| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২৬. থোমকৰগ্গো
26. Thomakavaggo
১-১০. থোমকত্থেরঅপদানাদিৰণ্ণনা
1-10. Thomakattheraapadānādivaṇṇanā
ছব্বীসতিমে ৰগ্গে পঠমাপদানং উত্তানমেৰ।
Chabbīsatime vagge paṭhamāpadānaṃ uttānameva.
৫-৬. দুতিযাপদানে ৰিজহিত্ৰা দেৰৰণ্ণন্তি দেৰতা সরীরং ৰিজহিত্ৰা ছড্ডেত্ৰা, মনুস্সসরীরং নিম্মিনিত্ৰাতি অত্থো। অধিকারং কত্তুকামোতি অধিককিরিযং পুঞ্ঞসম্ভারং কত্তুকামো দেৰরো নাম অহং দেৰরাজা ভরিযায সহ বুদ্ধসেট্ঠস্স সাসনে সাদরতায ইধ ইমস্মিং মনুস্সলোকে আগমিং আগতোতি অত্থো। তস্স ভিক্খা মযা দিন্নাতি পদুমুত্তরস্স ভগৰতো যো নামেন দেৰলো নাম সাৰকো অহোসি, তস্স সাৰকস্স মযা ৰিপ্পসন্নেন চেতসা ভিক্খা দিন্না পিণ্ডপাতো দিন্নোতি অত্থো।
5-6. Dutiyāpadāne vijahitvā devavaṇṇanti devatā sarīraṃ vijahitvā chaḍḍetvā, manussasarīraṃ nimminitvāti attho. Adhikāraṃ kattukāmoti adhikakiriyaṃ puññasambhāraṃ kattukāmo devaro nāma ahaṃ devarājā bhariyāya saha buddhaseṭṭhassa sāsane sādaratāya idha imasmiṃ manussaloke āgamiṃ āgatoti attho. Tassa bhikkhā mayā dinnāti padumuttarassa bhagavato yo nāmena devalo nāma sāvako ahosi, tassa sāvakassa mayā vippasannena cetasā bhikkhā dinnā piṇḍapāto dinnoti attho.
৯-১০. ততিযাপদানে আনন্দো নাম সম্বুদ্ধোতি আনন্দং তুট্ঠিং জননতো আনন্দো নাম পচ্চেকবুদ্ধোতি অত্থো। অমনুস্সম্হি কাননেতি অমনুস্সপরিগ্গহে কাননে মহাঅরঞ্ঞে পরিনিব্বাযি অনুপাদিসেসনিব্বানধাতুযা অন্তরধাযি, অদস্সনং অগমাসীতি অত্থো। সরীরং তত্থ ঝাপেসিন্তি অহং দেৰলোকা ইধাগন্ত্ৰা তস্স ভগৰতো সরীরং তত্থ অরঞ্ঞে ঝাপেসিং দহনং অকাসিন্তি অত্থো।
9-10. Tatiyāpadāne ānando nāma sambuddhoti ānandaṃ tuṭṭhiṃ jananato ānando nāma paccekabuddhoti attho. Amanussamhi kānaneti amanussapariggahe kānane mahāaraññe parinibbāyi anupādisesanibbānadhātuyā antaradhāyi, adassanaṃ agamāsīti attho. Sarīraṃ tattha jhāpesinti ahaṃ devalokā idhāgantvā tassa bhagavato sarīraṃ tattha araññe jhāpesiṃ dahanaṃ akāsinti attho.
চতুত্থপঞ্চমাপদানানি উত্তানানেৰ।
Catutthapañcamāpadānāni uttānāneva.
২০. ছট্ঠাপদানে অহোসিং চন্দনো নামাতি নামেন পণ্ণত্তিৰসেন চন্দনো নাম। সম্বুদ্ধস্সত্রজোতি পচ্চেকসম্বুদ্ধভূততো পুব্বে তস্স অত্রজো পুত্তো অহং। একোপাহনো মযা দিন্নোতি একং উপাহনযুগং মযা দিন্নং। বোধিং সম্পজ্জ মে তুৰন্তি তেন উপাহনযুগেন মে ময্হং সাৰকবোধিং তুৰং সম্পজ্জ নিপ্ফাদেহীতি অত্থো।
20. Chaṭṭhāpadāne ahosiṃ candano nāmāti nāmena paṇṇattivasena candano nāma. Sambuddhassatrajoti paccekasambuddhabhūtato pubbe tassa atrajo putto ahaṃ. Ekopāhano mayā dinnoti ekaṃ upāhanayugaṃ mayā dinnaṃ. Bodhiṃ sampajja me tuvanti tena upāhanayugena me mayhaṃ sāvakabodhiṃ tuvaṃ sampajja nipphādehīti attho.
২৩-২৪. সত্তমাপদানে মঞ্জরিকং করিত্ৰানাতি মঞ্জেট্ঠিপুপ্ফং হরিতচঙ্কোটকং গহেত্ৰা রথিযং ৰীথিযা পটিপজ্জিং অহং তথা পটিপন্নোৰ ভিক্খুসঙ্ঘপুরক্খতং ভিক্খুসঙ্ঘেন পরিৰুতং সমণানগ্গং সমণানং ভিক্খূনং অগ্গং সেট্ঠং সম্মাসম্বুদ্ধং অদ্দসন্তি সম্বন্ধো। বুদ্ধস্স অভিরোপযিন্তি দিস্ৰা চ পন তং পুপ্ফং উভোহি হত্থেহি পগ্গয্হ উক্খিপিত্ৰা বুদ্ধস্স ফুস্সস্স ভগৰতো অভিরোপযিং পূজেসিন্তি অত্থো।
23-24. Sattamāpadāne mañjarikaṃ karitvānāti mañjeṭṭhipupphaṃ haritacaṅkoṭakaṃ gahetvā rathiyaṃ vīthiyā paṭipajjiṃ ahaṃ tathā paṭipannova bhikkhusaṅghapurakkhataṃ bhikkhusaṅghena parivutaṃ samaṇānaggaṃ samaṇānaṃ bhikkhūnaṃ aggaṃ seṭṭhaṃ sammāsambuddhaṃ addasanti sambandho. Buddhassa abhiropayinti disvā ca pana taṃ pupphaṃ ubhohi hatthehi paggayha ukkhipitvā buddhassa phussassa bhagavato abhiropayiṃ pūjesinti attho.
২৮-২৯. অট্ঠমাপদানে অলোণপণ্ণভক্খোম্হীতি খীরপণ্ণাদীনি উঞ্ছাচরিযায আহরিত্ৰা লোণৰিরহিতানি পণ্ণানি পচিত্ৰা ভক্খামি, অলোণপণ্ণভক্খো অম্হি ভৰামীতি অত্থো। নিযমেসু চ সংৰুতোতি নিযমসঞ্ঞিতেসু পাণাতিপাতাৰেরমণিআদীসু নিচ্চপঞ্চসীলেসু সংৰুতো পিহিতোতি অত্থো। পাতরাসে অনুপ্পত্তেতি পুরেভত্তকালে অনুপ্পত্তে। সিদ্ধত্থো উপগচ্ছি মন্তি মম সমীপং সিদ্ধত্থো ভগৰা উপগঞ্ছি সম্পাপুণি। তাহং বুদ্ধস্স পাদাসিন্তি অহং তং অলোণপণ্ণং তস্স বুদ্ধস্স অদাসিন্তি অত্থো।
28-29. Aṭṭhamāpadāne aloṇapaṇṇabhakkhomhīti khīrapaṇṇādīni uñchācariyāya āharitvā loṇavirahitāni paṇṇāni pacitvā bhakkhāmi, aloṇapaṇṇabhakkho amhi bhavāmīti attho. Niyamesu ca saṃvutoti niyamasaññitesu pāṇātipātāveramaṇiādīsu niccapañcasīlesu saṃvuto pihitoti attho. Pātarāse anuppatteti purebhattakāle anuppatte. Siddhattho upagacchi manti mama samīpaṃ siddhattho bhagavā upagañchi sampāpuṇi. Tāhaṃ buddhassa pādāsinti ahaṃ taṃ aloṇapaṇṇaṃ tassa buddhassa adāsinti attho.
নৰমাপদানং উত্তানমেৰ।
Navamāpadānaṃ uttānameva.
৩৭-৩৮. দসমাপদানে সিখিনং সিখিনং যথাতি সরীরতো নিক্খন্তছব্বণ্ণরংসীহি ওভাসযন্তং জলন্তং সিখীনং সিখীভগৰন্তং সিখীনং যথা জলমানঅগ্গিক্খন্ধং ৰিয। অগ্গজং পুপ্ফমাদাযাতি অগ্গজনামকং পুপ্ফং গহেত্ৰা বুদ্ধস্স সিখিস্স ভগৰতো অভিরোপযিং পূজেসিন্তি অত্থো।
37-38. Dasamāpadāne sikhinaṃ sikhinaṃ yathāti sarīrato nikkhantachabbaṇṇaraṃsīhi obhāsayantaṃ jalantaṃ sikhīnaṃ sikhībhagavantaṃ sikhīnaṃ yathā jalamānaaggikkhandhaṃ viya. Aggajaṃ pupphamādāyāti aggajanāmakaṃ pupphaṃ gahetvā buddhassa sikhissa bhagavato abhiropayiṃ pūjesinti attho.
ছব্বীসতিমৰগ্গৰণ্ণনা সমত্তা।
Chabbīsatimavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi
২. একাসনদাযকত্থেরঅপদানং • 2. Ekāsanadāyakattheraapadānaṃ
৩. চিতকপূজকত্থেরঅপদানং • 3. Citakapūjakattheraapadānaṃ
৬. উপাহনদাযকত্থেরঅপদানং • 6. Upāhanadāyakattheraapadānaṃ
৭. মঞ্জরিপূজকত্থেরঅপদানং • 7. Mañjaripūjakattheraapadānaṃ
৮. পণ্ণদাযকত্থেরঅপদানং • 8. Paṇṇadāyakattheraapadānaṃ
১০. অগ্গপুপ্ফিযত্থেরঅপদানং • 10. Aggapupphiyattheraapadānaṃ
