| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. டி²தஞ்ஜலியத்தே²ரஅபதா³னவண்ணனா
9. Ṭhitañjaliyattheraapadānavaṇṇanā
மிக³லுத்³தோ³ புரே ஆஸிந்திஆதி³கங் ஆயஸ்மதோ டி²தஞ்ஜலியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்து²ப்பன்னப⁴வே விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே புராகதேன ஏகேன கம்மச்சி²த்³தே³ன நேஸாத³யோனியங் நிப்³ப³த்தித்வா விஞ்ஞுதங் பத்தோ மிக³ஸூகராத³யோ மாரெத்வா நேஸாத³கம்மேன அரஞ்ஞே வாஸங் கப்பேஸி. தஸ்மிங் ஸமயே திஸ்ஸோ ப⁴க³வா தஸ்ஸானுகம்பாய ஹிமவந்தங் அக³மாஸி. ஸோ தங் த்³வத்திங்ஸவரலக்க²ணேஹி அஸீதானுப்³யஞ்ஜனப்³யாமப்பபா⁴ஹி ச ஜலமானங் ப⁴க³வந்தங் தி³ஸ்வா ஸோமனஸ்ஸஜாதோ பணாமங் கத்வா க³ந்த்வா பண்ணஸந்த²ரே நிஸீதி³. தஸ்மிங் க²ணே தே³வோ க³ஜ்ஜந்தோ அஸனி பதி, ததோ மரணஸமயே பு³த்³த⁴மனுஸ்ஸரித்வா புனஞ்ஜலிமகாஸி. ஸோ தேன புஞ்ஞேன ஸுகெ²த்தே கதகுஸலத்தா அகுஸலவிபாகங் படிபா³ஹித்வா ஸக்³கே³ நிப்³ப³த்தோ காமாவசரஸம்பத்தியோ அனுப⁴வித்வா மனுஸ்ஸேஸு மனுஸ்ஸஸம்பத்தியோ ச அனுப⁴வித்வா அபரபா⁴கே³ இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய புராகதவாஸனாய ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Migaluddo pure āsintiādikaṃ āyasmato ṭhitañjaliyattherassa apadānaṃ. Ayampi purimabuddhesu katādhikāro tattha tatthuppannabhave vivaṭṭūpanissayāni puññāni upacinanto tissassa bhagavato kāle purākatena ekena kammacchiddena nesādayoniyaṃ nibbattitvā viññutaṃ patto migasūkarādayo māretvā nesādakammena araññe vāsaṃ kappesi. Tasmiṃ samaye tisso bhagavā tassānukampāya himavantaṃ agamāsi. So taṃ dvattiṃsavaralakkhaṇehi asītānubyañjanabyāmappabhāhi ca jalamānaṃ bhagavantaṃ disvā somanassajāto paṇāmaṃ katvā gantvā paṇṇasanthare nisīdi. Tasmiṃ khaṇe devo gajjanto asani pati, tato maraṇasamaye buddhamanussaritvā punañjalimakāsi. So tena puññena sukhette katakusalattā akusalavipākaṃ paṭibāhitvā sagge nibbatto kāmāvacarasampattiyo anubhavitvā manussesu manussasampattiyo ca anubhavitvā aparabhāge imasmiṃ buddhuppāde ekasmiṃ kulagehe nibbatto vuddhimanvāya purākatavāsanāya satthari pasīditvā pabbajito nacirasseva arahā ahosi.
42. ஸோ ததோ பரங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ மிக³லுத்³தோ³ புரே ஆஸிந்திஆதி³மாஹ. தத்த² மிக³லுத்³தோ³தி மிகா³னங் மாரணங் உபக³ச்ச²தீதி மிக³லுத்³தோ³. மிக³ந்தி ஸீக⁴ங் வாதவேகே³ன க³ச்ச²ந்தி தா⁴வந்தீதி மிகா³, தேஸங் மிகா³னங் மாரணே லுத்³தோ³ தா³ருணோ லோபீ⁴தி மிக³லுத்³தோ³. ஸோ அஹங் புரே ப⁴க³வதோ த³ஸ்ஸனஸமயே மிக³லுத்³தோ³ ஆஸிங் அஹோஸிந்தி அத்தோ² . அரஞ்ஞே கானநேதி அரதி க³ச்ச²தி மிக³ஸமூஹோ எத்தா²தி அரஞ்ஞங், அத² வா ஆ ஸமந்ததோ ரஜ்ஜந்தி தத்த² விவேகாபி⁴ரதா பு³த்³த⁴பச்சேகபு³த்³தா⁴த³யோ மஹாஸாரப்பத்தா ஸப்புரிஸாதி அரஞ்ஞங். கா குச்சி²தாகாரேன வா ப⁴யானகாகாரேன வா நத³ந்தி ஸத்³த³ங் கரொந்தி, ஆனந்தி விந்த³ந்தீதி வா கானநங், தஸ்மிங் அரஞ்ஞே கானநே மிக³லுத்³தோ³ புரே ஆஸிந்தி ஸம்ப³ந்தோ⁴. தத்த² அத்³த³ஸங் ஸம்பு³த்³த⁴ந்தி தத்த² தஸ்மிங் அரஞ்ஞே உபக³தங் ஸம்பு³த்³த⁴ங் அத்³த³ஸங் அத்³த³க்கி²ந்தி அத்தோ². த³ஸ்ஸனங் புரே அஹோஸி அவிதூ³ரே, தஸ்மா மனொத்³வாரானுஸாரேன சக்கு²விஞ்ஞாணங் புரேசாரிகங் காயவிஞ்ஞாணஸமங்கி³ங் பாபேதி அப்பேதீதி அத்தோ².
42. So tato paraṃ attano pubbakammaṃ saritvā somanassajāto pubbacaritāpadānaṃ pakāsento migaluddo pure āsintiādimāha. Tattha migaluddoti migānaṃ māraṇaṃ upagacchatīti migaluddo. Miganti sīghaṃ vātavegena gacchanti dhāvantīti migā, tesaṃ migānaṃ māraṇe luddo dāruṇo lobhīti migaluddo. So ahaṃ pure bhagavato dassanasamaye migaluddo āsiṃ ahosinti attho . Araññe kānaneti arati gacchati migasamūho etthāti araññaṃ, atha vā ā samantato rajjanti tattha vivekābhiratā buddhapaccekabuddhādayo mahāsārappattā sappurisāti araññaṃ. Kā kucchitākārena vā bhayānakākārena vā nadanti saddaṃ karonti, ānanti vindantīti vā kānanaṃ, tasmiṃ araññe kānane migaluddo pure āsinti sambandho. Tattha addasaṃ sambuddhanti tattha tasmiṃ araññe upagataṃ sambuddhaṃ addasaṃ addakkhinti attho. Dassanaṃ pure ahosi avidūre, tasmā manodvārānusārena cakkhuviññāṇaṃ purecārikaṃ kāyaviññāṇasamaṅgiṃ pāpeti appetīti attho.
44. ததோ மே அஸனீபாதோதி ஆ ஸமந்ததோ ஸனந்தோ க³ஜ்ஜந்தோ பததீதி அஸனி, அஸனியா பாதோ பதனங் அஸனீபாதோ, தே³வத³ண்டோ³தி அத்தோ². ஸேஸங் ஸப்³ப³த்த² உத்தானத்த²மேவாதி.
44.Tato me asanīpātoti ā samantato sananto gajjanto patatīti asani, asaniyā pāto patanaṃ asanīpāto, devadaṇḍoti attho. Sesaṃ sabbattha uttānatthamevāti.
டி²தஞ்ஜலியத்தே²ரஅபதா³னவண்ணனா ஸமத்தா.
Ṭhitañjaliyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. டி²தஞ்ஜலியத்தே²ரஅபதா³னங் • 9. Ṭhitañjaliyattheraapadānaṃ
