞ্ঞাযমানে অৰূপসন্তভযস্স সংৰাসসাদিযনেপি থেয্যসংৰাসকতা ন হোতীতি আপজ্জেয্য, ন চ অট্ঠকথাযং অৰূপসন্তভযস্স সংৰাসসাদিযনেপি অথেয্যসংৰাসকতা দস্সিতা। সব্বপাসণ্ডিযভত্তানি ভুঞ্জন্তোতি চ ইমিনা অৰূপসন্ততযেনপি সংৰাসং অসাদিযন্তেনেৰ ৰসিতব্বন্তি দীপেতি। তেনেৰ তীসুপি গণ্ঠিপদেসু ৰুত্তং ‘‘যস্মা ৰিহারং আগন্ত্ৰা সঙ্ঘিকং গণ্হন্তস্স সংৰাসং পরিহরিতুং দুক্করং, তস্মা সব্বপাসণ্ডিযভত্তানি ভুঞ্জন্তোতি ইদং ৰুত্ত’’ন্তি, তস্মা রাজভযাদীহি গহিতলিঙ্গতাযেৰেত্থ সুদ্ধচিত্ততাতি গহেতব্বং।
Rāja…pe… bhayenāti ettha bhaya-saddo paccekaṃ yojetabbo ‘‘rājabhayena dubbhikkhabhayenā’’tiādinā . Saṃvāsaṃ nādhivāseti, yāva so suddhamānasoti rājabhayādīhi gahitaliṅgatāya so suddhamānaso yāva saṃvāsaṃ nādhivāsetīti attho. Yo hi rājabhayādiṃ vinā kevalaṃ bhikkhū vañcetvā tehi saddhiṃ saṃvasitukāmatāya liṅgaṃ gaṇhāti, so asuddhacittatāya liṅgaggahaṇeneva theyyasaṃvāsako nāma hoti. Ayaṃ pana tādisena asuddhacittena bhikkhū vañcetukāmatāya abhāvato yāva saṃvāsaṃ nādhivāseti, tāva theyyasaṃvāsako nāma na hoti. Teneva ‘‘rājabhayādīhi gahitaliṅgānaṃ ‘gihī maṃ samaṇoti jānantū’ti vañcanācitte satipi bhikkhūnaṃ vañcetukāmatāya abhāvā doso na jāto’’ti tīsupi gaṇṭhipadesu vuttaṃ. Keci pana ‘‘vūpasantabhayatā idha suddhacittatā’’ti vadanti, evañca sati so vūpasantabhayo yāva saṃvāsaṃ nādhivāseti, tāva theyyasaṃvāsako na hotīti ayamattho viññāyati. Imasmiñca atthe viññāyamāne avūpasantabhayassa saṃvāsasādiyanepi theyyasaṃvāsakatā na hotīti āpajjeyya, na ca aṭṭhakathāyaṃ avūpasantabhayassa saṃvāsasādiyanepi atheyyasaṃvāsakatā dassitā. Sabbapāsaṇḍiyabhattāni bhuñjantoti ca iminā avūpasantatayenapi saṃvāsaṃ asādiyanteneva vasitabbanti dīpeti. Teneva tīsupi gaṇṭhipadesu vuttaṃ ‘‘yasmā vihāraṃ āgantvā saṅghikaṃ gaṇhantassa saṃvāsaṃ pariharituṃ dukkaraṃ, tasmā sabbapāsaṇḍiyabhattāni bhuñjantoti idaṃ vutta’’nti, tasmā rājabhayādīhi gahitaliṅgatāyevettha suddhacittatāti gahetabbaṃ.
সব্বপাসণ্ডিযভত্তানীতি সব্বসামযিকানং সাধারণং কত্ৰা ৰীথিচতুক্কাদীসু ঠপেত্ৰা দাতব্বভত্তানি। কাযপরিহারিযানীতি কাযেন পরিহরিতব্বানি। অব্ভুগ্গচ্ছন্তীতি অভিমুখং গচ্ছন্তি। কম্মন্তানুট্ঠানেনাতি কসিগোরক্খাদিকম্মকরণেন। তদেৰ পত্তচীৰরং আদায ৰিহারং গচ্ছতীতি চীৰরানি নিৰাসনপারুপনৰসেন আদায পত্তঞ্চ অংসকূটে লগ্গেত্ৰা ৰিহারং গচ্ছতি। নাপি সযং জানাতীতি ‘‘যো এৰং পব্বজতি, সো থেয্যসংৰাসকো নাম হোতী’’তি ৰা ‘‘এৰং কাতুং ন লভতী’’তি ৰা ‘‘এৰং পব্বজিতো সমণো ন হোতী’’তি ৰা ন জানাতি। যো এৰং পব্বজতি, সো থেয্যসংৰাসকো নাম হোতীতি ইদং পন নিদস্সনমত্তং। অনুপসম্পন্নকালেযেৰাতি ইমিনা উপসম্পন্নকালে সুত্ৰা সচেপি নারোচেতি, থেয্যসংৰাসকো ন হোতীতি দীপেতি।
Sabbapāsaṇḍiyabhattānīti sabbasāmayikānaṃ sādhāraṇaṃ katvā vīthicatukkādīsu ṭhapetvā dātabbabhattāni. Kāyaparihāriyānīti kāyena pariharitabbāni. Abbhuggacchantīti abhimukhaṃ gacchanti. Kammantānuṭṭhānenāti kasigorakkhādikammakaraṇena. Tadeva pattacīvaraṃ ādāya vihāraṃ gacchatīti cīvarāni nivāsanapārupanavasena ādāya pattañca aṃsakūṭe laggetvā vihāraṃ gacchati. Nāpi sayaṃ jānātīti ‘‘yo evaṃ pabbajati, so theyyasaṃvāsako nāma hotī’’ti vā ‘‘evaṃ kātuṃ na labhatī’’ti vā ‘‘evaṃ pabbajito samaṇo na hotī’’ti vā na jānāti. Yo evaṃ pabbajati, so theyyasaṃvāsako nāma hotīti idaṃ pana nidassanamattaṃ. Anupasampannakāleyevāti iminā upasampannakāle sutvā sacepi nāroceti, theyyasaṃvāsako na hotīti dīpeti.
সিক্খং অপ্পচ্চক্খায…পে॰… থেয্যসংৰাসকো ন হোতীতি ইদং ভিক্খূহি দিন্নলিঙ্গস্স অপরিচ্চত্তত্তা ন লিঙ্গথেনকো হোতি, লিঙ্গানুরূপস্স সংৰাসস্স সাদিতত্তা নাপি সংৰাসথেনকো হোতীতি ৰুত্তং। একো ভিক্খু কাসাযে সউস্সাহোৰ ওদাতং নিৰাসেত্ৰাতি এত্থাপি ইদমেৰ কারণং দট্ঠব্বং। পরতো সামণেরো সলিঙ্গে ঠিতোতিআদিনা সামণেরস্স ৰুত্তৰিধানেসুপি অথেয্যসংৰাসকপক্খে অযমেৰ নযো। ভিক্খুনিযাপি এসেৰ নযোতি ৰুত্তমেৰত্থং ‘‘সাপি হি গিহিভাৰং পত্থযমানা’’তিআদিনা ৰিভাৰেতি। যো কোচি ৰুড্ঢপব্বজিতোতি সামণেরং সন্ধায ৰুত্তং। মহাপেল়াদীসূতি এতেন গিহিসন্তকং দস্সিতং। সযং সামণেরোৰ…পে॰… থেয্যসংৰাসকো ন হোতীতি এত্থ কিঞ্চাপি থেয্যসংৰাসকো ন হোতি, পারাজিকং পন আপজ্জতিযেৰ। সেসমেত্থ উত্তানমেৰ।
Sikkhaṃ appaccakkhāya…pe… theyyasaṃvāsako na hotīti idaṃ bhikkhūhi dinnaliṅgassa apariccattattā na liṅgathenako hoti, liṅgānurūpassa saṃvāsassa sāditattā nāpi saṃvāsathenako hotīti vuttaṃ. Eko bhikkhu kāsāye saussāhova odātaṃ nivāsetvāti etthāpi idameva kāraṇaṃ daṭṭhabbaṃ. Parato sāmaṇero saliṅge ṭhitotiādinā sāmaṇerassa vuttavidhānesupi atheyyasaṃvāsakapakkhe ayameva nayo. Bhikkhuniyāpi eseva nayoti vuttamevatthaṃ ‘‘sāpi hi gihibhāvaṃ patthayamānā’’tiādinā vibhāveti. Yo koci vuḍḍhapabbajitoti sāmaṇeraṃ sandhāya vuttaṃ. Mahāpeḷādīsūti etena gihisantakaṃ dassitaṃ. Sayaṃ sāmaṇerova…pe… theyyasaṃvāsako na hotīti ettha kiñcāpi theyyasaṃvāsako na hoti, pārājikaṃ pana āpajjatiyeva. Sesamettha uttānameva.
থেয্যসংৰাসকৰত্থুকথাৰণ্ণনা নিট্ঠিতা।
Theyyasaṃvāsakavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৪৮. থেয্যসংৰাসকৰত্থু • 48. Theyyasaṃvāsakavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / থেয্যসংৰাসকৰত্থুকথা • Theyyasaṃvāsakavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / থেয্যসংৰাসকৰত্থুকথাৰণ্ণনা • Theyyasaṃvāsakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / থেয্যসংৰাসকৰত্থুকথাৰণ্ণনা • Theyyasaṃvāsakavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪৮. তিত্থিযপক্কন্তককথা • 48. Titthiyapakkantakakathā
